“Xya Hli Ntuj 29–Yim Hli Ntuj 4: ‘Ntsia Ntsoov Vajtswv Xwv Kom Muaj Txoj Sia Nyob.’ Amas 36–38,” Los, Nrog Kuv Mus—Siv hauv Tsev thiab lub Koom Txoos: Phau Ntawv Maumoos 2024 (2023)
“Xya Hli Ntuj 29–Yim Hli Ntuj 4. Amas 36–38,” Los, Nrog Kuv Mus—Siv hauv Tsev thiab lub Koom Txoos: 2024 (2023)
Poj Niam, los ntawm Jen Tolman, tsis pub luam
Xya Hli Ntuj 29–Yim Hli Ntuj 4: “Ntsia Ntsoov Vajtswv Xwv Kom Muaj Txoj Sia Nyob.”
Amas 36–38
Thaum Amas pom tej kev phem nyob ib puag ncig nws, ua rau nws “tu siab,” raug “txom nyem” thiab muaj “kev ntxhov siab” (Amas 8:14). Nws hais txog cov Neeg Xaulas hais tias, “Txoj kev phem zoo li no nyob hauv cov neeg no ua rau kuv tus ntsuj plig mob” (Amas 31:30). Nws xav zoo ib yam li ntawd tom qab nws mus qhia cov Neeg Xaulas thiab rov qab los—nws pom tias cov Neeg Nifais “lub siab pib tawv tuaj, thiab lawv pib npau taws vim yog txoj kev nruj ntawm txoj lus,” ua rau nws “tu siab heev kawg nkaus li” (Amas 35:15). Amas tau ua li cas txog tej yam uas nws pom thiab xav? Nws tsis tau poob siab thiab tsis xav tias ua tsis tau dab tsi. Tiam sis, “nws hais kom nws cov tub tuaj sib sau ua ke” thiab qhia lawv “tej uas hais txog kev ncaj ncees” (Amas 35:16). Nws tau qhia lawv tias “tsis muaj dua lwm txoj kev los sis lwm yam uas tib neeg yuav muaj peev xwm dim tau, tsuas yog los ntawm Khetos xwb. … Saib seb, nws yog txoj lus ntawm qhov tseeb thiab qhov ncaj ncees” (Amas 38:9).
Tej Tswv Yim Pab Qhia hauv Tsev thiab lub Koom Txoos
Kuv muaj peev xwm yug los ntawm Vajtswv.
Yeej yuav tsis muaj neeg coob uas muaj xwm txheej zoo li Amas txoj kev hloov siab los ntseeg. Tiam sis txhua tus yuav tsum “yug los ntawm Vajtswv,” txawm yog feem ntau yog ib yam yus ua zuj zus (Amas 36:23; 38:6). Thaum nej nyeem Amas 36, cia li xav seb qhov uas yus yug los ntawm Vajtswv txhais li cas. Ua piv txwv, thaum nej yug los ntawm Vajtswv, nej xav li cas txog kev txhaum? txog Yexus Khetos? Txoj kev yug los ntawm Vajtswv pab tau koj ua li cas thaum koj ua yuam kev? Yuav hloov lwm yam txoj kev ntseeg li cas thiab hloov tej yam yus ua li cas? Cia li xav txog qhov uas koj hloov li cas.
Kuj saib Mauxiyas 5:7; 27:25–26; Amas 5:14; 22:15; Hilamas 3:35; “Alma the Younger Is Converted unto the Lord” (vidi-aus), Txoj Moo Zoo cov Ntawv.
Yexus Khetos muab kev xyiv fab pauv kev tu siab.
Tej lub sij hawm tib neeg ntshai hloov siab lees txim, vim lawv xav tias kev hloov siab lees txim yog kev raug txim vim lawv ua txhaum. Koj xav hais tias Amas yuav hais li cas txog qhov ntawd? Kom thiaj li paub, koj kuj saib seb Amas lub neej zoo li cas ua ntej nws tau hloov siab lees txim (see Amas 36:6–17) rau tej yam uas nws tau hais txog nws tus kheej tom qab nws hloov siab lees txim (saib nqe 18–27). Raws li Amas 36:17–18 hais, Amas tau ua li cas kom txais tau kev zam txim no?
Kuj saib Mathais S. Holland, “Lub Txiaj Ntsim Zoo Nkauj Heev ntawm Leej Tub,” Liyahaunas, Kaum Ib Hlis Ntuj 2020, 45–47.
