“Tsib Hlis Ntuj 12–18: ‘Mob Siab Nrhiav tej Txiaj Ntsim Zoo Tshaj Plaws’: Lus Qhuab Qhia thiab Kev Khi Lus 46–48,” Los, Nrog Kuv Mus—Siv hauv Tsev thiab lub Koom Txoos: Lus Qhuab Qhia thiab Kev Khi Lus 2025 (2025)
“Lus Qhuab Qhia thiab Kev Khi Lus 46–48,” Los, Nrog Kuv Mus—Siv hauv Tsev thiab lub Koom Txoos: 2025
Pawg Neeg Sib Ntsib, los ntawm Worthington Whittredge
Tsib Hlis Ntuj 12–18: “Mob Siab Nrhiav tej Txiaj Ntsim Zoo Tshaj Plaws”
Lus Qhuab Qhia thiab Kev Khi Lus 46–48
Thaum Parley P. Pratt, Oliver Cowdery, Ziba Peterson, thiab Peter Whitmer tus Hluas ncaim Kirtland mus thiab mus tshaj tawm txoj moo zoo, lawv tseg ib puas tawm tus neeg hloov siab los ntseeg tshiab nyob ntawd, cov uas mob siab heev tiam sis tsis tau paub ntau. Tsis tau muaj tej phau ntawv qhia txheej txheem, tsis muaj kev sib ntsib qhia cov thawj coj, tsis muaj kev tshaj tawm lub tuam rooj sab laj—muaj tseeb tiag, tsis muaj Phau Ntawv Maumoos txaus lawm rau txhua tus. Cov neeg ntseeg tshiab no feem coob twb los ntseeg txoj moo zoo vim tau cog lus tias yuav muaj tej kev tshwm sim los ntawm tus Ntsuj Plig ntau, feem ntau los ntawm Phau Tshiab (saib, ua piv txwv, 1 Kauleethaus 12:1–11). Tiam sim nyuaj rau neeg feem coob paub tej yam twg yog los ntawm tus Ntsuj Plig thiab tej yam twg tsis yog. Vim nws pom tias lawv tsis to taub zoo, Joseph Smith tau thov Vajtswv pab. Tus Tswv tej lus teb yeej muaj nqis rau peb niaj hnub nim no, hauv ib lub caij uas tib neeg xyeej los sis tsis quav ntsej txog tej yam los ntawm tus Ntsuj Plig. Nws qhia tseeb tias tej kev tshaj tawm los ntawm sab ntsuj plig los muaj tiag. Nws piav meej tias tej ntawd yog dab tsi: yeej yog tej txiaj ntsim los ntawm Leej Txiv Saum Ntuj Ceeb Tsheej, “kom pab rau cov uas hlub [Nws] thiab ua raws li tag nrho [Nws] tej lus txib” (Lus Qhuab Qhia thiab Kev Khi Lus 46:9).
Tej Tswv Yim Pab Qhia hauv Tsev thiab lub Koom Txoos
Lus Qhuab Qhia thiab Kev Khi Lus 46:1–7
Tus Cawm Seej tos txais txhua tus uas xav teev tiam hauv Nws lub Koom Txoos.
Koj cov phooj ywg thiab cov neeg hauv zej zog los puas zoo siab tuaj rau koj pawg ntseeg tej kev sib ntsib teev tiam Vajtswv? Koj ua li cas kom kho koj tej kev sib ntsib hauv lub Koom Txoos ua rau tib neeg xav rov qab tuaj? Cia li xav txog seb koj ua li cas kom ua raws li tus Tswv tej lus ntuas nyob hauv Lus Qhuab Qhia thiab Kev Khi Lus 46:1–7 (kuj saib 2 Nifais 26:24–28; 3 Nifais 18:22–23).
Tej zaum koj yuav xav txog ib lub sij hawm thaum koj mus koom lub Koom Txoos kev sib ntsib—los sis lwm pab pawg sib ntsib—thawj zaug. Tib neeg tau ua dab tsi kom pab koj xav tias muaj neeg hlub koj?
Kuj saib Maulaunais 6:5–9; “’Tis Sweet to Sing the Matchless Love,” Hymns, zaj 177; “Welcome” (vidi-aus), Txoj Moo Zoo cov Ntawv.
Welcome Comeuntochrist.org
Lus Qhuab Qhia thiab Kev Khi Lus 46:7–33
Leej Txiv Saum Ntuj Ceeb Tsheej muab tej txiaj ntsim ntawm sab ntsuj plig rau kuv kom foom koob hmoov rau lwm tus.
Haiv Neeg Ntseeg thaum ub ntseeg tias muaj tej txiaj ntsim ntawm sab ntsuj plig tiam sis lawv xav tau kev pab kom nco tau thiab yuav tau kawm txog qhov uas vim li cas muaj tej ntawd. Thaum koj kawm txog tus Ntsuj Plig tej txiaj ntsim los ntawm los ntawm Lus Qhuab Qhia thiab Kev Khi Lus 46:7–33, cia li xav seb “yog vim li cas ho muab tej txiaj ntsim ntawd los” (nqe 8). Koj kawm dab tsi txog Vajtswv—tus uas muab tej txiaj ntsim no?
