Kōjerbal Itok, Ļoor Eō—N̄an Doulul ko an Priesthood eo an Aron im Kūlaaj ko an Doulul eo an Jiron̄ ro

Irooj ekar lewaj n̄an kwe juon lōke ekwojarjar: Ekar kūr kwe n̄an jerbal ilo juon būreejtōnji an doulul eo an Priesthood eo an Aron ak būreejtōnji an kūlaaj eo an Doulul eo an Jiron̄ ro. M̧ōttan eddo eo am̧ ej n̄an tōl im kajekiik kweilo̧k ko an doulul eo ak kūlaaj eo ilo Jabōt. N̄an kōm̧m̧an menin, ejipan̄ n̄an meļeļe etke jej kōm̧m̧ani kweilo̧k kein.

Kweilo̧k ko an Doulul eo an Priesthood eo an Aron im Kūlaaj ko an Doulul eo an Jiron̄ ro reoktak jān kūlaaj ko an Kabun̄ in āinwōt Jabōt Jikuuļ ak Jemenere. Ilo kweilo̧k ko an doulul eo ak kūlaaj eo, jej kōm̧m̧ane eļapļo̧k jān ekkatak wōt juon unin kōnono an gospel eo. Jej ekkatak kōn jerbal eo me Anij ekar letok n̄an kōj, im jej kōlaajrake ro uwaan doulul eo ak kūlaaj eo ad n̄an kōm̧m̧ane jerbal ko ilo m̧ōko im̧ōd, ilo m̧ōnjar eo, ak ilo jukjukin pād eo ad. Jej kōm̧m̧an pepe, n̄an waanjon̄ak, ewi wāween ad naaj kakūrm̧ool jerbal ko ad āinwōt m̧ōttan jarin tariņae eo an Irooj n̄an jipan̄ aiintok Israel. Ilo kweilo̧k kein, jejjab kōnono wōt kōn jerbal—ak jej kōm̧m̧an pepe n̄an kōm̧mane.

Bōtaab kōmejaja in kōn jerbal ejjab meļeļe in bwe jej door wōt ekōnono ko an katak wōt ilo Jabōt Jikuuļ wōt. Ilo m̧ool, ekkatak katak ilo doulul eo im kweilo̧k ko an Doulul eo an Jiron̄ ro eaorōk—ejipan̄ kōj meļeļe un ko unin ad kōm̧m̧ane jerbal eo. Ilo ad ekkatak gospel eo ippān doon, m̧ool ko jej ekkatak remaron̄ ukot buruōd. Jemaron̄ bōk im̧we kōn wāween ko n̄an kōļapļo̧k “ilo mālōtlōt im rūtto, im ilo jouj ippān armej im Anij” (Luk 2:52). Ilo an ļapļo̧k ad erom rioktak n̄an Jisōs Kraist im gospel eo An, jenaaj en̄jake ikdeelel ko n̄an jipan̄ ro jet ilo iaļ in bujen eo ļo̧k, ekoba baam̧le ko ad, ro m̧ōttad, im ro uwaan doulul eo ad im kūlaaj eo ad.

Anij ekar kūr eok āinwōt būreejtōnji ko an doulul eo im kūlaaj ko im kar lewaj n̄an eok mālim n̄an tōl. Unin an kajjojo kweilo̧k an doulul eo ami ak kūlaaj eo ami aikuj in kōjeikik jān juon uwaan būreejtōnji eo an doulul eo ak kūlaaj eo ami. Ritōl ro rerūtto rej aikuj leļo̧k tōl im rie, ak rejjab aikuj kōm̧m̧ane n̄an kwe. Lale jekjōn eo taitōļ in “Kapilōk Ippān Doon” ilo jino in kajjojo unin tōl ilo kein jipan̄ in n̄an ļōmņak ko n̄an jipan̄ eok jeļā ekōjkan tōl juon kweilo̧k im kadedeļo̧k jibadbad ko rem̧ool an. Kōjerbal kweilo̧k ko an būreejtōnji eo n̄an karōk wāween am̧ naaj kōjeikik kweilo̧k kein ilo Jabōt.

