1 Nifais 1–5

Ib lub ntsiab lus nyob hauv Phau Ntawv Maumoos yog qhov uas Vajtswv txoj lus “muaj nqis heev” (1 Nifais 5:21). Thaum koj nyeem 1 Nifais 1–5, nrhiav seb Vajtswv txoj lus tau ua li cas kom Lihais tsev neeg tau koob hmoov (ua piv txwv, saib 1:11–15; 3:19–20; 5:10–22). Tej tshooj no qhia dab tsi rau koj txog Vajtswv? Koj nrhiav tau dab tsi uas tshoov koj lub siab thaum koj kawm cov vaj lug kub?

Kuj saib “Thaum Kuv Nyeem Vaj Lug Kub Dawb Huv,” Cov Nkauj Qhuas Vajtswv, zaj 130; “Scriptures Legacy” (vidi-aus), Txoj Moo Zoo cov Ntawv.

Sawv daws paub Nifais ntseeg tus Tswv heev, tiam sis nws yuav tsum khwv ua hauj lwm kom thiaj li tau ib zaj lus tim khawv—ib yam li peb txhua tus yuav tsum ua. Koj nyeem dab tsi nyob hauv 1 Nifais 2 uas qhia tias vim li cas Nifais paub tias tej lus uas nws txiv hais muaj tseeb? Vim li cas Lamas thiab Lemu-ees tsis paub li no? (Kuj saib 1 Nifais 15:2–11). Thaum twg koj tau hnov tus Tswv ua rau koj lub siab mos muag?

Kuj saib “The Lord Commands Lehi’s Family to Leave Jerusalem” (vidi-aus), Txoj Moo Zoo cov Ntawv.

Thaum tus Tswv txib Lihais cov tub mus khaws cov phiaj toog los ntawm Lanpas, Nws tsis qhia tias yuav tsum ua dab tsi kom ua li ntawd. Hais txog thaum Vajtswv coj peb txoj hau kev, qhov no yeej muaj tseeb, thiab ntshe qhov no yuav ua rau peb xav tias Nws twb txib peb ua ib qho “nyuaj heev” (1 Nifais 3:5). Qhov uas Nifais hais li cas txog tus Tswv txoj lus txib nyob hauv 1 Nifais 3:7, 15–16, tshoov koj lub siab li cas?

Thaum koj nyeem 1 Nifais 3–4, nrhiav seb Nifais tau raug tej teeb meem dab tsi. Tus Tswv tau ua li cas kom “npaj kev” rau Nifais kom “ua tau tiav tej yam uas [tus Tswv] tau txib lawv ua”? Vim li cas qhov uas koj paub txog tej yam uas tus Tswv ua rau Nifais yog ib qho tseem ceeb?

Ib qho zoo kawg nkaus uas Vajtswv tau npaj rau peb kom pab peb ua raws li Nws cov lus txib yog qhov uas Nws txib Yexus Khetos los ua peb tus Cawm Seej. Xav seb koj puas nyeem Thawj Tswj Hwm Dallin H. Oak zaj lus hu ua “Peb tus Cawm Seej Tau Ua Dab Tsi Pab Peb?” (Liahona, Tsib Hlis Ntuj 2021, 75–77). Yexus Khetos tau ua li cas kom npaj ib txoj kev rau peb txhua tus? Vim koj paub tias Nws tau kov yeej txhua yam rau koj, koj xav tias muaj dab tsi uas koj yuav tsum “mus thiab ua”?

Kuj saib “Nephi Is Led by the Spirit to Obtain the Plates of Brass” (vidi-aus), Txoj Moo Zoo cov Ntawv; Txoj Moo Zoo tej Ntsiab Lus, “Obedience,” Txoj Moo Zoo cov Ntawv.

Thaum Lamas thiab Lemu-ees xav yws yws, nkawd pheej muaj Nifais thiab Lihais nyob ze kom pab txhawb nqa thiab qhuab ntuas nkawd. Thaum koj xav yws yws, kev nyeem Nifais thiab Lihais cov lus yuav pab koj. Nifais thiab Lihais tau ua li cas kom sim pab lwm tus txoj kev ntseeg Vajtswv muaj zog? (saib 1 Nifais 4:1–3; 5:1–8; kuj saib 1 Nifais 7:6–21). Koj kawm dab tsi uas yuav pab koj lwm zaus koj raug ntxias los yws yws los yog ntxeev siab?

