දේව ස්වභාවට පංගුකාරයන්

පෙර ආත්මික ජිවිතයේ මන්ත්‍රණ සභාවේ දී, ස්වර්ගික පියාණන්වහන්සේ තම ආත්මික දරුවන්ට ඔවුන්ගේ සදාකාලික දියුණුව හා සතුට සඳහා වූ සැලැස්ම ඉදිරිපත් කළ සේක.

“මොවුන්ට වාසය කළ හැකි පොළොවක් අපි එහි සාදමු;”

“ඔවුන්ගේ ස්වාමින් වූ දෙවියන්වහන්සේ ඔවුන්ට ආඥා කරන සෑම දෙයක්ම ඔවුන් කරන්නේ දැයි බැලීමට, අපි ඔවුන්ව මෙයින් පරීක්ෂා කර බලන්නෙමු;

“තවද ඔවුන්ගේ පළමු තත්වය තබන්නවුන්ව එකතු කරනු ලබන්නේය; තවද ඔවුන්ගේ පළමු තත්වය තබන්නේ නැති අයවළුන්ට ඔවුන්ගේ පළමු තත්වය තබන්නවුන් සමඟ එකම රාජධානියේ මහිමය ලබන්නට නොහැකිය; තවද ඔවුන්ගේ දෙවන තත්වය තබන්නවුන් හට ඔවුන්ගේ හිස් මත සදාකාලයෙන් සදාකාලයට මහිමය එකතු කරනු ලබන්නේය.”

“තවද ස්වාමින්වහන්සේ මෙසේ කී සේක: මා කාව යැවිය යුතු ද? තවද මනුෂ්‍ය පුත්‍රයාණන් හා සමාන වූ අයෙක් මෙසේ පිළිතුරු දුන්නේය: මම මෙහි ය, මා යවන්න. තවද තවත් අයෙක් පිළිතුරු දෙමින් මෙසේ කීවේය: මම මෙහි ය, මා යවන්න. තවද ස්වාමින්වහන්සේ මෙසේ කී සේක: මම පළමුවැන්නාව යවන්නෙමි.

“තවද දෙවෙනියා අමනාප වී, තවද ඔහුගේ පළමු තත්වය තැබුවේ නැත; තවද, එම දවසේ, බොහෝ දෙනෙක් ඔහු පසුපස ගියහ” (ආබ්‍රහම් 3:24–28).

පෙර ආත්මික මන්ත්‍රණ සභාවේ දී ඉදිරිපත් කරන ලද්දේ එක් සැලැස්මක් පමණක් බව සලකන්න—එය පියාණන්වහන්සේගේ සැලැස්මයි. අපගේ ස්වර්ගික පියාණන්වහන්සේ “අපි කුමක් කරමුද?” යන ප්‍රශ්නය මතු කළේ නැත. උන්වහන්සේ අදහස් ලබා ගත්තේ නැත, නිර්දේශ ඉල්ලා සිටියේ නැත, හෝ යෝජනා ඉල්ලා සිටියේ නැත. ඒ වෙනුවට, උන්වහන්සේ තම සැලැස්මේ මූලික අංග ඉදිරිපත් කර, “මා කාව යැවිය යුතුද?” කියා ඇසූ සේක. උන්වහන්සේගේ ප්‍රශ්නයේ හරය අවධානය යොමු කළේ උන්වහන්සේගේ සැලැස්මේ නියමයන් සහ කොන්දේසි ක්‍රියාත්මක කිරීම සඳහා යැවිය යුත්තේ කාව ද යන්න මත ය.

සතුරාගේ කැරැල්ලේ ප්‍රතිවිපාක ද ශුද්ධලියවිලිවල විස්තර කර ඇත.