Twb tau ceev cia cov vaj lug kub “rau ib lub hom phiaj tseem ceeb.”
Xav txog tej txuj ci tseem ceeb thiab cov koob hmoov vim peb muaj cov vaj lug kub hnub no! Thaum koj nyeem Amas 37, nrhiav tej koob hmoov uas los ntawm cov vaj lug kub (saib, piv txwv, tej nqe 7–10, 18–19, 44–45).
Nyob hauv Amas 37:38–47, Amas muab “Khetos txoj lus” piv rau lub Liyahaunas. Thaum koj xav txog kev muab ob yam no sib piv, cia li xav txog tej yam uas koj twb txais tau los ntawm qhov txuj ci tseem ceeb thiab lub hwj chim ntawm Khetos tej lus qhia “ib hnub dhau ib hnub” (Amas 37:40).
Kuj saib D. Todd Christofferson, “Txoj Koob Hmoov ntawm cov Vaj Lug Kub,” Liyahaunas, Tsib Hlis Ntuj 2010, 32–35; “Thaum Kuv Nyeem Vaj Lug Kub Dawb Huv,” Cov Nkauj Qhuas Vajtswv, zaj 130; “Alma Testifies to His Son Helaman” (vidi-aus), Txoj Moo Zoo cov Ntawv.
Cov vaj lug kub qhia peb paub coj raws li Vajtswv
“Los ntawm tej yam me me thiab yooj yim thiaj muaj tej yam tseem ceeb los.”
Tej lub sij hawm peb xav tias peb tej teeb meem yeej loj dhau thiab nyuaj dhau ces ua rau peb xav tias tej kev kho teeb meem yeej yuav loj thiab nyuaj ib yam thiab. Tiam sis ntawd tsis yog Tus Tswv txoj Kev. Thaum koj nyeem Amas 37:1–14, xav seb qhov uas Nws ua Nws txoj hauj lwm tshoov koj lub siab li cas. Cia li xav thiab sau ntawv txog tej yam uas koj tau pom uas qhia txog lub ntsiab cai no hauv koj lub neej.
Yog koj yuav qhia lub ntsiab cai no rau lwm tus, koj yuav siv tej zaj lus piv txwv twg los ntawm tej yam uas Vajtswv tau tsim los sis tej yam hauv koj lub neej txhua hnub? Koj nrhiav tau tej zaj lus piv txwv nyob hauv Thawj Tswj Hwm Dallin H. Oaks zaj lus “Tej Yam Me Me thiab Yooj Yim,” (Liyahaunas, Tsib Hlis Ntuj 2018, 89–92).
Tej yam twg yog tej yam me me thiab yooj yim hauv peb lub neej uas ua rau peb nyob ze dua Leej Txiv Saum Ntuj Ceeb Tsheej thiab Yexus Khetos?
Ntau zaus, peb tej kev xaiv uas “me me thiab yooj yim” yuav hloov peb lub neej loj heev. Xav seb nej puas xaiv ib lub ntsiab los ntawm Ntxiv Dag Zog rau cov Tub Hluas Ntxhais Hluas: Phau Ntawv Coj Kev Pab Neeg Xaiv thiab nug koj tus kheej tej lus nug no: Kuv txoj kev xaiv txog qhov no yuav pab kuv thiab cov neeg ib puag ncig kuv li cas? Kuv yuav tsum hloov tej yam me me thiab yooj yim dab tsi kom kuv thiaj txais tau kev kaj siab thiab kev zoo siab ntxiv?
Kuj saib Michael A. Dunn, “Ib Feem Pua Zoo Dua,” Liyahaunas, Kaum Ib Hlis Ntuj. 2021, 106–8; Txoj Moo Zoo tej Ntsiab Lus “Agency,” Txoj Moo Zoo cov Ntawv.
Siv tej yam me me thiab yooj yim. Ib yam li ntau yam hauv nej lub neej, siv tau tej yam me me thiab yooj yim rau kev qhia thiab kev kawm txog txoj moo zoo. Piv txwv hais tias, yuav siv me ntsis ntsev los sis poov xab li cas kom qhia txog lub hwj chim ntawm tej yam me me thiab yooj yim li cas? (saib Mathais 5:13; 13:33).
“Sab laj nrog tus Tswv.”
