Ol Nek bilong Restoresen: Ol Testimoni bilong “dispela Visen”

Wilford Woodruff i joinim Sios long Disemba 1833, klostu tupela yias bihain long Joseph Smith na Sidney Rigdon i kisim visen i stap long rekot long Doktrin na ol Kavanen 76. Em i bin stap long New York long dispela taim na lainim long “dispela Visen” long ol misinari i sev long hap. Sampela yias bihain, em i toktok long ol piling bilong em long dispela revelesen.

“Mi lainim taim mi liklik olsem i gat wanpela Heven na wanpela Hel, na ol tokim mi olsem ol lain nogut i gat wanpela panismen na ol stretpela i gat wanpela glori. …

“… Taim mi ritim dispela visen … , em i kliarim tingting bilong mi na givim mi bikpela amamas, em i kamap long mi olsem God husat i autim ol dispela prinsipel long ol man i wais, stretpela na tru, i gat ol gutpela pasin na save, Mi pilim Em i no sot long lav, marimari na jasmen bilong Em, na mi pilim mi laik lavim Bikpela moa long bipo laip bilong mi.”

“Dispela ‘Visen [i] wanpela revelesen i givim moa lait, moa toktru na moa prinsipel long narapela revelesen i stap insait long ol narapela buk yumi ritim. Em i mekim klia save bilong yumi long stap bilong yumi nau, yumi kam long we, wai yumi stap long hia, na we yumi bai go. Olgeta man bai save thru long revelesen wanem hap na stap bilong em bai olsem wanem.”

“Pastaim mi lukim Joseph Mi no kea em hamas krismas, o em i yangpela tumas, Mi no kea em i luk olsem wanem—sapos gras bilong em i longpela o sot; dispela man i mekim kamap dispela revelesen [dispela visen i rekot long seksen 76] i bin profet bilong God. Mi save long mi yet.”

Taim Phebe Peck i harim Joseph na Sidney i tisim “dispela Visen,” em bin stap long Missouri na i lukautim faipela pikinini olsem singel mama. Dispela visen i mekim em i pilim tru na givim gutpela tingting na em i raitim ol dispela samting long serim wanem em i lainim wantaim olgeta famili bilong em:

“Bikpela i wok long putim long ples klia ol misteri bilong ol Kingdom bilong heven i kam long ol Pikinini bilong em. … Joseph Smith na Sidney Rigdon i mekim wanpela raun i kam long las spring, na mipela i bin gat planti ol gutpela miting taim ol i stap hia, na mipela i gat planti ol misteri long opim long lukim, we i givim mi bikpela helpim. Mipela i ken lukim bikpela pawa bilong God long redim ol haus bilong bel isi bilong ol pikinini bilong Em. Na husat i no kisim dispela olgeta fulnes bilong gospel na sanap olsem strongpela soldia long wok bilong Krais i no inap long stap wantaim Papa na Pikinini bilong Em. Tasol i gat wanpela ples i redi long kisim ol husat i no kisim, tasol em i ples liklik long dispela glori i stap long Selesol kingdom. Mi no inap long traim tok moa long dispela olsem ol i stap long print na bai go aut long wol. Na yu ating bai gat wanpela opotuniti long rit long yu yet, na sapos yu mekim, mi hop yu bai rit wantaim bel i lukaut gut na i pulap long prea, olsem ol dispela samting i mas kisim luksave. Na mi laik olsem yu bai painim ol, long wanem em ol bai givim amamas long dispela wol na narapela wol bai kam.”