Koj puas txawj xav txog tej tus neeg uas siv tej txiaj ntsim no los yog lwm txiaj ntsim ntawm sab ntsuj plig? Lawv ua li cas kom “pab … Vajtswv cov me nyuam”? (nqe 26). Tej zaum koj yuav xav seb puas nrhiav tau tej lub txiaj ntsim ntawm sab ntsuj plig ntxiv nyob hauv tej nqe vaj lug kub xws li no: 1 Vaj Ntxwv 3:5–15; Daniyees 2:26–30; Tes Hauj Lwm 3:1–8; Hilamas 5:17–19; Maumoos 1:1–5; Ethaws 3:1–15; Lus Qhuab Qhia thiab Kev Khi Lus 6:10–12; Mauxes 7:13.
Koj txoj kev kawm txog tej txiaj ntsim ntawm sab ntsuj plig yuav pab koj xav txog tej txiaj ntsim uas Vajtswv tau pub rau koj. Koj yuav ua li cas kom siv tej txiaj ntsim no kom foom koob hmoov rau Nws cov me nyuam? Yog koj muaj yawg suab txoj koob hmoov, ces tej zaum qhov no qhia tias koj tau txais tej txiaj ntsim twg. Nyeem Txwj Laug John C. Pingree Jr. zaj lus “Kuv Muaj Ib txoj Hauj Lwm rau Koj Ua” yuav pab koj xav txog tej txiaj ntsim uas koj tsis tau xav txog (Liyahaunas, Kaum Ib Hlis Ntuj 2017, 32–35).
Yog tias koj xav kawm tias yuav ua li cas kom tej txiaj ntsim ntawm sab ntsuj plig loj hlob, zaj dab neeg uas zoo xws li lwm yam uas Txwj Laug Juan Pablo Villar zaj lus “Siv Peb lub Zog ntawm Sab Ntsuj Plig” yuav pab (Liyahaunas, Tsib Hlis Ntuj 2019, 95). Tej kev “xyaum ua” dab tsi yuav pab koj tej txiaj ntsim ntawm sab ntsuj plig loj hlob?
Kuj saib Tej Ntsiab Lus thiab tej Lus Nug, “Tus Vaj Ntsuj Plig Dawb Huv,” Txoj Moo Zoo cov Ntawv.
Lus Qhuab Qhia thiab Kev Khi Lus 47
Tus Tswv xav kom Nws lub Koom Txoos sau ib zaj keeb kwm.
John Whitmer txoj kev hu kom sau keeb kwm rau lub Koom Txoos twb yog raws li txij thaum ub los thaum cov neeg ceev xwm txheej hauv Vajtswv cov neeg tau sau keeb kwm. Koj xav tias yog vim li cas tus Tswv saib kev sau keeb kwm tseem ceeb npaum li no? Cia li xav txog qhov no thaum koj nyeem tshooj 47 thiab cov lus qhia zoo sib xws hauv 2 Nifais 29:11–12; Mauxes 6:5; Anplaham 1:28, 31. Koj xav tias tus Tswv xav kom koj sau dab tsi txog koj lub neej?
Thaum koj siv FamilySearch, koj sau tau kev nco txog thiab tej yam yav dhau los lawm los ntawm koj lub neej—thiab koj cov poj koob yawm txiv lub neej (saib FamilySearch.org).
Saib Henry B. Eyring, “O Remember, Remember,” Liyahaunas, Kaum Ib Hlis Ntuj 2007, 66–69.
John Whitmer
Lus Qhuab Qhia thiab Kev Khi Lus 47
Tus Vaj Ntsuj Plig Dawb Huv yuav coj kuv kev thaum kuv ua raws li kuv txoj hauj lwm.
Tej zaum koj yuav to taub txog John Whitmer thaum nws xav paub tseeb tias nws txoj hauj lwm yog los ntawm Vajtswv los. Tus Tswv hais li cas nyob hauv Lus Qhuab Qhia thiab Kev Khi Lus 47 rau John Whitmer—thiab rau koj—kom txhawb kev ntseeg siab kom uas raws li tej hauj lwm uas Nws muab?
Tus xib hwb lub luag hauj lwm. Txoj kev qhia tsis yog sib qhia thiab sib tham xwb. Kev qhia yog kev npaj ib lub sij hawm rau cov mej zeej kawm tau thiab nrhiav tej lus tseeb rau lawv tus kheej thiab qhia tej yam uas lawv tau kawm nrog lwm tus (saib Kev Qhia Raws Li tus Cawm Seej txoj Kev, 26).
Tej Tswv Yim Pab Qhia cov Me Nyuam
Lus Qhuab Qhia thiab Kev Khi Lus 46:2–6
Kuv muaj peev xwm pab lwm tus txais kev tos txais tom lub tsev koom txoos.