Ritōl ro rerūtto, juon uwaan doulul eo ak kūlaaj būreejtōnji eo, ak jabdewōt ro uwaan jet an doulul eo ak kūlaaj eo remaron̄ katakin katak ko. Āinwōt būreejtōnji an doulul eo ak kūlaaj eo, bōk an doon ļōmņak ippān ritōl ro rerūtto kōn wōn eo kar aikuji kappeik n̄an katakin katak ko. Keememej bwe ritōl ro rerūtto ami ekanooj ļap ijo remaron̄ letok. Kappukot n̄an ekkatak jān en̄jake ko aer im naan in kam̧ool ko aer. Elōn̄ em̧m̧an ko n̄an kajjitōk ippān jodikdik ro n̄an katakin—katakin emaron̄ jipan̄ kam̧ūlaļļo̧k oktak ko aer im kalōk jem̧jerā ko reppenļo̧k ippān ro jet uwaan doulul eo ak kūlaaj eo. Kōn menin leļo̧k n̄an er iien ko rem̧m̧an rejetjet n̄an katakin aolepān ak jidik in katak eo, bōtaab likūt ilo kōļmenļo̧kjeņ aikuj ko im maron̄ ko an armej ro ilo doulul eo ak kūlaaj eo am̧. N̄an waanjon̄ak, ritōl ro rerūtto emaron̄ emakijkijļo̧k aer katakin ilo doulul ko ak kūlaaj ko ippān jodikdik ro reddikļo̧k ak ippān jodikdik ro me edikļo̧k aer iiminene ilo katakin gospel eo. N̄e kwoj kajjitōk ippān juon jodikdik n̄an katakin, juon jinen ak jemen ak juon rikapilōk erūtto aikuj in jipan̄ er m̧aanjabpopo ilo an menin aikuj.

Ro me kar jitōn̄ er n̄an katakin remaron̄ kōjerbal taitōļ jekjōn eo “Katakin Katak eo” ilo kajjojo unin tōl ilo kein jipan̄ in n̄an jipan̄ er m̧aanjabpopo. Jekjōn in epād ie elmako ko n̄an katakin im ekōnono kōn katak eo n̄an wiik jab eo, bōtaab rūkaki ro ejjab aikuj wōr jon̄an aer en̄jake n̄an kein jipan̄ kein make. Āinwōt an Jetōb tōl, rūkaki ro remaron̄ ukukōt ļōmņak kein ak kōjerbal eo aer make ilo juon wāween eo me enaaj jetjet an tōpar aikuj ko an ro uwaan doulul eo im kūlaaj eo im jipan̄ er meļeļe katak eo.

Unin kōnono eo an unin tōl eo an kajjojo wiik ej juon pedped in katak an katak eo me kar jokāālete n̄an kajjokun wōt juon ippān kein riit eo kar jitōn̄e an Bok in Mormon n̄an wiik jab eo, loe ilo Itok, Ļoor Eō—N̄an Kajjojo Armej im Baam̧le ko. Ilo wāween in, ekōnono ko an katak eo ilo kweilo̧k ko an doulul eo im kūlaaj eo renaaj rie ta eo jodikdik ro rej ekkatak ilo m̧weo.

Men̄e unin tōl ko rej aikuj in katakin ilo Jabōt ko rejeno̧lok, enaaj wōr am̧ kāālet n̄an ekōnono kōn unin kōnono ko an katak ko jet pedped ioon aikuj ko an doulul eo im kūlaaj eo ami.

Kein jipan̄ kein ekoba unin tōl ko n̄an kajjojo wiik n̄e kweilo̧k ko an doulul eo an Priesthood eo an Aron im kūlaaj ko an Doulul eo an Jiron̄ ro rej kōm̧m̧an. Jet iien, komaron̄ aikuj in kejoon juon katak kōnke kōn kweilo̧k ko an stake ak un ko jet.

Ritōl ro rerūtto ami rej kōm̧m̧ane juon jerbal aorōk ilo doulul ko an Priesthood eo an Aron im kūlaaj ko an Doulul eo an Jiron̄ ro. Renaaj tōl im kapilōk eok ilo kūr in tōl ko am̧. Renaaj rie im rōjan̄ eok ilo am̧ kōm̧m̧ane jerbal eo an doulul eo ak kūlaaj eo am̧. Renaaj katakin eok katak eo, im renaaj kōjeraam̧m̧an eok kōn waanjon̄ak ko aer, en̄jake, im naan in kam̧ool.