“Yim Hli Ntuj 12–18: ‘Sawv Khov Kho Muab Siab rau Ntseeg Khetos.’ Amas 43–52,” Los, Nrog Kuv Mus—Siv hauv Tsev thiab lub Koom Txoos: Phau Ntawv Maumoos 2024 (2023)
“Yim Hli Ntuj 12–18. Amas 43–52,” Los, Nrog Kuv Mus—Siv hauv Tsev thiab lub Koom Txoos: 2024 (2023)
Rau cov Koob Hmoov ntawm Kev Ywj Pheej, los ntawm Scott M. Snow
Yim Hli Ntuj 12–18: “Sawv Khov Kho Muab Siab rau Ntseeg Khetos”
Amas 43–52
Thaum peb nyeem tej lus no nyob hauv Amas tshooj 43—“Thiab nim no kuv rov qab hais ib zaj uas hais txog tej kev ua rog ntawm cov Neeg Nifais thiab cov Neeg Lamas”—peb yeej xav paub vim li cas Maumoos tau hais tej zaj dab neeg txog kev ua tsov ua rog thaum nws tsis muaj chaw hauv cov phiaj (saib Maumoos cov Lus 1:5). Peb yeej muaj kev tsov kev rog ntau hauv hnub nyoog kawg no, tiam sis nws tej lus muaj nqi heev tsis yog vim nws piav txog tej lub tom txwv thiab kev nyuaj siab uas los ntawm kev tsov kev rog xwb. Nws tej lus kuj npaj peb lub siab rau kev tsov kev rog uas “peb txhua tus sawv ua rog” (Cov Nkauj Qhuas Vajtswv, zaj 116), yog kev tsov kev rog uas peb txhua hnub tawm tsam kev phem cov tub rog. Kev tsov rog no los muaj tiag tiag, thiab qhov tiav yuav hloov peb txoj sia nyob mus ib txhis. Ib yam li cov Neeg Nifais, peb muaj ib qho uas zoo dua txhawb peb zog—“muaj ib qho uas zoo dua txhawb [peb] zog” uas yog “peb tus Vajtswv, peb txoj kev teev ntuj, thiab txoj kev ywj pheej, thiab peb txoj kev thaj yeeb, peb cov poj niam, thiab peb cov me nyuam”—uas Maulaunais hu “lub hom phiaj ntawm cov ntseeg Khetos” (Amas 46:12, 16).
Tej Tswv Yim Pab Qhia hauv Tsev thiab lub Koom Txoos
Yexus Khetos pab kuv thaum muaj tej yam uas tawm tsam kuv sab ntsuj plig.
Thaum koj nyeem Amas 43–52, cia li saib tias cov Neeg Nifais tau ua li cas kom lawv ua tau (los sis ua tsis tau zoo). Ces cia li xav seb koj yuav siv tej yam uas koj kawm li cas kom pab koj yeej koj tej kev ua tsov ua rog ntawm sab ntsuj plig. Sau ntawv txog koj tej kev xav nram qab:
-
Amas 43:19 Cov Neeg Nifais tau npaj cov cuab yeej tiv rog. (Kuv txawj sim npaj kuv tus kheej yog kuv rau cov cuab yeej tiv rog ntawm sab ntsuj plig.)
-
Amas 43:23–24 Lawv xav tau tus yaj saub tej lus coj lawv kev.
Thiab, kuj saib seb koj kawm tau dab tsi los ntawm tej yam uas cov yeeb ncuab ntawm cov Neeg Nifais rau siab ua. Cia li xav seb Dab Ntxwg Nyoog yuav tawm tsam koj ib yam li no:
-
Amas 43:8 Xelaheenas xav kom nws cov neeg npau taws nws thiaj li yuav muaj hwj chim tswj hwm lawv. (Tej zaum Dab Ntxwg Nyoog yuav ntxias kuv kom ua ib yam vim kuv npau taws.)
Kuj saib Russell M. Nelson, “Muaj Kev Ntseeg Mus rau Yav Tom Ntej,” Liyahaunas, Kaum Ib Hlis Ntuj. 2020, 73–76; “Peb tus Vajtswv Yog Peb tus Pej Thuam,” Cov Nkauj Qhuas Vajtswv, zaj 24.
Minerva Teichert (1888–1976), Tiv Thaiv cov Neeg Nifais lub Nroog, 1949–1951, pleev roj rau pob zeb, 36 × 48 yas tes. Brigham Young University Qhov Chaw Saib Duab, 1969.
