Lus Qhuab Qhia thiab Kev Khi Lus 49–50

Ua ntej nws koom lub Koom Txoos, Leman Copley yog ib tug mej zeej hauv ib pawg hu ua United Society of Believers in Christ’s Second Appearing, los yog cov neeg Shakers. Tom qab nws nrog Leman tham, Joseph Smith xav paub los ntawm tus Tswv txog cov neeg Shaker tej lus qhia. Tus Tswv teb nws nyob hauv kev tshwm sim hauv tshooj 49. Ib feem ntawm cov neeg Shakers tej kev ntseeg los muaj nyob hauv zaj lus piav txog tshooj ntawd.

Tus Tswv tau qhia dab tsi nyob hauv tshooj 49 kom kho tej yam uas cov neeg Shakers ntseeg? Muaj dab tsi hauv txoj kev tshwm sim no uas qhia txog Nws txoj kev hlub thiab txoj kev txhawj txog cov neeg uas tsis muaj Nws tej lus tseeb tag nrho? Koj yuav ua li cas kom ncav tes pab lawv nrog kev hlub tshua?

Koj txais kev tshoov siab dab tsi txog tus Tswv tej lus nyob hauv nqe 2? Tej zaum koj yuav xav muab qhov no piv rau qhov uas yus saib movie tiam sis saib ib feem xwb, tsuas pom ib daim ntawm daim duab uas muab dhos ua ke, los sis thaum ob tug neeg sib cav yus hnov ib tug hais lus xwb. Tus Tswv tej lus ceeb toom qhia dab tsi txog Lus Qhuab Qhia thiab Kev Khi Lus 50:24? Xav seb koj ua dab tsi kom txais tau txoj kev kaj ntxiv los ntawm tus Tswv.

Kuj saib “Leman Copley and the Shakers,” nyob hauv Revelations in Context, 117–21.

Vim Dab Ntxwg Nyoog xav tab kaum Leej Txiv Saum Ntuj Ceeb Tsheej txoj hau kev, Dab Ntxwg Nyoog nrhiav kev tsim kev ntxhov siab txog kev sib yuav. Tiam sis tus Tswv tseem yuav muab tej lus tseeb txog kev sib yuav tshwm sim dhau los ntawm Nws cov yaj saub. You can find some of this truth nyob hauv Lus Qhuab Qhia thiab Kev Khi Lus 49:15–17; Chiv Keeb 2:20–24; 1 Kauleethaus 11:11; thiab “Tsev Neeg: Ib zaj Lus Tshaj Tawm rau lub Ntiaj Teb.” Cia li sau ntawv txog tej lus tseeb uas koj nrhiav tau. Vim li kev sib yuav tseem ceeb heev rau Vajtswv txoj hau kev?

Txwj Laug Ulisses Soares tau qhia tias “Yexus Khetos txoj moo zoo tshaj tawm tias yuav tsum ua raws li lub ntsiab cai uas qhia tias ib tug poj niam thiab tus txiv neej yuav tsum sib koom tes tag nrho, nyob hauv lub neej no thiab nyob mus ib txhis li” (“Sib Koom Tes nrog tus Tswv,” Liyahaunas, Kaum Ib Hlis Ntuj 2022, 42). Tej zaum koj yuav xav kawm nws zaj lus, nrhiav tej lub ntsiab cai uas “ua rau ib tug txiv neej thiab ib tug poj niam txoj kev sib koom tes muaj zog.” Koj yuav ua li cas thiaj muab tau tej kev tseeb no nruab rau hauv koj lub neej? Yog tias lwm tus nug koj seb vim li cas kev sib yuav tseem ceeb heev, koj yuav teb li cas? Vim li cas koj ris Vajtswv txiaj rau qhov koj to taub qhov no?

Kuj saib tej Ntsiab Lus thiab tej Lus Nug, “Sib Yuav,” “Tsev Neeg,” Txoj Moo Zoo cov Ntawv; David A. Bednar, “Marriage Is Essential to His Eternal Plan,” Ensign, Rau Hli Ntuj 2006, 83–84; “Renaissance of Marriage” (vidi-aus), Txoj Moo Zoo cov Ntawv.

2:36

Cov mej zeej tshiab ntawm lub Koom Txoos hauv Ohio yeej xav txais kev tshwm sim ntawm sab ntsuj plig uas tau cog lus tias lawv yuav txais nyob hauv cov vaj lug kub. Tiam sis Dab Ntxwg Nyoog xav ntxias lawv. Yog tias koj yuav tsum pab cov mej zeej no to taub yuav ua li cas kom paub thaum twg tus Vaj Ntsuj Plig Dawb Huv qhia qhov tseeb, koj yuav qhia txog tej lub ntsiab cai twg los ntawm Lus Qhuab Qhia thiab Kev Khi Lus 50? (qhov tseem ceeb nqe 22–25, 29–34, 40–46). Tus Cawm Seej tau pab koj li cas kom paub qhov tseeb thiab qhov cuav?

Kuj saib 1 Kauleethaus 14:1–28; 2 Timautes 3:13–17.

