Ewi Wāween Aō Kōppopo Kiiō n̄an Ejaake M̧weo iEj Pedped Wōt Ioon Kraist?

Katak im Bujen Ko 68 ekoba kapilōk n̄an pāāren ro me remaron̄ jab lukkun aorōk n̄an ro uwaan doulul ak kūlaaj (lale eoon ko 25–28). Ijoke, kōnke remaron̄ lukkuun ļap kajoor in an ukot baam̧le ko kiiō im ilju im jekļaj, kapilōk in emaron̄ jipan̄ er kiiō. Wāween eo em̧m̧antata n̄an er n̄an kōpooj n̄an ejaake m̧weo me ej pedped ioon Kraist ilo ilju im jekļaj ej n̄an “etetal jejjet im̧aan Irooj” rainin (eoon 28).

Ta kōjeraam̧m̧an ko rekar itok n̄an baam̧le eo am̧ kōnke kwar ļoor katak ko an Rilo̧mo̧o̧r? Ewi wāween an ro uwaan doulul ak kūlaaj eo maron̄ jipan̄ baam̧le ko aer ejaake m̧weo me ej pedped ioon Kraist? N̄an kōppopo n̄an katakin, kwomaron̄ etale ennaan eo an Būreejtōn Henry B. Eyring “M̧weo Ijo Jetōb eo an Irooj ej Jokwe ie” (Liaona, Māe 2019, 22–25) im “Baam̧le Eo: Juon Naan in Kean̄ n̄an Laļ in” (ChurchofJesusChrist.org).

N̄an jipan̄ ro uwaan doulul ak kūlaaj eo lale wāween Katak im Bujen Ko 68:25–28 iookļo̧k er, kwomaron̄ kajjitōk ippāer n̄an je juon kōmeļeļe ekadu kōn ta eo rekōņaan bwe baam̧le eo aer ilju im jekļaj bwe en erom̧. Kwomaron̄ kajjitōk ippāer n̄an kwaļo̧k ta eo rekar je eļan̄n̄e rej ikdeleel. Innem remaron̄ riit Katak im Bujen Ko 68:25–28 im kappukot katak im pedped ko an gospel me emaron̄ jipan̄ kalōk baam̧le ko ilo jim̧we kiiō im ilju im jekļaj. M̧akūtkūt eo ilaļ emaron̄ jipan̄ er meļeļe wāween n̄an kōm̧m̧an bwe Kraist en pedped in baam̧le eo aer.

• Pārokūrāāp jiljilimjuon an “Baam̧le Eo: Juon Naan in Kean̄ n̄an Laļ in” epād ie m̧ool ko me remaron̄ jipan̄ ro uwaan doulul ak kūlaaj eo n̄an likūt pedped in m̧weo im̧ōer ioon Rilo̧mo̧o̧r. Karuwaineneik er n̄an riit pārokūrāāp in im kakilen katak im pedped ko me renaaj jipan̄ juon baam̧le bwe ren m̧ōņōņō. Kwomaron̄ kōņaan je ioon boot kein im kajjitōk ippān ro kwoj katakin er n̄an kōmeļeļe etke kajjojo renaaj jipan̄ juon baam̧le m̧ōņōņō. Ro uwaan doulul ak kūlaaj eo remaron̄ kōņaan kwaļo̧k wāween aer kar loi katak im pedped kein me rej mour kaki ilo baam̧le ko aer ak er make. Rojan̄ er n̄an kejōkļo̧kjeņ kake wāween aer maron̄ mour kake diktata juon iaan pedped ko ilo mour ko aer kiiō. Kam̧ool n̄an er bwe remaron̄ kōm̧m̧an bwe Kraist en pedped in m̧weo m̧ōer, jekdo̧o̧n ta jekjek eo an baam̧le rej itok jāne.

• Ro uwaan doulul ak kūlaaj eo remaron̄ kōnono kōn men ko me rej dāpij Rilo̧mo̧o̧r bwe en pedped in m̧weo im̧ōd im men ko me rej bōbrae E jān an erom̧ pedped in m̧ōko m̧ōd. Kwomaron̄ kajjitōk ippān kajjojo armej ak kurup jiddik ko n̄an etale juon iaan jekjen ko ilo ennaan eo an Būreejtōn Henry B. Eyring “M̧weo Ijo Jetōb eo an Irooj ej Jokwe ie” (Liaona, Māe 2019, 22–25) n̄an pukot pedped ko me remaron̄ jipan̄ kōm̧m̧an bwe m̧ōko m̧ōd ren pedped wōt ioon Kraist. Karuwaineneik ro uwaan doulul ak kūlaaj eo n̄an kwaļo̧k ta eo rej ekkatak im kāālet juon men renaaj kōm̧m̧an ilo wiik in tok n̄an kōm̧m̧an m̧ōko m̧ōer eļapļo̧k pedped ion Jisōs Kraist im katak ko An.

• Bōlen kwomaron̄ kajjitōk ippān juon ak elōn̄ uwaan doulul ak kūlaaj eo n̄an al im riit juon al kōn m̧weo im baam̧le, āinwōt “Home Can Be a Heaven on Earth” (Hymns, no. 298) ak “Love Is Spoken Here” (Children’s Songbook, 190). Ro jet remaron̄ ron̄jake kōn ta eo al eo ej katakin kōn kōm̧m̧ane juon em̧ jikin elem̧ōņōņō. Karuwaineneik er n̄an kwaļo̧k juon en̄jake n̄e rekar en̄jake m̧ōņōņō kōnke rekar kwaļo̧k aer iakwe ak n̄e rekar jipan̄ kōļapļo̧k iakwe ilo m̧ōko m̧weer.

Rōjan̄ ro uwaan doulul ak kūlaaj eo n̄an kejo̧kļo̧kjeņ im je ta eo renaaj kōm̧m̧ane ekkar n̄an im̧we ko rej en̄jaki rainin. Ewi wāween an katak eo an rainin iookļo̧k kōttōbar ko an juon make me rekar kōm̧m̧ani? Eļan̄n̄e rekōņaan, ro uwaan doulul ak kūlaaj eo remaron̄ kwaļo̧k ļōmņak ko aer.

• Mosaia 4:14–16; Katak im Bujen Ko 88:119; 121:41–46 (Ewi wāween n̄an ejaake juon em̧ eo ewāppen)

• “What Can I Do to Help Ease Family Tension?” jān Face to Face eo ippān Elder Rasband, Sister Oscarson, im Brother Owen (kadiwōjļo̧k eo imejatoto eo an jodikdik ipeļaakin laļ in, Jan. 20, 2016), “Two Brothers Apart,” “Through Small Things,” “More Diligent and Concerned at Home” (videos), ChurchofJesusChrist.org