“N na Kaiririko I nanon Kawaim”

I uringa teuana te tai ngke e kairiia tabeman aomata te Uea. I uringa te tai teuana ngke te Uea e kairiia aomata aika a mwaiti n te Brazil Porto Alegre South Mition. Temanna ara mitinare iai aorakina ae e aranaki bwa te cleft palate (te bwangabwanga ni ngangarake), ae e tuai man bwainaorakiaki. Ngkana e taetae, e nako te eea rinanon aon wiina ao n otinako i bwairina. E kanganga ibukiia tabemwaang bwa a na oota irouna.

Te mitinare te mwaane ae ataei aei e tuangai bwa e a tia n tataroakina ana kangaanga. E taku bwa e wirikiriki te Tamnei bwa n na buokia ni kakaea kaekaana. Ana onimaki ae bebete, man matoa e anganai te ungannano. I rairaki nakon te Uea ni kakaean te kaeka.

Te korokoro ae e uarereke e na kona ni kaeta te kangaanga, ma karekean te korokoro tiaki te bwai ae bebete. Ngke ti a tia ni karaoia i bon iroura, e na rangi ni bobuaka mwiina nakoia ana utu te mitinare aio. Ni ietrana are teuana, kabonganaan ana botaki n tararua te botanaomata e na kainnanoa kabaean te tai ae e mwaiti ao e na taraa ni kabongana nikiran ana namwakaina n are e na mwakuri iai.

Ni katoa te tai are iai au kangaanga ni karaoan tian au mwakuri ni mitinare, I katan iaan ana onimaki ao ana buoka buu. I kabwarabwara kangaangan te mwakuri ni mitinare aio nakoina ao I tuangnga bwa e na taetae ma naake a mwakuri n te tabo ni kuakua . Iai te kawai riki teuana are e na karaoaki iai te mwakuri ni korokoro n akea boona ao inanon te tai ae e na tauraoi iai?

Imwiin au tataro ni kakaea te buoka, e a nakon te o n aoraki kainabau. E mena n te rain ae e abwabwaki n tataninga ana tai n taetae ma te tia ibuobuoki. Inanon rinnakona n te rain, e a kona kainabau n ongo maroroakinan aron reken buokaia naake imoana. Ni bon arona, a tuangaki aomata bwa a na oki ibukin manga aia tai inanon onoua te namwakaina, n tabetai e nako riki.

E ataia buu ae aio e na bon rangi ni maan ibukin ara mitinare. E anaaki nanaona bwa e na kitana te rain ao n rin n te mataroa are teuana. Ikekei e a kunea temanna te tia mwakuri n te o n aoraki. E kaotia kainabau ao e kaota kainnanon ara mitinare.

E tuangaki iroun te tia mwakuri bwa e na reitaki ma te tia korokoro, are e mena n te o n aoraki n te bong anne ni karaoa te korokoro n te tabo teuana. E kabwarabwara nakon te tia korokoro tera ae a karaoia mitinare ao e na kanga te mitinare aio ni kakabwaiaki ngkana e na kona n reke te korokoro ae e na katoka aorakina ae te cleft palate (te bwangabwanga ni ngangarake).

E tabeki ana titiraki te tia korokoro. Imwiina e taku. “Ti kona ni karekea taina n uoua te wiiki?” E kanoa beeban te o n aoraki are e kabwarabwara bwa te korokoro aio ibukin nanon te komiunitii ao iai nanona iai bon ti ngaia n onoti. E anga te booma nakon ana tia ibuobuoki ao e tuaganga bwa e na bairea taina.

Tebwina te bong imwiina, e a karaoa te korokoro te tia korokoro iaon ara mitinare. E aki maan e a oki te mitinare aei man te tabo ni mitinare, ni kukurei ao n taetae n te bwana ae e itiaki. Ma te korakora ae e boou, e kinaa bwa e a tia te Uea ni kairiiria.

Ana taneiai te mitinare aei bon te kakoaua are Tamara e ongo ara tataro ao e kairiira ni baina.

N te taetae n tamnei, titebo ngaira ma ataei aika a uarereke. Ti aki atai a na kakabwaia aika tamaroa Tamara are i Karawa are e a tia ni katauraoi ibukira. Ngkai ti rikirake n te maiu n rabwata, ti a moanna n oota n tuan te aonaaba ake a tautaekani maiura. Ma ti na riai n aki kariaia te rabakau n aon te aba bwa e na kakawaki riki nakon ataan ana kakabwaia Tamara are i karawa ae e rangi ni korakora are e a tia ni kawakinna ibukira.

