Ebɔbira 14–20: ‘Emi Nye Nyia Ɔtse Ase no, Emi Nye Nyia Wokum No no’: Easter,” Bra, Bɛka Mo Do—Ma Fie na Asɔr: Nkyerɛkyerɛ na Ahyɛmudzi 2025 (2025)

“Easter,” Bra, Bɛka Mo Do—Ma Fie na Asɔr: Nkyerɛkyerɛ na Ahyɛmudzi 2025

Ebɔbira 14–20: “Emi Nye Nyia Ɔtse Ase no, Emi Nye Nyia Wokum No no”

Easter

Ebɔbira 3, afe 1836, nna ɔyɛ Easter Kwesida. Wɔboae ma wohyiraa sacrament no do dze maa Ahotseweefo wɔ Kirtland Temple a woetu ahyɛ Nyame nsa fofor no, Joseph Smith na Oliver Cowdery nyaa bea komm bi a ɔwɔ ntwamutam n’ekyir na wɔbɔɔ hɔn etsir adze wɔ mpaabɔ komm mu. Nkyii, da krɔnkrɔn yi a Christianfo a wɔwɔ beebiara rehyɛ Jesus Christ no Wusoɛr ho fa no, Ewuradze a Ɔasoɛr Nankasa puee Ne temple mu, rese dɛ, “Emi nye nyia ɔtse ase no, emi nye nyia wokum no no” (Nkyerɛkyerɛ na Ahyɛmudzi 110:4

Yɛkã dɛ Jesus Christ nye “nyia ɔtse ase” a n’asekyerɛ nye dɛn? Ɔnnkyerɛ nko ara dɛ Ɔsoɛree fii nda mu na opuee N’esuafo do wɔ Galilee. N’asekyerɛ nye dɛ Ɔtse ase ndɛ. Ɔkasa dua nkɔnhyɛfo do ndɛ. Odzi N’Asɔr no ne Kan ndɛ Ɔsa akra a woepira na akoma a woebubu yarba ndɛ. Ntsi yebotum esi do akã Joseph Smith ne dasegye ndamyɛ nsɛm no: “Na afei, dasegye pii a wɔdze ama wɔ no ho no, iyi nye dasegye … a yɛgye dase wɔ no ho dɛ: Ɔtse ase! Nkyerɛkyerɛ na Ahyɛmudzi 76:22 Yetum tse Ne ndze wɔ nyikyerɛ yinom mu, yɛyɛ dasefo wɔ Ne nsa a ɔwɔ hɛn abrabɔ mu, na yɛtse “enyigye nkã a asɛntɔw yi dze ma: ‘Minyim dɛ mo Pomfo tse ase!’” (Hymns, nkanee 136).

Adwenkyerɛ ma Fie na Asɔr mu Adzesũa

Jesus Christ tse ase.

Hɛn mu dodowara nnhun Jesus Christ tse dɛ ma Nkɔnhyɛnyi Joseph Smith hunii no. Naaso yebotum ehu, dɛ mbrɛ ohunii, dɛ Agyenkwa no tse ase, dɛ Onyim hɛn nkonyimdzi na ahokyer, na dɛ Ɔbɔboa hɛn wɔ hia mber mu. Susu wankasa wo dasegye wɔ Christ ɔtseasefo no ho ber a idwendwen nsɛmbisa a ɔwɔ ase yi na isũa adzesũa mboa a ɔkã ho no.

Woana nye Jesus Christ? Dɛn ntsi na yɛsor No? (Hwɛ “Christ Ɔtseasefo No: Asomafo no Dasegye no”).
Ebɛnadze na Sunsum no kyerɛkyerɛ me fa Joseph Smith na nkaafo a wohun Agyenkwa no hɔn sũahu ho? Osi dɛn na hɔn dasegye no hyɛ medze mã? (Hwɛ Nkyerɛkyerɛ na Ahyɛmudzi 76:11–14, 20–24; 110:1–10; Joseph Smith—Abakɔsɛm 1:17).
Ebɛnadze na musũa fa Agyenkwa no ndwuma na no krɔnkrɔnyɛ fi nankasa Ne nsɛm mu? (hwɛ Nkyerɛkyerɛ na Ahyɛmudzi 29:5; 38:7).
Agyenkwa no besi dɛn botum aboa me ndɛ? (Hwɛ Isaiah 53:3–5; Hebrewfo 2:17–18; Mosiah 3:7; Alma 7:11–13; 36:3; Ether 12:27; Moses 5:10–12).