“Sawv khov kho muab siab rau ntseeg Khetos”
Koj puas xav tsis cia tus yeeb ncuab muaj hwj chim hauv koj lub neej? Ib txoj kev uas koj ua tau li no yog kev ua raws li cov lus qhia nyob hauv Amas 48:17 uas hais kom peb ua neeg “zoo li Maulaunais.” Xav seb koj puas sau ntawv txog tej lus uas piav qhia Maulaunais thaum koj nyeem Amas 46:11–28; 48:7–17. Koj kawm dab tsi los ntawm Maulaunais txog “sawv khov kho muab siab rau ntseeg Khetos”? (Amas 46:27).
Tej zaum koj yuav xav kawm tias Maulaunais tau ua li cas kom lwm tus txais kev tshoov siab txog “lub hom phiaj ntawm cov ntseeg Khetos” (saib Amas 46:11–22). Koj yuav piav li cas txog lub hom phiaj ntawd? Koj yuav ua li cas kom ua raws li lub hom phiaj ntawd? Koj yuav ua li cas kom tshoov lwm tus lub siab ua li ntawd thiab?
Ib yam uas Maulaunais ua kom tshoov lwm tus lub siab yog tsim daim chij ntawm kev ywj pheej, uas hais txog tej ntsiab cai kom tshoov cov Neeg Nifais lub siab (saib nqe 12). Peb cov thawj coj hauv lub Koom Txoos tau qhia tej ntsiab cai dab tsi hauv peb lub caij nyoog? Tej zaum Koj yuav xav nrhiav tej yam ntawd hauv Ntxiv Dag Zog rau cov Tub Hluas Ntxhais Hluas: Phau Ntawv Coj Kev Pab Neeg Xaiv{ (booklet, 2022), “Tsev Neeg: Ib Zaj Lus Tshaj Tawm rau lub Ntiaj Teb,” Koom Haum Ntxhais Hluas thiab Pawg Pov Thawj Hwj Aloos lub ntsiab, los sis tej zaj los ntawm lub tuam rooj sab laj. Tej zaum koj yuav xav sau ntsiab lus txog tej yam uas tej no qhia kom tsim koj ib daim chij ntawm kev ywj pheej—ib daim uas pab koj nco ntsoov ua raws li tus Cawm Seej thiab Nws txoj moo zoo.
Kuj saib Gospel Topic, “Faith in Jesus Christ,” Txoj Moo Zoo cov Ntawv.
Dab Ntxwg Nyoog dag ntxias peb ib qho me me dhau ib qho me me.
Dab Ntxwg Nyoog paub tias feem ntau koj yuav tsis kam ua txhaum loj heev los sis ntseeg kev dag loj heev. Yog li ntawd, nws dag me me thiab ntxias me me kom coj koj ua txhaum me me—ua txhaum li nws xav tias koj kam ua—uas coj tau koj mus ntawm kev kaj siab uas los ntawm txoj kev ua neej ncaj ncees.
Nrhiav tus txheej txheem no nyob hauv Amas 47, thiab xav seb Dab Ntxwg Nyoog tab tom ua li cas kom ntxias tau nej. Xav txog tej lub tswv yim no los ntawm Txwj Laug Robert D. Hales:
“Tus Amalikhaiyas uas ntxeev siab tau hais kom Lihoothis ‘los rau nram taw roob’ thiab ntsib nws hauv lub hav. Tiam sis thaum Lihoothis tawm chaw siab los, nws raug lom ‘me zuj zus’ mus txog thaum nws tuag, ces nws cia nws pab tub rog poob los rau Amalikhaiyas txhais tes (saib Amas 47). Los ntawm kev sib cav sib ceg thiab kev liam, muaj ib txhia neeg uas ntxias peb tawm chaw siab los. Chaw siab yog qhov chaw uas muaj txoj kev kaj. … Yog chaw uas muaj kev thaj yeeb” (“Christian Courage: The Price of Discipleship,” Liyahaunas, Kaum Ib Hlis Ntuj 2008, 74)
Nej kawm dab tsi los ntawm daim vidi-aus “Temptation Fades as We Seek Christ in Every Thought” (Txoj Moo Zoo cov Ntawv) uas pab tau nej tiv tau kev ntxias?
Kuj saib Nehemis 6:3; 2 Nifais 26:22; 28:21–22.
Kev koom siab ua rau peb nyab xeeb.
Txawm muaj cov Neeg Nifais tej cuab yeej tiv rog thiab tej chaw thaiv rog, cov Neeg Lamas twb yeej lawv tej lub nroog ntau (saib Amas 51:26–27). Vim li cas muaj li no? Nrhiav tej lus teb thaum koj nyeem tej tshooj no (qhov tseem ceeb saib Amas 51:1–12). Cia li xav seb zaj no muaj tej lus ceeb toom twg rau koj thiab koj tsev neeg.
Yog xav tau tswv yim ntxiv, saib tej phau xov xwm Liyahaunas thiab Ntxiv Dag Zog rau cov Tub Hluas Ntxhais Hluas rau lub hlis no.
