“Cuaj Hlis Ntuj 16–22: ‘Tsa Koj lub Taub Hau thiab Cia Li Zoo Siab.’ 3 Nifais 1–7,” Los, Nrog Kuv Mus—Siv hauv Tsev thiab lub Koom Txoos: Phau Ntawv Maumoos 2024 (2023)
“Cuaj Hlis Ntuj 16–22. 3 Nifais 1–7,” Los, Nrog Kuv Mus—Siv hauv Tsev thiab lub Koom Txoos: 2024 (2023)
Ib Hnub, Ib Hmos, thiab Ib Hnub, los ntawm Jorge Cocco
Cuaj Hlis Ntuj 16–22: “Tsa Koj lub Taub Hau thiab Cia Li Zoo Siab”
3 Nifais 1–7
Yeej yog ib lub sij hawm zoo siab heev ua ib tug neeg ntseeg Yexus Khetos. Twb tau muaj raws li tej lus qhia txog tej yuav muaj los yav tom ntej—tej cim thiab tej txuj ci tseem ceeb twb tau qhia tias tsis ntev tus Cawm Seej yuav yug los. Tiam sis, kuj yog ib lub sij hawm rau cov ntseeg txhawj xeeb heev vim, txawm muaj tej txuj ci tseem ceeb no, cov tsis ntseeg hais tias “lub sij hawm … twb dhau lawm” rau tus Cawm Seej txoj kev yug los (3 Nifais 1:5). Cov neeg no twb “ua kev xeeb txob loj heev thoob plaws rau hauv thaj av” (3 Nifais 1:7) thiab twb teem ib hnub muab cov ntseeg tua yog tias tej uas Xamuyees tus Neeg Lamas qhia tias yuav muaj—ib hmos uas tsis muaj kev tsaus ntuj—tseem tsis tau tshwm sim.
Thaum muaj tej xwm txheej uas sim siab li no, tus yaj saub Nifais “sib zog thov nws tus Vajtswv pab nws cov neeg” (3 Nifais 1:11). Tus Tswv tej lus teb yeej pab tau leej twg uas raug kev tsim txom los sis ua xyem xyav thiab xav paub tias txoj kev kaj yuav kov yeej txoj kev tsaus ntuj: “Cia li tsa koj lub taub hau thiab cia li zoo siab; … kuv yeej yuav ua kom muaj raws li tag nrho tej uas kuv tau txib kom kuv cov yaj saub uas dawb huv lub qhov ncauj hais” (3 Nifais 1:13).
Tej Tswv Yim Pab Qhia hauv Tsev thiab lub Koom Txoos
Yuav tsum ua siab ntev thiab siv zog kom hloov siab los ntseeg Yexus Khetos txoj moo zoo.
3 Nifais 1–7 piav txog tib neeg uas hloov siab los ntseeg tus Tswv thiab lwm tus uas tsis hloov siab. Ob pawg no sib txawv li cas? Ib daim phiaj zoo li muaj nram qab no tej zaum yuav pab koj sau koj tej kev xav tseg cia:
|
Tej yam uas tsis ntxiv zog rau kev hloov siab los ntseeg |
Tej yam uas ntxiv zog rau kev hloov siab los ntseeg | |
|---|---|---|
|
Tsis ntseeg tus yaj saub tej lus thiab thab luag thuam cov neeg ncaj ncees |
Ntseeg tus yaj saub cov lus thiab thov Vajtswv kom txais kev pab | |
Nug koj tus kheej thaum koj kawm. Piv txwv hais tias, thaum koj sau ntawv no, koj nug tau “Vajtswv xav kom kuv kawm dab tsi los ntawm qhov no?” Qhov no yuav caw tus Vaj Ntsuj Plig Dawb Huv los tshoov koj lub siab.
Vim muaj Yexus Khetos, kuv “cia li zoo siab.”
Koj Leej Txiv Saum Ntuj Ceeb Tsheej paub tias koj yuav raug tej yam nyuaj los sis txaus ntshai hauv koj lub neej. Tiam sis Nws xav kom koj muaj kev xyiv fab. Nyeem 3 Nifais 1:1–23 kom kawm yog vim li cas cov neeg Nifais uas rau siab ntseeg tau ntshai heev. Vim li cas tus Tswv tau hais kom lawv “cia li zoo siab”?
