Lus Qhuab Qhia thiab Kev Khi Lus 84

Thaum koj xav txog lo lus pov thawj hwj, ces koj xav txog dab tsi? Vajtswv lub hwj chim pov thawj hwj ua rau koj lub neej hloov li cas?

Tom qab koj xav txog tej lus nug no, tej zaum koj yuav xav kawm Lus Qhuab Qhia thiab Kev Khi Lus 84:17–32, thiab xav txog tej yam uas Vajtswv xav kom koj paub txog Nws lub hwj chim pov thawj hwj. Koj yuav ua li cas siv tej nqe no kom piav txog lub pov thawj hwj rau ib tug neeg thiab piav tias vim li cas peb muaj lub pov thawj hwj no?

Ib yam uas koj yuav kawm yog qhov uas dhau los ntawm cov kab ke pov thawj hwj “thiaj pom lub hwj chim ua li Vajtswv tshwm sim” (saib nqe 19–21). Tej zaum koj yuav xav sau ntawv txog cov kab ke pov thawj hwj uas koj tau ua lawm (cov ntawv nyob hauv Phau Qhia Kev Coj lub Koom Txoos, 18.1, 18.2, los pab tau). Cov kab ke no—thiab tej kev khi lus—tau ua li cas kom koj muaj Vajtswv lub hwj chim hauv koj lub neej? Koj lub neej yuav zoo li cas yog tias koj tsis muaj?

Thawj Tswj Hwm Russell M. Nelson tau qhia hais tias, “Txhua tus poj niam thiab txhua tus txiv neej uas ua kev khi lus rau Vajtswv thiab ua raws li lawv tej kev khi lus, thiab ua neeg tsim nyog ua cov kab ke pov thawj hwj, yeej txais tau Vajtswv lub hwj chim” (“Tej Nqi Zog ntawm Sab Ntsuj Plig,” Liahona, Kaum Ib Hlis Ntuj 2019, 77). Xav seb koj puas kawm Thawj Tswj Hwm Nelson zaj lus, nrhiav tej yam uas koj ua tau kom “muaj tus Cawm Seej lub hwj chim hauv [koj] lub neej.”

Kuj saib Lus Qhuab Qhia thiab Kev Khi Lus 25:10, 13, 15; 121:34–37, 41–46; Tej Ntsiab Lus thiab tej Lus Nug, “Pov Thawj Hwj,” “Joseph Smith tej Lus Qhia txog lub Pov Thawj Hwj, cov Tuam Tsev, thiab cov Poj Niam,” Txoj Moo Zoo cov Ntawv; Phau Qhia Kev Coj lub Koom Txoos, 3.6, Txoj Moo Zoo cov Ntawv.

Kev lav lus thiab kev khi lus ntawm lub pov thawj hwj (saib Lus Qhuab Qhia thiab Kev Khi Lus 84:31–44) yog ib yam tshwj xeeb rau Leej Txiv Saum Ntuj Ceeb Tsheej cov tub uas tus Tswv tau tsa los muaj ib lub luag hauj lwm hauj lwm ntawm lub pov thawj hwj, tiam sis ntau yam koob hmoov uas tus Tswv cog lus txog nyob hauv tej nqe no los tag nrho Vajtswv cov me nyuam txais tau. Tej lus cog tseg no yog dab tsi, thiab Vajtswv hais kom peb ua li cas kom txais tau tej no?

$Txwj Laug Paul B. Pieper qhia hais tias: “Kuv xav tias nyob hauv kev lav lus thiab kev khi lus ntawm lub pov thawj hwj [Lus Qhuab Qhia thiab Kev Khi Lus 84:31–44], yeej yog ib qho txawv uas tus Tswv siv tej lus tau thiab txais. Nws tsis siv lo lus tsa. Nyob hauv lub tuam tsev cov txiv neej thiab cov poj niam—nyob ua ke—txais thiab tau cov koob hmoov thiab lub hwj chim ntawm lub Pov Thawj Hwj Aloos thiab Mekhixedes” (“Revealed Realities of Mortality,” Ensign, Ib Hlis Ntuj 2016, 21).

Thaum koj kawm Lus Qhuab Qhia thiab Kev Khi Lus 84:31–44, cia li xav seb tej lus “tau” thiab “txais” lub pov thawj hwj txhais li cas. Qhov no puas txawv qhov uas muab ib tug txiv neej tsa rau ib lub luag hauj lwm pov thawj hwj? Tus Tswv caw koj txais tej yam twg nyob hauv tej nqe no? Koj ua li cas kom ua li ntawd?

Koj kawm dab tsi uas tshoov koj lub siab kom koj xav rau siab ntseeg txais yuav tus Cawm Seej, Nws Leej Txiv, Nws cov tub qhe, thiab Nws lub hwj chim pov thawj hwj?

