Lus Qhuab Qhia thiab Kev Khi Lus 89–92

Thaum cov txwj laug nyob hauv cov Yaj Saub lub Koom Haum Kawm mloog Joseph Smith nyeem Txoj Lus Txawj Ntse, lawv muab “lawv cov raj thiab cov luam yeeb tso tseg rau hauv hluav taws” (Saints, 1:168). Lawv xav qhia tias lawv txaus siab mloog tus Tswv. Tej zaum koj twb muab tej yam uas Txoj Lus Txawj Ntse ceeb toom txog tso tseg lawm, tiam sis koj kawm dab tsi ntxiv los ntawm kev tshwm sim no? Xav txog tej lub tswv yim no:

• Cia li xav txog kev tshwm sim no yog “ib lub ntsiab cai uas muaj kev cog lus” (nqe 3)—tej yam tseeb uas pab yus txiav txim siab. Koj nrhiav tau tej lub ntsiab cai twg uas pab koj txiav txim siab? Tus Tswv cog lus dab tsi rau peb? (saib nqe 18–21). Nws tau ua li cas kom muaj raws li cov lus cog tseg ntawd hauv koj lub neej?

• Koj tau pom tej yam twg uas yog “tej kev phem thiab tej tom txwv uas … nyob hauv tej neeg tuav hauv lub siab” uas zoo li lo Lus Txawj Ntse? (nqe 4). Ntxiv rau kev tshwm sim no, tus Tswv tau muab dab tsi ntxiv kom pab koj kom tsis txhob muaj los sis kov yeej tej yam phem no?

• Kev tshwm sim no qhia dab tsi rau koj txog tus Tswv? Txoj Lus Txawj Ntse zoo li Lus Qhuab Qhia thiab Kev Khi Lus 29:34–35 li cas?

• Koj txais kev tshoov siab twg kom saib xyuas koj lub cev?

Tej zaum koj tau muaj tej lub sij hawm uas koj qhia rau lwm tus vim li cas koj ua raws li Txoj Lus Txawj Ntse—thiab tej zaum yav tom ntej koj yuav muaj sij hawm ntxiv. Xav seb koj yuav ua li cas kom siv tej lub cib fim no ua tim khawv txog tus Cawm Seej, peb lub cev yeej dawb ceev, thiab lwm yam tseeb ntawm sab ntsuj plig li cas. Yog xav tau tswv yim, saib “Koj lub Cev Yeej Dawb Ceev{,” Ntxiv Dag Zog rau cov Tub Hluas Ntxhais Hluas: Phau Ntawv Coj Kev Pab Neeg Xaiv, 22–29.

Kuj saib 1 Kauleethaus 6:19–20; Thomas S. Monson, “Cov Ntsiab Cai thiab cov Lus Cog Tseg,” Liyahaunas, Kaum Ib Hlis Ntuj 2016, 78–79; Tej Ntsiab Lus thiab tej Lus Nug, “Word of Wisdom,” Txoj Moo Zoo cov Ntawv; “The Word of Wisdom,” nyob hauv Revelations in Context, 183–91; “Addiction,” “Physical Health,” Life Help, Txoj Moo Zoo cov Ntawv.

4:39

Nyob hauv tshooj 90, tus Tswv qhia txog “txoj hauj lwm qhuab qhia thiab … pawg thawj tswj hwm ” (nqe 12) ntawm Joseph Smith, Sidney Rigdon, thiab Frederick G. Williams—cov nyob hauv pawg uas peb hu ua Thawj Pawg Thawj Tswj Hwm. Koj kawm dab tsi txog Thawj Pawg Thawj Tswj Hwm los ntawm nqe 1–17? Cia li nyeem tej zaj lus los ntawm cov nyob hauv Thawj Pawg Thawj Tswj Hwm uas hais tsis ntev tas los. Lawv ua dab tsi kom “muaj chaw txawb chaw rau rau tag nrho tej xwm ntawm lub koom txoos thiab lub nceeg vaj”? (nqe 16). Koj yuav tau li cas kom qhia tias tej ntawd tsis yog “tej yam uas tsis muaj nqis” rau koj? (nqe 5).

Xav seb puas hu los sis nyeem cov lus ntawm “Los, Mloog Ib tug Yaj Saub lub Suab” (Cov Nkauj Qhuas Vajtswv, zaj 9) los sis lwm zaj nkauj uas hais txog cov yaj saub uas hais zoo li kev qhia nyob hauv tej nqe no. Thawj Pawg Thawj Tswj Hwm tau pab koj li cas kom paub Leej Txiv Saum Ntuj Ceeb Tsheej thiab Yexus Khetos?

Cia li xav txog tej lub sij hawm uas ua tim khawv rau koj txog tus Tswv tej kev cog lus nyob hauv Lus Qhuab Qhia thiab Kev Khi Lus 90:24. Xav seb koj puas sau ntawv txog koj lub neej thiab qhia tej ntawd rau koj tsev neeg los sis ib tug uas koj hlub—tej zaum ib tug uas xav tau kev nplij siab los sis kev txhawb nqa. Yog tias muaj cov koob hmoov uas koj tseem tos txais, cia li xav seb koj yuav ua li cas kom rau siab ntseeg thaum koj tseem tos seb yuav ua li cas kom “txhua yam yuav ua hauj lwm ua ke kom zoo rau [koj].”

