“Ib Hlis Ntuj 1–7: Ib zaj Tim Khawv Ntxiv txog Yexus Khetos. Tej Phab Ntawv Piav txog Phau Ntawv Maumoos,” Los, Nrog Kuv Mus—Siv hauv Tsev thiab lub Koom Txoos: Phau Ntawv Maumoos 2024 (2024)
“Ib Hlis Ntuj 1–7. Tej Phab Ntawv Piav txog Phau Ntawv Maumoos,” Los, Nrog Kuv Mus—Siv hauv Tsev thiab lub Koom Txoos: Phau Ntawv Maumoos 2024 (2024)
Ib Hlis Ntuj 1–7: Ib zaj Tim Khawv Ntxiv txog Yexus Khetos
Tej Phab Ntawv Piav txog Phau Ntawv Maumoos
Ua ntej koj nyeem 1 Nifais tshooj 1, qhov uas Phau Ntawv Maumoos tsis zoo li lwm phau ntawv yeej yog ib qho meej heev. Tej phab ntawv uas piav txog Phau Ntawv Maumoos qhia txog ib zaj uas yeej txawv tshaj txhua zaj—hais txog cov tim tswv txoj kev tuaj xyuas, ib co ceev xwm txheej puag thaum ub uas tau muab faus cia hauv ib lub toj, thiab ib tug tub hluas uas muab cov ceev xwm txheej ntawd txhais lus los ntawm Vajtswv lub hwj chim. Phau Ntawv Maumoos tsis yog keeb kwm txog tej haiv neeg uas nyob hauv Amelikas puag thaum ub xwb. Yog ib phau uas xav kom yaum txhua tus paub “hais tias Yexus yog tus Khetos” (phab ntawv piav txog Phau Ntawv Maumoos), thiab Vajtswv Nws tus Kheej yog tus uas tau coj qhov uas tau sau li cas, tau ceev cia li cas, thiab tau tshaj tawm li cas rau peb sawv daws. Xyoo no, thaum koj nyeem Phau Ntawv Maumoos, thov Vajtswv, thiab ua raws li phau ntawv no tej lus qhia, koj yuav txais tus Cawm Seej lub hwj chim ntawd hauv koj lub neej. Thiab tej zaum koj yuav xav hais, ib yam li Peb tug Tim Khawv tau hais hauv lawv zaj lus tim khawv hais tias, “Yog ib qho zoo kawg nkaus rau [kuv] qhov muag pom.”
Tej Tswv Yim Pab Qhia hauv Tsev thiab lub Koom Txoos
Phab ntawv piav txog Phau Ntawv Maumoos
Phau Ntawv Maumoos yuav ua rau kuv txoj kev ntseeg Yexus Khetos muaj zog.
Phab ntawv qhia npe ntawm Phau Ntawv Maumoos yeej tsis yog kev qhia npe xwb. Phab ntawv no qhia txog ob peb lub hom phiaj ntawm cov ceev xwm txheej dawb huv no. Nrhiav tej hom phiaj no ntawm phab ntawv qhia npe. Tej lus nug zoo li no pab tau koj thaum koj xav txog tej no: Vim li cas peb muaj Phau Ntawv Maumoos? Phau Ntawv Maumoos txawv li cas ntawm lwm yam cov ntawv?
Tej zaum lub sij hawm no yog ib lub sij hawm zoo kom tsim txoj kev npaj nyeem rau koj tus kheej los sis tsim koj tsev neeg txoj kev npaj nyeem Phau Ntawv Maumoos xyoo no. Koj yuav nyeem thaum twg thiab qhov twg? Yuav ua li cas thiaj pab tau tus Ntsuj Plig los nrog koj thaum koj kawm? Thaum koj kawm, puas muaj tej yam dab tsi uas koj nrhiav hauv phau ntawv? Piv txwv hais tias, tej zaum koj nrhiav tej nqe uas muaj tej hom phiaj zoo li cov koj pom hauv phab ntawv qhia npe. Tej zaum koj yuav xav sau thiab khaws tej nqe uas pab koj txoj kev ntseeg Yexus Khetos loj tuaj.
Kuj saib 2 Nifais 25:26; Mauxiyas 3:5–8; Amas 5:48; 7:10–13; Hilamas 5:12; 3 Nifais 9:13–18; 11:6–14; Maulaunais 10:32–33.
