Ewi Wāween an Eddo ko an Em̧m̧aan im Kōrā ro Kaun̄ Kipden Doon?

Jemedwōj Ilan̄ ekar letok n̄an em̧m̧aan im kōrā ro jon̄an wōt juon aer eddo n̄an kakūrm̧ool ilo karōk eo An. Eddo kein rej jipan̄ doon. N̄an jipan̄ em̧m̧aan im kōrā ro kakūrm̧ool eddo kein, Ekar leļo̧k n̄an er menin letok ko im maron̄ ko rejenolo̧k. Ro uwaan doulul ak kūlaaj eo emaron̄ kar dedeļo̧k aer ekkatak Katak im Bujen Ko 25 ilo wiik in. Ilo revelesōn in, Irooj ekar letok juon kapilōk n̄an Emma Smith kōn jerbal eo an eaorōk ilo Jepļaaktok eo an gospel eo im kar kōmeļeļeik wāween an Josep im Emma maron̄ jipan̄ doon. Ta waanjon̄ak ko em̧ōj am̧ loi kōn em̧m̧aan im kōrā ro rej jerbal ippān doon ilo wāween ko me rej kaun̄ kipden doon n̄an kōm̧m̧ane jerbal eo an Irooj? Ewi wāween am̧ maron̄ im̧we likao im jiron̄ ro kwoj katakin n̄an meļeļe eddo ko aer rekwojarjar im jerbal ippān doon n̄an kalōk aelōn̄ in kiin̄ an Anij?

Ilo am̧ kōppopo n̄an katakin, ļōmņak in etale “Baam̧le Eo: Juon Naan in Kean̄ n̄an Laļ in” (ChurchofJesusChrist.org) im ennaan eo an Sister Linda K. Burton “Jenaaj Wanlōn̄ļo̧k Ippān Doon” (Liaona, Māe 2015, 29–32).

N̄an jino juon ekkōnono kōn wāween an em̧m̧aan im kōrā ro jerbal ippān doon n̄an kalōk aelōn̄ in kiin̄ an Anij, ļōmņak n̄an karuwaineneik ro uwaan doulul ak kūlaaj eo n̄an etale Katak im Bujen Ko 25. Ta eo Irooj ekar ba kōn eddo ko an Emma im Josep me erro kar jipan̄ doon kaki? Ta eo jemaron̄ ekkatak jān jekjen 25 kōn wāween an ļeo im lio pālele aikuj jerbal ippān doon? Kwomaron̄ leļo̧k n̄an ro kwoj katakin er jet pepa n̄an jeje ta eo rej loi im kōtļo̧k n̄an er bwe ren kwaļo̧k ļōmņak ko aer. Innem kāālet jān m̧akūtkūt kein rej ellaajrak n̄an jipan̄ er bwe en em̧m̧anļo̧k aer meļeļe wāween an Anij kōtmene ļaddik im leddik ro Nejin n̄an jerbal ippān doon.

• Kwomaron̄ ke ļōmņak kōn juon waanjon̄ak n̄an jipan̄ ro uwaan doulul ak kūlaaj eo ta meļeļein “kaun̄ kipedin doon”? N̄an waanjon̄ak, kwomaron̄ kōnono kōn kōļar ko rej kaun̄ kipden doon ak kōnono kōn wāween an ainikien ko rokkotaktak ilo juon kuwaer kōm̧m̧an bwe al eo en ļapļo̧k an aiboojoj. Ewi Wāween an Eddo ko an Em̧m̧aan im Kōrā ro Kaun̄ Kipden Doon? Āinwōt juon doulul ak kūlaaj, riit ippān doon parokūrāāp ko ruo jinointata ilo jekjek eo ium̧win taitōļ eo “Kotak im Jipan̄ ilo Jerbal ko rej Kakūrm̧ool im Kaun̄ Kipden Doon” jān ennaan eo an Sister Linda K. Burton “Jenaaj Wanlōn̄ļo̧k Ippān Doon” (Liaona, Māe 2015, 30). Ak kwomaron̄ karuwaineneik ripālele ro em̧ōj aer m̧are n̄an loļo̧k doulul ak kūlaaj eo im kōnono kōn wāween aer kar jipan̄ doon kakūrm̧ool eddo ko aer im wāween ad Irooj kar jipan̄ er. Ta eo jej ekkatak, jān ennaan eo an Sister Burton ak ripālele ro, kōn wāween an em̧m̧aan im kōrā ro jipan̄ doon ilo baam̧le ko?