Tum fi isũa adze gu wo tsir mu. Elder Richard G. Scott kyerɛkyerɛɛ mu dɛ: “Tum kɛse botum aba efi kyerɛwsɛm a yesũa gu hɛn tsir mu no. Irusũa kyerɛwsɛm egu wo tsir mu dze anyɛnkofa fofor ba. Ɔtse dɛ irukopue nyimpa fofor bi a obotum aboa wo wɔ hia ber mu, ɔma nkenyan na awerɛkyekye, na ɔyɛ nkuranhyɛ fibea ma nsesa a wohia” (“The Power of Scripture,” Ensign, Ɔberɛfɛw 2011, 6). Sɛ ihu Agyenkwa no ho kyerɛwsɛm bi a ɔwɔ ntseasee soronko bi ma wo a—bia ɔno botum ama wo awerɛkyekye wɔ hia ber mu a—susu dɛ ibosũa egu wo tsir mu.

“MySpritualGoal,” video mu no, akataasia bi bɔ adwenpɔw dɛ obosũa “Christ, Ɔtseasefo” (Asɛmpa Nwoma Korabea) no egu ne tsir mu. Ebɛnadze na okenyan wo wɔ no sũahu ho? Ebɛnadze na enya ho atsenkã dɛ okenyan ma ayɛ dze enya nokwar a ɔwɔ “Christ, Ɔtseasefo” wɔ w’akoma na w’adwen mu?

Ama eesũa bi akã ho wɔ mbrɛ Agyenkwa no si hyira hɛn ndɛ no, ibotum esũa adze, etsie, anaa tow ndwom “Minyim Dɛ Me Gyefo Tse Ase” (Asɔr na Mbofra Ndwom, nkanee 38). Obotum ayɛ nkenyan dɛ ibɔhwehwɛ nokwar wɔ asɔr ndwom yi mu a wɔkyerɛkyerɛ so wɔ Nkyerɛkyerɛ na Ahyɛmudzi 6:34; 84:77; 98:18; 138:23.

Hwɛ Nsɛngyinado na Nsɛmbisa, “Jesus Christ,” Asɛmpa Nwoma Korabea so.

Osian Jesus Christ ntsi, mubɔsoɛr efi owu mu.

Joseph Smith nyim mbrɛ ɔtse dɛ ibedzi awerɛhow wɔ adɔfo hɔn wu ho, a n’egya na no nuambanyin beenu kã ho. Joseph na Emma siei hɔn mba beesia, a hɔn mu kor biara enndzi mfe ebien. Fi nyikyerɛ a Nyame dze mae no, Joseph na Emma nyaa onnyiewiei nhumu.

Hwehwɛ nokwar a ɔfa owu ho na Nyame n’onnyiewiei nhyehyɛɛ no wɔ Nkyerɛkyerɛ na Ahyɛmudzi 29:26–27; 42:45–46; 63:49; 88:14–17, 27–31; 93:33–34 mu. Osi dɛn na nokwar yinom nya nhyɛdo wɔ mbrɛ isi hwɛ owu? Osi dɛn na onya nhyɛdo wɔ w’asetsena mu?

Hwɛ 1 Corinthfo 15; Teachings of Presidents of the Church: Joseph Smith (2007), 174–76; Easter.ChurchofJesusChrist.org.

Jesus Christ bɔɔ “werdambɔ a odzi mu” maa me.

Kwan kor a edze betsim Agyenkwa No do Easter ber nye ibosũa nyikyerɛ a ɔwɔ Nkyerɛkyerɛ na Ahyɛmudzi no mu a ɔkyerɛkyerɛ No werdam afɔrbɔ ho nsɛm. Wobotum ehu bi wɔ Nkyerɛkyerɛ na Ahyɛmudzi 18:10–13; 19:16–19; 45:3–5; 76:69–70. Susu dɛ ibɛkyerɛw nokwar a ihu wɔ nyiyimu yi mu no nkorkor. Ama wɔaatow w’adzesũa mu no, ibotum dze bi akã dza akyerɛw no nkorkor ber a ehwehwɛ Luke 22:39–44; 1 John 1:7; 2 Nephi 2:6–9; Mosiah 3:5–13, 17–18; Moroni 10:32–33 mu.

Nsɛmbisa binom nye yi a obotum ama wo kwankyerɛ wɔ w’adzesũa ho.

Ebɛnadze nye Jesus Christ No Werdambɔ no?
Dɛn ntsi na Jesus Christ saan mu yii dɛ Obohu amandze na Oewu ama hɛn?
Ebɛnadze na otwar dɛ menyɛ dze enya N’afɔrbɔ ho nhyira no?
Ebɛn atsenkã na enya wɔ Jesus Christ ho, akenkan nyiyimu yinom ekyir no?

Hwɛ Kyerɛwsɛm no Kwankyerɛ, “Werdambɔ,” Asɛmpa Nwoma Korabea;”Agyenkwa no Hu Amandze wɔ Gethsemane” (video), Asɛmpa Nwoma Korabea so.

Ama eenya adwenkyerɛ bi akã ho no hwɛ bosoom yi Liahona na For the Strength of Youth dawurbɔ nkrataa a wɔdze epue.

