Siosefa Sāmita—Hisitōlia 1:1–26

Ko e taumuʻa ʻo e hisitōlia ʻo Siosefa Sāmitá ke “foaki ʻa e moʻoní” kiate kitautolu koeʻuhí naʻe faʻa fakakeheʻi ʻa e moʻoni fekauʻaki mo Siosefá (Siosefa Sāmita—Hisitōlia 1:1). ‘I hoʻo lau ʻa e Siosefa Sāmita—Hisitōlia 1:1–26, ko e hā ʻa e meʻa ʻokú ne fakamālohia hoʻo fakamoʻoni ki hono uiuiʻi fakalangí?

Vakai foki, Kau Māʻoniʻoní, 1:3–19.

Kuó ke “masiva ‘i he potó” pe ongoʻi puputuʻu nai kau ki ha fili ne fiemaʻu ke ke fai? (Siosefa Sāmita—Hisitōlia 1:13). ʻE lava ke hoko ʻa e ʻausia naʻe maʻu ʻe Siosefa Sāmita ʻi he 1820 ko ha sīpinga lelei ki hoʻo fakahā fakatāutahá. Hangē ko ʻení, ʻi hoʻo fekumi ʻi he Siosefa Sāmita—Hisitōlia 1:5–25, kumi ha ngaahi aʻusia te ke lava ʻo fakafekauʻaki ki ai. Ko e hā ʻokú ke ako fekauʻaki mo e:

• Founga naʻe teuteu ai ʻa Siosefa ki ha aʻusia toputapu ʻi he lotú? (vakai, veesi 8, 11, 14–15).

• Ko e fatongia ʻo e ako folofolá ʻi he fekumi ki ha fakahaá? (vakai, veesi 11–12).

• Meʻa ke fai ʻi hoʻo fehangahangai mo ha fakafepakí? (vakai, veesi 15–16, 21–26).

• Tali mo ngāueʻi ʻa e ngaahi tali ʻokú ke maʻú? (vakai, veesi 18–25).

Ko e hā mo ha ngaahi fakakaukau kehe te ke lava ʻo maʻu mei he fakamatala ʻa Palesiteni Henelī B. ʻAealingi “Ko e ʻUluaki Mata Meʻa-Hā-Maí: Ko ha Sīpinga ki he Fakahā Fakatāutahá”? (Liahona, Fēpueli 2020, 12–17).

Te ke lava foki ʻo kumi ha ngaahi sīpinga kehe ʻi he folofolá ʻo ha kakai ʻoku fetuʻutaki mo e ʻOtuá. ʻE lava ke ʻoatu ha ngaahi fakakaukau ʻe he ʻū tā ʻi he Tohi Fakatātā ʻo e Ongoongoleleí pe ko e ngaahi tohi kehe ʻo e Haʻu, ʻo Muimui ʻIate Aú. Feinga ke tali ʻa e ngaahi fehuʻi naʻe hiki kimuʻa atu ki he sīpinga takitaha ʻokú ke maʻú. Ko e hā ha ngaahi aʻusia kuó ke maʻu ʻi hono maʻu ha ngaahi tali ki ha lotú? Ko e hā te ke lava ʻo fai ke tokoni ki he niʻihi kehé ke nau maʻu foki mo ha ngaahi aʻusia ʻoku leleí?

Vakai foki, Russell M. Nelson, “Fanongo kiate Ia,” Liahona, Mē 2020, 88–92; Topics and Questions (Ngaahi Tefitó mo e Ngaahi Fehuʻí), “Personal Revelation” (Fakahā Fakatāutahá), Gospel Library.

Naʻe falala ʻa Siosefa Sāmita ʻe tali ʻe he ʻOtuá ʻene lotú, ka naʻe ʻikai te ne ʻamanaki ʻe liliu ʻe he tali ko iá ʻene moʻuí—pea mo e māmaní. ‘I hoʻo laukonga fekauʻaki mo e aʻusia ʻa Siosefá, fakalaulauloto ki he founga kuo liliu ai ʻe he ngaahi ola ʻo e ʻUluaki Mata Meʻa-Hā-Maí hoʻo moʻuí.

