Mêyi a Dipinguluja

Bidimu bisambuka pa 40 panyima pa Kamponyi ka Siona, Joseph Young, uvua muikala tshidimba tshia kamponyi, wakalubula ne Joseph Smith wamba tshidi tshilonda etshi:

“Bana betu baluma, bamua ba kunuenu mbamfikila tshiji, bualu kanuena baluangana mu Missouri to; kadi lekelayi nnuambila ne, Nzambi kavua musua bua nuluangana to. Kavua mua kulongolola bukalenga buenda ne baluma dikumi ne babidi bua kukangula tshîbi tshia lumu luimpa kudi bisamba bia pa buloba to, ne baluma makumi muanda muteketa muinshi mua bulombodi buabu bua kulonda makasa abu, amu yeya mubangata munkatshi mua baluma badi bafila mioyo yabu, ne badi benza mulambu munena bu wa Abalahama.

“Mpindiewu, Mukalenga udi ne Dikumi ne Babidi benda ne Makumi Muanda Muteketa enda, ne nekuikala mpuilu mikuabu ya Makumi Muanda Muteketa babikidibua, bikala mua kuenza mulambu, ne aba badi kabayi benza milambu yabu ne mapa abu mpindiewu, nebayenza pashisha.”

“Patuakafika mu Missouri, Mukalenga wakakula kudi musadidi wenda Joseph ne wakamba ne, ‘Ndi muitaba mulambu wenu,’ ne tudi ne bunema bua kupingana kabidi. Pamvua mpingana balunda ba bungi bavua bankonkesha tshinyi tshivuaku mu kubikila bantu ku midimu yabu bua kuya ku Missouri ne pashisha kupingana, kakuyi bualu nansha bumua buenza. ‘Ntshipetesha nganyi?’ muvuabu bakonka. ‘Pikala Mukalenga mufila mukenji bua bienzeka, kipatshila kayi kavuayi mumona mu dienza nunku?’ … Ngakambila bana betu ne mvua mufutshibua bimpa—mufutshibua ne masanka a bujitu—eyowa ne tshipimu tshianyi tshivua tshiûla ntenta ne dimanya diumvua mupeta ku dienza luendu ne muambi.”

“Mvua mu Kamponyi ka Siona ne Muambi wa Nzambi. Ngakamona ngenzelu wa Nzambi nenda. Ngakamona bukola bua Nzambi nenda. Ngakamona ne uvua Muambi. Tshivua tshilejibua kudiye ku bukola bua Nzambi mu bukenji ebu tshivua ne mushinga wa bungi kundi ne kudi bonsu bavua bapeta maludiki enda.”

“Pavua bidimba bia Kamponyi ka Siona bibikidibua, ba bungi ba kutudi kabavua banji kumonangana; tuvua benyi ku bamua ne bakuabu ne ba bungi kabavua banji kumona muambi to. Tuvua batangalaka, bu matala mu kasengulu, mu ditunga dijima. Tuvua bansongaluma, ne tuvua babikidibua matuku a bangabanga bua kuya ne bua kusungila Siona, ne tshituvua mua kuenza tuvua tutshienza ku ditabuija. Tuakadisanga pamua tufuma mu misoku yonsu ku Kirtland ne tuakaya bua kusungila Siona, mudikumbaja dia mukenji uvua Nzambi mutupesha. Nzambi wakitaba midimu yetu bu muvuaye muenza ne midimu ya Abalahama. Tuakakumbaja bualu bunena, nansha muvua bantombueji ne badi kabayi bitaba misangu yonsu bela lukonku ‘tshinyi tshinudi benza?’ Tuakapeta dimanya dituvua katuyi banji kupeta mu mushindu mukuabu. Tuakapeta bunema bua dimona mpala wa muambi, ne tuakapeta bunema bua kuenza luendu mu ntanta wa kilometa tshinunu nenda, ne kumona midimu ya nyuma wa Nzambi nenda, ne mabuluila a Yezu Kilisto mu yeya ne dikumbaja dia mabuluila â. Ne uvua mukunguija pabuipi ne bakulu nkama ibidi bafuma mu ditunga dijima mu tshikondu atshi ne kututuma bua kuya pa buloba bujima bua kuyisha lumu luimpa lua Yezu Kilisto. Bu mema ntshiyi muya ku Kamponyi ka Siona ntshivua mua kuikala nenu lelu [mu Salt Lake City, nsadila mu Mpuilu wa Ba Dikumi ne Babidi]. … Mu kuya koku tuvua bikala bapushibua mu budimi bua mvinyo bua kuyisha lumu luimpa, ne Mukalenga wakitaba midimu yetu. Ne mu midimu yetu yonsu ne makenga, ne mioyo yetu mu njiwu, tuvua ne tshia kuenza mudimu ne kusomba ku ditabuija.”

“Dimanya dituakapeta mu dienza luendu ku Kamponyi ka Siona divua dia mushinga kupita ngolo.”