Usa ka Kabilin sa Gugma ug Serbisyo
Usa ka pagpakita ngadto sa publiko kang Presidente Thomas S. Monson gipahigayon diha sa Conference Center niadtong Enero 11, 2018. Ang mga funeral service gipahigayon pagkasunod adlaw diha sa Conference Center. Usa ka pribado nga paglubong gisunod nianang hapona didto sa Sementeryo sa Siyudad sa Salt Lake.
Usa ka panalangin kini kanako nga mobarug sa inyong atubangan karong adlawa ug mohatag og pakigpulong agig paghandom sa akong amahan, si Presidente Thomas Spencer Monson, ang ika-16 nga Presidente sa Ang Simbahan ni Jesukristo sa mga Santos sa Ulahing mga Adlaw. Karong adlawa kining Conference Center napuno uban sa inyong gugma ug mga pag-ampo. Nagpasalamat ko ninyo sa inyong presensya ug suporta.
Isip pamilya, gusto namong pasalamatan ang daghan kaayong mga indibidwal nga nakapanalangin sa among amahan uban sa ilang serbisyo ug pag-amuma. Sinsiro namong gipasalamatan silang President Henry B. Eyring ug President Dieter F. Uchtdorf. Among gipasalamatan ang matag miyembro sa Korum sa Napulog Duha ka mga Apostoles. Nagpasalamat usab kami sa daghang ubang mga General Authority ug mga Opisyales sa Simbahan. Ang staff sa opisina ni Presidente Monson ug ubang mga empleyado dili pud makalimtan. Ang security team sa akong amahan, ilabi na nilang Tracy Monson ug Dan Stephens, sa ilang pagka propesyonal ug pag-atiman nakahatag og talagsaong serbisyo. Among espesyal nga pasalamat sa iyang nursing personnel, ilabi na ni Sister Aleese Walker. Nagpasalamat usab kami sa mapahinungorong mga physical therapist, dentista, ug doktor sa akong amahan, lakip na sa iyang internist, si Dr. Russell Maxwell. Kamong tanan talagsaon sa inyong makanunayon nga pagkamapuanguron ug pag-amuma.
Gusto sab nakong pasalamatan ang akong bana, si Roger, ug sa among mga anak sa pagsuporta kanako samtang nagserbisyo ko sa akong amahan ug ilang lolo.
Mahal nga Amahan, sagrado nga panalangin kini ug usa ka pasidungog ang pagbantay kanimo sigon sa gihangyo sa akong mahalarong inahan. Nasayud ko nga kita adunay “mga anghel anaa libut [kanato], aron sa pagtabang [kanato].”1
Sa katapusan, gusto kong mopasalamat, sa mga miyembro sa Simbahan. Ang inyong 54 ka tuig nga inadlaw nga mga pag-ampo, gihalad samtang nangalagad ang akong amahan isip usa ka Apostol ug dayon isip Presidente sa Simbahan, nakahimo sa kalainan.
Karon mapasalamaton kaayo ko sa akong amahan ug sa kabilin nga iyang gimugna—usa ka kabilin sa gugma ug serbisyo. Bisan og siya usa ka propeta, ang akong amahan dili perpekto. Uban sa tibuok niyang kasingkasing, mapaubsanon siyang nagsalig ug naninguha nga mahisama sa atong Ginoo ug Manluluwas, nga si Jesukristo. Sa miaging tuig, nagtrabaho siya sa iyang opisina. Usa ka kopya sa Ensign magazine abli, ug didto nakita ang iyang hulagway. Ang akong amahan mitudlo sa hulagway ug miingon, “Nakaila ko anang tawhana. Naninguha siya og maayo.”
Usa ka Kabilin sa Gugma
Si President Monson, pinaagi lang sa “iyang labing maayong paningkamot,” mibilin og dili malimtan nga kabilin sa gugma. Gihigugma niya ang Ginoo ug gihigugma niya ang katawhan. Nakita niya ang atong potensyal ug sinserong nagtuo sa atong abilidad nga mausab ug mouswag pinaagi sa Pag-ula ni Jesukristo.
Gihigugma niya ang iyang mga ginikanan, mga igsoon, ug mga paryente. Gihigugma niya ang iyang mahal nga mahangturong kapikas—iyang gwapa, hilum, matinud-anong tig-abag ug tig-aghat, nga si Frances. Gihigugma niya ang iyang pamilya ug matag usa sa iyang eastern Canadian nga mga misyonaryo. Ilabi na gihigugma niya ang iyang mga apo. Bisan pa sa iyang busy nga iskedyul, mihimo siya og dili maihap nga mga handumanan uban nila. Bug-os siyang interesado sa matag kinabuhi nila.
Ang mga estranghero mibati usab sa gugma ni President Monson. Makausa, samtang nagbisita og lokal nga nursing care nga balay, milamano siya sa usa ka tawo nga naka-wheelchair. Ang tawo mihangad ug maulawong miingon, “President Monson, milamano ka nako, pero gikinahanglan ko ang paggakos.” Walay pagduhaduha, miduko si Papa ug mabinationg migakos niini nga tawo.
Ang akong papa kasagarang mosaysay sa mahinungdanong sugo sa Manluluwas:
“Higugmaa ang Ginoo nga imong Dios sa tibuok mong kasingkasing, ug sa tibuok mong kalag, ug sa tibuok mong salabutan.
“Mao kana ang dako ug ang unang sugo.
“Ug ang ikaduha susama ra, Higugmaa ang imong silingan sama sa imong kaugalingon.”2
Mipili usab siya sa pagpuyo niini nga sugo matag adlaw.