Ib txoj lus cog tseg los ntawm tus yaj saub. Thawj Tswj Hwm Russell M. Nelson hais tias, “Kuv cog lus hais tias thaum nej xav txog tej yam uas nej kawm [nyob hauv Phau Ntawv Maumoos], lub rooj ntug yuav qhib plho, thiab nej yuav txais lus teb rau nej cov lus nug thiab kev coj rau nej lub neej” (“Phau Ntawv Maumoos: Nej lub Neej Yuav Zoo Li Cas Yog Tias Tsis Muaj?,” Liahona, Kaum Ib Hlis Ntuj 2017, 62–63)
Zaj Lus Piav txog Phau Ntawv Maumoos; “Zaj Lus Tim Khawv ntawm Peb tug Tim Khawv”; “Zaj Lus Tim Khawv ntawm Yim tus Tim Khawv”
Kuv txawj ua tim khawv txog Phau Ntawv Maumoos.
Tus Vaj Ntsuj Plig Dawb Huv ua tau tim khawv rau koj hais tias Phau Ntawv Maumoos muaj tseeb, txawm yog koj tsis tau pom cov phiaj kub ib yam li Peb tug Tim Khawv thiab Yim tus Tim Khawv tau pom. Thaum koj nyeem lawv cov lus, cia li xav seb lawv tej lus tim khawv ua rau koj muaj zog li cas.
Muaj dab tsi los ntawm cov neeg tim khawv tej zaj lus txog Phau Ntawv Maumoos uas tshoov koj lub siab? Xav seb koj yuav ua tim khawv txog Phau Ntawv Maumoos li cas—qhov tseem ceeb ua tim khawv txog phau ntawv no zaj lus pov thawj txog Yexus Khetos. Piv txwv hais tias, xav seb yuav zoo li cas yog koj nrog koj ib tug phooj ywg uas tsis tau hnov txog Phau Ntawv Maumoos dua sib tham. Koj yuav qhia dab tsi rau nws txog Phau Ntawv Maumoos? Koj yuav tshoov tau koj tus phooj ywg lub siab li cas kom ua rau nws xav nyeem? Tej zaum koj yuav xav rov qab nyeem Zaj Lus piav txog Phau Ntawv Maumoos{. Tej zaum koj yuav nrhiav tau tej kab lus uas pab koj xav qhia rau koj tus phooj ywg. Cov vidi-aus nram qab no yuav pab muab tswv yim rau koj thiab:
-
“Book of Mormon Introduction”
-
“What Is the Book of Mormon? A 60-Second Overview”
-
“A Book of Mormon Story”
Cia li xav seb puas sau ntawv txog tej yam uas koj xav qhia rau koj tus phooj ywg txog Phau Ntawv Maumoos. Sim qhia lwm tus txog Phau Ntawv Maumoos los ntawm qhov app Phau Ntawv Maumoos.
Kuj saib Ronald A. Rasband, “Hnub No,” Liahona, Kaum Ib Hlis Ntuj 2022, 25–28; Txoj Moo Zoo tej Ntsiab Lus, “Phau Ntawv Maumoos,” Txoj Moo Zoo cov Ntawv; “Ib tug Tim Tswv Nyob Siab,” Cov Nkauj Qhuas Vajtswv, zaj 7.
Peb tug Tim Khawv ua tim khawv txog Phau Ntawv Maumoos.
“Zaj Lus Tim Khawv ntawm tus Yaj Saub Joseph Smith”
Qhov uas Phau Ntawv Maumoos tawm los yeej yog ib qho txuj ci tseem ceeb.
Yog leej twg nug koj seb Phau Ntawv Maumoos los qhov twg los, koj yuav hais li cas? Koj yuav piav txog tus Tswv txoj kev pab muab Phau Ntawv Maumoos los rau peb li cas? Thaum koj nyeem Joseph Smith zaj lus tim khawv, tsom ntsoov seb nws hais li cas txog qhov ntawd. Raws li tej yam koj tau nyeem, koj xav seb Vajtswv xav tias Phau Ntawv Maumoos tseem ceeb npaum li cas?
Kuj saib Ulisses Soares, “Phau Ntawv Maumoos txoj Kev Tawm Los,” Liahona, Tsib Hlis Ntuj 2020, 32–35; Saints, phau 1, The Standard of Truth, 21–30; Txoj Moo Zoo tej Ntsiab Lus Essays, “Book of Mormon Translation,” Txoj Moo Zoo cov Ntawv.
Yog xav tau tswv yim ntxiv, saib tej phau xov xwm Liyahaunas thiab Ntxiv Dag Zog rau cov Tub Hluas Ntxhais Hluas rau lub hlis no.
Tej Tswv Yim Pab Qhia cov Me Nyuam
Phab ntawv piav txog Phau Ntawv Maumoos
Phau Ntawv Maumoos yuav pab kuv muaj kev ntseeg Yexus Khetos.
