Ewi Wāween Aō Bōk Menin Letok eo an Jetōb Kwojarjar?

Ālikin ad peptaij, ro rej kabōjer priesthood eo rej likūt pā ko peir ioon bōrad n̄an letok mennin letok eo an Jetōb Kwōjarjar. Doulul eo ak ro uwaan kūlaaj eo maron̄ kar bar kakeememej er ke raar ekkatak jān Katak im Bujen Ko 51–57 ilo wiik in. Mekarta, bōk Jetōb Kwojarjar eo aikuj eļapļo̧k jān men eo. N̄an bōk Jetōb Kwojarjar eo āinwōt juon ad kōm̧pānien aolep iien, jej aikuj kōņaan bwe en pād ippād, karuweineneiki n̄an mour ko ad, im tiljek ilo kōjparok kien ko. Ta kōjeraam̧m̧an ko renaaj itok n̄an mour ko an ro kwoj katakin er ilo aer kappukot tōl eo An?

N̄an jipan̄ eok kepoojak n̄an katakin, kwomaron̄ etale “The Gift of the Holy Ghost” ilo True to the Faith ([2004], 83–84) ak enaan eo an Būreejtōn Henry B. Eyring “Jetōb eo An en pād Ippam” (Liaona, Māe 2018, 86–89).

N̄an jipan̄ doulul eo ak ro uwaan kūlaaj eo em̧m̧anļo̧k aer meļeļe menin letok eo an Jetōb Kwojarjar, kwomaron̄ ijjino jān am kōnono kōn wāween ad bōk menin letok eo an Jetōb Kwojarjar. Remaron̄ riiti Katak im Bujen Ko 52:10; 53:3; 55:1–3 im kōmeļeļe kōn ta eo rej ekkatak. Kallikar bwe rikabwijer priesthood eo ejjab letok Jetōb Kwojarjar eo ak ej kūr membōr eo n̄an bōk Jetōb Kwojarjar. Ta oktak eo? M̧akūtkūt ko ilaļ remaron̄ jipan̄ ro me kwoj katakin er meļeļe em̧m̧anļo̧k kōn wāween n̄an bōk menin letok in eļap.

• Ta eo Liai im baam̧le eo an rekar kōm̧m̧an n̄an bōk tōl jān Liaona eo ejjeļo̧k oktak jān ta eo jej aikuj kōm̧m̧an n̄an bōk tōl eo an Jetōb Kwojarjar. Kwomaron̄ kwaļo̧k juon pijaan Liai im Liaona eo (lale Gospel Art Book [2009], no. 68) im kajjitōk ippān doulul eo ak ro uwaan kūlaaj eo n̄an kwaļo̧k ta eo rejeļā kōn Liaona eo. Innem, kwomaron̄ kūr jimettan in er n̄an riiti 1 Nipai 16:14–29 im jimettan eo juon n̄an riiti 1 Nipai 18:8–22, kappukot jekjek ko Liaona eo ej āinwōt Jetōb Kwojarjar eo. Ta eo jej ekkatak jān waanjon̄ok eo an baam̧le eo an Liai me emaron̄ jipan̄ kōj lukkuun bōk Jetōb Kwojarjar?

• Kajjojo jekjen ilo N̄an Kōkajoorļo̧k Jodikdik ro epād ie kapilōk kōn mour kōn jon̄ok ko im kien ko an Irooj. Mour kōn kien kein rej karuwaineneik kajoor eo an Jetōb Kwojarjar n̄an mour ko ad. Ļōmņak in kūr doulul eo ak ro uwaan kūlaaj eo n̄an kālet juon iaan jekjen ko ilo N̄an Kōkajoorļo̧k Jodikdik ro, riiti, im kōkaļļeik men ko me rej aikuj kōm̧m̧ane ak jab kōm̧m̧ane n̄an jipan̄ er bōk Jetōb Kwojarjar. Kiiō remaron̄ kwaļo̧k ta eo rekar ekkatak ippān aolepān doulul eo ak kūlaaj eo. Kūr er n̄an kōmlet juon kōttōbar me emaron̄ jipan̄ er lukkuun bōk Jetōb Kwojarjar. Etke jekōņaan bwe en pād Jetōb Kwojarjar eo ippād? (lale Jon 14:26–27; 15:26; 16:13; 2 Nipai 32:3).

• Ilo enaan eo an “Jetōb eo An en pād Ippam” (Liaona, Māe 2018, 86–89), Būreejtōn Henry B. Eyring eaar ba, “Jibadbad eo aō rainin ej n̄an kōļapļo̧k ikdelel im maron̄ eo am̧ n̄an bōk Jetōb Kwojarjar” (peij 86). Kajjitōk ippān doulul eo ak ro uwaan kūlaaj eo n̄an riiti pārokōrāāp ruatimjuōn ilo enaan eo an ijjino ilo “En̄jake eo an Rikanaan Josep Smith.” (peij 88). Kūr er n̄an kappukōt ta e Josep Smith ekar kōm̧m̧an n̄an bōk tōl jān Jetōb Kwojarjar. Er remaron̄ kōllaajrake ioon boot eo ta ko rej loi. N̄e ekkar, kwomaron̄ kūr er n̄an kwaļo̧k en̄jake ko aer kōn aer kar bōk tōl jān Jetōb Kwojarjar. Ta eo raar kōm̧m̧an ilo iien ko en̄jake kein raar waļo̧k me ekar tōl er n̄an bōk tōl jān Jetōb Kwojarjar? Kwomaron̄ barāinwōt kwaļo̧k am̧ en̄jake.

Rōjan̄ ro uwaan doulul ak kūlaaj eo n̄an kejo̧kļo̧kjeņ im je ta eo renaaj kōm̧m̧ane ekkar n̄an im̧we ko rej en̄jaki rainin. Ewi wāween an katak eo an rainin iookļo̧k kōttōbar ko an juon make me rekar kōm̧m̧ani? Eļan̄n̄e rekōņaan, ro uwaan doulul ak kūlaaj eo remaron̄ kwaļo̧k ļōmņak ko aer.

• Moronai 8:25–26; Katak im Bujen Ko 20:77, 79; 121:45–46 (Wāween bōk Jetōb Kwojarjar)

• David A. Bednar, “Receive the Holy Ghost,” Liahona, Nov. 2010, 94–97

• Douglas D. Holmes, “The Gift of the Holy Ghost” (First Presidency Christmas Devotional, Dec. 4, 2016), broadcasts.ChurchofJesusChrist.org