Usa ka Kabilin sa Pagserbisyo
Sa The Two Gentlemen of Verona, si William Shakespeare maalamong misulat: “They do not love that do not show their love [Wala sila mahigugma kon wala kini gipakita].”3 Nakasabot niini pag-ayo ang akong amahan ug mipakita sa iyang gugma ngadto sa uban pinaagi sa pagsunod sa ehemplo sa Manluluwas: “[Siya] miadto sa paghimog kaayohan, … kay ang Dios uban man kaniya.”4 Ang akong amahan migahin sa iyang tibuok kinabuhi sa pag-alagad sa uban.
Pribilehiyo nako nga makauban ang akong amahan sa daghan niyang personal nga mga pagbisita. Kanunay kaming mobisita sa usa ka dugay na kaayong higala, 98 anyos na nga si Elder Glen Rudd. Makausa, nadugay mi sa among mga pagbisita og balik. Usa ka adlaw ang sekretarya sa opisina sa akong amahan nakatubag sa tawag gikan ni Elder Rudd. Nangutana siya, “Si President Monson ba nagbisita sa masakiton, sa nagkalisud, ug sa tiguwang? Kon mao, puwede ko!“ Miadto mi dayon sa iyang panimalay. Human sa pagbisita, si Papa milingi kanako uban sa pahiyum ug miingon, “Ann, paminaw nako aduna kitay maayo nga nabuhat karong adlawa.”
Ang tinguha sa akong amahan sa pagserbisyo sa uban misobra sa iyang kapasidad sa pagbuhat, bisan sa kadaghan sa iyang katungdanan. Sa walay kahadlok, nakakita siya og solusyon: iyang gidani ang uban sa paghatag sa gikinahanglang serbisyo sa iyang bahin. Gitawag niya ang pinili nga mga indibidwal ug moingon, “Ang ako ba ning higala nga si Mac? Si Tom ni. Ganahan ka bang mobutang og kahayag sa imong kalag karong adlawa?” Kong hubaron, nagpasabot kini nga si President Monson nagkinahanglan og “pagserbisyo nga pabor.” “Si Mac” malipayon kaayong misugot.
Dili kinahanglan nga Presidente ta sa Simbahan aron makakita sa panginahanglan sa uban ug “mobutang og kahayag sa atong mga kalag.” Ang akong papa mibuhat sa kanunay niyang pagbati, “Mao kana ang maayo nga buhaton,” aron lang mahibaw-an nga tubag kadto sa laing pag-ampo. Pinaagi sa pagtubag sa mga pag-aghat sa Espiritu, ang atong yanong mga buhat sa pangalagad mahimong mga tubag sa mga pag-ampo, ug madala ni nato nga kabilin pinaagi sa pagserbisyo sa uban.
Sa miaging tuig, ang akong amahan ug ako mibisita og laing dugay na nga higala, kinsa 94 anyos na ug masakiton kaayo. Uban sa tibuok nga tingog, miingon ang akong amahan, “Ang ako ba ning higala nga si Brent Goates?” Si Brother Goates miabli sa iyang mga mata ug miingon uban sa dakong paningkamot ug emosyon, “Tom, mianhi ka. Nindot kaayo. Nindot kaayo.”
Ang akong papa mipasabot, “Brent, walay laing lugar nga gusto nakong adtoon kay sa dinhi uban nimo. Mao kini ang gusto sa Ginoo nga akong adtoan.” Nakig-istorya ang akong amahan uban kaniya nga daw mga batan-on pa sila ug si Brent usa ka lagsik, arang nga tawo; iya dayong gitagaan si Brother Goates og panalangin sa priesthood. Sa among pagbiya padulong sa sakyanan, miingon ang akong amahan, “Ang Ginoo mihatag kanato sa priesthood aron pagserbisyo ug pagpanalangin sa uban. Mao kini ang dakong panalangin sa pagbisita sa akong higala ug makahibalo siya nga gihinumduman siya. Gibati nako nga nakahimo kita og maayo karong adlawa, Ann.” Nianang adlawa ang akong amahan dili makahunong sa pagpahiyom. Nanaghoy siya. Malipayon siya.
Nagsud-ong kaniya, nakaamgo ko nga ang akong amahan kahibalo unsaon pag-angkon og tinuod nga kalipay. Pinaagi sa iyang maunungon nga pagserbisyo, nakat-on siya nga ang hingpit nga kalipay naggikan sa paghigugma sa Ginoo ug pagserbisyo sa imong silingan. Kining hingpit nga kalipay anaa alang sa matag usa kanato. Walay laing pagpasidungog sa akong amahan, ang propeta, ug sa atong Manluluwas nga si Jesukristo kay sa pagpuyo matag adlaw aron pagtapos sa adlaw makasulti kita, “Gibati nako nga nakabuhat ko og maayo karong adlawa.”
Ako adunay pagpamatuod. Ang Simbahan ni Jesukristo sa mga Santos sa Ulahing mga Adlaw tinuod. Nasayud ko nga ang Dios buhi ug nahigugma sa Iyang mga anak. Salamat kaninyong tanan nga nagmahal ug nagpasidungog sa akong amahan, si Presidente Thomas Spencer Monson. Hinaut nga ang matag usa kanato mopadayon sa pagsunod sa propeta sa Ginoo. Unta mohangad kita ngadto kang Kristo, ang atong hingpit nga Ginoo ug Manunubos, isip atong mahangturong ehemplo. Sinsiro nakong pag-ampo nga ang akong mahal nga amahan, ug sa umaabot kitang tanan, makadungog niini nga mga pulong: “Maayong pagkabuhat, maayo ug kasaligan nga ulipon: … dumuyog ka sa kalipay sa imong agalon.”5
Namulong ko niining mga butanga sa ngalan ni Jesukristo, amen.