Tokāteline mo e Ngaahi Fuakava 2; Siosefa Sāmita—Hisitōlia 1:27–65

Ko e meʻa kehe ʻa e tui naʻe ʻi ai ha ngāue ʻa e ʻOtuá maʻa Siosefa ke ne fakahokó—te tau lava ʻo vakai ki mui ki heʻene moʻuí pea sio lelei ki he meʻa naʻá ne lavaʻí. Ka kuo ʻi ai nai ha taimi kuó ke fakakaukau ai ʻoku ʻi ai foki mo ha ngāue ʻa e ʻOtuá maʻau? ʻI hoʻo lau ʻa e Siosefa Sāmita—Hisitōlia 1:27–33, fakakaukau pe ko e hā ʻa e ngāue ko iá. ʻOku tokoni fēfē ia ki he hokohoko atu hono Fakafoki Mai ʻo e ongoongolelei ʻa e Fakamoʻuí?

Naʻe akoʻi ʻe ʻEletā Keuli E. Sitīvenisoni: “Ko e taimi ʻoku tau haʻu ai kia Kalaisi pea tokoniʻi e niʻihi kehé ke nau fakahoko e meʻa tataú, ʻoku tau kau ai ʻi he ngāue ʻa e ʻOtuá ki he fakamoʻuí mo e hakeakiʻí, ʻa ia ʻoku fakatefito ʻi he ngaahi fatongia kuo fokotuʻu fakalangí. … ʻOku faingofua, fakalangi, fakamānako, mo toʻo ngofua e ngaahi fatongiá ni. Ko kinautolu ʻeni:

• Ko hono moʻui ʻaki e ongoongolelei ʻo Sīsū Kalaisí

• Ko hono tokangaʻi ʻo kinautolu ʻoku faingataʻaʻiá

• Ko hono fakaafeʻi ʻo e kakaí kotoa ke nau tali e ongoongoleleí

• Ko hono fakatahaʻi ʻo e ngaahi fāmilí ke taʻengatá” (“Mātuʻaki Fakaʻofoʻofa—Mātuʻaki Faingofua,” Liahona, Nōvema 2021, 47).

Fakalaulauloto ki he ngaahi aʻusia kuó ke maʻu ʻi hoʻo kau ki he ngaahi fatongia fakalangi takitaha ko ʻení. Ko e hā ʻa e meʻa hoko ʻe finangalo ʻa e Fakamoʻuí ke ke fakahokó? ʻOku ʻi ai ha peesi ʻo e Ngaahi Tefitó mo e Ngaahi Fehuʻí ki he ngaahi fatongia takitaha ko ʻení (vakai, “Our Role in God’s Work of Salvation and Exaltation” [Ko Hotau Fatongia ʻi he Ngāue ʻa e ʻOtuá ki he Fakamoʻuí mo e Hakeakiʻí], Gospel Library). Te ke lava ʻo vakaiʻi ʻa e ngaahi peesi ko ʻení ke tokoni ke tali ʻa e fehuʻi ko ʻení.

Mahalo te ke ongoʻi ʻi he taimi ʻe niʻihi he ʻikai lava ke fakaʻaongaʻi koe ʻe he ʻEikí koeʻuhí ko ha ngaahi fehalaaki kuó ke fai. Ko e hā ʻokú ke ako mei he aʻusia ʻa Siosefa Sāmita ‘i he Siosefa Sāmita—Hisitōlia 1:28–29? Te ke lava fēfē ʻo ʻiloʻi ho “tuʻunga ʻi [he] ʻao [ʻo e ʻOtuá]”?

Vakai, “Youth Responsibility in the Work of Salvation (Fatongia ʻo e Toʻu Tupú ʻi he Ngāue ʻo e Fakamoʻuí” (vitiō), ChurchofJesusChrist.org; “Ngāue ʻa e ʻOtuá ki he Fakamoʻuí mo e Hakeakiʻí,” Tohi Tuʻutuʻuni Fakakātoá, 1.2.