-
Cia koj cov me nyuam saib thiab tuav ib Phau Ntawv Maumoos. Pab lawv taw tes rau cov lus, Ib Zaj Lus Tim Khawv Ntxiv txog Yexus Khetos. Tej zaum koj yuav pab lawv, nyob ntawm phab ntawv qhia npe, nrhiav kab lus “Yexus yog tus Khetos, Vajtswv tus uas Nyob Mus Ib Txhis, ua tshwm sim nws tus kheej los rau txhua haiv neeg.” Pab lawv to taub tias kab lus no txhais hais tias Phau Ntawv Maumoos qhia peb txog Yexus Khetos. Qhia lawv txog qhov uas Phau Ntawv Maumoos tau txhawb koj txoj kev ntseeg Yexus Khetos dag zog li cas. Koj kuj nug lawv seb zaj dab neeg lawv nyiam tshaj hauv Phau Ntawv Maumoos yog dab tsi. Hu zaj nkauj “Book of Mormon Stories” (Children’s Songbook, 118–19) pab lawv nco qab txog tej zaj dab neeg no.
Zaj Lus Piav txog Phau Ntawv Maumoos
Phau Ntawv Maumoos yog lub plawv zeb ntawm peb txoj kev teev ntuj.
-
Phab ntawv ntxim ua rau lub lim tiam no thiab daim duab hauv pab tau koj cov me nyuam to taub tej lus no uas los ntawm Joseph Smith ntawm zaj lus piav txog Phau Ntawv Maumoos: “Phau Ntawv Maumoos [yog] lub plawv zeb ntawm peb txoj kev teev ntuj.” Tej zaum yuav lom zem ua taus los sis kos duab txog cov pob zeb ua nqeg uas muaj ib lub plawv zeb nyob sab saud . Yuav ua li cas yog tias yus muab lub plawv zeb tshem? Yuav zoo li cas yog tias peb tsis muaj Phau Ntawv Maumoos? Tej zaum koj nyeem ua ke nqe lus kawg ntawm zaj lus qhia thiab nrhiav seb puas muaj lwm yam peb kawm tau thaum peb txais qhov tseeb ntawm Phau Ntawv Maumoos. Peb yuav ua li cas kom ua tib zoo saib Phau Ntawv Maumoos yog lub plawv zeb ntawm peb txoj kev ntseeg Yexus Khetos?
Phau Ntawv Maumoos yog lub plawv zeb ntawm peb txoj kev teev ntuj.
“Zaj Lus Tim Khawv ntawm Peb tug Tim Khawv”; “Zaj Lus Tim Khawv ntawm Yim tus Tim Khawv”
Kuv txawj ua tim khawv txog Phau Ntawv Maumoos.
-
Kom pab koj cov me nyuam to taub tias ua ib tug tim khawv tseem ceeb li cas, tej zaum koj qhia lawv txog ib yam dab tsi ua koj tau pom tiam sis lawv tsis tau . Ces cia lawv ua tib yam nkaus li ntawd rau koj thiab. Tej zaum qhov no yuav ua rau nej xav sib tham txog 11 tub tib neeg ua tau pom cov phiaj kub uas tau siv kom txhais Phau Ntawv Maumoos. Thaum koj nyeem cov lus tim khawv no ua ke, tej zaum koj qhia tau vim li cas cov tim khawv no xav kom lwm cov tib neeg paub txog lawv cov lus tim khawv. Peb xav qhia leej twg txog Phau Ntawv Maumoos?
“Zaj Lus Tim Khawv ntawm tus Yaj Saub Joseph Smith”
Los ntawm Vajtswv lub Hwj Chim, Nws tau muab Phau Ntawv Maumoos rau peb.
-
Kom pab koj cov me nyuam kawm tias Vajtswv tau ua li cas kom muab Phau Ntawv Maumoos rau peb, koj kuj nyeem tau ib feem ntawm “Zaj Lus Tim Khawv ntawm tus Yaj Saub Joseph Smith” rau lawv. Tej zaum koj kuj yuav xav siv “Tshooj 1: Peb Tau Phau Ntawv Maumoos Li Cas” (hauv Cov Dab Neeg hauv Phau Ntawv Maumoos, 2–4). Koj cov me nyuam tej zaum yuav nyiam ua yeeb yam txog zaj dab neeg.
Yog xav tau tswv yim ntxiv, saib phau xov xwm Phooj Ywg rau lub hlis no.
Maulaunais Muab cov Phiaj Kub Los, los ntawm Gary L. Kapp