Ibukiia Kaaro
Te Babaire ni Kamaiu ao Kakoaua Iroun te Uea
Nakoia Kaaro aika Tangiraki,
Kam kona ni kabonganai koroboki ao tamneia aika imwina ni kauka te marooro ma am utu ao buokiia bwa a na oota ni kakawakin atuun rongorongo n aron te babaire ni kamaiu ao kakoaua iroun te Uea.
Babaire ni kamaiu
Kabongana “Boton te Euangkerio” iaon te iteraniba 6 n reireiniia am ataei n taekan te babaire ni kamaiu. Marooro bwa e kanga te atatai n te babaire ni kamaiu ni kakabwaiako ao am utu. Iangoia n anganiia am ataei bwa ana koroi tamnein te babaire ni kamaiu ao anganiia n tatabemaniia ni kabwarabwara mwakorona ae kaokoro.
Onimakina te Uea
Wareka ana taneiai te Tari Milton Camargo n te iteraniba 21. Ngkai ko marooroakinna ma am ataei, iangoia n titiraki. E kanga te mitinare ni kaota ana onimaki iroun te Atua? Ko kanga ni kaota am kakoaua iroun te Uea? Tera kawai tabeua are ko a tia ni kakabwaiaaki iai ngke ko a tia ni kakoaua te Atua?
Marooro iaon te Bwainikirinaki
Kabonganai iango inanon bwaai iaon te iteraniba 14 n reiakinna bwa e kanga kinaakin te bwainikirinaki, tuukana, ao reireiniia ataei bwa e kanga kamanoaia.