Tokāteline mo e Ngaahi Fuakava 29

ʻOku akoʻi ʻe he Tokāteline mo e Ngaahi Fuakava 29 ha ngaahi moʻoni lahi fekauʻaki mo e palani ʻa e ʻOtuá maʻaú. Lolotonga hoʻo laukongá, kumi ha ngaahi moʻoni kuó ke ʻilo fekauʻaki mo e ngaahi konga takitaha ko ʻeni ʻo ʻEne palaní:

• Moʻui ʻi he maama fakalaumālié (vakai, veesi 36–37)

• Fakatupú (vakai, veesi 31–33)

• Ko e Hinga ʻa ʻĀtama mo ʻIví (vakai, veesi 40–41)

• Moʻui fakamatelié (vakai, veesi 39, 42–45)

• Ko e Fakalelei ʻa Sīsū Kalaisí (vakai, veesi 1, 42–43, 46–50)

• Ko e Toetuʻú (vakai, veesi 13, 26)

• Ko e Fakamaau Fakaʻosí (vakai, veesi 12–13, 27–30)

Ko e hā ha ngaahi fakakaukau naʻá ke maʻu? Kapau ʻe ʻaonga kiate koe, te ke lava ʻo hiki kinautolu ʻi he feituʻu ʻoku fakaʻatā atu ʻoku ʻi ai ʻa e ngaahi tā ʻi he ngataʻanga ʻo e lēsoni ko ʻení. ʻOku tākiekina fēfē ʻe he ngaahi moʻoni ko ʻení hoʻo moʻuí?

Vakai foki, Topics and Questions (Ngaahi Tefitó mo e Ngaahi Fehuʻí), “Plan of Salvation” (Palani ʻo e Fakamoʻuí), Gospel Library.

ʻOku folofola ʻa Sīsū Kalaisi kau ki hono tānaki ʻo Hono kakaí “ʻo hangē ko hono tānaki ʻe he motuʻa moá ʻa hono fanga ʻuhikí ki hono lalo kapakaú” (Tokāteline mo e Ngaahi Fuakava 29:2). Ko e hā ʻoku akoʻi atu ʻe he fakahoá ni fekauʻaki mo Sīsū Kalaisí? Ko e hā mo ha toe ngaahi fakakaukau pe ongo ʻokú ke maʻu ʻi hoʻo ako ʻa e fakatātā ʻo ha motuʻa moa mo ha ʻuhiki ʻi he lēsoni ko ʻení? Fakakaukau ki he founga kuó ke ongoʻi ai hono tānaki mo maluʻi koe ʻe Sīsū Kalaisí.

ʻI hoʻo lau ʻa e Tokāteline mo e Ngaahi Fuakava 29:1–11, kumi ha ngaahi fakakaukau fekauʻaki mo e:

• Ko hai ʻe tānakí.

• ʻOku ʻuhinga ki he hā ʻa e “tānaki” kia Kalaisí.

• Ko e hā ʻoku tau tānaki ai kiate Iá.

Fakalaulauloto ki he ʻuhinga ʻokú ke fiemaʻu ai ke tānaki ʻa e kakai kehé kia Sīsū Kalaisí. Ko e hā ʻokú ke ongoʻi ‘oku ueʻi koe ke fai ke tokoní?

6:37

Te ke lava ʻo fehuʻi loto pē ʻa e ngaahi fehuʻi tatau lolotonga hoʻo sio ʻi he vitiō “A Witness of God” (Gospel Library) pe lau pe fanongo ki ha himi fekauʻaki mo e tānaki fakatahá, hangē ko e “ʻIsileli, ʻIsileli, ʻOku Ui ʻa e ʻOtuá” (Ngaahi Himí, fika 6). Ko e hā ʻokú ke ongoʻi ʻoku feinga ʻa e ʻEikí ke akoʻi atu fekauʻaki mo ʻEne ngāue ʻo e tānaki fakatahá?

