ආසියා ප්රාදේශීය නායකත්ව පණිවිඩය
අපගේ ජීවිතවල අරමුණ සහ අර්ථය සොයා ගැනීම
ආත්මික දරුවන් ලෙස පෙර පැවැත්මේ දී, අපි ස්වර්ගික මන්ත්රණ සභාවක දී ස්වර්ගික පියාණන්වහන්සේගේ සැලැස්ම අනුගමනය කිරීමට තීරණය කළෙමු. අපට ගැලවුම්කරුවෙකු වන යේසුස් ක්රිස්තුස්වහන්සේව ලබා දී ඇති අතර, උන්වහන්සේගේ වන්දිගෙවීම සැමට නැවත නැඟිටීමක් ලබා දෙනු ඇත. අපගේ ගැලවුම්කරුවාණන් සහ අපගේ මිදුම්කරුවණන් වන යේසුස් ක්රිස්තුස්වහන්සේට අපි සදහටම ණයගැතියි. බොහෝ ආත්මික දරුවන් සාතන්ට සහ ඔහුගේ සැලැස්මට සහාය දුන් අතර, ඔවුන් දෙවියන්වහන්සේගේ අභිමුඛයෙන් නෙරපා හරින ලදී. අපගේ කාලයේ දී, සාතන් තම අනුගාමිකයන්ව දිගට ම පාපයට යොමු කරයි.
ආදම් සහ ඒවට දුන් පළමු ආඥාව වූයේ බෝ වී වැඩිවෙමින් පොළොව පූර්ණ කරන ලෙසයි. (උත්පත්ති 1:28, ආබ්රහම් 4:28) ශරීරයක් ලබා ගැනීම දෙවියන්වහන්සේගේ සැලැස්මේ වැදගත් අංගයක් වන අතර එය අපගේ ජීවිතවල දියුණුවට සහ අර්ථය සොයා ගැනීමට අපට හැකියාව ලබා දෙයි. පවුල් ඇති දැඩි කිරීම සමහර විට අභියෝගාත්මක විය හැකි නමුත්, එය ඉගෙනීමේ සහ ඉටුවීමේ දිව්යමය මූලාශ්රයකි.
ස්වර්ගික පියාණන්වහන්සේට අවශ්ය වන්නේ උන්වහන්සේගේ සියලු දරුවන්ට ඔවුන්ගේ ජීවිතවල ප්රීතිය තිබීමයි. ගැලවීමේ සැලැස්ම සතුට සඳහා පරිපූර්ණ මාර්ගය සපයයි. මෝසෙස් 5:11 හි ඒව සතුටින් මෙසේ ප්රකාශ කළාය, “අපගේ පාපය නොවන්නට අපට කිසිදිනක දරුවන් නොලැබිය යුතුව තිබිණ, තවද කිසිදිනක යහපත සහ නපුරද, අපගේ මිදීමේ සතුටද, තවද දෙවියන්වහන්සේ සියලුම කීකරුවන්නන්ට දෙන සදාකාල ජීවනය ගැනද කිසිදා දැන නොගෙන සිටීමට තිබිණ.” අද ලෝකයේ, සතුට බොහෝ විට වරදවා වටහාගෙන ඇත. යේසුස් ක්රිස්තුස්වහන්සේගේ ශුභාරංචිය පැහැදිලි දෘෂ්ටිකෝණයක් විවෘත කරයි.
තාක්ෂණය ඕනෑ ම කෙනෙකුට සිතාගත නොහැකි තරමට දියුණු වී ඇතත්, බොහෝ දෙනෙකුට මෙම වැඩිදියුණු කිරීම් නිසා මංමුලා සහගත බවක් දැනේ. සමහර පුද්ගලයින් තාක්ෂණය අධික ලෙස භාවිත කරන අතර පවුල සහ අධ්යාත්මිකත්වය වැනි වඩා වැදගත් දේවල් නොසලකා හරිති. සතුට යන පදය බොහෝ විට භාවිත වේ, නමුත් එහි අර්ථය නැති වී ඇති බව පෙනේ. සතුට තීරණය කරන්නේ ධනය බව බොහෝ අය විශ්වාස කළ ද, සැබෑ ප්රීතිය ලැබෙන්නේ ආදරය සහ ධර්මිෂ්ඨ ජීවිතයෙන් බව අපි දන්නෙමු.
සමහර ආර්ථික දත්ත අධ්යයනය කරන අතරතුර, කණ්ඩායම් ක්රියාකාරකම්වල යෙදෙන විට බොහෝ විට මිනිසුන්ගේ සතුට වැඩි වන බව මම කියවූවෙමි. ඔවුන් එකට එක්ව කතා කරති, එකිනෙකාට උදව් කරති, සහ මිත්රත්වය භුක්ති විඳිති. තෘප්තිය සහ මනසේ සාමය රඳා පවතින්නේ පුද්ගලයෙකුගේ ධර්මිෂ්ඨ අවධානය සහ අන් අය ඇතුළත් කිරීමට ඇති ආශාව මත බව මම තේරුම් ගත්තෙමි. මට නම්, එය සෑම කෙනෙකුගේ ම සහභාගීත්වය අවශ්ය වන "පවුලේ උත්සාහයක්" වේ.
