Reirei ao Berita aika Tabu 41–44

N ramoan 1831, a moanna ni ikotaki Aomata aika Itiaki i Ohio. A rangi ni ingainga ni karekea te tua are e berita iai te Atua bwa E na anganiia ikekei (taraa Reirei ao Berita aika Tabu 38:32). Ma i mwaina, E reirei bwa a na kanga Ana reirei ni katauraoia ni karekea Ana tua. Tera te tua ae ko kunea n Reirei ao Berita aika Tabu 41:1–6 are e na kona ni buokiia Aika Itiaki ni karekea Ana tua te Atua? A na kangaa reirei aikai ni buokiko ni karekei kairi mai Irouna?

Taraa naba “A Bishop unto the Church,” in Revelations in Context, 77–83.

Aomata aika Itiaki a taraa te kaotioti are e kuneaki n Reirei ao Berita aika Tabu 42:1–72 bwa teuana te kabanea ni kakawaki are e a tia ni karekea te Burabeti. Aio teuana mai ibuakon te moan kaotioti ni boretiaki. I nanon ririki aika bati, a aranna Aoma aika Itiaki bwa bon “te tua.” E ngae ngke te mwakoro aei a aki kairaki ni kabane iai ana tua te Uea, e manena kamatebwaiakina bwa e aera tuua aikai a kakawaki ibukin te Ekaretia ae boou ae kaokaki. Bukin tera a kakawaki naba ibukira ni boong aikai?

Ibukina bwa mwakoro 42 e rang abwabwaki, ko na bae n tangiria ni kamatebwaia ni mwakorokoro aika uarereke, n aron aei. Katebenakoi tuua aika a reiakinaki man aikai, ao iangoaia bwa a kangaa tuua aikai n riki bwa kanikinaean Ana tangira te Uea nakoia Ana Aomata.

• Kiibu 4–9, 11–17, 56–58

• Kiibu 18–29

• Kiibu 30–31

• Kiibu 40–42

• Kiibu 43–52

Bukin tera Tamara are i Karawa e anganiira kaetieti ao tuua? Ni kawai raa ae ko a tia ni kakabwaiaaki man ataakin ao iriiran tuua?

Ngkai mwakoron te tua are e kaokaki n mwakoro 42, e tua te Uea nakoia Aika Itiaki bwa a na kanga, n aroia taan iriira Kristo ake rimoa, ni karekea te “katiteboaki imarenaia” (Mwakuri 2:44; 4 Nibwaai 1:3), ao “akea ae e kainnano i buakoia” (Mote 7:18). Tera ae ko reiakinna man Reirei ao Berita aika Tabu 42:30–42 iaon ae a kanga Aika Itiaki ni maiuakina tuan te anganano? (Ni katabua nanona ni kaokoroa te bwai teuana ni bukina ae tabu.)

E ngae ngke ti aki karekea te “katiteboaki imarenara” n te bong aei, inanon tembora Aika Itiaki ni Boong aika Kaitira a berita ni maiuakina tuan te anganano. Ko na kanga ni katabua te bwai ae e anganiko te Atua ni kakabwaiaia aomata aika a kainano? Tao anenean te kuna n aron “Because I Have Been Given Much” (Anene n Taromauri, nambwa. 219) e kona n anganiko iango.

Taraa naba Sharon Eubank, “I Tataro bwa E na Kabonganaira,” Riaona, Nobembwa 2021, 53–56; “The Law,” i nanon Revelations in Context, 93–95.

Iangoia ae ko marooro ma te membwa ae e boou n te Ekaretia ao e rangi ni ingainga ni kan ataia ae e kairaki te Ekaretia man te kaotioti. Ko na kanga ni kabongana Reirei ao Berita aika Tabu 43:1–16 ni buoka teuanne ke neienne n reiakina aron ana kawai te Uea ni kaira Ana Ekaretia rinanoia Ana burabeti? Ko na kanga ni kabongana Reirei ao Berita aika Tabu 42:61, 65–68. n reiakina karekean oin am kaotioti?