Kev ua raws li Yexus Khetos txoj moo zoo ua rau tib neeg muaj cib fim ua cov xib hwb thiab cov neeg uas kawm, nyob hauv tsev thiab nyob hauv lub Koom Txoos. Tej zaum ib txoj kev rau koj kawm Lus Qhuab Qhia thiab Kev Khi Lus 50:13–24 yog kev kos duab txog ib tug xib hwb thiab ib tug uas kawm. Nyob ua ke, cia li sau tej lus los ntawm tej nqe no uas qhia koj txog kev qhia txoj moo zoo thiab kev kawm txog txoj moo zoo. Thaum twg tau muaj tej yam uas qhia koj txog qhov uas yuav tsum muaj tus Ntsuj Plig thaum koj qhia thiab kawm? Xav seb koj yuav ua li cas kom ua ib tug kawm txoj moo zoo thiab ib tug neeg qhia zoo dua ntxiv.

Thaum koj xav txog tus Cawm Seej tej lus nyob hauv Lus Qhuab Qhia thiab Kev Khi Lus 50:23–25, cia li xav seb koj ua li cas kom txais tau Vajtswv txoj kev kaj nyob hauv koj lub neej thiab koj ua li cas kom “ntiab kev tsaus ntuj tawm” hauv koj mus. Piv txwv hais tias, tej nqe no pab koj li cas kom xaiv hais tias koj yuav siv koj lub sij hawm li cas? yuav saib los sis mloog tej yam twg? yuav nrog leej twg sib tham? Tej nqe vaj lug kub no yuav pab koj thaum muaj lwm yam uas koj yuav tsum txiav txim siab? Tej zaum ib zaj nkauj qhuas Vajtswv zoo li “Tus Tswv yog Qhov Kaj” (Cov Nkauj Qhuas Vajtswv, zaj 31) yuav ua rau koj tawm tswv yim ntxiv.

Kuj saib “Taug kev hauv Vajtswv txoj kev kaj,” Ntxiv Dag Zog rau cov Tub Hluas Ntxhais Hluas: Phau Ntawv Coj Kev Pab Neeg Xaiv, 16–21.

• Kom pab koj cov me nyuam kawm tej lub ntsiab cai nyob hauv tej nqe no, tej zaum koj yuav xav npaj plaub daim ntawv uas ua hneev taw thiab plaub daim duab uas piv txog kev ntseeg Yexus Khetos, kev hloov siab lees txim, kev cai raus dej, thiab kev txais tus Vaj Ntsuj Plig Dawb Huv (saib tej daim duab nyob hauv phab ntawv ntxim ua rau lub lim tiam no). Tej zaum koj cov me nyuam yuav xav tso tej hneev taw rau hauv av thiab tso cov duab rau ntawm ib sab. Ces tej zaum lawv yuav xav taug kev rau ntawm cov hneev taw thaum koj nyeem Lus Qhuab Qhia thiab Kev Khi Lus 49:12–14. Cia li pab lawv to taub tias thaum peb ua tej yam raws li cov duab no, peb coj raws li Yexus Khetos.

• Koj caw tau koj cov me nyuam muab phau Lus Qhuab Qhia thiab Kev Khi Lus 49:12–14 piv rau Tes Hauj Lwm 2:38 thiab nqe kev ntseeg thib plaub. Lawv pom tej kev zoo sib thooj dab tsi? Vim li cas tej lus tseeb no tseem ceeb heev?

• Kom pib qhia txog tej nqe no, tej zaum koj yuav xav piav hais tias cov neeg Shaker yog ib pawg teev ntuj uas ntseeg tias tib neeg yuav tsum tsis txhob sib yuav (saib zaj lus piav txog tshooj Lus Qhuab Qhia thiab Kev Khi Lus 49). Caw koj cov me nyuam nrhiav tej yam uas tus Tswv qhia txog kev sib yuav nyob hauv Lus Qhuab Qhia thiab Kev Khi Lus 49:15–17. Qhov uas hais tias “kev sib yuav yog Vajtswv tsa los” txhais li cas? Tej zaum nej yuav xav nyeem thawj peb nqe lus ntawm “Tsev Neeg: Ib zaj Lus Tshaj Tawm rau lub Ntiaj Teb” ua ke. Ces cia li sib tham seb yog vim li cas kev sib yuav thiab tsev neeg yog tej yam tseem ceeb rau Leej Txiv Saum Ntuj Ceeb Tsheej.

• Kom pib qhia txog Lus Qhuab Qhia thiab Kev Khi Lus 50:23–25, nrog koj cov me nyuam sib tham txog qhov uas txoj kev kaj thiab txoj kev tsaus ntuj sib txawv li cas? Vim li cas peb yuav tsum muaj txoj kev kaj? Tej zaum nej yuav xav nyeem thawj nqe lus ntawm “Taug kev hauv Vajtswv txoj kev kaj” ua ke nyob hauv txiv Dag Zog rau cov Tub Hluas Ntxhais Hluas: Phau Ntawv Coj Kev Pab Neeg Xaiv (phab 17) thiab nyeem Lus Qhuab Qhia thiab Kev Khi Lus 50:23–25. Sib tham txog tej yam uas peb ua tau kom txais Vajtswv txoj kev kaj thiab ntiab kev tsaus ntuj tawm mus. Ces tej zaum nej yuav xav hu ib zaj nkauj txog txoj kev kaj ntawm sab ntsuj plig ua ke, xws li “Shine On” (Children’s Songbook, 144).

• Tom qab nej nyeem phau Lus Qhuab Qhia thiab Kev Khi Lus 50:40–46 ua ke, tej zaum nej yuav xav muab daim duab txog tus Cawm Seej nyob hauv tus txheej txheem qhia no rau lawv saib thiab nug tej yam xws li no: Ib tug neeg yug yaj xav li cas txog Nws cov yaj? Tus Cawm Seej ua li cas kom zoo li ib tug neeg yug yaj rau peb?