Nyob hauv Amas 37:35–37, nrhiav Amas cov lus caw rau nws tus tub Hilamas. Tej lus caw twg ntawm cov lus caw no yog tej uas nej xav ua raws li? Piv txwv tias, tej zaum nej xav paub seb “sab laj nrog tus Tswv” txhais li cas (nqe 37). Koj tau ua li cas kom sim ua li no? Nws tau coj koj kev kom ua zoo li cas?
Thaum kuv hais lus tim khawv, kuv pab cov neeg uas kuv hlub muaj zog.
Amas cov lus rau nws tus tub Sinploos qhia tau ib zaj lus piv txwv zoo txog peb txoj hau kev pab thiab txhawb nqa cov tib neeg uas peb hlub kom lawv ua neej raws li txoj moo zoo. Tej zaum Amas 38 yuav muab tswv yim rau koj pab koj tsev neeg thiab phooj ywg muaj zog los ntawm Yexus Khetos. Sau tej yam uas koj kawm tau.
Yog xav tau tswv yim ntxiv, saib tej phau xov xwm Liyahaunas thiab Ntxiv Dag Zog rau cov Tub Hluas Ntxhais Hluas rau lub hlis no.
Tej Tswv Yim Pab Qhia cov Me Nyuam
kev hloov siab lees txim ua rau kuv xyiv fab rau Yexus Khetos.
-
Kom pab koj cov me nyuam to taub tias muaj tau kev zoo siab los ntawm kev hloov siav lees txim, koj kuj kos ib lub ntsej muag luag ntxiv rau ib sab ntawv thiab ib lub ntsej muag tu siab rau sab tod. Hais kom lawv mloog koj thaum koj nyeem los sis piav qhia rau lawv txog Amas 36:13, 17–20 thiab tuav daim ntawv uas muaj ob lub ntsej muag kom qhia seb Amas xav li cas. Cov me nyuam laus kuj sau tej lo lus los sis tej kab lus uas qhia seb Amas xav li cas. Dab tsi ua rau Amas tu siab, thiab dab tsi ua rau nws muaj kev zoo siab? Ces, koj kuj qhia lawv txog thaum koj muaj kev zoo siab vim koj tau hloov siab lees txim.
“Los ntawm tej yam me me thiab yooj yim thiaj muaj tej yam tseem ceeb los.”
-
Tej zaum koj cov me nyuam yuav nyiam nrhiav tej yam me me uas ua tau tej yam tseem ceeb tshwm sim. Tej zaum khoom xws li ib lub roj teeb, tus yawm sij los sis ib qhov khoom ua si uas pab nplij lawv siab. Ces nej nyeem Amas 37:6–7 ua ke los tau thiab xav txog tej yam me me los sis tej yam yooj yim uas Vajtswv xav kom peb ua. Tej yam tseem ceeb twg yuav tshwm sim yog peb ua raws li tej lus txib uas me me thiab yooj yim?
-
Tej zaum koj cov me nyuam kuj ua tau li no: muab dej rau hauv ib lub khob, cug ib tee dhau ib tee. Qhov no nruab li cas rau Amas 37:6–7? Ces tej zaum koj yuav hais txog tus Tswv “tej yam me me thiab yooj yim,” xws li kev nyeem cov vaj lug kub txhua hnub, zoo li cug dej ib tee dhau ib tee rau hauv khob.
-
Pab koj cov me nyuam xav txog lwm yam uas lawv ua tau tom tsev, hauv tsev kawm ntawv, los sis tom tom lub koom txoos. Zaj nkauj “‘Give,’ Said the Little Stream” (Children’s Songbook, 236) kuj qhia txog qhov ntsiab cai no.
Cov vaj lug kub pab tau kuv txhua hnub.
-
Koj yuav ua li cas kom pab koj cov me nyuam nyiam ua raws li Vajtswv cov lus, ib yam li Amas tau ua rau Hilamas? Xav seb koj puas muab ib daim duab uas pom lub Liyahaunas rau lawv (xws li Phau Muaj Duab txog Txoj Moo Zoo, naj npawb 68) los sis caw lawv los kos duab thiab qhia txog tej yam uas lawv paub txog lub Liyahaunas (saib Amas 37:38–47; 1 Nifais 16:10, 28–29). Cov vaj lug kub zoo li lub Liyahaunas li cas?
Yog xav tau tswv yim ntxiv, saib phau xov xwm Phooj Ywg rau lub hlis no.
Tus Tim Tswv Tshwm Sim rau Amas thiab Mauxiyas cov Tub Pom, los ntawm Clark Kelley Price