Tera tabeua “bwaai aika a karaunano” ao ni kakukurei ake ko a tia ni karekei mairoun te Uea rinanon Tamneina?

N reiakinna bwa a kanga taan kairiiri n te Ekaretia n tia n ongo bwanaan te Uea, ko kona ni mataku n teuana te witeo inanon “Hear Him” collection n te Gospel Library. Iangoia ni karaoa oin am witeo, ni kabwarabwaraa bwa e kanga te Uea n taetae ma ngkoe.

Taraa naba Russell M. Nelson, “Revelation for the Church, Revelation for Our Lives,” Riaona, Meei 2018, 93–96; “All Things Must Be Done in Order,” i nanon Revelations in Context, 50–53.

• Ni buokiia am ataei n ataia bwa tera nanon ae te riki bwa ana reirei Iesu Kristo, ko kona ni korea Reirei ao Berita aika Tabu 41:5 iaon te moti ni beeba, ni katikua ni kakea te taeka ae reirei n are e na mena iai. A kona ngkanne n taraa te kibu 5 ibukin te taeka are e bua. Ni kaineti ma te kibu aei, tera nanon te riki bwa ana reirei Iesu Kristo? Ti na kanga ni kataia n riki n nakoraoi bwa ana reirei Kristo?

• Am ataei a na bae ni kukurei n takakarona te takakaro are a na kataia n ongoraa raoi ao n touii mwiin kaetieti. Ko kona ni kabongana te takakaro aei ni maroroakinna bwa tera nanon te “ongora ao kakauongo raoi ao ongeaba” nakon te Uea (Reirei ao Berita aika Tabu 42:2). Tera kaetieti ae E a tia n anganiira? Ti kanga ni kakabwaiaaki man te ongeaba nakon Ana tua ao kaetieti?

• Ko na bae ni kabwanina karaoan iteraniba n te waaki ni kakukurei n te wiiki aei ma am ataei. Ko kona naba n anenea te anene iaon te ongotaeka nakon Ana tua te Atua, n aron “I Love to See the Temple” (Aia Boki n Anene Ataei, 148). Iangoia n tibwaia i marenami bwa e kanga te ongeaba n Ana tua te Atua ni karokoa te kukurei.

  

• I mwiin are kam uaia ni wareka Reirei ao Berita aika Tabu 42:38, buokiia am ataei ni iangoi kawai are a na kona ni beku ibukin Iesu man buokakiia aomata tabeman. A kona ni kunei tabeua iango man te witeo “Pass It On” (ChurchofJesusChrist.org). A kona naba n taraa tamnein te Tia Kamaiu ngke e buokiia aomata tabeman, kamaiuia aoraki, ke n akoi nakoia ataei (taraa Gospel Art Book, nambwa. 42, 47).

  

  2:18

  

• Ko na bae ni kaotia nakoia am ataei te beeba ni Kabwianibwai ao Angabwai Tabeua ao marooro bwa e kanga aron kabonganaakina n anga are iai iroura ni kakabwaiaia tabeman (taraa naba “Tithing and Donations Online”).

• Kaoiia am ataei bwa a na iangoia bwa e tei temanna n tain te kaoti koaua ao n tuanga te uoote bwa e a tia ni karekea te kaotioti ibukin te Ekaretia (n aron te katooto, bwa ti na aki manga kana te carrots ke ti na teboki baira ma te miriki ao tiaki te ran.) E taku bwa ti riai ni kakauongo nakon are e taku n onea mwiin te burabeti. Tera ae kairua n anne? Kam kona ngkanne n uaia ni kamatebwaia Reirei ao Berita aika Tabu 43:1–7 ni kakaea bwa e kanga te Uea n anga te tua nakon Ana Ekaretia.

• Ko kona naba ni kaota tamnein te burabeti ae maiu ao kaoiia am ataei bwa a na tibwaua te reirei are e a tibwa tia n anga reirei i aona. Ngkana a tangira te ibuobuoki, kaota mwakoron te tamnei n te witeo ke wareka te rongorongo man te maungatabu ni kabuta ae nako. Bukin tera bon te kakabwaia ngkai iai te burabeti ae maiu?