Tej Tswv Yim Pab Qhia cov Me Nyuam
Amas 43:17–21; 48:7–8; 49:1–5; 50:1–6
Yexus Khetos txoj moo zoo pov hwm kuv sab ntsuj plig.
-
Xav seb koj puas siv “Tshooj 31: Thawj Tub Rog Maulaunais Kov Yeej Xelaheenas” (Cov Dab Neeg hauv Phau Ntawv Maumoos, 85–88) los qhia koj cov me nyuam txog npluav rog ntawm cov Neeg Nifais thiab cov Neeg Lamas. Thaum koj nyeem txog cov Neeg Nifais tej cuab yeej tiv rog nyob hauv Amas 43:19, tej zaum koj yuav xav muab cov cuab yeej tiv rog uas tiv thaiv peb lub cev piv rau tej yam uas Vajtswv tau muab rau peb tiv thaiv peb sab ntsuj plig. Tej zaum koj thiab koj cov me nyuam yuav xav kos duab txog ib tug me nyuam thiab txhua zaus koj tus me nyuam hais ib yam dab tsi uas tiv thaiv tau peb sab ntsuj plig, ces koj cov me nyuam yuav kos duab txog tej cuab yeej tiv rog rau ntawm tus me nyuam hauv daim duab.
-
Tej nqe no qhia txog tej chaw thaiv rog uas cov Neeg Nifais tau tsa: Amas 48:7–9; 49:1–9; 50:1–6. Tom qab nej nyeem tej nqe no ua ke, tej zaum koj cov me nyuam yuav nyiam ua qhov chaw thaiv rog nrog tej yam li cov rooj zaum thiab cov pam vov. Daim vidi-aus “Elder Stevenson on Fortifying Families” (Txoj Moo Zoo cov Ntawv) kuj pab tau koj qhia txog tej yam ntawm sab ntsuj plig uas koj ua tau kom koj lub tsev ruaj khov.
Kuv muaj peev xwm “nyob ruaj nrees ntawm txoj kev ntseeg Khetos” ib yam li Thawj Tub Rog Maulaunais.
-
Tej zaum koj cov me nyuam yuav xav saib cov duab nyob hauv tus txheej txheem qhia no kom qhia rau zaj dab neeg txog tus chij ntawm kev ywj pheej (saib Amas 46:11–16; “Tshooj 32: Thawj Tub Rog Maulaunais thiab tus Chij ntawm Kev Ywj Pheej,” Cov Dab Neeg hauv Phau Ntawv Maumoos, 89–90). Maulaunais xav kom cov neeg nco qab dab tsi (saib nqe 12)? Peb Leej Txiv Saum Ntuj Ceeb Tsheej xav kom peb nco qab dab tsi? Tej zaum koj cov me nyuam yuav xav tsim tau lawv ib daim “chij ntawm kev ywj pheej” nrog tej lus los sis cov duab uas yuav pab lawv nco qab tej yam no.
-
Kom qhia koj cov me nyuam “nyob ruaj nrees ntawm txoj kev ntseeg Khetos” ib yam li Maulaunais (saib Amas 48:13), koj pab tau lawv nrhiav thiab kov ib yam dab tsi uas ruaj nrees. Qhov hais tias kev ntseeg yuav tsum “ruaj nrees” txhais li cas? Nyeem Amas 48:11–12 ua ke kom nrhiav seb vim li cas Maulaunais ruaj nrees ntawm nws txoj kev ntseeg Khetos. Tej zaum nej kuj yuav xav hu ib zaj nkauj zoo li “I Will Be Valiant” (Children’s Songbook, 162). Peb yuav ua li cas kom “nyob ruaj nrees ntawm txoj kev ntseeg Khetos”?
Dab Ntxwg Nyoog dag ntxias peb ib qho me me dhau ib qho me me.
Nyeem tej nqe uas tau xaiv los ntawm Amas 47:4–19 ua ke. Yuav muaj xwm dab tsi yog tias Amalikhaiyas tau qhia Lihoothis tej yam ua nws npaj yuav ua thaum xub thawj? Tej nqe no qhia dab tsi rau peb txog qhov uas Dab Ntxwg Nyoog ntxias peb li cas?
Pab koj cov me nyuam muaj peev xwm. Tej zaum ib txhia me nyuam tsis tau txawj kawm txog txoj moo zoo lawv ib leeg. Ib txoj kev kom pab lawv ua siab loj yog kev qhuas lawv thaum lawv koom tes kawm. Koj yuav ua li cas kom siv lub tswv yim no thaum ua tej yam ntxim ua hauv tus txheej txheem qhia no?
Yog xav tau tswv yim ntxiv, saib phau xov xwm Phooj Ywg rau lub hlis no.
Daim Chij ntawm Kev Ywj Pheej, los ntawm Larry Conrad Winborg
© 2018 los ntawm Larry Conrad Winborg