Reirei ao Berita aika Tabu 89–92

Unimwaane ake n Aia Kuura n Reirei Burabeti ngke a moan ongo Iotebwa Timiti ni wareka Tuan te Mauri, ngkekei naba a waekoa ni “karenakoi aia moko te bwaiti ao nikiran aia bakee nako nanon te ai” (Saints, 1:168). A tangiria ni kaota kukureia n ongeaaba nakon te Uea. Tao ko a tia ni “karenakoi” man maium bwaai ake a katabuakaki n Tuan te Mauri, ma tera riki ae ko kona n reiakinna man te kaotioti aio? Tarai iango aikai:

• Iangoa te kaotioti bwa “te tua ae iriana te berita” (kibu 3)—te koaua ae teimatoa are e kairii karaoan babaire. Tera tuua ake ko kunei aika a kona n kairii am rinerine? Tera kakabwaia ake e beritani te Uea? (tarai kiibu 18–21). E kanga ni kakoroi nanon berita akanne i nanon maium?

• Tera katooto aika ko a tia n noora iai “te buakaka ao babaire … i nanoia naake a iangoa karaoan ae buakaka ni karaba” n irekereke ma Tuan te Mauri? (kibu 4). Irarikin te kaotioti aio, tera ae e a tia n anga te Uea ni buokiko n totokoa ke n tokanikai i aon buakaka aikai?

• E kanga te kaotioti aio n reireiniko taekan te Uea? E kanga Tuan te Mauri ni kaeineti nakon Reirei ao Berita aika Tabu 29:34–35?

• Tera te bwai ae ko kaungaaki iai bwa ko na karaoia n tararua raoi riki iai rabwatam?

Tao e na tia n reke am tai ni kabwarabwaraa nakoia aomata tabeman bwa bukin tera ko maiuakina Tuan te Mauri—ao are e na karekei riki tibwanggam ni boong aika a na roko. Iangoia bwa ko na kanga ni karekei tibwanga aikai ni kaota koauan te Tia Kamaiu, tabun rabwatara, ao koaua n tamnei riki tabeua. Ibukin iango, taraa “E tabu rabwatam,” Ibukin Kakorakoraia Kairake: Te Kairi Ibukin Karaoan Rinerine, 22–29.

Taraa naba 1 I-Korinto 6:19–20; Thomas S. Monson, “Principles and Promises,” Riaona, Nobembwa 2016, 78–79; Topics and Questions, “Word of Wisdom,” Gospel Library; “The Word of Wisdom,” in Revelations in Context, 183–91; “Addiction,” “Physical Health,” Life Help, Gospel Library.

4:40

Ni mwakoro 90, E anga taian kaetieti te Uea i aon “te mwakuri ni ibuobuoki ao te beretitentii” (te kibu 12) Iotebwa Timiti, Sidney Rigdon, ao Frederick G. Williams—membwa n te bwai ae ti aranna ngkai bwa te Moan Beretitentii. Tera ae ko reiakinna i aon te Moan Beretitentii man kiibu 1–17? Iangoia n rinanon aia rongorongo ae ai tibwa ngkai kaain te Moan Beretitentii. Tera ae a karaoia ni “bairei raoi ana waaki nako te ekaretia aei ao te abanuea”? (kibu 16). Ko na kanga ni kaotia ae bon tiaki bwaai “aika akea maneia” nakoim? (kibu 5).

Iangoia n anenea ke ni wareka taekan “Come, Listen to a Prophet’s Voice” (Anene n Taromauri, nambwa. 21) ke te anene riki teuana ae taekaia burabeti are e irekereke ma reirei aika inanon kiibu aikai. E kanga aia mwakuri te Moan Beretitentii ni buokiko n ataa Tamara are i Karawa ao Iesu Kristo?

Iangoa te bwai are ko a tia n rinanona are e kamatoa ana berita te Uea n Reirei ao Berita aika Tabu 90:24. Iangoa korean baike ko rinanona ao tibwauaia ma kaain am utu ke temanna ae ko tangiria—tao temanna ae kainnanoa te karaunano ke te kaunganano. Ngkana iai kakabwaia ake ko bon tataningai naba ngkai, iangoia bwa tera ae ko kona ni karaoia n teimatoa ni kakaonimaki ngkai ko tataninga n nooria bwa a kanga “bwaai ni kabane ni kaai ni mwakuri ibukin ae raoiroi ibukim.”

E bungiaki Vienna Jaques n Tuun 10, 1787, i Massachusetts. Te aine ae onimaki ae rang ni kaumwane, E moan kaitibo Vienna ma mitinare n 1831. I mwin karekean te kakoaua ae tabu bwa e koaua aia rongorongo, e mwananga bwa e na kaitibo ma te Burabeti i Kirtland, Ohio, ike e bwabetoaki iai.

