Kuneakin Kawaina Rinanon te Kakaitau ao te Onimaki

E raka iaon 30 te ririki n nako, Afulua Tuivaiti, man te Pesega ka-6 n Uoote n te Pesega Samoa Titieki, e mii n te bong teuana bwa e okira te kauarinan n reirei, ni kabanea ana reirei are e a tia ni kabua . . . ao riki ni manga reitinako nakon te iuniwetiri. E bon aki ataia bwa e na kanga arona.

Ma te utu are e na tararuaia ngkai, e aki rang mwaiti ana karekemwane ao tibwangana aika a mwaiti n te Ekaretia ao n te komiunite, Afulua e a moanna n namakinna bwa e a oimwi, bwa karekean ana reirei e nang bae n aki kona n riki. Ma imwiina, te taanga ni mitinare n ana uoote a tuangnga taekan te burokuraem n te PathwayConnect are e karaoaki man Ana Ekaretia Iesu Kristo Ibukiia aika Itiaki ni Boong aika Kaitira.

PathwayConnect e uarereke boona, 4 ana kooti n te tiemetita are e katauraoia taan kamatebwai bwa a na waakina aia tikurii n te iuniwetiri, are a kona ngkanne ni karaoia iaon te rain ma Brigham Young University (BYU). Te burokuraem e tauraoi ni kabuta te aonaaba ao e boutokaaki n te Ekaretia irarikin ara kiraati n te riki n toronibwai.

Ngke e a karekea taekan te PathwayConnect Afulua, e a moanna n reke ana onimaki, n titiraki ngkana miina are e na manga kamatebwai iai e bon kona ni koro bukina, ao imwiina te taanga riki teuana a manga irekereke. “Unimwaane ao Titita Abbot a kairai nakon te Pathways,” Afulua e kabwarabwara, “ao te taanga ni mitinare a rang n tituaraoi ni kabwaka [roou n reirei]. Ai tamaroara te kakabwaia!

“E kanga Tamara are I Karawa [n tia] kaekai au tataro, irou bon te kakai.”

Afulua e waekoa ni karina arana ao n ira ana moan kiraati, are e bon kanakonano teutana.

“Au moan tiemetita, E nako nanou ao I maaku ibukina bwa I kabi raoi n taetae ni Imatang,” e taku, ma ngkai n ana kateniua n tiemetita, ai tiaki te kangaanga irouna. “[Au Ingiriti] e a tamaroa riki ao I aki maaku. N reitia, I aki tiku n ti ngai. I kaungaaki irouia au taan kairiiri n au Ekaretia, tia reirei, ao bon raou n reirei,” e taku Afulua.

E rang kakaitau riki nakoia Titita Ho Chin, buun te mition Beretitenti i Apia Samoa, ao mitinare n Aobitin te Titeiki ake a tia ni buokia, riki ni kainnanona n rabakau aika boou, ao nakon ana bitiobi, Lautua Fa’aofo ma buuna Apu, ake a reitinako ni boutokaia iaon ana waaki ni kabane.

“Riki, I a rikirake ni kaan riki nakon te Uea,” e taekinna. “[Te taneiaia aei] e a tia ni kakorakora au kakoaua ni koaua.”

Bon ana koaua are e kateimatoa ni kaunga ao n tabekia rinanon nako kawaina ake e rinanona, ake n tainako aki beebete. Afulua e tararua tinana ae 85-ana ririki ao tibuna te mwaane ae 5 ana namwakaina, ake—a raonaki ma tabena ni mweengana—ake e rang n tabetabe iai ni katoabong. “I tii kona ni kamatebwai n te tairiki,” e taku, ao n tabetai e karaoia ni karokoa e matu.

Ma e nanomatoa.

Ma teuana riki te tiemetita ni karaoa te PathwayConnect, Afulua e nanomatoa n reitinako nakon te burokuraem n te BYU degree ao e a karaoi tabeua rinerine ibukin te mwaneka are imwiina.

“I rangi n nano n te Hospitality and Tourism Management,” e taku. “I kakoaua bwa e na riki bwa te bitineti ae tamaroa ibukiu n te bong teuana.” Ni koauana, Afulua e a tia ni kaman katikumwane ibukin karaoan ana bitineti nakon taai aika a na roko, “ma I iangoa naba au kamatebwai n te Applied Health.”

Iai ana tai are e na bairea iai ana major, ma Afulua e a kaman mataata iaon te bwai teuana. “Iai au onimaki iroun te Uea Iesu Kristo. E kaeka au tataro ao e kairaki nakon te kawai ae eti.”

Ana onimaki Afulua iroun te Atua, ao ana motinnano ibukin ana kouru, e a tia ni kaunga n onimakinna ibon irouna. “E na bon iai kangaanga n tainako iaon kawaiu,” e taku, “ma N na kataia n tainako n tokanikai iaoia ibon irou ni kamwaita riki au konabwai bwa I aonga ni kona ni kakoroa bukin au babaire.”