Adwenkyerɛ a wɔdze Kyerɛkyerɛ Mbofra Adze

Osian Jesus Christ ntsi, mubɔsoɛr efi owu mu.

Ama akyerɛkyerɛ wo mbofra afa wusoɛr ho no, ibotum ahyɛ ase dze Agyenkwa no wu na Wusoɛr no mfonyin akyerɛ hɔn. Ma wo mbofra nkyɛ dza wonyim wɔ dza osisii yinom ho. Hom so botum atow ndwom tse dɛ “Did Jesus Really Live Again?” Children’s Songbook, 64).
Susu adzesuadze bi a ɔfa biribi pɔkyee ho a obotum aboa wo mbofra ma wɔatse dza ye wu ɔba (hɛn esunsum na honandua papaamu) na sɛ yɛsoɛr fi owu mu a (hɛn esunsum na honandua san ba bɔbɔmu, na hɛn nyimpa dua dzi mu na ɔyɛ bɛkyebo). Mfatoho, ebɛnadze na osi sɛ yeyi battery fi touchlight mu anaa dza ink wɔ mu no fi pɛn no mu a? Ebɛnadze na osi sɛ wɔsan bɔmu bio a? (Hwɛ Alma 11:44–45.)
Ana wo mbofra no nyim obi a woetwa mu kɔ? Ma wɔnkyɛ biribi kakraba bi mfa ankorankor yinom ho, na nkyii hom mbɔmu nkenkan Nkyerɛkyerɛ na Ahyɛmudzi 138:17. Hom nye homho nkasa mfa mbrɛ hɛn atsenkã bɛyɛ sɛ yehu dɛ hɛn adɔfo no bɛsoɛr na woenya nyimpadua bio a.
Sɛ ewɔ mbofra mpanyimfo a, ibotum ato nsa afrɛ hɔn ma wɔahwehwɛ kasasin ahorow a ɔkye Easter amandzɛɛbɔ no wɔ kyerɛwsɛm yinom mu: Nkyerɛkyerɛ na Ahyɛmudzi 63:49; 88:14–17, 27; 138:11, 14–17. Wobotum so dze video no “BecauseHeLives” Asɛmpa Nwoma Korabea ayɛ dɛmara. Yebesi dɛn nye binom akyɛ asɛm yi?

Nkɔnhyɛnyi Joseph Smith hun Jesus Christ.

Ɔwo na wo mbofra bia ɔbɛyɛ hɔn enyigye dɛ wɔbɛkenkan mpɛn soronko ebiasa a Jesus Christ pue Joseph Smith na binom do dɛ mbrɛ wɔakyerɛw no wɔ Joseph Smith—Abakɔsɛm 1:14–17; Nkyerɛkyerɛ na Ahyɛmudzi 76:11–24; 110:1–10. Wo mbofra botum so ahwɛ dza osisii ho mfonyin wɔ dapɛn yi ne dwumadzi krataafa. Ebɛnadze na yesũa fa Jesus Christ ho fi sũahu ebiasa kor biara mu? Dɛn ntsi na ɔyɛ nhyira dɛ ibohu dɛ Joseph Smith na binom hun Agyenkwa no a Ɔasoɛr no?

Osian Jesus Christ ntsi, wobotum wɔdze me bɔn akyɛ me.

Nokwar no a Joseph Smith sũae a ɔfa bɔnfakyɛ a odua Christ mu no botum ama wo mbofra enyidado dɛ wobotum dze hɔn mfom na bɔn akyɛ hɔn. Susu dɛ ibɔto nsa afrɛ wo mbofra ma wɔahyehyɛ no esiado esiado wɔ etsir yinom ase: Ebɛnadze na Agyenkwa no yɛɛ maa me na Ebɛnadze na otwar dɛ meyɛ ma maagye No bɔnfakyɛ. Boa wo mbofra ma wɔnhwehwɛ kyerɛwsɛm yinom mu mfa nhu ndzɛmba a wɔbɔkɔ etsir yinom ase : Nkyerɛkyerɛ na Ahyɛmudzi 18:10–13; 19:16–19; 45:3–5; 58:42–43. Hom nye homho nkyɛ hom enyigye na enyisɔ wɔ dza Agyenkwa no yɛɛ maa hɛn no.
Ibotum so nye wo mbofra no ahwɛ video “The Shiny Bicycle” (Asɛmpa Nwoma Korabea) na wɔakyɛ hɔn sũahu wɔ ber a hom tsee Agyenkwa no no bɔnfakyɛ ne nkã ber a hom nu homho no.

Ama eenya adwenkyerɛ bi akã ho no, hwɛ bosoom yi Friend dawurbɔ krataa a wɔdze epue no.

Christ a Ɔasoɛr no pue Mary do — Christ na Mary wɔ Nda no ho, Joseph Brickey yɛɛ nsaano mfonyin no