Nsanananmu no ho Ndze Ahorow

Ber a Abigail Calkins edzi mfe bɛyɛ eduosa enum no, nna ɔpɛ dɛ wɔdze no bɔn kyɛ no. Nna ɔnntaa nnkenkan Bible no, na nkorɔfo a wɔwɔ Christian asɔr ahorow mu no bɛseraa no wɔ ne fie, naaso nna n’adwen mu ayɛ no konsẽe wɔ nsonsonee a ɔda nsɔrnsɔr no ntamu. Ɔkãa dɛ, “Dakor anapa bi, medze me Bible kɔr ndua no mu, ber no mohwee mo kotodwe enyim.” Ɔbɔɔ mpaa enyiber do maa Ewuradze. Ɔkãa dɛ, “Amonmu ara enyido-adzehu bi twaa m’enyi do, na nsɔrsɔr ahorow bɛseen nkorkor, na ndze bi frɛɛ me rese dɛ: ‘Wɔakyekyer iyinom ama wɔdze eenya mfaso.’ Nkyii, ɔdze kɔ ekyir no, nna mutum hu kandzea kɛse bi, na ndze a ofi sor see dɛ ‘Mibeyi nkorɔfo binom, a M’enyi bɛgye dɛ wɔbɛyɛ medze na mehyira hɔn.’” Ekyir no annkyɛr na Abigail tsee Mormon Nwoma no no ho asɛm. Nna onnyi nwoma no bi dze, naaso ɔhwehwɛɛ dɛ ɔdze “Sunsum Krɔnkrɔn no akyɛdze na tum no, obohu nwoma yi no nokwar,” na “ɔtsee dɛ ɔwɔ ne nkyɛn ntsɛmara.” Ewiei no ber a otumii kenkaan Mormon Nwoma no, nna ɔayɛ krado dɛ ɔbɛgye.” Ɔno na no kun, Lyman, wonumaa hɔn wɔ afe 1831 mu.

Ber a Thomas B. Marsh yɛ aberantsɛba no, osũaa Bible no na ɔkɔdɔɔm Christian asɔr bi. Mbom nna ɔmmee no, ewiei no ɔtwee noho fii nsɔr ne nyinara ho. Ɔkãa dɛ, “Nna mowɔ nkɔnhyɛ sunsum akyɛdze kakra, na mekãa kyerɛɛ [nyamesom asɔr baanodzinyi] bi dɛ m’enyi da asɔr fofor bi do a ɔbɔsoɛr a, obenya nokwar no krɔnngyee.” Iyi ekyir no annkyer, na Thomas nyaa sunsum mu nkenyan dɛ omfi ne fie wɔ Boston, Massachusetts, na ontu kwan nkɔ anee. Ɔhweer abosoom ebiasa wɔ New York anee afamu a oennhu dza ɔrohwehwɛ no, osii mu dɛ ɔrokɔ fie. Kwan no do no, ɔbaa bi bisaa Thomas dɛ ana ɔatse “Sika Nwoma no a banyimba bi wɔfrɛɛ no Joseph Smith hunee no ho asɛm a.” Asɛm yi ho enyigye ntsi, Thomas sii mu ntsɛmara tuu kwan kɔr Palmyra na ohyiaa Martin Harris wɔ ntsintsimfir fiadze hɔ, ber a nna Mormon Nwoma no ne nkrataafa 16 a odzi kan no fi efir no mu reba no. Thomas nyaa kwan dɛ ɔmfa dɛm nkrataafa 16 ne bi, na ɔdze baa fie dze brɛɛ ne yer, Elizabeth. Ɔkaa dɛ “N’enyi gyee nwoma no ho ara yie, a ɔgyee dzii dɛ ɔyɛ Nyame n’edwuma.” Ekyir no Thomas na Elizabeth nye hɔn mba tui baa New York, na wonumaa hɔn. (Ama eenya nsɛm bi a ɔfa Thomas B. Marsh akã ho no, hwɛ Nkyerɛkyerɛ na Ahyɛmudzi 31.)