3:15

ʻI he hā ʻa Molonai kia Siosefa Sāmitá, naʻá ne lave ki ha ngaahi kikite ʻi he Fuakava Motuʻá mo e Fuakava Foʻoú, hangē ko e ʻĪsaia 11; Ngāue 3:22–23; mo e Soeli 2:28–32. ʻI hoʻo lau ʻa e Siosefa Sāmita—Hisitōlia 1:34–47, fakakaukau ki he ʻuhinga naʻe mei mahuʻinga ai ke ʻiloʻi ʻe Siosefa ʻa e ngaahi kikite ko ʻení. Ko e hā ʻoku mahuʻinga ai ke ke ʻilo ki aí?

Te ke lava foki ʻo lau ʻa e meʻa naʻe akoʻi ʻe ʻEletā Tēvita A. Petinā fekauʻaki mo e fuofua ʻaʻahi ʻa Molonai kia Siosefa Sāmita ʻi he “ʻAki e Mālohi ʻo e ʻOtuá ʻi he Fuʻu Nāunau Lahi” (Liahona, Nōvema 2021, 28).

13:17

Vakai foki, “Kuo Puna ʻa e ʻĀngelo,” Ngaahi Himí, fika 8.

Naʻe taʻu 17 pē ʻa Siosefa ʻi he taimi naʻá ne fuofua mamata ai ki he ʻū lauʻi peleti koulá. Ka neongo ia, naʻe ʻikai fakafalala ange ke ne tokangaʻi ʻa e ʻū lauʻi peletí, kae ʻoua kuo ʻosi ha taʻu ʻe fā mei ai. Lau ʻa e Siosefa Sāmita—Hisitōlia 1:48–60, ʻo kumi ʻa e meʻa naʻe hoko ʻi he moʻui ʻa Siosefá lolotonga ʻa e taimi ko iá. ʻOkú ke pehē naʻe teuteuʻi fēfē ia ʻe he ngaahi meʻa ko ʻeni naʻe hokó ki he ngāue naʻe ui ia ʻe he ʻOtuá ke ne faí? Ko e hā ha ngaahi meʻa kuó ke aʻusia kuó ne teuteuʻi koe ke ke tauhi ki he ʻOtuá mo e niʻihi kehé? Ko e hā ʻokú ke lolotonga aʻusia ʻe lava ʻo tokoni atu ke ke teuteu ai ki ha ngāue tokoni ʻi he kahaʻú?

Ko e hā ʻoku akoʻi atu ʻe he ngaahi foʻi lea hangē ko e “tō,” “loto,” mo e “liliu” ‘i he vahe ko ʻení ʻo kau ki he misiona ʻo ʻIlaisiaá mo e ngaahi tāpuaki ʻo e ngaahi kī ʻo e lakanga fakataulaʻeikí naʻá ne fakafoki maí? Kuó ke ongoʻi fēfē ha liliu ho lotó ki hoʻo ngaahi kuí? Fakakaukauʻi ha ngaahi founga te ke lava ai ʻo aʻusia lahi ange ʻa e ngaahi ongo peheé. Ko ha founga ʻe taha ko e fekumi ki hoʻo ngaahi kuí mo hono fakahoko ha ngaahi ouau maʻanautolu ʻi he temipalé (vakai, FamilySearch.org). Ko e hā mo ha toe founga te ke lava ʻo fakakaukau ki ai?

Vakai foki, Tokāteline mo e Ngaahi Fuakava 110:13–16; Gerrit W. Gong, “Fiefia Taʻengatá,” Liahona, Nōvema 2022, 83–86.