“එසේහෙයින්, සාතන් මට විරුද්ධව කැරළි ගසා, ස්වාමින් වූ දෙවියන්වහන්සේ වන මම, මනුෂ්‍යයාට ලබාදුන් තෝරාගැනීමේ නිදහස විනාශ කිරීමට, සහ එමෙන්ම මම මාගේ බලය ඔහුට දිය යුතු යැයි ඔහු සෙවූ නිසා; මාගේ ඒකජාතකයාණන්ගේ බලය මගින්, මම ඔහුව පහතට නෙරපා දැමීමට සැලැස්සුවෙමි;

“තවද එවිට ඔහු සාතන් බවට පත්විය, එසේය, මනුෂ්‍යයින්ව රවටා තවද අන්ධ කරන්නටත්, තවද මාගේ හඬට ඇහුම්කන්නොදෙන තරමට බොහෝ අයවළුන්ව, ඔහුගේ කැමැත්තට අනුව ඔවුන්ව වහල් බවට ගෙන යන්නටත්, සියලු බොරුවේ පියා වන, යක්ෂයා බවට වුවත් පත්විය” (මෝසෙස් 4:3–4; අවධාරණය එක් කරන ලදී).

පෙර ආත්මික මන්ත්‍රණ සභාවට සහභාගී වූවන්ගෙන් බහුතරයක් විසින් ඡන්දය ප්‍රකාශ කරන ලද සැලැස්මක් ලුසිෆර් ඉදිරිපත් කළේ නැත. ඔහු මැතිවරණයකින් පැරදුණු අනුකම්පා සහගත චරිතයක් නොවේ. ඔහු කැරලි ගැසුවේය! උඩඟුකම, අහංකාරය සහ ආත්මාර්ථකාමිත්වය පියාණන්වහන්සේගේ සැලැස්මට එරෙහිව කැරැල්ලක් ඇති කළේය.

සියලු මනුෂ්‍ය වර්ගයාට සදාකාල ජීවනයේ ආශීර්වාද ලබා ගත හැකි වන පරිදි පියාණන්වහන්සේගේ සහ පුත්‍රයාණන්ගේ ක්‍රියා එම සැලැස්ම විස්තර කරයි.

දෙවියන්වහන්සේගේ සැලැස්මේ පොරොන්දු වූ ආශිර්වාද, පුරුෂයින් හා ස්ත්‍රීන් විශ්වාස කර අනුගමනය කළ යුතු දහම, මූලධර්ම, නියෝග සහ ගිවිසුම් පවා අපට ලබා ගත හැකි මාර්ගය යේසුස් ක්‍රිස්තුස්වහන්සේගේ ශුභාරංචියයි. “මනුෂ්‍යයාට ගැලවීමට හැකිවන මෙම යේසුස් ක්‍රිස්තුස්වහන්සේ හැරුනු විට ස්වර්ගයෙහි පහත වෙනත් නාමයක් නොවන්නේය” (2 නීෆායි 25:20). සැබවින්ම, ස්වාමින් වන යේසුස් ක්‍රිස්තුස්වහන්සේ “මාර්ගය ද, සත්‍ය ද, ජීවනය ද වේ: [උන්වහන්සේ] තුලින් හැර කිසිවෙක් පියාණන්වහන්සේ තුලට පැමිණෙන්නේ නැත” (යොහන් 14:6;අවධාරණය එක් කරන ලදී).

සභාපති රසල් එම්. නෙල්සන් මෙලෙස පැහැදිලි කළේය:

“සැලැස්මට මැවීම අවශ්‍ය වූ අතර, ඒ සඳහා වැටීම සහ වන්දිගෙවීම යන දෙකම අවශ්‍ය විය. සැලැස්මේ මූලික අංග තුන මේවායි. පාරාදීස ග්‍රහලෝකයක් නිර්මාණය කිරීම දෙවියන්වහන්සේගෙන් පැමිණියේය. ආදම්ගේ වැටීම තුළින් ලෞකිකත්වය සහ මරණය ලෝකයට පැමිණියේය [බලන්න 2 නීෆායි 2:25; මෝසෙස් 6:48]. අමරණීයභාවය සහ සදාකාල ජීවනයේ හැකියාව ලබා දුන්නේ යේසුස් ක්‍රිස්තුස්වහන්සේගේ වන්දිගෙවීමෙනි [බලන්න 2 නීෆායි 2:21–28]. …

