Boton te Euangkerio

Tamara are i Karawa e Tangirira bwa Ti na Kukurei

Ngkana ti uringa ana babaire ni kakukurei te Atua, ti kona ni karekea te kimwareirei riki e ngae ngke e kangaanga aron te maiu.

Imwain ae ti bungiaki nako aon te aonaaba, ti bane ni maeka ma Tamara are i Karawa bwa ngaira Natina n tamnei. E kaota Ana kai ni baire ni buokiia Natina n reirei ao n rikirake. Rinanon Ana baire, ti kona n riki n ai Arona ao n riki n tau ni kukurei n te maiu ae akea tokina. Te baire aei e bon riai bukina bwa Natin te Atua, ae Iesu Kristo, e roko nakon te aonaaba bwa e na karawawataaki ibukin ara bure, te karea are e aranaki bwa te Mwakuri ni Kamaiu.

Ana baire Tamara are i Karawa e aranaki bwa

kakukurei (taraa Aramwa 42:8),
kamaiuaki (taraa Mote 6:62),
kaboan maiura (taraa Iakobwa 6:8), ke
nanoanga (taraa Aramwa 42:15).

N aron aikai ao ake a kaotaki ni koroboki aika tabu ake tabeua, Tamara are i Karawa e tangiriira n riki n ai Arona, n oki Nakoina, ao ni kukurei (taraa Mote 1:39).

Ti Roko nakon te Aonaaba n Reirei ao n Rikirake

Te Atua e kanakoira nakon te aonaaba, bwa ti na kona ni karekei rabwatara (taraa Karikan Bwaai 1:26–27). Ti kainanoa rabwatara ni buokiira n taneiai n te maiu iaon te aonaaba.

E ataia te Atua bwa ti na aki namakina te kukurei n taai nako. Ti na rinanon te bwarannano, te maraki, ao riki te mate. Ma rinanon kangaangan te maiu, Tamara are i Karawa e buokiira n reiakinaki ao n rikirake.

Te Atua e anganiira naba te inaomata n rinerine, te wanawana n rinerine imarenan te raoiroi ma te buakaka. E kariaia bwa ti na rinerine i bon ibukira n te bwai ae ti na iangoia ao ni karaoia. E a tia n anganiira koroboki aika tabu ao burabeti aika maiu ni buokiira n reirei aron rinean te bwai ae eti (taraa Aberaam 3:25).

Kataia n Riki n Ai Aron Iesu Kristo

Te Atua e aki kanakoira nakon te aonaaba ma akean te katooto are ti na iria (taraa Ioane 13:15). E kanakoa Natina, Iesu Kristo, bwa e na kaota te kawai nakoira. N reiakinaki bwa ti na kanga n Iria, ti kona ni wareki koroboki aika tabu n reiakinna bwa antai Ngaia ao tera ae Karaoia inanon Ana bong ni maiu iaon te aonaaba. Ti kona naba ni karaoi ara kabanea n tamaroa n riki n ai aron Kristo man te ongotaeka nakon te Atua ao n tangiriia tabeman.

Ngkana ti karaoi kaairua, ti bubuti ibukin te kabwarabure ao ni kairaki nakon mwaakan ana Mwakuri ni Kamaiu Iesu Kristo ni buokiira ni bitaki. Ti kona ni kukurei ngkana ti kataia ni katoa bong bwa ti na riki n ai Arona.

Te mate Tiaki te Toki

Ngkana ti mate, tamneira a nakon te aonaaba n tamnei. Ikekei ti reitinako n reiakinaki ngkai ti katauraoi ibukin te Mangauti.

Inanon tain te Maungauti, rabwatara ao tamneira a na manga ikotaki. Rabwatara a na manga nakoraoi, ao ti na manga aki karawawataaki n te mate ke te aoraki. (Taraa Aramwa 11:44–45.) Ngkai n aron Iesu Kristo ae mate ao ni manga maiu, ngaira ni kabane ti na manga maiu.

Ngkana e motiki taekara te Atua, E na bairea ara bure ao nanora ake ti tangiri. Ngkana ti a tia ni kawakin tuua ao taian berita ake ti karaoi nakon Tamara are i Karawa, ngkanne ti na kona ni maiu ma Ngaia riki.

Te Maiu ma te Atua ao Ara Utu i Karawa

N te abanuea ae te tiretio, ti na maeka ma te Atua ao Iesu Kristo. Ti na kona naba ni maeka ikekei ma ara utu n aki toki ngkana ti a tia ni kabaeaki nakoia. Ti na kunea te rau, kakukurei, ao te motirawa (taraa Motiaea 2:41).

Maiura iaon te aonaaba tao e na kangaanga n taainako, ma ngkana ti iriira Iesu Kristo, ti na kona ni kunea te kimwareirei n te maiu aei ao te kakukurei ae akea tokina n te maiu are e na roko.

Tera ae e Taekinaki n Koroboki aika a Tabu iaon Te Babaire ni Kakukurei?

Te kawai are ti maiuakin maiura iai e kakawaki. Te Atua e na motiki taeka ao ni kanuanganiira ni kaineti nakon ara iango ao mwakuri. (Taraa Aramwa 41:3)

Tatan bon te kairiribai nakon kakukureiara. E kaririira ni kabongana buaka maiura iaon te aba ao nakon te bure. E tangiriira bwa ti na karawawataaki n ai arona. (Taraa 2 Nibwaai 2:27).

Ngkana iai ara onimaki n ana baire te Atua ibukira, ti na kona ni karekea te rau n aki tabe bwa tera kataakira are ti na kaaitara. Ti kona n taraia bwa ti na maeka n aki toki ma te Atua. (Taraa Reirei ao Berita aika Tabu 59:23.)