UkuVivinywa nokuQiniswa kuKristu

Bafowethu nodadewethu abathandekayo, ngiyaluzwa uthando lweNkosi njengoba sihlangene ndawonye. Kuyangithobisa ukukhuluma nani. Sengathi uMoya ungaletha ezinhliziyweni zenu lokho iNkosi ethanda nikuzwe, kakhulu kunamazwi mina engizowakhuluma.

Kudala ngafuna ukufunda isayensi yezinto zemvelo kanye nezibalo ngeminyaka ngisesekolishi. Ngaba nomuzwa wokwehluleka. Ngaqala ukuba nomuzwa wokuthi ngangizama ukufunda into engingayiqondi. Ngaya ngokuya ngiba nomuzwa wokwehluleka, ngaya ngokuya ngiphelelwa amandla okuqhubeka nokuzama. Ukudumala kwami kwangiholela ukuba ngibe nomuzwa wokuthi imizamo yami cishe yayingenazithelo. Ngaqala ukucabanga ukuyeka, ngenze izifundo ezilula kunalezi.

Ngezwa ngibuthakathaka. Ngesikhathi ngikhuleka, ngezwa isiqiniseko sokuthula seNkosi. Ngezwa Yena ethi engqondweni yami, “Ngiyakuvivinya, kodwa futhi nginawe.”

Ngaleso sikhathi ngangingazi ukuthi wonke lawo magama ayeshoni. Kodwa ngangazi ukuthi kwakufanele ngenzeni—futhi ngasebenza.

Ngokuzindla nokusebenza kuleyo minyaka eyalandela, ngafinyelela ekutheni ngiwuqonde lomyalezo okhuthazayo wemibhalo engcwele: “Nginamandla ukwenza konke ngaye ongiqinisayo.”

Ngafunda ukuthi umzabalazo wami nesifundo sesayensi yezinto zemvelo eqinisweni kwakuyisipho esivela eNkosini. Wayengifundisa ukuthi ngosizo Lwakhe, ngangingenza izinto okwakubonakala sengathi zazingenakwenzeka uma nganginokholo lokuthi wayezoba lapho ukungisiza. Ngalesi sipho, iNkosi yayisebenza ukungivivinya nokungiqinisa.

Igama vivinya linezincazelo ezimbalwa. Ukuvivinya into akukona nje ukuyilinga. Kuwukwandisa ukuqina kwayo. Ukuvivinya ucezu lwensimbi wukulubeka ngaphansi kobunzima. Ukushisa, isisindo, nencindezi kuyengezwa kuze kube ubunjalo balo ngempela bukhuliswe futhi bambulwe. Insimbi ayenziwa buthaka ngokuyivivinywa. Eqinisweni, iba yinto engethenjwa, into eqine ngokwanele ukuba ikwazi ukuthwala imithwalo emikhulu.

INkosi isivivinya ngendlela efanayo ukusiqinisa. Lokho kuvivinywa akuzi ngezikhathi zentokomalo noma zokunethezeka. Kuza ngezikhathi lapho sizizwa sinwetshwa ngaphezu kwalokho ebesicabanga ukuthi singakwazi ukumelana nakho. INkosi ifundisa ukuthi kufanele siqhubeke nokukhula futhi singalinge sikhathale emizamweni yethu, ukuthi singadeli, ukuthi siqhubeke nokuzama.

Lapho siqhubeka nokuba nokholo kuJesu Kristu—ngisho noma izinto zibonakala sengathi azinakwenzeka okwamanje—siyaqina ngokomoya. Okungcwele okubhaliweyo kuyaligcizelela leli qiniso.

Isibonelo, umphrofethi uMoroni wavivinywa waqiniswa ngalendlela. Iminyaka yakhe yokugcina wayiphila eyedwa. Wabhala ukuthi wayengenabangani, ukuthi uyise wayebulewe, nokuthi abantu bakubo babebhujisiwe. Wayezingelwa yilabo ababefuna impilo yakhe.

