Bwanaa n Kaokan Bwaai: Koaua ibukin “te Kaotioti”

E kaaina te Ekaretia Wilford Woodruff n Ritembwa 1833, e kaania uoua te ririki i mwin karekean te mi ni burabeti iroun Iotebwa Timiti ao Sidney Rigdon are e tauaki mwiina n Reirei ao Berita aika Tabu 76. E maeka i New York n te tai anne ao e reiakina taekan “te Mi ni Burabeti” mairouia mitinare ake a beku n te tabo anne. Ririki ake imwina, e taekina ana namakin ibukin te kaotioti aio:

“I reireinaki man ataeiu bwa bon ti teuana Karawa ao teuana Moone, ao n tuangakiu bwa naake a buakaka ti teuana tuaaia ao naake a raoiroi teuana mimitongiia. …

“… Ngke I wareka te mii ni burabeti aei … , e kaotaa au iango ao e anganai te kukurei ae abwabwaki, e mataata irou bwa te Atua are e anga te reirei anne nakon te aomata e bon wanawana, e raoiroi man koaua, iai irouna anua aika tamaroa ao iango ma atatai aika tamaroa, I namakinna bwa E aki bibitaki ana tangira, nanoanga, motiraoi, ao motikitaeka, ao I namakina te tangira ae bati ibukin te Uea n ae raka riki nakon are mai i mwaina i nanon maiu.”

“Te Mi ni Burabeti’ [bon] te kaotioti are anga riki te oota, te koaua ma te reirei ae raka riki nakon kaotioti nako ake a mena ni booki ake ti kona n wareki. E buokiira bwa ti na mataata raoi n arora ngkai, ti roko mai ia, buki tera ti mena ikai, ao ti na nakea. E kona n ataia te aomata rinanon te kaotioti anne bwa tera tabena ao arona iai.”

“I mwain ae I noora Iotebwa I aki tabe bwa ikawaira ngaia, ke ataeira ngaia; I aki tabe bwa tera taraakina—bwa e mwarairai ke e kororo irana; te aomata are e karekea te kaotioti anne [e tauaki mwiin te mii ni burabeti i nanon mwakoro 76] bon ana burabeti te Atua. I ataia i bon irou.”

Ngke e ongora Phebe Peck irouia Iotebwa ma Sidney n reirei i aon “te Mi ni Burabeti,” e bon maeka i Missouri ao iai niman natina ao akea buuna. E rangi ni kakaongora ao n anai nano te mi ni burabeti nakoina n te aro are e a korea ae i mwiina n tibwaia bwa tera are e a tia n reiakinna ma ana utu:

“E kaotii rabakau aika a raba te Uea ibukin Abanueana are i Karawa nakoia Natina. … A kawariira i mwiin te kamwaitoro ae nako Iotebwa Timiti ao Sidney Rigdon, ao e mwaiti ara bobotaki aika a kakukurei ngke ti mena ikekei, ao a kaotaki nakoira Ana mwakuri aika raba, are e anganai te rau ae bati. Ti a kona n noora ruon te Atua ni kamangoria n katauraoi taabo ni maeka n rau ibukiia natina. Ao naake a na aki karekea bwaninin te euangkerio ao n tei bwa tautia aika kakaonimaki n ana mwakuri Kristo a aki kona n maeka i matan te Tama ma Te Nati. Ma iai te tabo are e katauraoaki ibukiia naake a aki karekea te euangkerio, ma bon te tabo are mimitongina e aki roota te maeka n Abanuean te teretirio. N na aki taekina ae bati riki ibukin bwaai aikai ngkai a tia n boretiaki ao a butanako nakon te aonaaba. Ao tao e na reke am tai n wareware bon ngkoe, ao ngkana ko wareware, au kantaninga bwa ko na wareware ma te nano ae karaurau man tataromwaaka, ibukin bwaai ake a riai n taraaki. Ao nanou bwa kam na wareki man kamatebwai baikai, bwa bon ngaia are e anganira te kukurei n te aonaaba aei ao n te aonaaba ae na roko.”