-
Tom qab koj nyeem Lus Qhuab Qhia thiab Kev Khi Lus 46:5 nrog koj cov me nyuam, sib tham seb tus Cawm Seej xav kom neeg xav li cas thaum lawv tuaj rau Nws lub Koom Txoos. Caw kom koj cov me nyuam xav tias lawv pom ib tug neeg hauv lub tsev koom txoos thawj zaug. Pab lawv xyaum txoj kev los pab tus neeg no xav tias muaj neeg hlub nws.
Lus Qhuab Qhia thiab Kev Khi Lus 46:7–26
Leej Txiv Saum Ntuj Ceeb Tsheej muab tej txiaj ntsim ntawm sab ntsuj plig rau kuv kom foom koob hmoov rau lwm tus.
-
Kom pab koj cov me nyuam kawm txog tej txiaj ntsim ntawm sab ntsuj plig nyob hauv Lus Qhuab Qhia thiab Kev Khi Lus 46:13–26, xav txog lub tswv yim no. Tej zaum koj yuav xav sau tej txiaj ntsim saum tej daim ntawv thiab muab zais hauv chav nej nyob. Thaum koj cov me nyuam nrhiav txhua daim ntawv, pab lawv nrhiav seb tau piav txog tej txiaj ntsim ntawd nyob qhov twg hauv tshooj 46. Rau txhua lub txiaj ntsim, sib tham txog yuav siv li cas los foom koob hmoov rau lwm tus (kev piav qhia nyob hauv “Tshooj 20: Tus Ntsuj Plig tej Txiaj Ntsim,” nyob hauv Cov Dab Neeg hauv phau Lus Qhuab Qhia thiab Kev Khi Lus, 77–80, yuav pab).
2:19Chapter 20: Gifts of the Spirit: 8•March 1831
-
Qhia koj cov me nyuam txog tej txiaj ntsim uas koj xav tias Leej Txiv Saum Ntuj Ceeb Tsheej tau pub rau lawv, thiab cia lawv sib tham txog tej txiaj ntsim uas lawv ib leeg pom ib leeg muaj. Raws li Lus Qhuab Qhia thiab Kev Khi Lus 46:8–9, 26, vim li cas Leej Txiv Saum Ntuj Ceeb Tsheej pub tej txiaj ntsim ntawm sab ntsuj plig rau peb? Peb yuav siv peb tej txiaj ntsim li cas kom pab lwm tus?
Lus Qhuab Qhia thiab Kev Khi Lus 47:1, 3
Kuv muaj peev xwm sau kuv zaj keeb kwm.
-
Cia koj cov me nyuam kawm txog tej yam uas tus Tswv xav kom John Whitmer ua nyob hauv Lus Qhuab Qhia thiab Kev Khi Lus 47:1, 3. Tej zaum nej kuj yuav xav ib leeg qhia ib leeg txog cov dab neeg nej nyiam tshaj los ntawm cov vaj lug kub. Qhia tias peb paub txog cov dab neeg no rau qhov muaj ib tug neeg sau.
-
Cia li xav seb koj yuav ua li cas kom tshoov koj cov me nyuam lub siab kom sau lawv aj keeb kwm. Tej zaum nej yuav xav nyeem tej zaj los ntawm nej phau ceev xwm txheej los sis hais dab neeg txog ib tug poj koob yawm txwv (saib FamilySearch.orgFamilySearch.org los yog qhov app Memories). Tej zaum nej yuav xav hais tej lus kom lawv paub sau txog dab tsi, xws li “Lub lim tiam no muaj dab tsi tshwm sim uas nej xav kom nej cov xeeb ntxwv paub txog?” los sis “Nej tau pom tus Tswv txhais tes pab nej li cas hauv nej lub neej lub lim tiam no?” Cov me nyuam yaus kos duab txog tej no los tau, los sis nej kaw tau lawv lub suab thaum lawv hais lawv tej zaj. Peb tau tej koob hmoov twg thaum peb ceev “ib zaj keeb kwm mus zuj zus”? (Lus Qhuab Qhia thiab Kev Khi Lus 47:1).
Lus Qhuab Qhia thiab Kev Khi Lus 48:2–3
Kuv muaj peev xwm pab lwm tus thaum kuv faib tej yam kuv tau txais.
-
Thaum koj nyeem Lus Qhuab Qhia thiab Kev Khi Lus 48:2–3 nrog koj cov me nyuam, tej zaum koj yuav tsum qhia tias neeg tuaj Ohio los ntawm sab hnub tuaj, thiab lawv tsis muaj chaw nyob. Tus Tswv hais kom cov Ntseeg ua dab tsi kom pab? Pab koj cov me nyuam xav txog tej yam uas Vajtswv tau pub rau lawv uas lawv faib tau rau lwm tus. Tej zaum nej kuj yuav xav hu ib zaj nkauj zoo li “‘Give,’ Said the Little Stream” (Children’s Songbook, 236).
Yog xav tau tswv yim ntxiv, saib phau xov xwm Phooj Ywg rau lub hlis no.