Tus Cawm Seej tau siv lo lus “cia li zoo siab” ntau zaus—piv txwv hais tias, nyob hauv Mathais 14:24–27; Yauhas 16:33; Lus Qhuab Qhia thiab Kev Khi Lus 61:36; 78:17–19. Koj xav li cas txog tej lus caw no? Tej zaum koj yuav xav nyeem tej nqe vaj lug kub kom to taub vim li cas tus Cawm Seej hais lus li no. Txhua lub sij hawm, Nws hais li cas kom pab cov neeg fim tej yam uas lawv ntshai? Nws tau ua li cas kom ua li no rau koj?
Tej zaum koj xav nyeem Thawj Tswj Hwm Russell M. Nelson zaj lus, “Kev Xyiv Fab thiab Kev Nyiaj Kom Dhau ntawm Sab Ntsuj Plig” (Liyahaunas, Kaum Ib Hlis Ntuj 2016, 81–84). Thawj Tswj Hwm Nelson qhia dab tsi rau koj txog txoj kev nrhiav kev xyiv fab txhua lub sij hawm? Xyuas seb tau siv lo lus “tsom ntsoov” pes tsawg zaus. Tej zaum koj yuav xav muab ib lub koob yees duab piv rau txoj kev tsom ntsoov rau Yexus Khetos. Koj yuav ua li cas kom siv zog tsom ntsoov rau Nws ntxiv?
Kuj saib “Kev Tu Siab,” “Kev Cia Siab,” “Kho Sab Paj Hlwb,” los sis lwm yam nyob hauv “Kev Pab lub Neej” nyob hauv Txoj Moo Zoo cov Ntawv.
Tus Tswv yuav ua kom muaj raws li tag nrho Nws tej lus raws li Nws lub sij hawm.
Nyeem 3 Nifais 1:4–7 thiab xav seb koj yuav xav li cas yog hais tias koj yog ib tug uas ntseeg. Lawv tau ua li cas kom lawv txoj kev ntseeg ruaj khov? (saib 3 Nifais 1:4–21 thiab 5:1–3). Twb tau muaj li cas kom thiaj li muaj raws li Xamuyees tej lus? (saib 3 Nifais 1:19–21). Tus Cawm Seej tau ua li cas kom muaj raws li Nws tej lus nyob hauv koj lub neej?
3 Nifais 1:4–15; 5:12–26; 6:10–15; 7:15–26
Kuv yog Yexus Khetos ib tug thwj tim.
Maumoos hais tias, “Saib seb, kuv yog Yexus Khetos ib tug thwj tim” (3 Nifais 5:13). Cov lus no muaj lub ntsiab zoo li cas rau koj? Tej zaum koj yuav xav nyeem 3 Nifais 1:4–15; 5:12–26; 6:10–15; thiab 7:15–26, nrhiav Khetos cov thwj tim tej cwj pwm zoo, kev ntseeg, thiab tej kev ua.
Kuj saib “I’m Trying to Be like Jesus,” Children’s Songbook,, 78.
Thaum kuv muab siab rau ntseeg Yexus Khetos, kuv tsis tas ntshai.
Zaj lus hais txog thaum cov Neeg Nifais raug cov neeg tub sab los tej zaum muaj tej lus qhia uas yuav pab koj nrog tej kev phom sij ntawm sab ntsuj plig uas koj ntsib. Xav txog tej yam uas koj kawm nyob hauv 3 Nifais 2:11–12 thiab 3:1–26. Piv txwv hais tias koj kawm Nkidi-ahais cov lus nyob hauv 3 Nifais 3:2–10 thiab muab piv rau txoj kev uas Dab Ntxwg Nyoog sim ntxias koj. Koj kawm dab tsi los ntawm Lakhoonias tus yam ntxwv?
Yog xav tau tswv yim ntxiv, saib tej phau xov xwm Liyahaunas thiab Ntxiv Dag Zog rau cov Tub Hluas Ntxhais Hluas rau lub hlis no.