Hangē ko ʻení, naʻe fakahā ʻe he ʻUluaki Mata Meʻa-Hā-Maí ha ngaahi moʻoni fekauʻaki mo e ʻOtua ko e Tamaí mo Hono ʻAlo ko Sīsū Kalaisí, ʻa ia naʻe kehe mei he meʻa naʻe tui ki ai ha kakai tokolahi ʻi he kuonga ʻo Siosefá. ʻI hoʻo lau ʻa e Siosefa Sāmita—Hisitōlia 1:15–20, fakakaukau ke hiki ha ngaahi founga kehekehe ke fakakakato ʻaki ha fakamatala hangē ko ʻení: “Koeʻuhí naʻe hoko ʻa e ʻUluaki Mata Meʻa-Hā-Maí, ʻoku ou ʻiloʻi …”

Ko e hā ha ngaahi ongo ʻokú ke maʻu ʻi hoʻo fakalaulauloto ki he aʻusia ʻa Siosefá pea mo e meʻa kotoa pē naʻe tupu mei aí?

Vakai foki, “Ask of God: Joseph Smith’s First Vision (Fehuʻi ki he ʻOtuá: ʻUluaki Mata Meʻa-Hā-Mai ʻa Siosefa Sāmitá” (vitiō), Gospel Library; “Ko e Fua Lotu ʻa Siosefá,” Ngaahi Himí, fika 14.

6:35

Lolotonga ʻa e moʻui ʻa Siosefa Sāmitá, naʻá ne lekooti ʻene aʻusia ʻi he Vaoʻakau Tapú ʻo ʻikai toe siʻi hifo ʻi he tuʻo faá, ʻo faʻa fakaʻaongaʻi ha tangata tohi. ‘Ikai ngata aí, ne hiki ha ngaahi fakamatala ʻe ha niʻihi kehe naʻa nau fanongo ʻi ha talanoa ʻa Siosefa fekauʻaki mo ʻene mata meʻa-hā-maí. Neongo ‘oku kehekehe ʻa e ngaahi fakamatala ko ʻení ʻi ha ngaahi fakaikiiki ʻe niʻihi, ʻo makatuʻunga ʻi he tokotaha tohí, kau fanongó mo e feituʻú, ka ʻoku nau tatau pē. Pea ʻoku tānaki atu ʻe he fakamatala takitaha ha ngaahi fakaikiiki ke mahino lelei ange kiate kitautolu ʻa e aʻusia ʻa Siosefa Sāmitá, ʻo hangē pē ko e tokoniʻi kitautolu ʻe he faaʻi Kosipeli ʻo e Fuakava Foʻoú ke mahino lelei ange ʻa e ngāue ʻa e Fakamoʻuí.

Vakai foki, Topics and Questions (Ngaahi Tefitó mo e Ngaahi Fehuʻí), “First Vision Accounts” (Ngaahi Fakamatala ʻo e ʻUluaki Mata Meʻa-Hā-Maí), Gospel Library.

Hili ʻa e ʻUluaki Mata Meʻa-Hā-Mai fakaofo ʻa Siosefa Sāmitá, naʻe fakanatula pē ʻene loto ke vahevahe ʻene aʻusiá mo e niʻihi kehé. Naʻe fakaʻohovale kiate ia ʻa e fakafepaki naʻá ne fehangahangai mo iá. ‘I hoʻo lau ʻene fakamatalá, ko e hā ha meʻa ʻokú ne ueʻi koe ke ke kei tuʻu maʻu ʻi hoʻo fakamoʻoní? Ko e hā mo ha ngaahi sīpinga kehe—mei he folofolá, ko ha kui, pe kakai ʻokú ke ʻiloʻi—ʻoku nau fakalotolahiʻi koe ke ke tuʻu maʻu ʻi he ngaahi aʻusia fakalaumālie kuó ke maʻú?

Vakai foki, Gary E. Stevenson, “Ko Hono Tanumaki mo Vahevahe Hoʻo Fakamoʻoní,” Liahona, Nōvema 2022, 111–14.

• ʻE ala tokoni ʻa e ako fekauʻaki mo e kei talavou ʻa Siosefa Sāmitá ke fakafekauʻaki hoʻo fānaú kiate ia ʻi heʻenau ako mei heʻene ngaahi aʻusiá. Mahalo te nau lava ʻo pukepuke ha fakatātā ʻo Siosefa Sāmita pea vahevahe ʻa e meʻa ʻoku nau ʻilo fekauʻaki mo iá. Kapau ʻe fiemaʻu, te ke lava ʻo tānaki atu ha ngaahi moʻoniʻi meʻa fekauʻaki mo ia mei he Siosefa Sāmita—Hisitōlia 1:3–14 (vakai foki, “Vahe 1: Ko Siosefa Sāmita mo Hono Fāmilí,” ʻi he Ngaahi Talanoa ʻo e Tokāteline mo e Ngaahi Fuakavá, 6–8). Ko e hā naʻe aʻusia ʻe Siosefa naʻe tokoni ke teuteuʻi ia ke hoko ko ha palōfitá? Ko e hā nai ʻe teuteuʻi kitautolu ʻe he ʻOtuá ke tau fakahokó?

