“Nsanananmu no ho Ndze Ahorow: Mboano kɔ Ohio,” Bɛka Mo Do—Ma Fie na Asɔr: Nkyerɛkyerɛ na Ahyɛmudzi 2025 (2025)
“Mboano kɔ Ohio,” Bɛka Mo Do—Ma Fie na Asɔr:2025
Nsanananmu no ho Ndze Ahorow
Mboano kɔ Ohio
Kirtland Ekurase, Al Rounds yɛɛ nsaano mfonyin no
Phebe Carter
Phebe Carter kã Ahotseweefo dodowara ho a wɔboaa hɔn ano kɔɔr Ohio mfe 1830 ber mu no. Ɔbɔdɔɔm Asɔr no wɔ America etsifi anee afamu a nna oedzi mfe bɛyɛ eduonu enum a, n’awofo dze wɔammbɔdɔm. Ekyir no ɔkyerɛɛw n’adwenpɔwbɔ dɛ ɔnye ahotseweefo no botu akɔ Ohio no ho nsɛm.
“Ɔyɛɛ emi m’anyɛnkofo ahobow dɛ mefaa dɛm kwan no do, mbom nna biribi rupuhim me wɔ mo mu. Awerɛhow a me maame dzii wɔ fie a mirifi no nna ɔbor dza mubotum asoa, na nkyɛ ɔnnyɛ sunsum no a ɔwɔ mo mu no a nkyɛ mesan ekyir. Me maame kãa kyerɛɛ me dɛ nkyɛ ɔbɛpɛ dɛ obohu dɛ woesie me kyɛn monko mobɔkɔ wiadze yerɛyerɛw mu.
“‘[Phebe],’ ɔkãa no awerɛhyɛmu mu ara, ‘ana ibɛsan aba mo hɔ sɛ ihu dɛ Mormonsom yɛ ɔtor a?’
“Mubuaa dɛ, ‘nyew, me nã, mebɛba.’ … Mo mbuae no dwedwee ne haw no; naaso ɔyɛɛ hɛn awerɛhow ara yie dɛ yebedzi mpaapaamu. Mber no durii dɛ miribefir edzi efi fie no menntum ennya awerɛhyɛmu wɔ mo mu dɛ mubotum akra hɔn, ntsi mekyerɛɛw bye bye nsɛm maa hɔn mu kor biara, na medze too mo pon do, na mutuu mbirika kɔr asenadze na muhuruwii sii tseaseanam no mu. Dɛm kwan yi do na mifii me mbafober mu fie dze m’abrabɔ kɛkyekyeer Nyankopɔn n’ahotseweefo dze ho.”
Bye bye nsɛm kor no mu no, Phebe kyerɛɛw dɛ:
“Awofo Adɔfo—Sesei miribefi m’egya fie mber kakra … Minnyim mber ne tsentsen—mbom medze enyisɔ da hom ase wɔ ayamuyie a menya fi me mbafober mu besi sesei—naaso Twerammpon na ɔyɛ dɛ Ɔahyehyɛ no sesei. Hom mma hɛn nyina mfa ndzɛmba yinom nyinara nhyɛ Twerammpon nsa na yenya ndaase dɛ Ɔama hɛn kwan ma yɛabɔ mu atsena mber tsentsen yi wɔ tsenabew pa a Ɔdze adom hɛn yi, a yɛregye edzi dɛ adze nyina bɔ mu yɛ edwuma ma hɛn yie sɛ yɛdɔ Nyankopɔn ara yie a. Hom mma yenhu dɛ yebotum abɔ mpaa ama Nyame kor no a Ɔbɛtse N’abɔdze nyina hɔn nokwar mpaabɔ na Ɔama hɛn dza oye koraa ma hɛn no. …
“Me nã, megye dzi dɛ ɔyɛ Nyame ne pɛ dɛ mokɔ anee na menyaa ho awerɛhyɛmu akyɛr yie. Sesei kwan no ebue … ; megye dzi dɛ ɔyɛ Ewuradze no sunsum na Ɔayɛ na ɔsõ adze nyina. Mma nnhaw wo ho wɔ wo ba ho; Ewuradze bɛkyekye mo werɛ. Megye dzi dɛ Ewuradze bɔhwɛ mo do na Ɔama me dza oye koraa no. … Morokɔ osiandɛ mo Wura refrɛ—ɔama m’asɛdze ayɛ pefee.”