සදාකාලික දෘෂ්ටිකෝණයක් වර්ධනය කර ගැනීම අපගේ ජීවිත පරිවර්තනය කර දෙවියන්වහන්සේට සමීප කරවයි. සමහර වෙලාවට, පුද්ගලයන් ප්රධාන වශයෙන් සැලකිලිමත් වන්නේ පොළොවේ ධනය ගොඩනැගීම ගැන ය. අපගේ ජීවිතවල දී, අපි මේ ජීවිතය සහ අපගේ ඊළඟ ජීවිතය සඳහා අධ්යාත්මික ධනය ගොඩනැගීමට ප්රමුඛත්වය දිය යුතුය. සදාකාලික දෘෂ්ටිකෝණයක් වැළඳ ගැනීමෙන් අපගේ ජීවිත පරිවර්තනය වී දෙවියන්වහන්සේට සමීප වේ. අප පොළොවේ වස්තු රැස් නොකළ යුතු නමුත් ස්වර්ගයේ වස්තු රැස් කළ යුතු බව ගැලවුම්කරුවාණන් ඉගැන්වූ සේක. (මතෙව් 6:19-21)
මගේ ජීවිතයේ සතුට යනු පොළොවේ ජීවිතය ගැන පමණක් නොව, වඩාත් වැදගත් ලෙස, සදාකාලික දෘෂ්ටියක් තිබීම සහ වඩාත් විශාල දෙයක් සමඟ සම්බන්ධ වීම ඇතුළත් වේ. සතුට යනු ස්වාමින්වහන්සේගේ උපදෙස් අනුගමනය කිරීමේ උසස් ඉලක්කයකට අපව ගෙන යාම බව මම විශ්වාස කරමි. අපගේ අනාගතවක්තෘවරුන්ගේ සහ ස්වාමින්වහන්සේගේ වචන වලින්, අපි සතුටේ සැලැස්ම තේරුම් ගැනීමට ඉගෙන ගන්නා අතර, එහි ප්රතිඵලයක් ලෙස, වැඩි ප්රීතියක් අත්විඳින්නෙමු. අපගේ ජීවිත යේසුස් ක්රිස්තුස්වහන්සේ සහ උන්වහන්සේගේ ඉගැන්වීම් මත කේන්ද්රගත වූ විට, අපගේ ප්රීතිය වැඩි වේ. ඔබේ ක්රියාවන් සහ ජීවන රටාව නිසා ඔබ බලපෑම් කර ඇති ජීවිත සලකා බලන්න. දෙවියන්වහන්සේගේ අරමුණ සහ සැමට උන්වහන්සේගේ ප්රේමය අවබෝධ කර ගැනීම සඳහා යේසුස් ක්රිස්තුස්වහන්සේ වෙත පැමිණීමට අපි අන් අයව පෙළඹවිය යුතු අතර දිරිමත් කළ යුතුය. දෙවියන්වහන්සේගේ ප්රීතියේ සැලැස්ම අපගේ පවුලේ අයට, මිතුරන්ට සහ අසල්වාසීන්ට පැතිරවිය හැකි මාධ්යයන් අපි වෙන්නෙමු.
මේ අවුරුද්දේ අපේ පවුලේ අය එකට එක්ව තායිලන්තයේ බැංකොක් දේවමාළිගාවට ගිය විට, අපේ ජීවිතවල අරමුණ සහ සාමය සොයා ගැනීම අපගේ ගැලවුම්කරුවාණන් සමඟ අපගේ සම්බන්ධතාවයට සම්බන්ධ බව මට වඩාත් ශක්තිමත් අවබෝධයක් ලැබුණි. දේවමාළිගාවේ දී, අව්යාජ ප්රේමය සහ ප්රීතිය අපගේ සදාකාලික අරමුණ සොයා ගැනීමට අපගේ පවුලට මග පෙන්වනු ඇතැයි මට හැඟුණි. මගේ පවුලේ අය සමඟ දේවමාළිගාවේ සිටීම මගේ ජීවිතයේ වඩාත්ම අමතක නොවන හා අධ්යාත්මික කාලවලින් එකකි. අපි දේවමාළිගා වත්පිළිවෙත් ඉටු කරන විට, අපට ස්වාමින්වහන්සේගේ ප්රේමය දැනිය හැකි විය. සභාපති නෙල්සන් මෙසේ ප්රකාශ කළේය, “යකඩ අත්වැල තදින් අල්ලා ගෙන සිටීමට ඔබේ තත්වයන් ඉඩ දෙන පරිදි නිතිපතා දේවමාළිගාවේ නමස්කාර කිරීම තරම් කිසිවක් ඔබට උපකාර නොකරනු ඇත.” (“පූජකවර යතුරු දීමනාව ගැන ප්රීති වන්න,” ප්රධාන සම්මන්ත්රණ පුස්තකාලය, අප්රියෙල් 2024, 122) දෙවියන්වහන්සේගේ සතුට පිළිබඳ සැලැස්ම සාක්ෂාත් කර ගැනීමට සහ අපගේ දේවමාළිගා ගිවිසුම් තබා ගැනීමට, දෙවියන්වහන්සේගේ රාජ්යය ගොඩනැගීමට අපි අපගේ කාලය සහ හැකියාවන් භාවිත කළ යුතු අතර, එමඟින් අපට උන්වහන්සේගේ සදාකාලික රාජ්යයට ඇතුළු වීමට හැකි වේ.
යේසුස් ක්රිස්තුස්වහන්සේ මේ ලෝකයේ මිදුම්කරුවාණන් සහ ගැලවුම්කරුවාණන් බවත් දෙවියන්වහන්සේගේ ඒකජාතක පුත්රයාණන් බවත් මට සාක්ෂියක් තිබේ. අපි උන්වහන්සේ කරණකොටගෙන ගැලවී ඇත්තෙමු. ■