Doktrin mo Ol Kavenan 49–50

Bifo hem i joenem Jos, Leman Kopli i bin pat blong wan grup blong relijin we oli bin save olgeta olsem “United Society of Believers in Christ’s Second Appearing,” we oli save tu olsem Ol Seka. Afta long wan storian wetem Leman, Josef Smit i askem Lod blong i kliarem sam long ol tijing blong Ol Seka. Lod i ansa wetem revelesen long seksen 49. Sam long ol bilif blong Ol Seka oli tokbaot long seksen heding.

?Wanem nao Lod i tijim long seksen 49 blong stretem ol bilif blong Ol Seka? ?Wanem pruf nao yu luk insaed long revelesen ia abaot lav blong Hem mo wari from ol pipol we oli no gat trutok blong Hem we i fulwan? ?Olsem wanem nao yu save givhan long olgeta wetem lav mo kea?

?Wanem filing i kam long yu abaot tingting blong Lod long ves 2? Maet yu save komperem hemia wetem wanem we i hapen sapos yu wajem wan pat blong muvi nomo, luk wan pis blong pasel o harem wan saed stori blong wan raorao. ?Long wanem wei nao woning blong Lod i go wetem Doktrin mo Ol Kavenan 50:24? Tingting long wanem nao yu stap mekem blong kasem moa laet we i kam long Lod.

Luk tu long “Leman Copley and the Shakers,” long Revelations in Context, 117–21.

Long wan hadwok blong spolem plan blong Papa long Heven, setan i lukaotem blong krietem tu tingting abaot mared. Be long narafala tingting, Lod i gogohed blong talemaot trutok abaot mared tru long ol profet blong Hem. Yu save faenem sam long ol trutok ia long Doktrin mo Ol Kavenan 49:15–17; Jenesis 2:20–24; 1 Korin 11:11; mo “Famli: Wan Ofisol Toktok I Go long Wol.” Mekem wan lis blong ol trutok we yu fanem. ?From wanem nao mared hem i impoten tumas long plan blong God?

Elda Ulisses Soares i bin tijim se “g ospel blong Jisas Kraes we i kambak i tokbaot fulwan prinsipol iablong wok wan bitwin woman mo man, tugeta long laef ia mo long laef we i no save finis” (“Wok Wan Wetem Lod,” Liahona, Nov. 2022, 42). Yu save stadi long mesej blong hem, blong stap lukaotem ol prinsipol “we i mekem patnasip bitwin man mo woman i kam moa strong.” ?Olsem wanem nao yu save yusum ol prinsipol ia long laef blong yu? Sapos wan man o woman long wan narafala jos i askem yu from wanem mared i impoten, ?bae yu ansa olsem wanem? ?From wanem bae yu talem tangkyu from andastaning ia?

Luk tu long Topics and Questions, “Marriage,” “Family,” Gospel Laebri; David A. Bednar, “Marriage Is Essential to His Eternal Plan,” Ensign, June 2006, 83–84; “Renaissance of Marriage” (vidio), Gospel Laebri.

2:36

Ol niu memba blong Jos long Ohaeo oli bin wantem tumas blong kasem ol samting we Spirit i soemaot, we oli promesem insaed long ol skripja. Be, setan, i bin wantem tumas blong giaman long olgeta. Sapos oli askem yu blong helpem ol memba ia blong andastanem olsem wanem blong luksave ol samting we Tabu Spirit i soemaot, wanem ol prinsipol long Doktrin mo Ol Kavenan 50 we bae yu serem? (luk speseli long ol ves 22–25, 29–34, 40–46). ?Long wanem wei nao Sevya i helpem yu blong save wanem i defren bitwin trutok mo wanem we i no tru?

Luk tu long 1 Korin 14:1–28; 2 Timoti 3:13–17.

Blong stap laef folem gospel blong Jisas Kraes, i givim plante janis blong stap ol tija mo olgeta we oli stap lanem samting, tugeta long hom mo long Jos. Wan wei we maet yu save stadi Doktrin mo Ol Kavenan 50:13–24 hem i blong droem wan pikja blong wan tija mo wan we i stap lanem samting. Narasaed long tufala wanwan, mekem wan lis blong ol toktok mo ol sentens aot long ol ves ia we oli tijim yu wan samting abaot gospel blong stap lan mo stap tij. ?Wetaem nao yu bin gat ol eksperiens we oli bin tijim yu hamas i impoten blong gat Spirit long taem blong stap tij mo stap lanem samting? Tingting long wanem yu save mekem blong kam antap long ol hadwok blong yu olsem wan we i stap lanem gospel, mo wan we i stap tijim gospel.

