1 Nifais 11–15

Thaum Nifais nug tus tim tswv txog tus ntoo uas nws txiv tau pom txhais li cas, kuj yooj yim yog tias tus tim tswv tau hais tias “Tus ntoo yog Vajtswv txoj kev hlub.” Tiam sis nws tau ua rau Nifais pom ntau lub cim thiab tej yam hauv tus Cawm Seej lub neej. Nrhiav tej lub cim thiab tej yam no thaum koj nyeem thiab xav txog 1 Nifais 11. Koj kawm dab tsi uas pab koj to taub vim li cas Yexus Khetos yog tus zoo kawg nkaus kom qhia txog Vajtswv txoj kev hlub?

Tej zaum koj xav saib Cov Vidi-aus txog Phau Npaivnpaum nyob hauv Txoj Moo Zoo cov Ntawv uas sib raug nrog tej yam uas Nifais tau pom. Tus Cawm Seej tau pab koj li cas kom koj paub tias Leej Txiv Saum Ntuj Ceeb Tsheej hlub koj?

Kuj saib Susan H. Porter, “Vajtswv txoj Kev Hlub: Kev Zoo Siab Tshaj Plaws rau tus Ntsuj Plig,” Liahona, Kaum Ib Hlis Ntuj 2021, 33–35.

Nifais tsis tau nyob ntev txaus pom ntau yam uas muaj hauv nws txoj kev ua yog toog. Koj xav tias yog vim li cas qhov uas Nifais paub tej no yog ib qho uas muaj nqis? Vim li cas qhov uas koj paub tej no yog ib qho uas muaj nqis? Cia li nug tej yam no txhua zaus koj nyeem ib yam uas Nifais ua yog toog pom (saib 1 Nifais 12–14). Koj txais tej kev tshoov siab twg txog tus Tswv “txoj hauj lwm tseem ceeb thiab zoo kawg nkaus”? (1 Nifais 14:7). Nws tau ua tej yam tseem ceeb thiab zoo kawg nkaus dab tsi rau koj?

Xav txog cov lus cog tseg tseem ceeb hauv 1 Nifais 14:14. Tus Cawm Seej tau ua li cas kom muaj raws li kev cog lus no nyob hauv koj lub neej? (Kom pom tej yam piv txwv, saib David A. Bednar, “Vajtswv lub Hwj Chim uas Muaj Yeeb Koob Heev,” Liahona, Kaum Ib Hlis Ntuj. 2021, 28–30, qhov tseem ceeb saib ob nqe lus kawg.)

Thawj Tswj Hwm Dallin H. Oaks piav hais tias “lub koom txoos uas muaj zog thiab txaus ntxub” uas Nifais piav txog yeej piv rau “ib txoj kev tawm tswv yim los yog lub koom haum uas tawm tsam kev ntseeg Vajtswv. Thiab ‘kev poob cev qhev’ uas ‘lub koom txoos no’ xav coj haiv neeg ntseeg los raug tsis yog kev raug kaw ntawm sab cev nqaij daim tawv tiam sis yog kev poob cev qhev rau tej tswv yim tsis tseeb” (“Stand as Witnesses of God,” Ensign, Peb Hlis Ntuj 2015, 32). Xav seb tus Cawm Seej pab koj li cas kom txhob raug—thiab dim ntawm—tej lub tswv yim cuav?

Koj puas tau xav tias koj tsis txais kev tshwm sim rau koj tus kheej—koj xav tias Vajtswv tsis hais lus rau koj? Thaum Nifais ob tug tij laug xav li no ces Nifais tau hais kom nkawd ua dab tsi? (Saib 1 Nifais 15:1–11.) Koj yuav ua li cas thiaj muab tau Nifais tej lus ntuas no nruab rau hauv koj lub neej?

Ntau zaus los Nifais muaj tej zaj lus tseem ceeb hais rau nws cov tij laug. Tiam sis zoo nkaus tej yam uas nws qhia lawv hauv 1 Nephi 15:23–25 yog tej yam uas tseem ceeb heev rau nws. Nifais zaj lus yog dab tsi, thiab koj xav seb vim li cas tseem ceeb heev rau nws?