Nyob hauv 1 Nifais 4:5–18, muaj dab tsi uas tshoov koj lub siab txog qhov uas Nifais muaj peev xwm paub thiab ua raws li tus Ntsuj Plig qhia? Tej zaum koj yuav xav kawm Thawj Tswj Hwm Russell M. Nelson zaj lus hu ua “Kev Tshwm Sim rau lub Koom Txoos, Kev Tshwm Sim rau Peb lub Neej” (Liyahaunas, Tsib Hlis Ntuj 2018, 93–96) kom kawm ntxiv txog kev txais tshwm sim los ntawm tus Tswv.

• Nifais tau ua li cas thiaj paub tias tej yam uas nws txiv qhia muaj tseeb? Pab koj cov me nyuam nrhiav tej lus teb qhov no nyob hauv 1 Nifais 2:16, 19. Tej zaum lawv yuav nyiam sau ntawv txog tej yam uas Nifais tau ua rau cov block los sis lwm yam khoom ces siv tej khoom ntawd ua ib lub tsev los sis ib yam li ntawd. Tej zaum ua li no yuav ua rau nej xav sib tham txog qhov uas vim li cas tej yam uas peb ua pab peb muaj ib zaj lus tim khawv.

• Tej zaum koj yuav xav muab daim duab los sis tej yam khoom rau koj cov me nyuam saib kom piv txog tej yam uas lawv yuav xav ua tim khawv txog, xws li ib Phau Ntawv Maumoos los sis ib daim duab txog Yexus Khetos, ib lub tuam tsev, los sis tus yaj saub. Caw lawv xaiv ib qho thiab hais lus tim khawv txog qhov ntawd. Tej zaum koj yuav xav qhia koj cov me nyuam tias koj tau ua li cas kom thiaj li muaj ib zaj lus tim khawv. Vim li cas peb nyias yuav tsum muaj nyias zaj lus tim khawv?

• Xav seb koj puas siv ib los sis ob yam pab no kom pab koj cov me nyuam sib them txog qhov uas Vajtswv tau pab Nifais li cas kom tau cov phiaj toog: 1 Nifais 3–4; phab ntawv ntxim ua rau lub lim tiam no; “Nephi’s Courage” (Children’s Songbook, 120–21); thiab “Tshooj 4: Cov Phiaj Toog” (nyob hauv Cov Dab Neeg hauv Phau Ntawv Maumoos, 8–12).

• Tej zaum koj thiab koj cov me nyuam yuav nyiam ua yeeb yam txog 1 Nifais 3:2–7. Tej zaum koj yuav xav ua yeeb yam txog Lihais thiab thov koj cov me nyuam rov qab mus rau Yeluxalees nqa cov phiaj toog. Caw lawv teb xws li lawv yog Lamas thiab Lemu-ees los sis Nifais. Vajtswv tau txib peb ua tej yam twg? (saib cov duab 103–15 nyob hauv phau Phau Muaj Duab txog Txoj Moo Zoo los sis Mauxiyas 18:8–10 kom pab tawm tswv yim). Peb yuav ua li cas kom ua neeg zoo li Nifais?

• Lihais tsev neeg saib cov vaj lug kub tseem ceeb heev. Kom pab qhia txog qhov no, tej zaum koj yuav xav caw koj cov me nyuam pab koj qhia los sis ua yeeb yam txog tej yam uas Nifais thiab nws cov tij laug tau ua kom tau cov phiaj toog: lawv tau taug kev mus ntev heev, tso lawv cov kub thiab cov nyiaj tseg, thiab nkaum hauv ib lub qhov tsua kom dim. Ces koj nyeem tau 1 Nifais 5:21 thiab sib tham yog vim li cas Lihais tsev neeg saib cov vaj lug kub muaj nqis heev. Vim li cas peb saib cov vaj lug kub muaj nqis heev? Peb yuav ua li cas kom qhia tias peb saib cov vaj lug kub tseem ceeb heev?

• Tom qab nyeem phau 1 Nifais 3 ua ke uas qhia tias Nifais thiab nws cov tij laug tau ua li cas kom tau cov phiaj toog, nrog koj cov me nyuam nyeem 1 Nifais 4:6 thiaj li paub tias Nifais ua li cas kom thiaj li tau cov phiaj toog lawm. Ces tej zaum koj cov me nyuam yuav xav sau txog tej yam uas Vajtswv xav kom lawv ua. Yuav siv tus Vaj Ntsuj Plig Dawb Huv li cas thaum muaj xwm txheej li no?