Ekōjkan Aō Maron̄ Kōpooj Eō Make n̄an Bōk Koņaaō ilo “Jerbal eo Ekabwilōn̄lōn̄” an Anij?

Ke Armej ro Rekwojajrar jinointata raar m̧okta jino ron̄ ennaan eo an gospel eo kōjepļaaktok, elōn̄ raar kōņaan jeļā ta eo remaron̄ kar kōm̧m̧ane n̄an jipan̄ ilo jerbal eo. Jemān rikanaan Josep Smith, Josep Smith Sr., ekar juon iaan ro me kar kajjitōk n̄an jeļā ankilan Irooj n̄an e. Uwaak eo an Irooj, loe ilo Katak im Bujen Ko 4, ekar jān iien eo im̧we epepen ko an armej n̄an jerbal kōn aolepān “būruōmi, maron̄, ļōmņak im kajoor” (eoon 2). Men̄e jerbale juon mijen ak jerbal ilo jabdewōt kūr ak eddo ilo Kabun̄ in, ta men ko aikuji n̄an jerbal in jipan̄ rej ejja wōt: juon ikdeelel n̄an jerbal n̄an Anij koba ippān tōmak, kōjatdikdik, iakwe erreo, im iakwe (lale Katak im Bujen Ko 4:2–6). Ekōjkan am̧ maron̄ jipan̄ ro uwaan doulul eo ak kūlaaj eo am̧ kōkajoorļo̧k ikdeelel eo aer n̄an jerbal n̄an Irooj im m̧aanjabpopo n̄an iien ko rem̧m̧an ilju jekļaj n̄an jerbal?

N̄an kōpooj eok make n̄an tōl ro uwaan doulul eo im kūlaaj eo ilo ekkatak in, kwomaron̄ riiti im kejōkļo̧kjeņ kōn juon ak elōn̄ļo̧k ennaan ko loi ilo “Kein Jipan̄ ko rej Rie.”

Ro uwaan doulul eo ak kūlaaj eo remaron̄ kar im̧we n̄an jerbal n̄an Irooj niknikļo̧k jān riiti Katak im Bujen Ko 3–5 wiik in. N̄an kōketak er n̄an kwaļo̧k ļōmņak ko aer, kwomaron̄ kajjitōk ippāer n̄an pijaikļo̧k bwe rej kanne n̄an juon jerbal. Ta men ko aikuji renaaj kar likūt ilo juon resume ak kōnono ilo juon intōrpiu in jerbal? Remaron̄ etale Katak im Bujen Ko 4 im kwaļo̧k men ko Irooj ej aikuji n̄an ro me rekōņaan bōk koņaer ilo jerbal eo An. Kāālet juon ak elōn̄ļo̧k jān m̧akūtkūt ko itulaļ n̄an jipan̄ ro kwoj katakin er ļōmņak kōn ta eo remaron̄ kōm̧m̧ane n̄an kanooj bōk koņaer ilo “jerbal ekabwilōn̄lōn̄” an Anij (Katak im Bujen Ko 4:1).

• N̄an jipan̄ ro kwoj katakin ekkatak ekōjkan aer maron̄ bōk koņaer ilo kōm̧ōkajļo̧k jerbal in lo̧mo̧o̧r eo, je ioon boot eo meļeļe kein an jerbal in lo̧mo̧o̧r: Anij ej kajjitōk ippān aolep n̄an itok n̄an Kraist im jipan̄ ilo jerbal eo An kōn mour kōn gospel eo an Jisōs Kraist, kōjparok ro rej pād ilo aikuj, kajjitōk ippān aolep n̄an bōk gospel eo, im kobaik baam̧le ko n̄an indeeo. Kajjitōk ippān ro uwaan doulul eo ak kūlaaj eo n̄an ekōnono kōn ekōjkan an piktok ko kar kōllaajraki ilo Katak im Bujen Ko 4 naaj jipan̄ er kōm̧m̧ane kajjojo m̧ōttan jerbal in lo̧mo̧o̧r eo. Ajije jodikdik ro n̄an kumi ko, im kōm̧m̧an bwe kajjojo kumi ren ekōnono kōn wāween ko remaron̄ kōļapļo̧k m̧wil kein. Ta eo jemaron̄ kōm̧m̧ane n̄an kōm̧m̧an bwe jerbal in lo̧mo̧o̧r en juon m̧ōttan aorōkļo̧k an mour ko ad?

• Kajjitōk ippān ro uwaan doulul eo ak kūlaaj eo n̄an etale juon iaan ennaan ko loi ilo “Kein Jipan̄ ko rej Rie,” pukōt juon kout remaron̄ kwaļo̧ke kōn ekōjkan jerbal n̄an Irooj ilo tiljek ilo kūr ko an Kabun̄, ijjitōn̄ ko, ak eddo ko jet. Kajjitōk ippāer n̄an kwaļo̧k kout eo raar kāālete im ektke raar lo bwe eļap meļeļe in. Ekōjkan aer naaj kōjerbale ta eo raar ekkatak kiiō im ilo ilju jekļaj?

• Jet ro uwaan doulul eo ak kūlaaj eo remaron̄ m̧aanjabpopo n̄an jerbal āinwōt mijenede ro. Kwomaron̄ kajjitōk ippāer n̄an kwaļo̧k ekōjkan aer m̧aanjabpopo n̄an jerbal. N̄an kōketak er ilo kijejeto ko aer, kwomaron̄ kwaļo̧k kajjitōk eo me Elder David A. Bednar ekar ba emakijkij an bōke: “Ta eo imaron̄ kōm̧m̧ane n̄an wejepedik tata m̧aanjabpopo n̄an jerbal āinwōt juon mijenede ej jerbal aolep raan?” (“Becoming a Missionary,” Liahona, Nob. 2005, 45). Ekōjkan an ro uwaan doulul eo ak kūlaaj eo uwaake kajjitōk in? Ta kōļmenļo̧kjeņ ko Elder Bednar ekar litok? Kwomaron̄ omaron̄ kajjitōk ippān juon ak lōn̄ļo̧k mijenede ro rekar ro̧o̧l n̄an kwaļo̧k ta eo raar kōm̧m̧ane n̄an m̧aanjapbobo n̄an juon mijen im ta eo rej kōņaan ren kar kōm̧m̧ane?

Rōjan̄ ro uwaan doulul ak kūlaaj eo n̄an kejōkļo̧kjeņ im je ta eo renaaj kōm̧m̧ane n̄an jerbal ekkar n̄an im̧we ko me rekar en̄jaki rainin. Ewi wāween an katak eo an rainin iookļo̧k kōttōbar ko an juon make me rekar kōm̧m̧ani? Eļan̄n̄e rekōņaan, ro uwaan doulul ak kūlaaj eo remaron̄ kwaļo̧k ļōmņak ko aer.

• Matu 28:19–20; Katak im Bujen Ko 18:9–16; 50:13–14; 88:81 (Ewōr ippād juon eddo eo n̄an kwaļo̧k gospel eo)

• Dieter F. Uchtdorf, “Eo Eļap Tata Ilubwilijimi,” Liaona, Māe 2017, 78–81

• Carl B. Cook, “Jerbal,” Liaona, Nob. 2016, 110–12

• “Preparing to Serve,” ChurchofJesusChrist.org/topics/missionary-preparation