  

  3:22

• Fakakaukau ke fakaʻaliʻali ki hoʻo fānaú ha ngaahi tohi kehekehe, kau ai ʻa e folofolá. Tokoniʻi kinautolu ke nau fakakaukau ki ha ngaahi fehuʻi ʻe lava ke tali ʻe he ngaahi tohi ko ʻení. Hili iá, lau fakataha ʻa e Siosefa Sāmita—Hisitōlia 1:10–11 ke ʻiloʻi pe ko e hā ʻa e ngaahi fehuʻi ne maʻu ʻe Siosefa Sāmitá pea mo e ngaahi tali naʻá ne maʻu ʻi he folofolá.

• ʻE lava ke maʻu ʻe hoʻo fānaú ha ngaahi foʻi lea ʻi he veesi 12 ʻokú ne fakamatalaʻi ʻa e founga naʻe tokonia ai ʻa Siosefa ʻi heʻene lau ʻa e Sēmisi 1:5. Hili iá ʻe lava ke mou fevahevaheʻaki ha ngaahi aʻusia naʻe tākiekina mālohi ai kimoutolu ʻe ha potufolofola. Te mou lava foki ʻo hivaʻi fakataha ha foʻi hiva fekauʻaki mo e lau folofolá, hangē ko e “Fekumi, Fifili pea mo Lotu” (Tohi Hiva ʻa e Fānaú, 66). Ko e hā ʻoku akoʻi ʻe he foʻi hivá fekauʻaki mo e ʻuhinga ʻoku tau lau ai ʻa e folofolá?

• Ke kamataʻi ha fealēleaʻaki fekauʻaki mo e founga ʻo ʻetau fetuʻutaki mo e Tamai Hēvaní, mahalo te ke lava mo hoʻo fānaú ʻo ʻeke fehuʻi ʻiate kimoutolu ʻo fakaʻaongaʻi ha ngaahi founga fetuʻutaki kehekehe, hangē ko ha pōpoaki text, telefoni, pe ko ha kiʻi nouti tohinima. Ko e hā ʻa e founga ʻoku tau fai ai ha ngaahi fehuʻi ki he Tamai Hēvaní? ʻOku tau fakahaaʻi fēfē kiate Ia ʻoku tau ʻofa mo fakaʻapaʻapa kiate Ia ʻi heʻetau ngaahi lotú? Lau fakataha ʻa e Siosefa Sāmita—Hisitōlia 1:16–19 pea aleaʻi ʻa e founga naʻe tali ai ʻe he Tamai Hēvaní ʻa e lotu ʻa Siosefa Sāmitá. Te ke lava leva mo hoʻo fānaú ʻo vahevahe ha ngaahi aʻusia ʻi he taimi naʻá ke kole tokoni ai ki he ʻOtuá pea maʻu ha talí.

• Mahalo ʻe fiefia ʻa e fānau īkí ke fakamafao honau nimá ke hangē ha ʻuluʻakau ʻi he Vaoʻakau Tapú lolotonga hoʻo fakamatala kiate kinautolu fekauʻaki mo e ʻUluaki Mata Meʻa-Hā-Maí. Kole ki he fānaú ke nau sēlue ʻo hangē ʻoku puhi kinautolu ʻe he havilí lolotonga hoʻo talanoa fekauʻaki mo e lotu ʻa Siosefá. Kole ange leva ke nau tuʻu maʻu mo fakalongolongo ʻi hoʻo fakamatala ki he hā mai ʻa e Tamai Hēvaní mo Sīsū kia Siosefá.

• Mahalo ʻe fiefia ʻa e fānau lalahi angé ʻi hono fakaʻaongaʻi ha fakatātā ʻe taha pe lahi ange ʻi he fokotuʻutuʻu ko ʻení ke talaatu ʻa e meʻa ʻoku nau ʻilo fekauʻaki mo e ʻUluaki Mata Meʻa-Hā-Maí. Poupouʻi kinautolu ke vakai ki he Siosefa Sāmita—Hisitōlia 1:14–17 pea vahevahe ʻenau ngaahi fakakaukau mo e ongo fekauʻaki mo e aʻusia ʻa Siosefá (vakai foki, “Vahe 2: Ko e ʻUluaki Mata Meʻa-hā-mai ʻa Siosefa Sāmitá,” ʻi he Ngaahi Talanoa ʻo e Tokāteline mo e Ngaahi Fuakavá, 9–12).

  

  3:22