Vienna Jaques yug los thaum lub Rau Hli Ntuj 10, 1787, nyob hauv Massachusetts. Nws yog ib tug poj niam uas ntseeg Vajtswv thiab muaj nyiaj txiag ntau, es Vienna twb ntsib cov tub txib thaum xyoo 1831. Tom qab tus Ntsuj Plig tau qhia nws tias nkawd zaj lus muaj tseeb, nws tau mus rau Kirtland, Ohio kom ntsib tus Yaj Saub, es nyob ntawd nws tau ua kev cai raus dej.

Vienna twb mloog tus Tswv tej lus ntuas rau nws nyob hauv Lus Qhuab Qhia thiab Kev Khi Lus 90:28–31. Nws txoj kev muab nws tej khoom fij tseg rau tus Tswv, tsis hais cov nyiaj uas nws pub dawb thaum nws nyob hauv Kirtland, twb pab lub Koom Txoos thaum txog ib lub sij hawm tseem ceeb, thaum cov thawj coj xav yuav thaj av rau lub Tuam Tsev Kirtland. Vienna yeej “rau siab ntseeg, thiab tsis … tub nkeeg” nyob tas nws lub neej thiab thaum kawg nws “muaj kev kaj siab lug” (nqe 31) nyob hauv lub Hav Salt Lake, es nws tas sim neej no thaum nws muaj 96 xyoo.

Peb sawv daws txais tej zaj lus uas muaj “ntau yam … [uas] tseeb” thiab “ntau yam … uas tsis tseeb” (Lus Qhuab Qhia thiab Kev Khi Lus 91:1–2). Koj nrhiav tau tej lub tswv yim twg hauv tshooj 91 uas pab tau koj nrhiav qhov tseeb ntawm tej zaj lus uas koj txais? Tus Ntsuj Plig tau pab koj li cas kom koj paub qhov tseeb thiab qhov cuav?

• Kom pib qhia txog tshooj 89, tej zaum koj thiab koj cov me nyuam yuav xav saib ib daim duab txog ib lub tuam tsev los sis hu ib zaj nkauj txog kev nyob zoo ntawm sab cev nqaij daim tawv, xws li “The Lord Gave Me a Temple” (Children’s Songbook, 153), kom qhia peb tias peb lub cev zoo li ib lub tuam tsev rau peb tus ntsuj plig. Pab koj cov me nyuam ua yeeb yam txog tej yam uas lawv ua tau kom saib xyuas lawv lub cev.

• Kom kawm txog tus Tswv cov lus txib nyob hauv Lus Qhuab Qhia thiab Kev Khi Lus 89:10–17, koj thiab koj cov me nyuam kos tau duab los sis saib cov duab txog tej yam zoo uas peb noj tau los sis ua kom pab peb lub cev muaj zog (saib daim duab thiab phab ntawv ntxim ua uas nyob tom kawg daim ntawv qhia no). Tus Tswv tau ceeb toom kom peb tsis txhob siv dab tsi? Vim li cas Nws xav kom peb saib xyuas peb lub cev?

• Txwj Laug Gary E. Stevenson tau hais kom cov neeg hluas npaj tam sim no tias lawv yuav ua li cas thaum nraug kev ntxias nrog cawv los sis tshuaj phem. Nws qhia tias: “Nej yuav kawm hais tias kev ntxias kov tsis tau yeej nej. Nej twb txiav txim siab tias nej yuav ua li cas. Nej tsis tas txiav txim siab txhua lub sij hawm” (“Nej Phau Ntawv Qhia Txheej Txheem Siv lub Pov Thawj Hwj,” Liyahaunas, Tsib Hlis Ntuj 2019, 48). Tom qab nej nyeem phau Lus Qhuab Qhia thiab Kev Khi Lus 89:4 thiab Txwj Laug Stevenson zaj lus ua ke, sib tham nrog seb lawv xav txiav txim siab tam sim no—mus tag nrho lawv lub neej li cas—ua raws li txoj Lus Txawj Ntse. Tej zaum nej yuav xav ua yeeb yam txog seb lawv yuav teb li cas yog tias leej twg, xws li ib tug phooj ywg, muab dab tsi rau lawv uas tsis yog raws li txoj Lus Txawj Ntse. Tus Tswv foom koob hmoov rau peb li cas thaum peb ua raws li txoj Lus Txawj Ntse? (saib nqe 18–21).

• Tej zaum nej yuav xav saib cov duab txog cov yaj saub thaum ub los sis hu ib zaj nkauj li “Follow the Prophet” (Children’s Songbook, 110–11). Vajtswv tau foom koob hmoov rau nws cov me nyuam li cas los ntawm Nws cov yaj saub? Vim li cas peb yuav tsum mloog Vajtswv cov yaj saub? (saib Lus Qhuab Qhia thiab Kev Khi Lus 90:5). Ces tej zaum koj thiab koj cov me nyuam yuav xav saib ib daim duab txog tus yaj saub uas muaj txoj sia nyob thiab qhia txog tej yam uas tus Tswv tau qhia los sis ceeb toom rau peb los ntawm nws. Peb yuav ua li cas kom ua raws li tus yaj saub?

• Tej zaum koj yuav xav hais ntsiab lus txog zaj lus piav txog tshooj Lus Qhuab Qhia thiab Kev Khi Lus 91 kom pab koj cov me nyuam to taub vim li cas Vajtswv muab kev tshwm sim no rau peb. Lawv kuj xav tau txog tej qhov chaw, xws li nyob hauv media, uas peb nrhiav tau “ntau yam … [uas] tseeb” thiab “ntau yam … uas tsis tseeb” (nqe 1–2). Nqe 4–6 qhia peb dab tsi txog tus Vaj Ntsuj Plig Dawb Huv? Tus Vaj Ntsuj Plig Dawb Huv pab peb li cas thiaj paub tias dab tsi yog qhov yog?