2:40

Naʻe pehē ʻe Palesiteni Lāsolo M. Nalesoni: “ʻOku fakahoko ʻa e tānakí he taimi ní ʻi he fonua kotoa pē. Kuo tuʻutuʻuni ʻe he ʻEikí ke fokotuʻu ʻa Saione ʻi he fonua kotoa pē kuó Ne foaki ai ki heʻene Kāingalotú honau tupuʻangá mo e tangataʻi fonuá” (“The Gathering of Scattered Israel,” Liahona, Nov. 2006, 81). ʻOku tokoni fēfē ʻa e tānaki fakataha ʻi he founga ko ʻení ke tau “mateuteu ʻi he ngaahi meʻa kotoa pē” ki he Hāʻele ʻAnga Ua Mai ʻa e Fakamoʻuí? (veesi 8; vakai foki, veesi 14–28).

Vakai foki, Russell M. Nelson and Wendy W. Nelson, “ʻAmanakiʻanga ʻo ʻIsilelí” (fakataha lotu fakaemāmani lahi ʻa e toʻu tupú, 3 Sune 2018), Gospel Library; D. Todd Christofferson, “Ko e Tokāteline ʻo e Kau Maí,” Liahona, Nōvema 2022, 53–56; Topics and Questions (Ngaahi Tefitó mo e Ngaahi Fehuʻí), “Gathering of Israel” (Ko Hono Tānaki ʻo ʻIsilelí), Gospel Library.

ʻI hoʻo ako ʻa e Tokāteline mo e Ngaahi Fuakava 29:31–35, fehuʻi pē kiate koe, “Ko e hā ʻa e ʻuhinga ʻoku fakalaumālie kotoa ai ʻa e ngaahi fekaú?” ʻE lava ke ke lisi ha ngaahi fekau ʻe niʻihi mo fakakaukau ki he ngaahi moʻoni fakalaumālie fekauʻaki mo kinautolu takitaha. ʻE lava ke ʻaonga hano toe vakaiʻi ʻo e Ki Hono Fakamālohia ʻo e Toʻu Tupú: Ko ha Fakahinohino ki Hono Fakahoko ha Ngaahi Filí—ʻokú ne akoʻi ha niʻihi ʻo e ngaahi moʻoni taʻengata kau ki he konga lahi ʻo e ngaahi fekau ʻa e ʻOtuá.

ʻOku liliu fēfē ʻa e anga hoʻo vakai ki he ngaahi fekau ʻa e ʻOtuá ʻi hono ʻiloʻi “ʻoku fakalaumālie … ʻa e ngaahi meʻa kotoa peé”? Fakakaukau ke fekumi foki ki ha ʻuhinga pe taumuʻa fakalaumālie ʻi he ngaahi tafaʻaki kehe ʻo hoʻo moʻuí.

Vakai foki, 2 Nīfai 9:39.

Te ke fakaʻaongaʻi fēfē ʻa e Tokāteline mo e Ngaahi Fuakava 29:36–50 ke fakamatalaʻi ʻa e ʻuhinga ʻoku tau fiemaʻu ai ʻa e huhuʻí ʻo fakafou ʻia Sīsū Kalaisí?

Naʻe ʻomi ʻe he Hinga ʻa ʻĀtama mo ʻIví ʻa e maté mo e angahalá ki he māmaní, ka naʻá ne teuteu foki ʻa e hala ki he huhuʻi mo e fiefia ʻia Kalaisí. ʻI hoʻo fakakaukau ki aí, lau ʻa e veesi 39–43 pea fakaʻilongaʻi ʻa e ngaahi foʻi lea mo e ngaahi kupuʻi lea ʻoku nau ʻomi kiate koe ʻa e fiefiá. Ko e hā ʻokú ke saiʻia ai fekauʻaki mo e meʻa naʻe lea ʻaki ʻe ʻĀtama mo ʻIvi kau ki he Hingá ʻi he Mōsese 5:10–12?

Vakai foki, “Why We Need a Savior” (video), Gospel Library.