“… අපි කෙටි කාලයක් සඳහා පොළොවට පැමිණ, අපගේ පරීක්ෂණ සහ පීඩාවන් විඳදරා ගනිමින්, තේජාන්විත නැවත පැමිණීමක් කරා ඉදිරියට සහ ඉහළට යාමට සූදානම් වෙන්නෙමු [බලන්න ගීතාවලිය 116:15; ඇල්මා 42:8]. අපි දෙවියන්වහන්සේගේ සැලැස්ම තේරුම් ගෙන උන්වහන්සේගේ ආඥාවලට ස්තූතිවන්ත වී කීකරු වන්නේ නම් [ලෞකිකත්වයේ දී] අපගේ සිතුවිලි සහ ක්‍රියාවන් නිසැකවම වඩාත් අරමුණු සහිත වනු ඇත [බලන්න දහම සහ ගිවිසුම් 59:20–21].”

යේසුස් ක්‍රිස්තුස්වහන්සේගේ තවත් ගිවිසුමක් වන මොර්මන්ගේ පොතේ පියාණන්වහන්සේගේ සැලැස්ම සඳහා විවිධ නාම හඳුනාගෙන අධ්‍යයනය කිරීමෙන් අපි වැදගත් සත්‍යයන් ඉගෙන ගන්නෙමු. උදාහරණයක් ලෙස, පහත තෝරාගත් මාතෘකා නියැදිය සලකා බලන්න:

“ශ්‍රේෂ්ඨ මැවුම්කරුවාණන්ගේ කරුණාවන්ත සැලැස්ම” (2 නීෆායි 9:6).

“අපගේ දෙවියන්වහන්සේගේ සැලැස්ම” (2 නීෆායි 9:13).

“ගැලවීමේ සැලැස්ම” (ජෙරොම් 1:2; ඇල්මා 24:14).

“මිදීමේ සැලැස්ම” (ඇල්මා 12:25, 26, 30, 32, 33; 42:11, 13).

“නැවත පිහිටුවීමේ සැලැස්ම” (ඇල්මා 41:2).

“ප්‍රීතියේ සැලැස්ම” (ඇල්මා 42:16).

“ශ්‍රේෂ්ඨ දයාවේ සැලැස්ම” (ඇල්මා 42:31).

මෙම සෑම නාමයක්ම පියාණන්වහන්සේගේ සැලැස්මේ වටිනා පොරොන්දු වඩාත් පැහැදිලිව තේරුම් ගැනීමට අපට උපකාරී වන අතර අපගේ ලෞකික ජීවිතයේ අරමුණු සහ අර්ථය පිළිබඳ අපගේ දෘෂ්ටිකෝණය පොහොසත් කරයි.

සැලකිය යුතු ලෙස, මොර්මන්ගේ පොතේ දෙවියන්වහන්සේගේ සැලැස්ම සඳහා නිතර භාවිත වන නාමය අවධානය යොමු කරන්නේ යේසුස් ක්‍රිස්තුස්වහන්සේගේ වන්දිගෙවීම තුළින් කළ හැකි මිදීම කෙරෙහි ය.

ඇල්මා මෙසේ ප්‍රකාශ කළේය, “දැන්, ලෝකයේ පටන්ගැන්මේ සිට තබා තිබූ, මිදීමේ සැලැස්ම නොතිබෙන්නට, මළවුුුුුන්ගේ උත්ථානයක් ද සිදු නොවන්නේය; එහෙත් කතා කරන ලද, මළවුන්ගේ උත්ථානය සිදු කිරීම ගෙන එන්නා වූ, මිදීමේ සැලැස්මක් තබා තිබුණි” (ඇල්මා 12:25).

