Etke Ij Aikuji Pinmuur eo an Jisōs Kraist?

Būreejtōn Ezra Taft Benson ekar katakin: “Āinwōt an baj juon armej jab lukkuun kōņaan m̧ōn̄ā m̧ae iien ekwōle, āindein ejjab kōņaan lo̧mo̧o̧r an Kraist m̧ae iien ejeļā etke eaikuji Kraist. Ejjeļo̧k juon ejeļā etke eaikuji Kraist m̧ae iien emeļeļe im bōk katak eo kōn Wōtļo̧k eo im jekjek ko an aolep armej” (“Bok in Mormon im Katak im Bujen Ko,” Ensign, Māe 1987, 85). Ilo am̧ kar ekkatak Katak im Bujen Ko 29 wiik in, kwomaron̄ keememej kōmļeļe eo an Rilo̧mo̧o̧r eo kōn Wōtļo̧k eo im elmen ad maron̄ bōk lo̧mo̧o̧r jāne. Elmen am kar bōk juon naan in kam̧ool kōn Jisōs Kraist im kōn jerbal eo An āinwōt Rilo̧mo̧o̧r im Ripinmuur? Ļōmņak elmen kōkajoorļo̧k naan in kam̧ool eo an ro uwaan doulul ak kūlaaj eo kōn E naaj ukōt er. Ilo am kōppopo, ļōmņak in ekkatak “Anemkwoj im Wōtlo̧k eo an Adam,” “Pinmuur eo an Jisōs Kraist,” im “ Mijen eo Ekwojarjar an Jisōs Kraist” ilo jebta 3 in Kwaļo̧k Gospel eo Aō ([2019], 49–52, 60–61).

N̄an kwaļo̧k kadkadin ekōnono eo rainin, kwomaron̄ karuwaineneik ro kwoj katakin n̄an kōlaajraki ioon boot eo jabdewōt men eo rejeļā kōn Wōtļo̧k eo an Adam im Iv. N̄an waanjon̄ok, ta eo rejeļā kōn Wōtļo̧k eo jān Katak im Bujen Ko 29:36–50? Ta kam̧ool eo kōn Wōtļo̧k eo jej lo ipeļaakid? Makūtkūt kein ilaļ renaaj jipan̄ doulul ak kūlaaj eo am lo elmen an Pinmuur eo an Jisōs Kraist jipan̄ kōj anjo̧ jān jekjek ko an Wōtļo̧k eo.

• N̄an meļeļeļo̧k kōn Wōtļo̧k eo an Adam im Iv, ro uwaan doulul ak kūlaaj eo remaron̄ riiti “Wōtļo̧k” ilo True to the Faith (56–59) ak “Anemkwoj im Wōtlo̧k eo an Adam im Iv” ilo jebta 3 in Kwaļo̧k Gospel eo Aō (49–50). Karuwaineneik er n̄an antoone n̄e juon m̧ōttaer ekajjitōk ippāer, “Etke Ij Aikuji Jisōs Kraist?” Karuwaineneik er n̄an katakin doon elmen aer maron̄ uwaake kajjitōk eo pedped wōt ioon ta eo rekar jeļā jān aer riit.

• Elmen am maron̄ jipan̄ ro uwaan doulul ak kūlaaj eo ekkatak jān jeje ko rekwojarjar etke rej aikuji Pinmuur eo an Jisōs Kraist? Juon iaan wāween eo ej n̄an je jet iaan eoon in jipan̄ ko jān “Kein Jipan̄ ko rej Rie Katak ko” ioon boot eo innām je kōmeļeļein ennaan eo n̄an eoon in jipan̄ ko ilo peba jidikdik eo. Leļo̧k n̄an kajjojo ro uwaan doulul ak kūlaaj eo juon peba jidikdik. Karuwaineneik er n̄an riiti eoon in jipan̄ ko kar je ioon boot eo im pukot eo ekkar tata n̄an kōmeļeļein ennaan eo. (Jet iaan ennaan ko elōn̄ jān juon eoon ie.) Karuwaineneik ro uwaan doulul ak kūlaaj eo n̄an riit eļaaj eoon eo me ekkar tata n̄an ennaan eo im kwaļo̧k ta eo raar ekkatak kake etke jej aikuji Pinmuur eo an Rilo̧mo̧o̧r.

• Karuwaineneik ro uwaan doulul ak kūlaaj eo n̄an uwaaki kajjitōk ko āinwōt kein ilaļ: Elmen aō kar jeraam̧m̧an kōn Pinmuur eo an Jisōs Kraist? Ta eo Rilo̧mo̧o̧r ekōņaan bwe in ukōte bwe in maron̄ lukkuun en̄jake kōjeraam̧m̧an ko an Pinmuur eo An? Innām kajjitōk ippāer n̄an kōnono ippān doon kōn kajjitōk eo jinoin. Remaron̄ lale “Pinmuur eo an Jisōs Kraist” im “Mijen eo Ekwojarjar an Jisōs Kraist” ilo jebta 3 in Kwaļo̧k Gospel eo Aō (51–52, 60–61) im juon ak lōn̄ļo̧k in pija ko ilo “Kein Jipan̄ ko rej Rie Katak eo.” Karuwaineneik er n̄an kwaļo̧k ta eo rekar ekkatak.

Rōjan̄ ro uwaan doulul ak kūlaaj eo n̄an kejo̧kļo̧kjeņ im je ta eo renaaj kōm̧m̧ane ekkar n̄an im̧we ko rej en̄jaki rainin. Elmen an katak eo an rainin iookļo̧k kōttōbar ko an juon make me rekar kōm̧m̧ani? Eļan̄n̄e rekōņaan, ro uwaan doulul ak kūlaaj eo remaron̄ kwaļo̧k ļōmņak ko aer.

• Katak im Bujen Ko 19:16–19 (Jisōs Kraist eaar en̄taan kōn jerawiwi ko ad bwe jen jab en̄taan n̄e jej ukweļo̧k)

• 2 Nipai 9:6–16; Alma 42:6–9 (Jisōs Kraist eaar lo̧mo̧o̧ren kōj jān mej im hell)

• 2 Nipai 2:5–10; Hilamōn 14:15–17 (Kōn wōt Jisōs Kraist jemaron̄ jepļaakļo̧k n̄an Anij)

• Mosaia 3:7; Alma 7:11–13 (Kōnke Kraist eaar bōk ioon Make en̄taan im jerawiwi ko ad, Ejeļā elmen jipan̄ kōj)

• Moses 5:10–12 (Kōnke Rilo̧mo̧o̧r eaar lo̧mo̧o̧ren kōj jān Wōtļo̧k eo, jemaron̄ lo m̧ōņōņō)

• Walter F. González, “The Savior’s Touch,” Liaona, Nov. 2019, 90–92

• “Ijo Kien, Iakwe, im Tiriamo Rej Waļo̧k,” “Etke Jej Aikuji juon Rilo̧mo̧o̧r,”Pinmuur eo ej Kōtļo̧k Kōj” (pija in alooj ko), ChurchofJesusChrist.org