Elmen Aō Maron̄ Mour Āinwōt Kraist ilo Jerbal in Jipan̄ ro Jet?

Ke Irooj ej kakien Armej ro Rekwojarjar n̄an aintok doon ilo Kirtland, Ohio, elōn̄ armej ro retiljek rekar joļo̧k m̧oko im̧weer im em̧m̧akūtļo̧k n̄an ijo. Ak em̧m̧akūt in ekar jab wōt kōn mour ilo juon jikin ekāāl—eaar barāinwōt kōn mour ilo juon jekjek ekāāl. Doulul eo ak ro uwaan kūlaaj eo emaron̄ kar mōj aer ekkatak Katak im Bujen Ko 41-44 ilo wiik in im kar ekkatak kōn an Rikwojarjar ro em̧m̧akūtļo̧k n̄an Kirland im kien eo Irooj ekar kwaļo̧k n̄an er ijo. Ilōn̄n̄inļo̧k men ko jet, Irooj ekar kōtmene bwe Rikwojarjar ro ren ippān doon ilo aer iakwe im jerbal n̄an doon (lale Katak im Bujen Ko 42:30–31, 38–39, 45; 44:6). Ta men ko kwar ekkatak jāni komaron̄ kwaļo̧k me emaron̄ jipan̄ doulul eo ak kūlaaj eo en̄jaake aurōk in jerbal in lale āinwōt Kraist?

N̄an jipan̄ eok kepojak n̄an katakin kōn jerbal in jipan̄ āinwōt Kraist, kwomaron̄ bar etale “Jerbal in Jipan̄” ilo N̄an Kōkajoorļo̧k Jodikdik ro ([2011], 32–33) im enaan eo an Bureejitōn Russell M. Nelson’s “Kien Ko Kein Karuo” (Liaona, Nob 2019, 96–100).

N̄an ijjino juon kōmeļeļe kōn jerbal in jipan̄ āinwōt Kraist, kwomaron̄ jeje ioon bo̧o̧t eo “mour ippān doon ilo iakwe” (Katak im Bujen Ko 42:45). Kūr doulul eo ak kūlaaj eo am̧ n̄an riiti Katak im Bujen Ko 42:30–31, 38–39, 45; 44:6 im kelaajrak jekjek ko Irooj ekar kōņaan bwe Rikwojarjar ro ren jerbal n̄an doon. Ta iien ko rem̧m̧an ewōr ippād, jim̧ōr ilo m̧oko im̧ōd im inam̧ōjier, n̄an jerbal n̄an ro rej aikuj ilo kanniōk, ļōmņak, im jetōb? Ekāleel jān ļōmņak ko itulaļ n̄an im̧weik doulul eo ak kūlaaj eo n̄an kōm̧man jerbal in jipan̄ āinwōt Kraist n̄an ro jet.

• N̄an jipan̄ doulul eo ak ro uwaan kūlaaj eo ekkatak jān waanjon̄ak eo an Rilo̧mo̧o̧r eo, kwomaron̄ leļo̧k n̄an kajjojo armej n̄an riiti juon ioon kōn an Rilo̧mo̧o̧r eo jerbal n̄an juon armej (lale “Kein Jipan̄ ko rej Rie”). Kajjojo armej remaron̄ kōmeļeļeik ilo kadu ioon eo im kōmeļeļeik ta eo Rilo̧mo̧o̧r eo ekar kōm̧m̧an n̄an jerbal n̄an ro jet. Ta eo waanjon̄ak kein rej katakin kōn ta meļeļein n̄an jerbal āinwōt an kar Rilo̧mo̧o̧r eo kōm̧m̧an? Ta oktak eo ikōtaan jerbal in jipan̄ ilo wāween eo an Rilo̧mo̧o̧r eo im wāween ko jet in jerbal in jipan̄? Doulul eo im ro uwaan kūlaaj eo remaron̄ kwaļo̧k kōn iien ko ke rekar kajjeon̄ jerbal āinwōt an kar Rilo̧mo̧o̧r eo kōm̧m̧ane ak ke ro jet rekar jerbal n̄an er ilo wāween in.

• Emaron̄ jipan̄ n̄an doulul eo ak kūlaaj eo am̧ n̄an etale ta eo Rilo̧mo̧o̧r eo im rikanaan ro An rekar katakin kōn jerbal in jipan̄. Erkein jet ioon ko remaron̄ riiti ippān doon: Matu 25:31–46; Luk 10:25–37; Jon 13:34–35; Jemes 1:27; Mosaia 2:17; 18:8–10. Kōketak er n̄an je ta eo rej ekkatak kake kōn jerbal n̄an ro jet im kwaļo̧k ļōmņak ko im men ko rekar ekkatak jāni me reiookļo̧k ta eo rekar ekkatak. Innem remaron̄ karōk jekjek ko n̄an leļo̧k jerbal in jipan̄ āinwōt Kraist. (Remaron̄ ebbōk ļōmņak ko jān aer alooje juon ak elōn̄ļo̧k iaan bitio ko ilo “Kein Jipan̄ ko rej Rie” ak loļo̧k JustServe.org.)

• N̄an jipan̄ doulul eo ak ro uwaan kūlaaj eo ilo kijejeto ko aer n̄an jerbal in karejar n̄an ro jet, ļōmņak in etale ippān doon enaan eo an Sister Bonnie H. Cordon “Erom̧ juon Seperd” (Liaona, Nob. 2018 74–76). Kwomaron̄ ijjino ilo am̧ kwaļo̧k jejjo pija ko pijaan Rilo̧mo̧o̧r eo ej jerbal (Sister Cordon eaar kwaļo̧k jejjo ilo enaan ilo an). Ta eo pija kein rej katakin kōn wāween ad maron̄ jerbal in karejar ilo wāween ko āinwōt Kraist? Innem ļōmņak in kūr doulul eo kar ro uwaan kūlaaj eo n̄an riit ilo ruo ruo leiaia juon iaan jekjen ko in enaan eo im kwaļo̧k ta eo raar ekkatak kake kōn wāween jerbal āinwōt Rilo̧mo̧o̧r eo. Remaron̄ barāinwōt kwaļo̧k ta eo rej ekkatak kōn jerbal in jipan̄ āinwōt Kraist ilo aer jerbal in karejar n̄an ro jet.

Rōjan̄ ro uwaan doulul ak kūlaaj eo n̄an kejōkļo̧kjeņ im je ta eo renaaj kōm̧m̧ane n̄an jerbal ekkar n̄an im̧we ko me rekar en̄jaki rainin. Ewi wāween an katak eo an rainin iookļo̧k kōttōbar ko an juon make me rekar kōm̧m̧ani? Eļan̄n̄e rekōņaan, ro uwaan doulul ak kūlaaj eo remaron̄ kwaļo̧k ļōmņak ko aer.

• Matu 4:13–21; Jon 9:1–11; 13:4–5, 12–17; 1 Nipai 11:31; 3 Nipai 17:5–10 (Waanjon̄ak ko an Jisōs Kraist jerbal n̄an ro jet)

• Joy D. Jones, “For Him,” Liaona, Nob. 2018, 50–52

• “If We Forget Ourselves,” “Teachings of Thomas S. Monson: Rescuing Those in Need,” “Youth in Action,” “Opportunities to Do Good” (bitio), ChurchofJesusChrist.org