ඔහු මෙසේ ද අවවාද කළේය, “දෙවියන්වහන්සේගේ පුත්‍රයාණන් තුළ විශ්වාස කිරීමට පටන් ගන්න, එනම් උන්වහන්සේ තමන්වහන්සේගේ ජනතාව මුදා ගැනීමට පැමිණෙන සේක, තවද එනම් ඔවුන්ගේ පාපයන් වෙනුවෙන් වන්දිගෙවීම සඳහා උන්වහන්සේ වේදනා විඳ මරණයට පත්වන සේක, එය මරණයෙන් නැවත නැගිටීම ගෙන එන්නේය, අවසාන සහ විනිශ්චය දවසේ දී ඔවුන්ගේ ක්‍රියාවන් අනුව විනිශ්චය කරනු ලැබීමට සියලු මනුෂ්‍යයෝ උන්වහන්සේ ඉදිරියේ සිට ගන්නෝය” (ඇල්මා 33:22).

දෙවියන්වහන්සේගේ ගැලවීම, මිදීම, නැවත පිහිටුවීම, දයාව සහ සතුට පිළිබඳ ශ්‍රේෂ්ඨ සැලැස්ම සලකා බලන විට අපගේ ආත්මයන් කෘතඥතාවයෙන් පිරී ඉතිරී යා යුතුය. උන්වහන්සේගේ සැලැස්ම පිළිබඳ දැනුම වටිනා දෘෂ්ටිකෝණයක් ලබා දෙයි, අපගේ ප්‍රීතිය පොහොසත් කරයි, සහ අපගේ අභියෝග සහ විපත්ති ජය ගැනීමට අපව ශක්තිමත් කරයි.

ස්වර්ගික පියාණන්වහන්සේගේ අප උන්වහන්සේ වෙත නැවත නිවසට පැමිණෙනවාට ආශාවෙන් බලාපොරොත්තුවෙන් සිටී. උන්වහන්සේ අපට ආශිර්වාද ආරාධනා කර පොරොන්දු වන නමුත්, උන්වහන්සේ අපට ලබා දුන් සදාචාරාත්මක තෝරා ගැනීමේ නිදහස ක්‍රියාත්මක කිරීමට කිසි විටෙකත් බල කරන්නේ නැත, බලහත්කාරයෙන් පොළඹවන්නේ නැත, නැතහොත් සීමා කරන්නේ නැත. අපි ක්‍රියා කළ යුතු අතර උන්වහන්සේගේ ආදරණීය පුත්‍රයාණන්ගේ ආදර්ශය අනුගමනය කරමින් උන්වහන්සේ වෙත නැවත පැමිණීමට තෝරා ගත යුතුයි.

එලිසබෙත් තයර් විසින්, His Hand Is Stretched Out Still [උන්වහන්සේගේ අත තවමත් දිගු කර ඇත]

“මාර්ගය සකස් කර ඇත්තේය, තවද අප බලන්නේ නම් අප සදහටම ජීවත් වන්නෙමු” (ඇල්මා 37:46; අවධාරණය එක් කරන ලදී).

ස්වර්ගික පියාණන්වහන්සේ උන්වහන්සේගේ දරුවන් සඳහා වූ දිව්‍යමය සැලැස්මේ කර්තෘ බව මම සතුටින් සාක්ෂි දරන්නෙමි. යේසුස් ක්‍රිස්තුස්වහන්සේ අපගේ මිදුම්කරුවාණන් සහ ගැලවුම්කරුවාණන් ය. ස්වාමින්වහන්සේගේ පසුදවස්වල ප්‍රේරිතවරයෙකු ලෙස, උන්වහන්සේ සැබවින්ම “මාර්ගය, සත්‍යය සහ ජීවනය” බව මම සාක්ෂි දරන්නෙමි (යොහන් 14:6; අවධාරණය එක් කරන ලදී).