Nakuba kunjalo uMoroni akazange aphelelwe yithemba. Esikhundleni salokho, waqophela abantu ayengeke aphilele ukubabona ubufakazi bakhe ngoJesu Kristu ezingcwepheni, okubalwa kubo nezizukulwane zabantu ababefuni ukumbulala. Wabhalela thina. Wayazi ukuthi abanye babeyowedelela amazwi akhe. Wayazi ukuthi abanye babeyowenqaba amazwi akhe. Nakuba kunjalo waqhubeka nokubhala.

Ekuvivinyweni kwakhe, ukholo lukaMoroni lwahlungwa futhi lwaqiniswa. Lwacweba kakhulu. Amazwi akhe anamandla alowo owabekezela ngokwethembeka kwaze kwaba sekugcineni. Singawezwa lawo mandla ngesikhathi sibufunda ubufakazi bakhe:

“Manje mina, Moroni, sengibhala okuthile njengoba ngibona kukuhle kimi; futhi ngibhalela abafowethu, amaLamani; futhi ngifuna ukuthi bazi ukuthi sekudlule iminyaka engaphezulu kwamakhulu amane namashumi amabili selokhu isibonakaliso sokuza kukaKristu sanikwa.

“Futhi sengiyayivala lemibhalo, emva kokuthi sengikhulume amazwi ambalwa ngendlela yokunikhuthaza.

“Bhekani, ngizonikhuthaza ukuthi ngesikhathi senizifunda lezi zinto, uma kungukuhlakanipha kuNkulunkulu ukuthi nizifunde, ukuthi nikhumbule ukuthi iNkosi ibe nesihawu esingakanani kubantwana babantu, kusukela ekudalweni kuka-Adamu kwehle kuze kube yisikhathi lapho niyozithola khona lezi zinto, futhi nizindle ngazo ezinhliziyweni zenu.

“Futhi ngesikhathi senizithola lezi zinto, ngizonikhuthaza ukuthi nibuze kuNkulunkulu, uBaba waPhakade, egameni likaKristu, ukuthi lezi zinto ziliqiniso na; futhi uma niyobuza ngeqiniso, nangenhloso okuyiyo, ninokholo kuKristu, uyolibonakalisa iqiniso lazo kini, ngamandla kaMoya oyiNgcwele.

“Futhi ngamandla kaMoya oyiNgcwele ningalazi iqiniso lazo zonke izinto.”

Ubufakazi bukaMoroni bahlungwa enesizungu, kodwa buyakhazimula ngokukhanya okuwumhlahlandlela wazo zonke izizukulwane ukuba zifune uBaba wethu oseZulwini kanye noJesu Kristu.

Omunye umphrofethi eNcwadini kaMormoni, uJakobe, wavivinywa futhi waqiniswa esengumntwana owezwa inhlupheko nosizi olukhulu. Kodwa uyise, uLehi, wamfundisa ukuthi uNkulunkulu wayeyombusisa ngobunzima bakhe.

“Futhi bheka, ebuntwaneni bakho uzizwile izinkathazo kanye nosizi olukhulu, ngenxa yokwedelela kwabafowenu.

“Nokho, Jakobe, zibulo lami lasehlane, wena uyabazi ubukhulu bukaNkulunkulu; futhi uyozingcwelisa izinkathazo zakho ukuze kube yinzuzo kuwe.

“Ngalokho-ke, umphefumulo wakho uyobusiswa, futhi uyohlala ngokuphepha nomfowenu, uNefi; futhi izinsuku zakho uyozichitha ngokwenza umsebenzi kaNkulunkulu wakho. Ngalokho-ke, ngiyazi ukuthi ukhululiwe, ngenxa yokulunga koMkhululi wakho; ngokuba ubonile ukuthi ngokuphelela kwesikhathi uyofika alethe insindiso kubantu.”