Txwj Laug David A. Bednar qhia hais tias “Vajtswv txoj lus” yog cov vaj lug kub, tej lus los ntawm cov yaj saub uas muaj txoj sia nyob, thiab tej lus los ntawm Yexus Khetos Nws tus kheej. Koj xav hais tias “tuav rawv” cov vaj lug kub thiab cov lus los ntawm cov yaj saub uas muaj txoj sia nyob txhais li cas? Koj xav tias “tuav rawv” Yexus Khetos txhais li cas? Tej zaum koj xav nrhiav tej lus teb rau cov lus nug no hauv Txwj Laug Bednar zaj lus “Tiam Sis Peb Tsis Quav Ntsej Lawv” (Liahona, Tsib Hlis Ntuj 2022, 14–16).

Qhov uas koj tuav rawv Vajtswv txoj lus pab koj li cas kom tiv taus tus yeeb ncuab? Koj sau tau ib daim phiaj zoo li nram qab no tej zaum yuav pab koj sau koj tej kev xav tseg cia:

Kuj saib “Tus Nqaj Hlau,” Cov Nkauj Qhuas Vajtswv, zaj 127; Jorge F. Zeballos, “Tsim lub Neej Kom Tiv Taus tus Yeeb Ncuab,” Liahona, Kaum Ib Hlis Ntuj. 2022, 50–52.

• Ib tug tim tswv tau qhia Nifais txog Vajtswv txoj kev hlub thaum nws cia Nifais pom tej yam tshwm sim hauv tus Cawm Seej lub neej. Koj ua tib yam tau rau koj cov me nyuam—cia lawv saib cov duab ua Nifais tau pom hauv 1 Nifais 11:20, 24, 27, 31, thiab 33 (saib Phau Muaj Duab txog Txoj Moo Zoo, naj npawb 30, 35, 39, 42, 57). Thaum koj nyeem tej nqe no, pab koj cov me nyuam nrhiav cov duab uas phim tej nqe. Peb kawm dab tsi txog Yexus Khetos los ntawm tej nqe no thiab cov duab?

• Hu zaj nkauj li “He Sent His Son” (Children’s Songbook, 34–35) kuj pab tau koj cov me nyuam paub txog Vajtswv txoj kev hlub. Nug koj cov me nyuam lawv tau kawm dab tsi los ntawm zaj nkauj tom qab hu zaj nkauj tiav. Peb kawm dab tsi ntxiv txog Vajtswv txoj kev hlub los ntawm 1 Nifais 11:22–23?

• Xwv kom pab koj cov me nyuam to taub qhov uas tej yam tseeb uas “meej thiab muaj nuj nqis” nyob hauv Phau Ntawv Maumoos muaj nqis npaum li cas, koj kos tau ib daim duab thiab caw koj cov me nyuam los hloov los tshem tawm tej yam ntawm koj daim duab ua kom txawv. Koj siv tau lub sij hawm no qhia tias tej yam hauv Phau Npaivnpaum tau raug hloov thiab tshem tawm thaum sij hawm dhau mus. Nyeem ua ke 1 Nifais 13:40 thiab tham txog qhov uas Phau Ntawv Maumoos (“cov ceev xwm txheej kawg no”) pab peb to taub tej yam “meej thiab muaj nuj nqis heev” uas tau xiam hauv Phau Npaivnpaum (cov ceev xwm txheej “ua ntej”). Koj tau kawm tej yam tseeb uas “meej thiab muaj nuj nqis heev” twg los ntawm Phau Ntawv Maumoos?

• Qhov vidi-aus “The Book of Mormon—a Book from God” (Txoj Moo Zoo cov Ntawv) kuj pab tau koj cov me nyuam to taub tias qhov uas muaj Phau Npaivnpaum thiab Phau Ntawv Maumoos yog ib qho tseem ceeb. Tej zaum cov me nyuam yuav nyiam ua yeeb yam txog cov duab uas los ntawm daim vidi-aus.

• Muab sij hawm rau koj cov me nyuam hais tias lawv nco qab dab tsi txog Lihais txoj kev ua yog toog pom. Tej zaum yuav pab yog siv ib daim duab, zoo li daim duab uas nyob hauv tus txheej txheem qhia lub lim tiam dhau los. Muaj dab tsi cia cov tib neeg mus tsis txog tsob ntoo? Muaj dab tsi pab lawv mus cuag? Tej zaum koj yuav xav nug lawv seb lawv nrhiav puas tau tus nqaj hlau hauv daim duab. Nyeem 1 Nifais 15:23–24 ua ke kom nrhiav tau seb tus nqaj hlau piv txog dab tsi thiab pab tau peb li cas.