E ongeaba Vienna n ana taeka te Uea nakoina n Reirei ao Berita aika Tabu 90:28–31. Ana anganano aika tabu nakon te Uea, n ikotaki ma te mwane are e anga mai mwaina i Kirtland, e kaoti n te tai ni kaangaanga i nanon te Ekaretia, ngke taan kairiiri a kataia ni kabooa te aba are e na kateaki iai te Kirtland Tembora. E bon “kakaonimaki, man aki … taningaroti” Vienna inanon maiuna ao n tokina e a kona n “maeka ma te rau” (te kibu 31) i Salt Lake Valley, ike e a motirawa iai n ana ririki ae 96.

Ti bon bane n rinanon rongorongo aika “a mwaiti bwaai i nanona … aika a koaua … ao “a mwaiti bwaai inanona … aika a aki koaua” (Reirei ao Berita aika Tabu 91:1–2). Tera taeka n reirei ae ko kunea ni mwakoro 91 are e kona ni buokiko n atai koaua i nanon rongorongo ake ko aitara ma ngaia? E kanga te Tamnei n tia ni buokiko n ataa te koaua man te kaairua?

• Ni kabwarabwaraa te mwakoro 89, tao ngkoe ao am ataei kam kona n tarai tamnein te tembora ke anenea te anene i aon marurungin te rabwata, n aron “The Lord Gave Me a Temple” (Aia Boki n Anene Ataei, 153), n reireia ae rabwatara kanga ai aron tembora ibukin tamneira. Buokiia am ataei ni katea kain kawai aika a na kona iai n tararuai rabwataia.

• N reiakina taekan ana tua te Atua n Reirei ao Berita aika Tabu 89:10–17, ngkoe ao am ataei kam kona ni korea ke n tarai tamnein bwaai aika a tamaroa ake ti kona ni kang ke ni karaoi ni kateimatoa rabwatara bwa a na marurung (taraa te tamnei ao iteraniba ni waaki ni kakukurei are ni banen te kabwarabwara aei). Tera bwaai ae e a tia ni kauringiira iai te Uea bwa ti na aki kabonganai? Bukin tera ngkai E tangiriira bwa ti na tararuaa raoi rabwatara?

• E reireiniia te roronrikirake Unimwaane Gary E. Stevenson bwa a na baireia i mwain ae na riki bwa tera ae a na karaoia ngkana a kaririaki n te manging ke te turaki. E reirei, “Kam na kunea bwa te kariiri anne e uarereke korakorana n tautaekaniko. Kam na kaman tia ni baireia bwa kam na kanga ni kaitaraai ao tera ae kam na karaoia. Kam aki riai ni baireia ni katoa tai” (“Ami Boki Ibukin te Nakoanibonga,” Riaona, Meei 2019, 48). I mwiin tiami n uaia ni wareka Reirei ao Berita aika Tabu 89:4 ao ana rongorongo Unimwaane Stevenson, marooro ma am ataei i aon ae a na kanga ni baireia ngkai—inanon nako maiuia—ni maiuakina Tuan te Mauri. Kam kona naba ni karaoa te kaotioti bwa a na kanga ni kaeka ngkana temanna, ke bon raraoia, e anganiia te bwai ae e kaitara ma Tuan te Mauri. E kanga ni kakabwaiaira te Uea ngkai ti kawakina Tuan te Mauri? (tarai kiibu 18–21).

• Ko kona n tarai tamneia burabeti ake rimoa ke anenea te anene n aron “Follow the Prophet” (Aia Boki n Anene Ataei, 110–11). E kanga n tia te Atua ni kakabwaiaia Natina rinanoia Ana burabeti? Bukin tera ti riai n ongo irouia ana burabeti te Atua? (taraa Reirei ao Berita aika Tabu 90:5). Ngkanne ngkoe ao am ataei kam kona n tarai tamneia burabeti aika a maiu ao n tibwai tabeua bwaai ae e a tia te Uea n reireia ke ni kauringiira mai Irouna. Ti na kanga n iriira te burabeti?

• Ko kona n taekinna ni kakimototoa atuun te mwakoro ibukin Reirei ao Berita aika Tabu 91 ni buokiia am ataei bwa e na mataata bwa bukin tera ti anganaki te kaotioti aei. A kona ngkanne ni iangoi taabo, n aron ake ni bwaai n reitaki, ike ti kunei iai “bwaai aika a mwaiti … aika a koaua” ao “bwaai aika a mwaiti … aika aki koaua” (kiibu 1–2). Tera ae e reireiniira kiibu 4– 6 i aon te Tamnei ae Raoiroi? E kanga te Tamnei ae Raoiroi ni buokiira n ataa te bwa ae eti?