Kuj saib Lus Qhuab Qhia thiab Kev Khi Lus 121:36–46.

Koj nrhiav tej yam tseeb twg hauv phau Lus Qhuab Qhia thiab Kev Khi Lus 84:43–61 uas pab koj to taub vim li cas koj yuav tsum kawm Vajtswv txoj lus tsis tu tsis tseg? Cia li nco txog tej yam uas hais txog qhov kaj thiab kev tsaus ntuj nyob hauv tej nqe no; qhov uas koj “rau siab mloog cov lus ntawm txoj sia nyob mus ib txhis” ua li cas pab koj txais tau qhov kaj, qhov tseeb, thiab “Yexus Khetos tus Ntsuj Plig” hauv koj lub neej? (nqe 43, 45).

Kuj saib 2 Nifais 32:3.

Thaum koj nyeem tej nqe no, tej zaum koj yuav xav seb tus Tswv tau hais tias Nws yuav ua li cas pab txhawb nqa Nws cov tub qhe. Tej lus cog tseg no muaj nqis li cas rau tej hauj lwm uas Nws tau hais kom koj ua? Piv txwv hais tias, tej lus cog tseg hauv nqe 88 los puas muaj hauv koj lub neej?

Koj kawm dab tsi los ntawm tej nqe no txog qhov uas tus Tswv ua li cas kom ua tau Nws txoj hauj lwm? Koj nrhiav tej lus ntuas thiab cov koob hmoov twg? Tej zaum koj kuj yuav xav txog koj tau txais kev “txhawb nqa … raws li kev siab mos muag” vim koj tau ua hauj lwm nrog ib tug uas “muaj zog los ntawm tus Ntsuj Plig,” tsis hais cov neeg nyob hauv koj tsev neeg.

• Kom pab koj cov me nyuam to taub tias ib txoj kab ke yog dab tsi, xav seb puas saib tej daim duab txog cov kab ke pov thawj hwj, xws li Phau Muaj Duab txog Txoj Moo Zoo, najnpawb 103–8, los sis phab ntawv ntxim ua rau lub lim tiam no. Thov kom lawv piav tias tej daim duab no qhia dab tsi. Ces nej nyeem tau Lus Qhuab Qhia thiab Kev Khi Lus 84:19–22 ua ke. Vim li cas Leej Txiv Saum Ntuj Ceeb Tsheej xav kom peb txais tau cov kab ke no? Qhia koj cov me nyuam tias koj tau hnov Vajtswv lub hwj chim vim koj tau txais cov kab ke thiab khi lus nrog Nws. (Kuj saib “Lub Hwj Chim Pov Thawj Hwj, Txoj Cai, thiab Yawm Sij” nyob hauv ntaub ntawv ntxiv tom kawg A los sis ntaub ntawv ntxiv tom kawg B.)

• Tom qab nej nyeem Lus Qhuab Qhia thiab Kev Khi Lus 84:77 ua ke, nug koj cov me nyuam seb lawv xav li cas kev ua phooj ywg txhais li cas. Tej zaum koj yuav xav hais txog cov phooj ywg zoo uas koj tau muaj dhau los. Yexus ua li cas qhia peb tias Nws xav kom peb ua Nws cov phooj ywg? Peb yuav ua li cas kom qhia tias peb xav tau qhov ntawd thiab? Ib zaj nkauj zoo li “I’m Trying to Be like Jesus” (Children’s Songbook, 78–79) kuj pab tau kom nej sib tham txog qhov no.

• Tej zaum koj cov me nyuam yuav nyiam mloog seb cov tub txib tau pab koj, koj tsev neeg, los sis koj cov poj koob yawm txwv li cas kom txais tau txoj moo zoo. Ces tej zaum koj yuav xav nyeem txog cov lus cog tseg tshwj xeeb uas tus Tswv tau cog lus rau cov tub txib nyob hauv phau Lus Qhuab Qhia thiab Kev Khi Lus 84:88. Tej zaum koj cov me nyuam yuav nyiam xav txog tej yam lawv ua tau thaum nyeem nqe no. Tej zaum koj yuav xav qhia txog ib lub sij hawm thaum koj ua hauj lwm pab tus Tswv thiab xav tias Nws nrog koj nyob, zoo li hais nyob hauv nqe 88. Tej zaum koj yuav xav pab koj cov me nyuam xav txog tej yam lawv ua tau tam sim no ua li cov tub txib. Cia li ua tim khawv tias Leej Txiv Saum Ntuj Ceeb Tsheej pab peb paub hais li cas thaum peb nrog lwm tus tham txog Yexus Khetos.