Ekōjkan Aō Maron̄ Karuwaineneik Aolep n̄an Itok n̄an Kraist?

Jet wōt allōn̄ ko ālkin an Kabun̄ eo kar jepļaaktok kar ejaak ilo Eprōļ 6, 1830, ilo Fayette, New York, Irooj ekar jino kūr mijenede ro n̄an aintok “rikāālet jān m̧ōttan ko emān in laļ in” (Katak im Bujen Ko 33:6). Ta eo ekar jino āinwōt kijejeto ko an jet wōt rioktak ro rekāāl ilo juon jikin ejjab ļap em̧ōj an eddōkļo̧k n̄an juon jarin tariņae in mijenede ro rej kean̄ kōn gospel eo ilo aolepān laļ in. Bōtaab jerbal in mijenede ejjab wōr jon̄an n̄an ro rej jerbali mijen ko aolep raan. Irooj ekōņaan kajjojo iaad n̄an kajjitōk ippān ro ipeļaakid n̄an itok n̄an E.

Ta en̄jake ko ekar wōr ippāmi kōn kajjitōk ippān ro jet n̄an ekkatak kōn gospel eo an Rilo̧mo̧o̧r eo? Ta eo kwomaron̄ kōm̧m̧ane n̄an im̧we ro uwaan doulul eo ak kūlaaj eo n̄an kakūrm̧ool eddo eo aer n̄an bōktok jetōb ko n̄an Jisōs Kraist? Ilo am̧ m̧aanjabpopo n̄an katakin, ļōmņak in etale “What Is My Purpose as a Missionary?” ilo Preach My Gospel ([2019] 1–16) im ennaan eo an Elder Dieter F. Uchtdorf “Jerbal In Mijenede: Kwaļo̧k Ta eo Kwoj Lukkuun Tōmak im En̄jake,” Liaona, Māe 2019, 15–18).

Katak im Bujen Ko 30–36 ej ekōnono kōn etan jet armej ro me kar kūr n̄an mijen ko ilo raan ko jino in an Kabun̄ in. Jet raan ko m̧okta jān kwelo̧k eo ami, kwomaron̄ leļo̧k n̄an kajjojo ro uwaan doulul eo ak kūlaaj eo juon iaan āt kein (lale taitōļ ko n̄an jekjōn 30–36) im kajjitōk ippān ļaddik ak leddik eo n̄an ekkatak ta kapilōk eo Irooj ekar leļo̧k n̄an jipan̄ armej eo kwaļo̧k gospel eo. Ekōjkan ad maron̄ kōjerbal ko̧o̧njeļ eo n̄an kōj make? Ļōmņak ko itulaļ remaron̄ kōdepakpakļo̧k aer im̧we ro kwoj katakin n̄an kajjitōk ippān ro ipeļaakier n̄an itok n̄an Kraist.

• Ro kwoj katakin er remeļeļe ke ta meļeļe in n̄an itok n̄an Kraist? Kwomaron̄ kajjitōk ippāer n̄an kwaļo̧k ļōmņak ko aer. Eļan̄n̄e ejipan̄, kwomaron̄ kwaļo̧k kōmeļeļe in: “N̄an itok n̄an Rilo̧mo̧o̧r eo, armej raikuj wōr aer tōmak ilo E n̄an ukweļo̧k—kōm̧m̧ani oktak ko remenin aikuj n̄an bōktok mour aer n̄an errā ippān katak eo An” (Preach My Gospel, 2). Ro uwaan doulul eo ak kūlaaj eo remaron̄ barāinwōt riiti eoon ko me ekoba naan ko āinwōt “itok n̄an eō” ak “itok n̄an Kraist” n̄an jipan̄ uwaake kajjitōk in—n̄an waanjon̄ak, Matu 11:28–30; Omni 1:26; Moronai 10:32; Katak im Bujen Ko 20:59. Etke jej kōņaan bwe armej ren itok n̄an Kraist? Ta men ko repidodo jemaron̄ kōm̧m̧ani n̄an jipan̄ er? Ro uwaan doulul eo ak kūlaaj eo remaron̄ kōm̧m̧ani karōk ko n̄an kajjitōk ippān juon eo rejeļā n̄an itok epaakļo̧k Kraist.

• Ekkatak kōn ekōjkan an ro jet kar kwaļo̧k gospel eo ej juon wāween em̧m̧an n̄an im̧we ro kwoj katakin. Kwomaron̄ kwaļo̧k juon ak elōn̄ļo̧k pija in alooj ko loi ium̧win “Kein Jipan̄ ko rej Rie” ak kajjitōk ippān ro uwaan doulul eo ak kūlaaj eo n̄an riiti kapilōk eo im waanjon̄ak ko loi ilo ennaan eo an Sister Cristina B. Franco “Lo Lan̄lōn̄ ilo Kwaļo̧k Gospel eo” (Liaona, Nob. 2019, 83–86). Ta eo jej ekkatak jān waanjon̄ak kein? Ekōnono ippān doon ta eo doulul eo ak kūlaaj eo am̧ emaron̄ kōm̧m̧ane n̄an kajjitōk ippān ro jet n̄an itok n̄an Kraist.

• N̄e ej itok n̄an kwaļo̧k gospel eo, Elder Dieter F. Uchtdorf ekar ba bwe jet iaad emaron̄ “en̄jake jab jeļā kōn ekōjkan kōm̧m̧ane. Ak jemaron̄ en̄jake mijak ilo ad kōm̧m̧ane juon men enaaj kōm̧m̧ane menin an jab em̧m̧an ad mour” (“Jerbal In Mijenede: Kwaļo̧k Ta eo Kwoj Lukkuun Tōmak im En̄jake,” Liaona, Māe 2019, 16). Eļan̄n̄e ro uwaan doulul eo ak kūlaaj eo rej en̄jake wāween in, elmakot ko ļalem repidodo Elder Uchtdorf ekar litok ilo ennaan in an emaron̄ jipan̄ er. Komaron̄ kajjitōk ippān kajjojo uwaan kūlaaj eo n̄an riit kōn juon iaan elmakot ko an im kwaļok ta eo rekar ekkatak.

Rōjan̄ ro uwaan doulul ak kūlaaj eo n̄an kejōkļo̧kjeņ im je ta eo renaaj kōm̧m̧ane n̄an jerbal ekkar n̄an im̧we ko me rekar en̄jaki rainin. Ewi wāween an katak eo an rainin iookļo̧k kōttōbar ko an juon make me rekar kōm̧m̧ani? Eļan̄n̄e rekōņaan, ro uwaan doulul ak kūlaaj eo remaron̄ kwaļo̧k ļōmņak ko aer.

• 1 Timote 4:12 (Erom juon waanjon̄ak an ro ritōmak)

• Alma 17:2–4 (Ļōmaro nejin Mosaia raar kōpooj er make n̄an kwaļo̧k gospel eo)

• Katak im Bujen Ko 42:6–7 (Kwaļo̧k gospel eo kōn kajoor eo an Jetōb)

• Būreejtōn Russell M. Nelson im Wendy Nelson, “Hope of Israel,” (worldwide youth devotional, June 3, 2018, dam̧oļo̧k in jipan̄ n̄an New Era im Ensign, HopeofIsrael.ChurchofJesusChrist.org

• “Inviting All to Come unto Christ: Sharing the Gospel,” “Inviting Others to ‘Come and See,’” “Inviting Others to ‘Come and Help,’” “Inviting Others to ‘Come and Stay’” (videos), ChurchofJesusChrist.org