Ewi wāween Aō Maron̄ Lukkuun M̧ool in Oktaktok n̄an Irooj?

N̄an lukkuun m̧ool in oktaktok n̄an Jisōs Kraist, jej aikuj lōke E im pokake kien ko An—men̄e ilo iien ko rapan̄ n̄an idajon̄jon̄ oktak eo ad. Ilo 1837, jet iaan membōr ro an Kabun̄ in, ekoba jet member in Doulul eo an Jon̄oulruo Rijilōk Ro, ejako naan in kam̧ool ko aer im rekar oktakļo̧k ņae Rikanaan Josep Smith. Tomas B. Marsh e kar ilo tōre in Būreejtōn eo an Doulul eo an Jon̄oulruo Rijjilōk. Ilo am̧ im baam̧le eo am̧ riiti Katak im Bujen Ko 112 wiik in, komaron̄ kile kapilōk eo Irooj ekar leļo̧k n̄an jipan̄ Thomas B. Marsh kōkajoorļo̧k oktak eo an (lale eļaptata eoon ko 10–26). Ta eo kapilōk in ej katakin eok kōn lukkuun m̧ool in oktaktok n̄an Rilo̧mo̧o̧r?

Ewi wāween am̧ maron̄ jipan̄ ro uwaan doulul ak kūlaaj eo bōk kallim̧ur eo an Rilo̧mo̧o̧r bwe “renaaj oktaktok, im Inaaj kōmour er”? Katak im Bujen ko 112:24 Ta en̄jake ko jemaron̄ kwaļo̧ki? Ilo am̧ kejōkļo̧kjeņ kōn kajjitōk kein, ļōmņak n̄an etale ennaan eo an Būreejtōn Bonnie H. Cordon “Lōke Irooj im Jab Atartar” (Liaona, Māe 2017, 6–9) im “Conversion” ilo True to the Faith ([2004], 40–43).

Membōr ro ilo doulul ak kūlaaj eo am̧ rejeļā ke ta meļeļein n̄an oktaktok n̄an Jisōs Kraist? Rejeļā ke wāween lukkuun m̧ool in oktaktok? Karuwaineneik er n̄an kejo̧kļo̧kjeņ kōn kajjitōk ein ilo aer etale Katak im Bujen Ko 112:10–26. Ewi wāween ad dāpdep ilo ad oktak n̄an Jisōs Kraist men̄e ilo jekjek ko rapan̄? Kwomaron̄ kōjerbal juon ak eļapļo̧k m̧akūtkūt ko rej ellaajrak n̄an jipan̄ doulul ak kūlaaj eo kōkajoorļo̧k oktak tok eo aer ilo Rilo̧mo̧o̧r?

• Alma 32:27–43 emaron̄ jipan̄ ro kwoj katakin er meļeļe kōn wāween kōkajoorļo̧k tōmak eo aer im lukkuun m̧ool in oktaktok n̄an gospel eo an Jisōs Kraist. Bolen kwomaron̄ kōjepeļo̧k ro uwaan doulul ak kūlaaj n̄an kurup ko im kajjitōk ippān kajjojo kurup n̄an riiti eoon ko im kōmeļeļe ta eo rej katakin kōn tōmak im oktaktok. Kajjitōk ippān kajjojo kurup n̄an kwaļo̧k ļōmņak ko aer. Komaron̄ rōjan̄ ekkōnono ko ilo am̧ kajjitōk kajjitōk kein: Etke ej juon ine eo ej eddōkļo̧k im erom̧ juon wōjke ej juon kōmeļeļe em̧m̧an kōn oktaktok? Ta meļeļein n̄an “mālejoni naan ko an [Anij]”? (eoon 27). Ta meļeļein n̄an “ņa kōņin wōjke eo”? (eoon 41). Ewi wāween ad ba bwe ine in oktak eo “juļ, eo̧n̄, im jino an eddek” ilo kōj? (eoon 30). Leļo̧k n̄an membōr ro ilo doulul ak kūlaaj eo iien n̄an kejo̧kļo̧kjeņ kōn ta eo rej aikuji n̄an kōkajoorļo̧k oktak eo aer make n̄an Jisōs Kraist.

• Elukkuun lōn̄ kajoor ko renana ilo laļ in me rej jum̧ae oktak tok eo ad n̄an Jisōs Kraist. Riiti Hilamōn 5:12 emaron̄ katakin doulul ak kūlaaj eo wāwen kajoor wōt jekdo̧o̧n jum̧ae ko. Ta meļeļein n̄an “kalōk pedped eo am̧” ioon ejaam eo an Jisōs Kraist? Komaron̄ jitōn̄ kajjojo armej juon m̧ōttan ennaan eo an Elder Quentin L. Cook “Pedped in Tōmak Ko” (Liaona, Māe 2017, 127–31) im kajjitōk ippāer n̄an etale waanjon̄ak ko im kapilōk ko me rej jipan̄ er kalōk pedped eo aer ioon Rilo̧mo̧o̧r.

• Kwomaron̄ ke ļōmņak kōn juon wāween eo ewājepdik n̄an kwaļo̧k pedped eo kar katakin jān Būreejtōn Bonnie H. Cordon ilo ennaan eo an “Lōke Irooj im Jab Atartar”? N̄an waanjon̄ak, komaron̄ kōjepelļo̧k doulul ak kūlaaj eo n̄an kurup ko im kajjitōk ippān kajjjojo kurup n̄an kalōk annōk eo eutiejtata ilo juon Innām kōnono kōn wāween an menin iookļo̧k ennaan eo an Būreejtōn Cordon. Doulul ak kūlaaj eo ej aikuj etale ennaan ko n̄an ļōmņak kōn ewi wāween an mour ko ad pedped wōt ioon Jisōs Kraist. Ta en̄jake ko me jemaron̄ kwaļo̧k n̄e jekar atartar ilo jeļā eo ad make ak n̄e jekar lōke ilo Rilo̧mo̧o̧r?

Rōjan̄ ro uwaan doulul ak kūlaaj eo n̄an kejo̧kļo̧kjeņ im je ta eo renaaj kōm̧m̧ane ekkar n̄an im̧we ko rej en̄jaki rainin. Ewi wāween an katak eo an rainin iookļo̧k kōttōbar ko an juon make me rekar kōm̧m̧ani? Eļan̄n̄e rekōņaan, ro uwaan doulul ak kūlaaj eo remaron̄ kwaļo̧k ļōmņak ko aer.

• Alma 5 (Alma ej katakin kōn oktaktok)

• David A. Bednar, “Oktaktok n̄an Irooj,” Liaona, Nob. 2012, 106–9

• Richard J. Maynes, “Lan̄lōn̄ eo ilo Mour Āinwōt Kraist,” Liaona, Nob. 2015, 27–30

• Becky Craven, “Tiljek ņae Jatiljek,” Liaona, Māe 2019, 9–11