Ewi Wāween Aō Tōpar “Kajoor ko an Lan̄” ilo Mour eo Aō?

Mālim an priesthood im kajoor rejjab jon̄an wōt juon. Juon armej emaron̄ bōk mālim an priesthood kōn likūt pā—em̧m̧aan ro remaron̄ bōk ekkapit n̄an juon opiij an priesthood, im jim̧or em̧m̧aan im kōrā remaron̄ bōk kōjenoļo̧k ko n̄an juon kūr. Ak kajoor eo an priesthood—kajoor an Anij, ak “kajoor ko an lan̄”—remaron̄ jerbal wōt n̄e “ioon wōt pedped ko an wānōk” (Katak im Bujen Ko 121:36), im jim̧or em̧m̧aan im kōrā remaron̄ kōjerbal kajoor in. Eļan̄n̄e jekōņaan jerbal in jipan̄ ko ad n̄an ro jet bwe en lukkuun kajoorļo̧k im ukot mour ko ad, jejj aikuj erreo n̄an kūr ko ad ioon kajoor ko an lan̄.

Ro uwaan doulul ak kūlaaj eo am̧ rejeļā ke wāween tōpar kajoor eo an priesthood eo? Ewi wāween an mour ko aer im jerbal in jipan̄ ko aer oktak eļan̄n̄e ekar wōr ippāer meļeļe in? Kejōkļo̧kjeņ kōn kajjitōk kein ilo am̧ ekkatak Katak im Bujen Ko 121. Enaaj barāinwōt em̧m̧an n̄e jej ekkatak ruo ennaan ko jān Būreejtōn Russell M. Nelson. Juon kar kwaļo̧k n̄an rikabwijer priesthood ro—“Wōņāān Kajoor in Priesthood eo” (Liaona, Māe 2016, 66–69). Eo juon kar kwaļo̧k n̄an sister ro—“Mennin Aorōk ko ilo Jetōb” (Liaona, Nob. 2019, 76–79).

N̄an jino juon ekkōnono kōn kajoor eo an priesthood, kwomaron̄ kajjitōk ippān ro uwaan doulul ak kūlaaj eo n̄an kwaļo̧k juon men me rekar ekkatak kōn kajoor in jān aer riiti Katak im Bujen Ko 121 ilo wiik in. Eļan̄n̄e ejipan̄, komaron̄ leļo̧k ļōmņak in ke ren lale wōt eoon ko 34–46 n̄an kappukot aolep jikin naan eo kajoor rej kōjerbale innem kwaļo̧k ta eo rekar ekkatak jāne. Komaron̄ kōjerbal m̧akūtkūt kein rej ellaajrak n̄an jipan̄ ro uwaan doulul ak kūlaaj eo bwe en em̧m̧anļo̧k aer meļeļe wāween tōpar kajoor eo an priesthood an Anij ilo mour ko aer.

• Emaron̄ ļap tokjen n̄an keidi wāween an “kajoor” im “im̧we” dāpdep wōt ilo laļ in kōn ta eo Irooj ekar katakin ilo jekjen 121 kōn wāween dāpij wōt kajoor in priesthood eo. Komaron̄ kōm̧m̧an ruo column chart ilo boot eo kōn taitōļ ko Kajoor ko an Laļ im Kajoor ko an Lan̄. Ro uwaan doulul ak kūlaaj eo remaron̄ kanne ilo jaat eo kōn naan in jentōj ko jān Katak im Bujen Ko 121:34–46. Ewi wāween n̄e jej meļeļe eoon kein jelōt wāween ad kappukot n̄an im̧we ro jet n̄an em̧m̧anļo̧k eo, ekoba ro m̧ōttad, ro uwaan baam̧le eo, im ro jej jerbal im karejar n̄an er? Ekkar n̄an eoon kein, ewi wāween an Jetōb Kwojarjar jipan̄ kōj im̧we ro jet ilo erreo?

• N̄an jipan̄ rikabwijer Priesthood eo an Aron ekkatak wāween n̄an boktok kajoor n̄an jerbal ko an priesthood, komaron̄ kwaļo̧k jet men ko im kajjitōk ippān ro uwaan doulul eo n̄an kajidede jet iaan men ko eļap tokjāer. Etke jet iaan men ko eļapļo̧k tokjeer jān men ko jet? Ta men ko eļapļo̧k tokjāer ilo mour ko ad, im jete wōņāān eo jej aikuj “kōļļāiki” er? Ro uwaan doulul eo emaron̄ kappukot ennaan eo an Būreejtōn Russell M. Nelson “Wōņāān Kajoor in Priesthood eo,” lale wōņāān eo ekar ba jej aikuj kōļļāiki n̄an bōk kajoor in priesthood. Ewi wāween an mour ko ad im ko an ro jet jelōt ilo ad jerbal kōn eļapļo̧k kajoor an Rilo̧mo̧o̧r?

• N̄an jipan̄ jiron̄ ro meļeļe wāween aer tōpar kajoor eo an priesthood, komaron̄ kajjitōk ippāer n̄an ļōmņak kōn iien ko ke rekar en̄jake kajoor an Anij ilo mour ko aer. Kōmeļeļe bwe kajoor eo an priesthood ej kajoor an Anij. Remaron̄ kappukot ennaan eo an Būreejtōn Russell M. Nelson “Mennin Aorōk ko ilo Jetōb” kōn m̧ool ko kōn kōrā ro im kajoor an priesthood. Ta eo Būreejtōn Nelson ej kajjitōk ippān kōrā ro ilo Kabun̄ in n̄an kōm̧m̧an n̄an “kōmakijkij im kōjerbal kajoor eo an Rilo̧mo̧o̧r”? (peij 77; lale eļaptata pāārokūrāāp ko emān jinoin me ej jino kōn “Aolep kōrā ro im aolep em̧m̧aan”). N̄āāt eo em̧ōj ad kepaak kajoor in n̄an kōjeraam̧m̧an mour ko ad im our ko an ro jet? Ta eo Katak im Bujen Ko 121:39–43 ej katakin kōj kōn wāween kōm̧m̧an kōn kajoor eo an Irooj ilo mour ko ad?

Rōjan̄ ro uwaan doulul ak kūlaaj eo n̄an kejo̧kļo̧kjeņ im je ta eo renaaj kōm̧m̧ane ekkar n̄an im̧we ko rej en̄jaki rainin. Ewi wāween an katak eo an rainin iookļo̧k kōttōbar ko an juon make me rekar kōm̧m̧ani? Eļan̄n̄e rekōņaan, ro uwaan doulul ak kūlaaj eo remaron̄ kwaļo̧k ļōmņak ko aer.

• Russell M. Nelson, “Bōktok Kajoor eo an Jisōs Kraist ilo Mour ko Ad,” Liaona, Māe 2017, 39–42

• David A. Bednar, “Kajoor ko an Lan̄,” Liaona, Māe 2012, 48–51