Nahimo Kitang Mas Maayo Tungod Kaniya

Minahal nga pamilya, mga kaigsoonan, ug mga higala, dungog nako nga mamulong sa haya sa akong lider, mentor, ug mahal nga higala, nga si Presidente Thomas S. Monson.

Nindot ang akong gibati alang niining tawhana nga akong nailhan ug gimahal labaw na sa 50 ka tuig. Alang sa tanang mga General Authority ug Kinatibuk-ang Opisyales sa Simbahan, ipahayag namo ang among gugma ug pasalamat ni Presidente Monson. Ngadto sa iyang pamilya—Thomas, Ann, ug Clark, uban sa ilang mga kapikas, mga anak, ug mga apo—gipadayag usab namo ang among dako kaayong gugma ug simpatiya. Nagpasalamat kaayo ta og dako sa kinasingkasing nga mga mensahe nila ni Ann M. Dibb, Presidente Dieter F. Uchtdorf, ug Presidente Henry B. Eyring ug sa maanindot nga kanta sa Mormon Tabernacle Choir.

Si Presidente Monson nagpuyo og talagsaong kinabuhi. Wala nay laing makapareha niya! Dunay miagas ug ipaagas nga daghang luha sa panagbulag sa matag usa nato. Mingawon gyud ta niya! Apan ang atong kasubo nahupay sa Pag-ula ni Ginoong Jesukristo. Ang Iyang mapait nga kopa nakahimo sa atong pagbangutan nga makaya ra. Ang Iyang Pag-ula nakapahimo sa Pagkabanhaw nga tinuod. Ang Iyang Pag-ula nakahimong posible sa mga pamilya nga magkahiusa sa kahangturan sa plano sa Langitnong Amahan. Nalipay kita nga nakahibalo nga si Presidente Monson nahiusa sa iyang minahal nga si Frances ug nga moabut ang adlaw nga mahibalik ang atong asosasyon kanila.

Sukad sa pagtaliwan ni Presidente Monson, ang mga handumanan maayo kaayo pagkaandam ug gipresentar sa media. Nakapadasig kini nako. Dugang pa, ang mga halangdon ug mga higala sa tibuok kalibutan mipadala sa ilang pahasubo ug mipadayag og tumang pagdayeg.

Gipaabut kini alang sa usa ka tawo nga nakaimpluwensya sa mga kinabuhi ug nakahulma sa kapalaran sa minilyon ka mga tawo sa tibuok kalibutan. Nahimo kitang mas maayo tungod kaniya. Ug ang Simbahan nahimong mas maayo tungod kaniya. Nagbilin siya og kabilin sa pagtubo. Sukad sa iyang ordinasyon isip usa ka Apostol niadtong 1963, ang mga miyembro sa Simbahan misaka gikan sa 2.1 ka milyon ngadto sa dul-an sa 16 ka milyon. Ang gidaghanon nga nagserbisyo karon nga mga misyonaryo mitubo gikan sa 5,700 ngadto sa labaw sa 70,000. Ug ang mga templo—kaniadto 12 ra ka buok—karon 159, ug daghan pa ang umaabut.

Apan uban niining tanan, si Presidente Monson kanunay nga nagtutok sa indibidwal. Nagpahinumdom siya nato pinaagi sa mga ekspresyon sama sa “Ipadala kana nga sulat ngadto sa higala nga imong nataligam-an,” “Gaksa ang imong anak,” “Ingna nga ‘gihigugma ko ikaw’ sa makadaghan, “Ipahayag kanunay ang imong pasalamat,” ug “Ayaw himoang mas importante ang sulbarunon nga problema kay sa tawo nga angayng higugmaon.”

Si Presidente Monson wala gayud magtinguha nga mabantog. Sa kalibutan nga napuno sa “selfies,” siya nagpakita og pagkadili hakog. Iyang gilarawan ang pamahayag sa Ginoo, kinsa miingon, “ang labing dako kaninyo, mainyo siya nga sulugoon.”¹ Mihatag siya sa iyang panahon sa pagbisita, pagpanalangin, ug paghigugma sa uban. Bisan sa hapit na siya mamatay, nagpadayon siya sa pagpangalagad, nagsige og bisita sa mga ospital ug sa mga sentro sa mga senior.

