Reirei ao Berita aika Tabu 76

Mwakoro 76 e kaotii koaua aika kakawaki i aon tokin kawaira ae akea tokina, ma e na aki bwanin n taekinana bwa te kaotioti aei bon i aon abanuea aika a mimitong ake teniua ke tao ti taekan te babaire ni kamaiu. Ni bon etina raoi, mwakoro 76 bon taekan Iesu Kristo, are e karika ana babaire te Atua ibukin kamaiuara ao te mimitong ae akea tokina bwa e na reke. Ngkai ko wareware, ko na bae ni kakaei taeka ke mwakoro n taeka ake a kabwarabwara te reitaki i marenan Iesu Kristo ao aomata ake a kaainii abanuea aika a mimitong aika a kakaokoro. Tao te taibora ae ai aron aei e kona ni buokiko n tauii mwiin baike ko kunei.

Tera ae ko namakinna bwa ko na karaoia ni kakorakoraa reitakim ma te Tia Kamaiu?

Ngke e wareka te kaotioti aei Wilford Woodruff, e taku, “I namakina te tangira ibukin te Uea ae akea n ai arona” (taraa “Voices of the Restoration: Testimonies of ‘the Vision’”). Tera ae ko reiakinna ibukin Iesu Kristo man kiibu 1–5, 20–24, 39–43, 107–8 are e karikiko bwa ko na tangiria riki?

Taraa naba 1 Betero 3:18–19; 4:6; Dallin H. Oaks, “Tera Ae E a Tia Ni Karaoia te Uea Ibukira?,” Riaona, Meei 2021, 75–77; “I Stand All Amazed,” Anene n Taromauri, nambwa 193.

Tiaki ni kabane kaain te Ekaretia ae a butimwaea te kaotioti are ni mwakoro 76, ibukina bwa e reirei ae bon angiia aomata nako a na kamaiuaki ao ni karekea teuana man abanuea aika mimitong. Te katooto, e taku Brigham Young: “Au katei bon aikai, bwa ngkana e roko moa nakoiu te Kaotioti, e bon rangi ni kaokoro ao ni kaitraa au reirei are mai i mwaaina. I taku, Tataninga riki teutana. I aki katinanikua; ma I bon aki oota raoi iai.” E kabwarabwara bwa e riai n “iango ao n tataro, ni wareware ao n iango, ni karokoa are I a bon ataia ao ni bwanin ootau i bon irou” (n “The Vision,” inanon Revelations in Context,150). Tera ae ko reiakinna man te bwai ae rinanona are e kona ni buokiko ngkana te Atua e kaoti bwaai aika a kaokoro man am atatai aika ngkai? Tera ae ko reiakinna i aon te Atua n Reirei ao Berita aika Tabu 76:5–10, 114–18? Tera ae a reireia kibu aikai i aon ae ko na kanga ni mataata n “oin nanon [te Atua]?” (kibu 7).

Reirei ao Berita aika Tabu 76:39–44 e kabwarabwaraa te kamaiuaki n ae tabangaki. Kiibu 50–70 e kabwarabwaraa te karietataaki, ae onoti n te kamaiuaki. Ko na kanga ni kabwarabwaraa te kaokoro imarenan te kamaiuaki ao te karietataaki? Tera mwiokoan te Tia Kamaiu ni bwaai aikai? Tera ae ko kunea i nanon kiibu aikai ae e kaungako ni ukora te karietataaki?

Taraa naba Ioane 3:16–17; Reirei ao Berita aika Tabu 132:20–25.

Ko a tia ni karaua ni iangoia—ke n raraomaeakinna—bwa tao ko kona n riki bwa te aomata ae ko na karekea te mimitong n tiretio, n aron ae kabwarabwaraaki n Reirei ao Berita aika Tabu 76:50–70, 92–95? Ngkai e kakawaki ataakina bwa tera ae e kantaningaia te Atua mai iroura, iangoa naba taraakin kiibu aikai bwa tera ae e a tia ni karaoia te Atua ibukira—ao ae ko karaoia—ni buokiira n riki n ai Arona. Bukin tera ko namakinna ae a bongana am kekeiaki Irouna?

E kanga te kaotioti ibukin mimitongin te tiretio n roota arom ni maiuakina maium ni katoa bong?

Taraa naba Mote 1:39; J. Devn Cornish, “Am I Good Enough? Will I Make It?,” Riaona, Nobembwa 2016, 32–34.

• Ni buokiia am ataei ni mataata n aia konabwai ae mairoun te Atua, ko kona ni kaota nakoia tamneia ataei ao aia karo. Ko kona ni wareka ngkanne Reirei ao Berita aika Tabu 76:24 ao tibwatibwa i marenami bwa bukin tera ko kukurei n ataia ae ngaira ni kabane “natin te Atua aika mwaane ao aine.”

• Kam kona naba n uaia n anenea “Ngai Natin te Atua” (Aia Boki n Anene Ataei, 2–3) ao kaoiia am ataei ni bon koteiia ngkana a anenea “Ngai.” Ngkanne manga aneneia riki, ao onea mwiin “Ngai” nakon “Ngkoe” ngkai a kotea temanna.

• Iangoia ni karaoa te kaotioti ma am ataei ni karakinan ae temanna e titiraki, “Tera te bwai ae e a tia ni karaoia Iesu Kristo ibukiu?” Kam kona ngkoe ao am ataei n noori kaeka inanon kiibu 5, 41–42, ke 69 ni mwakoro 76. Kam kona naba n anenea “He Sent His Son,” Aia Boki n Anene Ataei, 34–35. Ti na kanga ni kaota ara kakaitau ibukin te bwai ae e a tia ni karaoia te Tia Kamaiu ibukira?

• Kam kona ngkoe ao am ataei ni wareka ke ni mataku ni mwakoron ke ni kabwanina “Mwakoro 26: Abanuea ni Karawa Aika Teniua” (man Karaki n Reirei ao Berita aika Tabu, 97–103, ke te witeo ae e irekereke ma are n te Gospel Library) ao tibwaia imarenami bwa tera ae kam tangiria i aon miin Iotebwa Timiti are e karekea. Kariaia am ataei bwa a na tibwai aia iango ao aia namakin bwa kanga e kangaa aron te maeka ma Tamara are i Karawa n te abanuea ae te tiretio.

  

  4:7

• Kam kona naba ni wareka Reirei ao Berita aika Tabu 76:62 ao kaoiia am ataei bwa a na korea tamneia ma Tamara are i Karawa ma Iesu Kristo n te abanuea ae te tiretio (taraa iteraniba n te waaki ni kakukurein te wiik aei).

• Ko kona ni kaoia am ataei ni warekii kiibu 15–19 ni kakaea te bwai ae a karaoia Iotebwa Timiti ao Sidney Rigdon ngke a noora te kaotioti are n Reirei ao Berita aika Tabu 76. Kaongoia am ataei aron te tai ngke ko karekea kairakim iroun te tamnei ngke ko wareware ni booki aika tabu, ao tuangiia am ataei ngkana a tia ni karekea te taneiai ae aekan anne.