2:15

• Ke kamataʻi ha fepōtalanoaʻaki fekauʻaki mo e palani ʻa e Tamai Hēvaní maʻatautolú, te ke lava mo hoʻo fānaú ʻo talanoa ki ha taimi naʻá ke faʻu ai ha palani, hangē ko ha folau pe ki hano fakahoko ha ngāue. Te ke lava foki ʻo vahevahe ha ngaahi sīpinga ʻo e palaní, hangē ko ha tohi māhina ʻoku hiki ai ha ngaahi ʻekitivitī pe ko ha ngaahi fakahinohino ki ha meʻa ke ngaohi. Ko e hā ʻoku ʻaonga ai ʻa e palaní? Te mou lava leva ʻo talanoa fekauʻaki mo e meʻa ʻoku finangalo ʻa e Tamai Hēvaní ke fakahokó mo e founga ʻoku tokoniʻi ai kitautolu ʻe Heʻene palaní ke tau fakahoko iá.

• Te ke lava ʻo fakaʻaongaʻi ʻa e ngaahi fakatātā ʻi he fakaʻosinga ʻo e lēsoni ko ʻení ke tokoni ki hoʻo fānaú ke nau kumi ha ngaahi veesi ʻi he Tokāteline mo e Ngaahi Fuakava 29 ʻokú ne akoʻi ha ngaahi konga kehekehe ʻo e palani ʻa e Tamai Hēvaní. Te ke lava foki ʻo kosi ʻo toʻo ʻa e ngaahi fakatātaá pea kole ki hoʻo fānaú ke fokotuʻutuʻu kinautolu ʻi honau hokohoko totonú. Ko e hā ʻoku tau houngaʻia ai ʻi heʻetau ʻilo ʻoku ʻi ai ha palani ʻa e Tamai Hēvaní maʻatautolú? ʻOku tākiekina fēfē ʻetau moʻui fakaʻahó ʻi hono ʻiloʻi iá?

• ʻE lava ke tokoni ʻa e fakatātā ʻi lalo ʻo ha motuʻa moa ʻokú ne tānaki hono ʻuhikí pe ko e vitiō “Chicks and Hens” (ChurchofJesusChrist.org) ke fakakaukauloto hoʻo fānaú ki he talanoa fakatātā ʻi he Tokāteline mo e Ngaahi Fuakava 29:1–2. Hili iá, ʻe lava ke mou lau fakataha ʻa e ngaahi veesi ko ʻení pea mou fetalanoaʻaki fekauʻaki mo e founga ʻoku maluʻi ai ʻe ha motuʻa moa hono ʻuhikí mo e founga ʻoku faitatau ai mo e meʻa ʻe lava ke fai ʻe he Fakamoʻuí maʻatautolú.

  

  1:29

  

• Ko e hā te ne ueʻi fakalaumālie hoʻo fānaú ke nau fie tokoni ki he Fakamoʻuí ke tānaki fakataha Hono kakaí? Mahalo te nau fie fanongo ki ha aʻusia ʻa ha taha naʻe “tānaki” kiate Ia ʻaki ʻene kau ki Hono Siasí. Hangē ko ʻení, ko hai naʻá ne fakafeʻiloaki hoʻo fāmilí ki he Siasí? Kuo tāpuekina fēfē kitautolu ʻi heʻetau tali ʻa e ui ʻa e Fakamoʻuí ke tānaki fakataha kiate Iá? Te tau lava fēfē ʻo tokoni ki he niʻihi kehé ke tānaki kiate Iá? (Vakai, “A Message for Children from President Russell M. Nelson” [video], ChurchofJesusChrist.org.)

  

  3:30

• ʻE lava ke tokoni ha fakatātā ʻo e Hāʻele ʻAnga Ua Mai ʻa e Fakamoʻuí (hangē ko e Tohi Fakatātā ʻo e Ongoongoleleí, fika 66) pe ko ha foʻi hiva fekauʻaki mo ia (hangē ko e “ʻO Ka Ne Ka Toe Haʻú,” Tohi Hiva ʻa e Fānaú, 46–47) ke ke aleaʻi mo hoʻo fānaú ʻa e Tokāteline mo e Ngaahi Fuakava 29:11. Tokoniʻi hoʻo fānaú ke nau fakatokangaʻi ha ngaahi kupuʻi lea ʻi he folofolá ʻoku fekauʻaki mo ha meʻa ʻi he fakatātaá pe hivá. Fevahevaheʻaki hoʻomou ongo fekauʻaki mo e toe hāʻele mai ʻa Sīsū Kalaisi ki māmaní.