• ʻOku tau faʻa ongoʻi kotoa ʻi he taimi ʻe niʻihi ʻoku tau “halaia koeʻuhí ko [hotau] vaivaí mo e ngaahi melé,” ʻo hangē ko ia naʻe lea ʻaki ʻe Siosefa Sāmitá. Te ke lava mo hoʻo fānaú ʻo ako fakataha ʻa e Siosefa Sāmita—Hisitōlia 1:29, ʻo kumi ʻa e meʻa naʻe fai ʻe Siosefa ʻi heʻene ongoʻi peheé. Ko e hā te tau lava ʻo ako mei heʻene sīpingá ʻe ala tokoni ʻi he taimi ʻoku tau fai ai ha fehalaākí? Ko e hā ʻoku mahuʻinga ai ke ʻiloʻi naʻe ui ʻe he ʻOtuá ʻa Siosefa neongo ne ʻikai ke ne haohaoa?

• Mahalo naʻa fiefia hoʻo fānaú ʻi haʻanau fakangalingali ko Siosefa Sāmita kinautolu ʻi hoʻo fakamatala ange ki he ngaahi ʻaʻahi ʻa Molonaí ʻi he Siosefa Sāmita—Hisitōlia 1:27–54 pe “Vahe 3: Ko e ʻĀngelo ko Molonaí mo e ʻŪ Lauʻi Peleti Koulá” (ʻi he Ngaahi Talanoa ʻo e Tokāteline mo e Ngaahi Fuakavá, 13–17). Hangē ko ʻení, te nau lava ʻo kūnima ʻo hangē ʻoku nau lotú pe fakangalingali ʻoku nau kaka ʻi he Moʻunga ko Komolá, mo e alā meʻa pehē. Hili iá, ʻe lava ke ke kole ange ke nau talanoa fekauʻaki mo e meʻa naʻe ui ʻe he ʻOtuá ʻa Siosefa Sāmita ke ne faí mo e founga ʻoku tāpuekina ai kitautolu ko ha ola ʻo e meʻa ko iá. Hangē ko ʻení, kuo tāpuekina fēfē kitautolu koeʻuhí naʻe liliu ʻe Siosefa Sāmita ʻa e Tohi ʻa Molomoná? Kuo tokoniʻi fēfē kitautolu ʻe heʻene ngāué ke tau ofi ange ki he Tamai Hēvaní mo Sīsū Kalaisi?

2:29

3:45

• Mahalo te ke fiefia mo hoʻo fānaú ke sio ki ha ngaahi tā ʻo homou fāmilí, ʻe lava ke kau ai ha tā homou fāmilí ʻi ha temipale (pe vakai ki he Tohi Fakatātā ʻo e Ongoongoleleí, fika 120). Te mou lava leva ʻo lau ʻa e Tokāteline mo e Ngaahi Fuakava 2 pea fevahevaheʻaki hoʻomou ngaahi fakakaukau fekauʻaki mo e ʻuhinga ʻoku tau maʻu ai ha ngaahi temipalé mo e ʻuhinga ʻoku finangalo ai ʻa e Tamai Hēvaní ke fakataha ʻa e ngaahi fāmilí ʻo taʻengatá. Fakakaukau ke hivaʻi fakataha ʻa e “Ko e Fāmilí ke Taʻe Ngata” (Tohi Hiva ʻa e Fānaú, 98). Ko e hā ʻoku talamai ʻe he hiva ko ʻení te tau lava ʻo fai ke nofo ʻo taʻengata mo hotau fāmilí?

• ʻE lava ke fiefia ʻa e fānaú mo ongoʻi vēkeveke fekauʻaki mo e hisitōlia fakafāmilí. Ke tokoniʻi kinautolú, te ke lava ʻo vahevahe ha ngaahi talanoa pe fakatātā ʻo hoʻo ngaahi kuí. Talanoa mo hoʻo fānaú fekauʻaki mo e tuʻunga ʻo e moʻuí ki heʻenau ngaahi kuí ʻi heʻenau kei īkí. ʻE lava foki ke fiefia hoʻo fānaú ʻi ha niʻihi ʻo e ngaahi ʻekitivitī hisitōlia fakafāmili ʻi he FamilySearch.org/discovery.