Tej Tswv Yim Pab Qhia cov Me Nyuam
Ib lub hnub qub tshiab tshwm sim thaum Yexus Khetos yug los.
-
Phab ntawv ntxim ua rau lub lim tiam no pab tau koj cov me nyuam kawm txog tej txuj ci tseem ceeb uas cov Neeg Nifais pom thaum Yexus yug los. Tej zaum koj kuj yuav xav siv “Tshooj 41: Cov Cim Thaum Khetos Yug Los” (Cov Dab Neeg hauv Phau Ntawv Maumoos, 114–16) koj qhia zaj dab neeg no—los sis kom pab lawv qhia rau koj.
Yeej yuav muaj raws li cov yaj saub hais.
-
Thaum koj thiab koj cov me nyuam nyeem 3 Nephi 1:4–10, caw kom lawv sib tham txog qhov uas yuav zoo li cas yog tias yus yog ib tug ntseeg nyob rau lub sij hawm ntawd. Ces, thaum lawv nyeem zaj dab neeg nyob hauv nqe 11–15, tej zaum lawv yuav xav qhia tias yuav hais li cas kom hais kab lus no tiav: “Zaj lus qhia kuv tias …”
-
Tej zaum koj cov me nyuam yuav pab koj xav txog lwm lub sij hawm thaum Vajtswv ua raws li Nws tej lus cog tseg uas muab los ntawm Nws tus yaj saub. Tej zaum lawv yuav nyiam nrhiav duab txog tej zaj dab neeg no nyob hauv Phau Muaj Duab txog Txoj Moo Zoo (saib, ua piv txwv, naj npawb 7–8 thiab 81). Cia koj cov me nyuam qhia seb lawv paub dab tsi txog cov dab neeg no, thiab vim li cas tau ua raws li Vajtswv tej kev cog lus. Nyeem 3 Nephi 1:20 ua ke, thiab hais koj zaj lus tim khawv txog qhov tseeb no.
3 Nifais 2:11–12; 3:13–14, 24–26
Peb muaj zog dua thaum peb sib sau ua ke.
-
Pab koj cov me nyuam kawm vim li cas cov Neeg Nifais tau sib sau ua ke thiab tej koob hmoov uas los rau lawv nyob hauv 3 Nifais 2:11–12 thiab 3:13–14, 24–26. Vim li cas peb yuav tsum sib sau ua ke hauv peb tsev neeg thiab tim lub tsev koom txoos?
-
Koj puas paub txog ib txoj kev siv khoom qhia txog lub zog uas los ntawm kev sib koom siab? Tej zaum koj cov me nyuam xav sim lov ib tug pas ces ib pob pas los sis rhuav ib daim ntawv ces ib pawg ntawv. Vim li cas peb zoo li cov pas los sis cov ntawv?
3 Nifais 5:12–26; 6:14; 7:15–26
Kuv yog Yexus Khetos ib tug thwj tim.
-
Tom qab nej nyeem 3 Nifais 5:13 ua ke, caw kom koj cov me nyuam hais lo lus “Kuv yog Yexus Khetos ib tug thwj tim.” Xwv kom kawm seb kev ua Yexus Khetos ib tug thwj tim zoo li cas, ces cia li nyeem txog cov yam ntxwv no ua ke: cov Neeg Lamas hloov siab los ntseeg (saib 3 Nifais 6:14), Maumoos (saib 3 Nifais 5:12–26), thiab Nifais (saib 3 Nifais 7:15–26). Tej zaum koj yuav xav nrhiav tswv yim los ntawm ib zaj nkauj zoo li “I’m Trying to Be like Jesus” (Children’s Songbook, 78–79).
-
Pab koj cov me nyuam kos lawv txhais tes saum ib daim ntawv thiab txiav tawm. Sau “Kuv yog Yexus Khetos ib tug thwj tim” rau ntawm ib sab, thiab caw kom lawv kos duab ntawm txoj kev ua ib tug thwj tim nyob rau sab nraud.
Yog xav tau tswv yim ntxiv, saib phau xov xwm Phooj Ywg rau lub hlis no.
Ib Hnub, Ib Hmos, thiab Ib Hnub, los ntawm Walter Rane