UMphrofethi uJoseph Smith wakuzwa lokho kuvivinywa nokuqiniswa ngesikhathi eseTilongweni laseLiberty. Ekujuleni kosizi lwakhe, uMphrofethi uJoseph wakhala wathi:

“O Nkulunkulu, ukuphi na? …

“Kuyoze kube nini isandla sakho usibambile?”

INkosi yawubona umphumelo ongcwelisayo ebuhlungwini buka Joseph wokukubekezelela kahle ngesikhathi iphendula ithi:

“Ndodana yami, ukuthula makube semphefumulweni wakho; ubunzima bakho nokuhlupheka kwakho kuzokuba okwesikhashana;

“Futhi emva kwalokho, uma ukubekezelela kahle, uNkulunkulu uyokuphakamisela phezulu; uyonqoba phezu kwazo zonke izitha zakho.”

Isibonelo esikhulu sokuvivinywa nokuqiniswa senzeka ngeNhlawulo kaMsindisi. Wathwala izono zomhlaba. Wathwala ubuhlungu nosizi lwethu. Waphuza isitsha esibabayo. Wethembeka kuzo zonke izikhathi.

Ngenxa yeNhlawulo Yakhe ekhazimulayo, uJesu Kristu angasiqinisa ezikhathini zethu zokuvivinywa. Uyazi ukuthi angasisiza kanjani ngoba ubuzwile bonke ubunzima esibuzwayo empilweni yasemhlabeni. “Iyothwala ubuhlungu nezifo zabantu bayo … ukuze yazi ngokwasenyameni ukuthi ingabasiza kanjani abantu bayo ngokobuthakathaka babo.”

Siyafunda ukuthi ngesikhathi eseNsimini yaseGetsemane, uMsindisi wamcela uBaba ukuthi lokhu kuvivinywa kudlula Kuye—kodwa futhi wabuye wathi uma kwakuyintando kaBaba, uMsindisi wayezodlula kulokho. Ngamanye amazwi, uMsindisi wathwala ukungabaza nokungazi, kodwa wayenokholo kuYise oseZulwini.

Bafowethu nodadwethu, ukuvivinywa nokuqiniswa kwenu kungefane nokuka Moroni noma okukaJakobe noma okukaMphrofethi uJoseph. Kodwa kuzoza. Kungeza ngokuthula, ngezivivinyo zasempilweni yomndeni. Kungeza ngokugula noma ukudumala noma usizi noma isizungu.

Ngiyafakaza ukuthi lezi zikhathi azibona ubufakazi bokuthi iNkosi ikushiyile. Kunalokho, ziwubufakazi bokuthi Iyakuthanda ngokwanele ukukuhlunga nokukuqinisa. Ikwenza uqine ngokwanele ukuze uthwale isisindo sokuphila okuphakade.

Uma sihlezi sethembekile emisebenzini yethu, iNkosi izosihlunga. Izosiqinisa. Futhi ngelinye ilanga siyobuka emuva sibone ukuthi lezo zivivinyo uqobo zaziwubufakazi bothando Lwakhe. Siyobona ukuthi wayesibumba ukuze sikwazi ukuma Naye enkazimulweni. Njengoba uMphostoli weNkosi uPawulu asho ekugcineni kwempilo yakhe uqobo, “Ngikulwile ukulwa okuhle, ngiqedile ibanga, ngigcinile ukukholwa.”

Ngiyafakaza ukuthi uNkulunkulu uyakwazi. Uyazazi izivivinyo obhekene nazo. Unawe. Ngeke akushiye. Ngiyafakaza ukuthi uJesu Kristu, iNdodana kaNkulunkulu. Ungamandla ethu, uMhlengi wethu, ithemba lethu. Uma simethemba, Uzokwenza amandla ethu angokomoya alingane nokuvivinywa esibizelwe ukukuthwala. Ngiyafakaza ngalokho egameni elingcwele likaJesu Kristu, amen.