Tse dɛ Thomas Marsh no, Parley na Thankful Pratt tsie sunsum a orununu hɔn no na wogyaa hɔn haban a wɔayɛ prɔmprɔm no ekyir wɔ Ohio a wɔdze adwen dɛ wɔrekɛkã asɛmpa no dɛ mbrɛ wɔtse ase fi Bible mu no. Dɛ mbrɛ Parley kãa kyerɛɛ no nuabanyin no, “Ndzɛmba yinom ho sunsum akyekyer m’adwen dzendzenndzen mber yi mu ma munntum nnhom.” Ber a wokodur New York boka afamu no, Parley nyaa nkenyan dɛ wɔntsena apaamu hɔ kakra. Wɔbɔɔ adwenpɔw dɛ Thankful, bɔtoa do a ɔrennye no nnkɔ. Parley kãa kyerɛɛ no dɛ, “Mowɔ edwuma yɛ wɔ ɔman yi ne mantɔw yi mu, na edwuma kor no, mber dodow a medze bɛyɛ no, minnyim, mbom sɛ meyɛ wie a nna mebɛba.” Ha na Parley dzii kan tsee Mormon Nwoma no ho asɛm. Ɔkãa dɛ, “Minyaa enyigye nwanwa bi wɔ nwoma no mu. Ɔserɛɛ kor na ɔkenkan no anafua ne nyina. Anapa durii no, nna onyim dɛ nwoma no yɛ nokwar, a obuu no bo ɔsom dɛ “ɔbor wiadze sika nyina.” Nda kakra ara ntamu no wonumaa Parley. Nkyii ɔsanee kɔr Thankful hɔ, a ɔno so wonumaa no. (Ama eenya nsɛm bi a ɔfa Parley P. Pratt akã ho no, hwɛ Nkyerɛkyerɛ na Ahyɛmudzi 32.)

Ɔnam kwan do fi New York rokɔ asɛmpakã wɔ Missouri no, Parley Pratt na ne mfɛfo edwumayɛfo soɛe wɔ Mentor, Ohio, wɔ Sidney na Phebe Rigdon fie—n’anyɛnkofo dadaw a nna onyim hɔn wɔ nda a ɔwɔ Ohio no. Nna Sidney yɛ Christian sɔfo, na Parley nna ɔkã no mboanofo no ho na ɔfaa no dɛ no sunsum mu kyerɛkyerɛnyi. Parley kãa Mormon Nwoma no na Jesus Christ n’asɛmpa Nsanananmu ho asɛm enyigye mu ara kyerɛɛ n’anyɛnkofo no. Sidney ɔnoara nna ɔrohwehwɛ nokwar Asɔr a ohun dɛ wɔakyerɛ no wɔ Ahyɛmu Fofor mu no ne nsanananmu, ɔwɔ mu dɛ ahyɛse no nna ɔnngye Mormon Nwoma no nndzi papa. Ɔkãa kyerɛɛ ne nyɛnko Parley no dɛ, “Mbom mebɛkenkan wo nwoma yi na mabɔ mbɔdzen ahwɛ dɛ sɛ ɔyɛ anaa ɔnnyɛ nyikyerɛ a ofi Nyame hɔ.” Dapɛn ebien adzesũa na mpaabɔ ekyir no, ɔno na Phebe nyina nyaa awerɛhyɛmu dɛ nwoma no yɛ nokwar. Mbom nna Sidney so nyim dɛ ɔrobɔdɔm Asɔr no bɛyɛ afɔrbɔdze kɛse ama n’ebusua. Mbrɛ ɔbɛdan biara no n’edwuma dɛ sɔfo no bɔbɔ no, nye ne dzibew a ɔwɔ korow mu no. Ber a ɔno na Phebe pɛnsapɛnsa dza obotum aba yi mu ho no, Phebe kãa dɛ, “Mebubu dza yɛbɔhwer, na … ɔyɛ me pɛ dɛ mebɛyɛ Nyankopɔn ne pɛ, nkwa mu o, owu mu o.”