Ta Meļeļe in n̄an Ukweļo̧k?

Epen n̄an riiti Katak im Bujen Ko 19:16–19 im jab en̄jake iakwe eo an Rilo̧mo̧o̧r eo n̄an kōj. Ilo eoon kein, Ekar kōmeļeļeik en̄taan eo Ekar en̄jake ilo An kar en̄taan kōn jerawiwi ko ad im kar kwaļo̧k etke Ekar m̧ōņōņō in kanooj en̄taan—“bwe [jen] jab maron̄ jab en̄taan eļan̄n̄e [je] naaj ukweļo̧k” ukweļo̧k ej juon kōjeraam̧m̧an kar kapidodoik jān Rilo̧mo̧o̧r eo. Ej juon kijejeto raan otemjeļo̧k, ejjab bōjrak n̄an oktakļo̧k jān jerawiwi im oktakļo̧k n̄an Anij. Ej m̧ōttan karōk eo an Jemād Ilan̄ n̄an jipan̄ kōj bar ro̧o̧lļo̧k n̄an Ippān. Meļeļe ekōjkan ukweļo̧k emaron̄ jipan̄ kōj erreo jān jerawiwi ko ad, ukōt bōro im ļōmņak ko ad, im epaakeļo̧k Anij.

Ekōjkan an kar ukweļo̧k jipan̄ eok epaakeļo̧k Jemedwōj Ilan̄? Ekōjkan am̧ maron̄ jipan̄ ro kwoj katakin ikdeelel n̄an ukweļo̧k? Ekōjkan am̧ maron̄ jipan̄ er lo bwe ukweļo̧k ej juon kijejeto raan otemjeļo̧k im ejjab baj wōt n̄an kōjparok n̄an jerawiwi ko reļļap? Ilo am̧ m̧aanjabpopo n̄an katakin, ļōmņak in ekkatak ennaan eo an Būreejtōn Russell M. Nelson “Jemaron̄ Kōm̧m̧an Em̧m̧anļo̧k im Maron̄ Em̧m̧anļo̧k” (Liaona, Māe 2019, 67–69).

Aolep rikanaan ro jān jino in kar kūr ioon armej ro n̄an ukweļo̧k. Ijo wōt ke, bōlen ejjeļo̧k kajjitōk n̄an ukweļo̧k ej āinwōt ekajoorļo̧k ilo en̄jake āinwōt eo an Rilo̧mo̧o̧r eo loe ilo Katak im Bujen Ko 19:15–19, eo jodikdik ro remaron̄ kar riiti ilo wiik in. Kwomaron̄ kajjitōk ippāer ta eo rej ekkatak kōn Rilo̧mo̧o̧r eo jān eoon kein. Ta eo eoon kein rej ba kōn aorōk eo an ukweļo̧k ilo mejān Irooj? Ļōmņak kein remaron̄ jipan̄ ro kwoj katakin lo ukweļo̧k āinwōt juon kōjeraam̧m̧an raan otemjeļo̧k ilo mour ko aer.

• N̄an jipan̄ ro uwaan doulul eo ak kūlaaj eo meļeļe ekōjkan an ukweļo̧k kōjeraam̧m̧an mour ko aer, kwomaron̄ jino jān kajjitōk kajjitōk kein: Ekōjkan aō jeļā eļan̄n̄e kijejeto ko aō n̄an ukweļo̧k rej jerbal? Ekōjkan an Rilo̧mo̧o̧r eo naaj jipan̄ eō oktak? Ilo kakobaba n̄an jeorļo̧k bōd in jerawiwi, ta kōjeraam̧m̧an ko jet rej itok jān ukweļo̧k? Kajjitōk ippān ro uwaan kūlaaj eo n̄an riiti juon ak elōn̄ļo̧k eoon ko ilo “Kein Jipan̄ ko rej Rie,” kappukōt uwaak ko n̄an kajjitōk ko. Ta eo rekar loe? Āinwōt m̧ōttan ekōnono in, kwomaron̄ kwaļo̧k pija in alooj eo “Repentance: A Joyful Choice” (ChurchofJesusChrist.org).

• Elōn̄ jodikdik ro elikjab aer meļeļe ta meļeļe in n̄an ukweļo̧k. Remaron̄ watōk ilo mijak ukweļo̧k ak ļōmņak ej jerbal wōt n̄an jerawiwi ko reļļap. N̄an jipan̄ kajim̧we likjab in, kwomaron̄ kajjitōk ippān ro uwaan doulul eo ak kūlaaj eo n̄an ekkatak jidik in ennaan eo an Būreejtōn Russell M. Nelson “Jemaron̄ Kōm̧m̧an Em̧m̧anļo̧k im Maron̄ Em̧m̧anļo̧k” (Liaona, Māe 2019, 67–69), kappukōt naan ko me ejipan̄ er meļeļe ta meļeļe in n̄an ukweļo̧k. Ta eo raar loe me ekar jipan̄ er ļōmņak kōn ukweļo̧k ilo juon wāween ekāāl? Ta kōjeraam̧m̧an ko Būreejtōn Nelson ekar kallim̧ur kaki n̄an ro rej ukweļo̧k?

• Ekōjkan am̧ maron̄ jipan̄ ro kwoj katakin meļeļe etke im ekōjkan ad ukweļo̧k? Ennaan eo an Būreejtōn Dallin H. Oaks “Erreo kōn Ukweļo̧k” (Liaona, Māe 2019, 91–94) emaron̄ jipan̄. Kwomaron̄ ajije doulul eo ak kūlaaj eo n̄an emen kumi ko im kappeik kajjojo kumi n̄an riiti juon iaan jekjōn ko emen an ekōnono eo an Būreejtōn Oaks. Innām kajjojo kumi emaron̄ kwaļo̧k juon ennaan ekadu kōn ta eo raar riiti n̄an kumi ko jet, ippānļo̧k jabdewōt eoon jān ennaan eo me ej rie ta eo rekar ekkatak. Kamaron̄ kōjem̧ļo̧ke kōn kajjitōk ippān ro uwaan doulul eo ak kūlaaj eo n̄an kwaļo̧k naan in kam̧ool ko aer kōn aorōk eo an ukweļo̧k ilo karōk eo an Anij.

Rōjan̄ ro uwaan doulul ak kūlaaj eo n̄an kejo̧kļo̧kjeņ im je ta eo renaaj kōm̧m̧ane n̄an jerbal ekkar n̄an im̧we ko me rekar en̄jaki rainin. Ewi wāween an katak eo an rainin iookļo̧k kōttōbar ko an juon make me rekar kōm̧m̧ani? Eļan̄n̄e rekōņaan, ro uwaan doulul ak kūlaaj eo remaron̄ kwaļo̧k ļōmņak ko aer.

• 2 Nipai 31:13; Inōs1:5–9; Mosaia 4:9–12; 27:23–26, 35; Alma 19:33; 36:18–21, 24; 37:9; Hilamōn 15:7–8; Moronai 6:8; Katak im Bujen Ko 58:42–43; 64:9–10 (Eoon ko kōn ukweļo̧k)

• Katak im Bujen Ko 18:10–16 (Ukweļo̧k ej bōktok lan̄lōn̄)

• “Ukweļo̧k,” ilo N̄an Kōkajoorļo̧k Jodikdik ro (2011), 28–29

• “Repentance through the Atonement of Jesus Christ,” ilo jepta 3 in Preach My Gospel (2019), 62–63

• “Repentance Is a Blessing to All of Us,” “Atonement—Not a One-Time Thing” (pija in alooj ko), ChurchofJesusChrist.org