Taem yu tingting hevi long ol toktok blong Sevya long Doktrin mo Ol Kavenan 50:23–25, tingting long olsem wanem bae yu kasem laet blong God long laef blong yu mo olsem wanem bae yu “ronemaot tudak” i go. Eksampol, ?long wanem wei nao ol ves ia oli lidim ol joes blong yu abaot olsem wanem blong yusum taem blong yu? ?wanem entetenmen o media bae yu lukaotem, ?wanem ol storian we yu save tekempat long hem? ?Wanem ol narafala desisen we ol ves ia oli save helpem yu wetem Wan hym olsem “The Lod Is My Light” (Hym, namba 89) i save givim sam moa insperesen tingting.

Luk tu long “Wokbaot long laet blong God,” Blong Ol Yut Oli Kam Strong: Wan Gaed blong Stap Mekem Ol Joes, 16–21.

• Blong tijim ol pikinini blong yu ol prinsipol insaed long ol ves ia, yu save rere long fo pepa we i gat trak blong leg long hem mo fo pikja we i ripresentem fet long Jisas Kraes, fasin blong sakem sin, baptaes mo blong kasem Tabu Spirit (luk long ol pikja blong aktiviti pej blong wik ia). Ol pikinini blong yu oli save putum ol pepa blong trak blong leg long flo wetem ol pikja long saed blong olgeta. Afta, oli save gat wanwan janis blong stap wokbaot long ol trak blong leg long pepa ia taem yu stap ridim Doktrin mo Ol Kavenan 49:12–14. Helpem olgeta blong andastanem se taem yumi mekem ol samting we i stap long ol pikja ia, yumi stap folem Jisas Kraes.

• Mo tu, yu save invaetem ol pikinini blong yu blong komperem Doktrin mo Ol Kavenan 49:12–14 wetem Ol Wok 2:38 mo wetem nambafo toktok blong bilif. ?Wanem nao ol semmak samting we oli faenem? ?From wanem ol trutok ia oli impoten?

• Blong introdiusum ol ves ia, yu save eksplenem se Ol Seka oli bin wan grup we oli bin biliv se ol pipol oli no mas mared (luk long seksen heding blong Doktrin mo Ol Kavenan 49 Invaetem ol pikinini blong yu blong faenem ol samting we Lod i bin tijim abaot mared long Doktrin mo Ol Kavenan 49:15–17 ?Wanem i minim se “God i odenem mared”? Maet, tugeta, yufala i save ridim fas trifala paragraf blong “Famli: Wan Ofisol Toktok I Go long Wol.” Afta, tokbaot from wanem mared mo famli oli impoten long Papa long Heven.

• Blong introdiusum Doktrin mo Ol Kavenan 50:23–25, tokbaot wetem ol pikinini blong yu abaot wanem i defren bitwin laet mo tudak. ?From wanem nao yumi nidim laet? Tugeta, yufala save ridim fas paragraf blong “Wokbaot long laet blong God” long Blong Ol Yut Oli Kam Strong: Wan Gaed blong Stap Mekem Ol Joes (pej 17) mo tu long Doktrin mo Ol Kavenan 50:23–25. Tokbaot ol wei we yumi kasem laet blong God mo ol wei we yumi save ronemaot tudak i go. Afta, tugeta, yufala i save singsing wan singsing abaot laet blong olgeta long saed blong spirit, olsem“Shine On” (Children’s Songbook, 144).

• Afta we yufala i ridim tugeta Doktrin mo Ol Kavenan 50:40–46 yu save soem pikja blong Sevya long en blong aotlaen ia mo askem ol kwestin olsem hemia:?Olsem wanem nao wan man blong lukaotem sipsip i filim abaot ol sipsip blong Hem? ?Olsem wanem nao Sevya i olsem wan man blong lukaot long sipsip, long yumi?