• Jeje ko rekwojarjar rej ellaajrak ilo “Supporting Resources” remaron̄ jipan̄ ro uwaan doulul ak kūlaaj eo ekkatak eļapļo̧k kōn eddo ko an em̧m̧aan im kōrā ro ilo baam̧le ko. Kwomaron̄ jitōn̄ kajjojo ro uwaan doulul ak kūlaaj eo n̄an riit juon iaan eoon kein ilo jeje ko rekwojarjar. Karuwaineneik er n̄an kwaļo̧k eoon kein im kōnono kōn eddo ko kar kōnono kaki. Ta eo eoon kein rej katakin kōn eddo ko an m̧am̧a im baba ro? Ewi wāween an ļeo im lio pālele jipan̄ doon n̄an kakūrm̧ool eddo kein rekwojarjar? Ewi wāween an Rilo̧mo̧o̧r jipan̄ er relukkuun tōprak? Ewi wāween an ajri ro maron̄ jipan̄ er?

• N̄an jipan̄ doulul ak kūlaaj eo am̧ meļeļe wāween an em̧m̧aan im kōrā ro maron̄ jipan̄ doon āinwōt jet paatnōr rej jon̄an wōt juon, je taitōļ ko rej elaajrak ilo bo̧o̧t eo: Eddo eo an juon Baba im Eddo ko an juon M̧am̧a. Kajjitōk ippān ro uwaan doulul ak kūlaaj eo n̄an kappukot pāārokūrāāp jiljilimjuon ilo “Baam̧le Eo: Juon Naan in Kean̄ n̄an Laļ in” im je ta eo rej loe ium̧win taitōļ eo ekkar. Ta eo jej ekkatak kōn eddo ko rekwojarjar an baba im m̧am̧a ro? Ta meļeļein an baba im m̧am̧a ro rej n̄an jipan̄ doon “āinwōt paatnōr ro rej jon̄an wōt juon” n̄an kakūrm̧ool eddo kein? Ta waanjon̄ak ko jemaron̄ kwaļo̧k jān mour ko ad me ej kwaļo̧k an baba im m̧am̧a ro kakūrm̧ool eddo ko aer im jipan̄ doon āinwōt paatnōr ro rej jon̄an wōt juon? Kwomaron̄ barāinwōt kōnono kōn wāween ko rūm̧m̧an ded ro remaron̄ kōppopo kiiō n̄an eddo kein ilju im jekļaj.

Rōjan̄ ro uwaan doulul ak kūlaaj eo n̄an kejōkļo̧kjeņ im je ta eo renaaj kōm̧m̧ane ekkar n̄an im̧we ko rej en̄jaki rainin. Ewi wāween an katak eo an rainin iookļo̧k kōttōbar ko an juon make me rekar kōm̧m̧ani? Eļan̄n̄e rekōņaan, ro uwaan doulul ak kūlaaj eo remaron̄ kwaļo̧k ļōmņak ko aer.

• Jabōn Kōnnaan Ko 22:6; Katak im Bujen Ko 68:25–28; 121:41–43 (Eddo ko an ro Jined im Jemād)

• Epesōs 5:25; Moses 3:21–24; 5:1–12 (Ļeo im lio pālele rej jerbal ippān doon āinwōt paatnōr ro rej jon̄an wōt juon)

• “The Women in Our Lives,” “Let Us Be Men” (videos), ChurchofJesusChrist.org