Sa milabayng katuigan, nakigsalo ako og maanindot nga mga kasinatian uban ni Presidente Monson. Moistorya ko og usa lang nga nagpakita sa unsa nga paagi siya migamit og pag-awhag, pagkamainantuson, kalumo, kaaghup, ug tiunay nga paghigugma sa pagkab-ot og talagsaong mga tumong.²

Niadtong 1985, gihatagan ko og responsibilidad alang sa Simbahan sa Uropa, usa ka buluhaton nga gihuptan ni Presidente Monson sa daghang mga tuig. Ako ang iyang junior companion nianang mahagiton nga trabaho. Luyo sa unsay gitawag nga Iron Curtain, si Presidente Monson nagtrabaho dul-an og duha ka dekada aron makaestablisar og pagsalig uban sa mga lider sa gobyerno sa German Democratic Republic.

Niadtong 1988, siya ug ako mibiyahe uban sa gamay nga delegasyon sa atong lokal nga mga lider sa Simbahan ngadto sa kapital nga siyudad sa Silangang Berlin. Niini nga nasud nga nasira sa misyonaryo nga buhat sobra na sa 50 ka tuig, gibati namo ang pagpangayo og pagtugot nga makaserbisyo ang mga misyonaryo didto. Nangayo usab kami og pagtugot alang sa takus nga mga elder gikan niana nga nasud nga makaangkon og oportunidad nga moserbisyo sa Ginoo isip mga misyonaryo bisan asa.

Kining importante nga miting gihimo sa nagdag-om nga adlaw niadtong Oktubre 28, 1988. Nagmiting kami uban ni Erich Honecker, chairman sa state council alang sa German Democratic Republic, ug sa iyang staff. Nagsugod siya sa usa ka taas nga pakigpulong mahitungod sa mga kaayohan sa komunismo. (Ang mahimo ra namo mao ang pagpaminaw.)

Dayon, ubos sa nagkidlap-kidlap nga dili maihap nga mga camera, si Presidente Monson gidapit sa pagpamulong. Maisugon niyang gipresentar ang iyang mensahe kon sa unsa nga paagi ug ngano nga ang atong mga misyonaryo makahatag og kaayohan niana nga nasud.

Human sa hangyo ni Presidente Monson, ang tanan naghulat sa tubag ni Chairman Honecker uban sa hilabihang kakulba. Dili gayud nako makalimtan ang iyang tubag: “Presidente Monson, nakaila mi nimo! Nagbantay mi nimo sulod sa daghang mga tuig! Misalig kami nimo! Ang imong hangyo kabahin sa mga misyonaryo aprobado!”

Sa among pagbiya niana nga miting, ang mga panganud miiway sa makadiyot ug nagpakita ang adlaw kanamo. Ingon og ang langit naghatag og signal sa pagtugot sa unsay bag-o lang nahitabo.

Karon, nga ang mortal nga kinabuhi ni Presidente Monson natapos na, gibati nato nga ang panalangin sa Ginoo ngadto sa Iyang propeta nga si Nephi alang usab sa atong minahal, mibiya nga lider:

Bulahan ikaw, [Presidente Thomas S. Monson] alang niadto nga mga butang nga imong nabuhat; kay Ako nakakita giunsa nimo uban sa walay kaluya pagpahayag sa pulong, nga Ako mihatag nganha kanimo, ngadto niini nga mga katawhan. Ug ikaw wala mahadlok kanila ug wala magtinguha sa imong kaugalingon nga kinabuhi, apan nagtinguha sa akong kabubut-on, ug sa paghupot sa akong mga sugo.

Ug karon, tungod kay ikaw naghimo niini uban sa walay kaluya, tan-awa, Ako mopanalangin kanimo [ug sa imong pamilya] sa kahangturan.”³

Ligdong akong mopahayag nga si Presidente Thomas S. Monson usa ka propeta sa Dios. Mitudlo siya isip sa usa ka propeta ug mipamatuod isip usa ka propeta. Aduna siyay kaisug sa usa ka propeta ug pagkamabination sa usa ka propeta. Nakadawat siya og pagpadayag isip usa ka propeta ug mitubag isip usa ka propeta. Nabuhi siya isip usa ka propeta ug namatay isip usa ka propeta, misilyo sa iyang kinabuhi sa iyang pagpamatuod nga ang Dios buhi, nga si Jesus mao ang Kristo, nga ang Iyang Simbahan gipahiuli sa yuta, ug kining sagrado nga buhat tinuod. Ngadto sa pagpamatuod nga iyang gihatag sa daghang higayon gikan niini nga pulpito, mapainubsanon akong modugang sa akong pagpamatuod, pinaagi sa sagradong ngalan ni Jesukristo, amen.