Mote, te burabeti n te O Tetementi ae e kakannnto, iai irouna te atatai ae e kaotia nakoina bwa e uarereke ataakina irouna. Ao imwiina e “noora te aonaba ao tabotabona nako, ao natiia aomata ni kabane ake a karikaki, ao ake a tia ni karikaki; ao e korakora miimina ao kubanakona n aei.” Te Atua e kitanna. E tiku n ti ngaia Mote, ao e a bwaka nako aontano.

“Ao e koro bukina bwa i nanon te maan ae aoa aika a mwaiti i maain ae okira korakorana n aomata Mote, ao e taku i bonirouna: Ngkai man aio I ataia bwa akea manen te aomata, te bwai ae I tuai ma ni kaman iangoia” (Mote 1:8–10).

Ngkana te Uea e kaoti bwaai ni kabane ae ti konai ni karaoi ni mwakana, ti na rangi n rootaki. N ai aron Mote, ti na noora anne ngkana akea te Atua, bon te akea ngaira.

Ma man kaonrakeara, e a tia te Uea ni kairirira inanon kawaira te mwaneka teuana ma teuana. Aio are e anganiira te kona ni katiai riki aika a mwaiti nakon are ti na kona ni karaoia i boni iroura.

“Bwa tiaki nanomi nako nanou nako, ao tiaki naba arou nako aromi nako, bon ana taeka te Uea.

“Bwa aroni karawa ngkae e rietata riki nakon aontano, ao ai aron naba arou nako, bwa e rietata riki nakon aromi nako ao nanou nako nakon nanomi nako (Itaia 55:8–9).

N aron ae e taku te Uea n Reirei ao Berita aika Tabu 78:18, ti “aki kona ni uotii bwaai ni kabane ngkai.” Ti aki kona n oota ni bwaai ake E oota iai. Tera, ngkanne, ae ti na karaoia? E kaeka te Uea: “Kabebetei nanomi!”

Te nakonako ni kawain te berita ni kabebetei nanomi e raonaki ma te riki n taotaonaki n nano, n aron te ataei ae uarereke. Ti riai n tauraoi ao n reireinaki iroun te Tama (taraa Reirei ao Berita aika Tabu 112:10). E rangi ni mangaongao te maiu n te aro are ti aki kona ni kairi aron nako mwanangara. Ao ti aki kona n oota ni bwaai nako ake ngaira, ke ake ti tangiriia, ake a rinanona ikai iaon te aba.

Ma ngkai ti onimakina te Uea ao ni kariaia bwa e na kairiira ni baina, ti kona ni katiaa ae mwaiti riki n Abanueana nakon ae ti kona n iangoia. Ti na kona riki ni kakabwaia maiuia natin Tamara are i Karawa. Ti na kona riki ni kinaa bain te Tia Kamaiu inanon maiura. Ti na kona riki n namakina te kukurei ibukin Ana nanoanga ao ana tangira ae akea tiana.

N te kabane, te Uea e kairiiri kawaira ni kauringiira bwa “Ami bwai te abanuea ao kakabwaia mai iai bon ami bwai, ao kaubwain are akea tokina bon ami bwai” (Reirei ao Berita aika Tabu 78:18).

I okira ana katoto au mitinare. E kairaki bwa e na bubuti buokana ao ni kakabwaiaki ma te tia korokoro are e karekea te kona n reitaki raoi. Imwiina e kairaki irouia te koraki ake a tauraoi ni butimwaea ana taeka te Uea ao ana kakabwaia, n reitaki ma te bwabetito. I taraa naba ana katooto kainabau. E rikirake ana kakoaua inanon kairana iroun te Uea. Imwiina e kauki mataroan karawa ao e urakina te kakabwaia.

I rangi ni kukurei ngkai e reke mwakuriu ma te mitinare ae e ataei aio, are e kaonaki ma te onimaki ae bebete, ma ni korakora. Ao I rangi ni kukurei bwa I kona ni maiu n akea tokina ma kainabau, are e katea te katoto bwa e na angan te Uea bwa e na kairia iaoni kawaina.

N te koaua te abanuea ao kakabwaia bon ara bwai.