Usa ka Propeta alang sa Atong Panahon

Gibati nako ang dakong dungog ug pasalamat sa pribilehiyo nga mohalad og pasidungog kang Presidente Thomas S. Monson, usa ka propeta sa Dios ug pinangga nakong higala.

Niining emosyunal nga panahon, kusog ang impluwensya sa mga pagbati ug hunahuna ug kulang ang mga pulong sa pagpahayag sa akong gugma, pasalamat, ug kasubo.

Si Harriet ug ako mopahayag sa among kinasingkasing nga simpatiya, pahasubo, ug pasalamat ngadto sa pamilya, ngadto sa tanang nahigugma kaniya, ug sa daghan nga mapinanggaong miatiman kaniya. Usa ka espesyal nga pasalamat ngadto kang Ann Monson Dibb, ang anak ni Presidente Monson. Human sa kamatayon sa minahal nga asawa ni Presidente Monson, nga si Frances, ang mapahinungurong pagserbisyo ni Ann, nga gisuportahan sa iyang mga igsoon ug pamilya, mipanalanginan pag-ayo ni Presidente Monson sa katapusang mga adlaw sa iyang kinabuhi.

Gimingaw kaayo ko niya! Dugay na nako siyang gikonsiderar nga higala bisan sa wala pa nako siya mahimamat. Nagtuo ko nga ang tanan nga nakaila niya, nakadungog niya, o nakakita niya, bisan kon sa layo ra, mikonsiderar sa ilang kaugalingon nga iyang mga higala.

Sa dihang si Sister Uchtdorf ug ako mibiyahe sa kalibutan, ang mga tawo mopahayag sa ilang gugma, pasalamat, ug pag-ampo ngadto sa ilang minahal nga propeta. Kining kinasingkasing nga mga pagtimbaya nagagikan sa mga batan-on, mga edaran, ug sa tanang mga edad.

Si Thomas S. Monson malampuson ug daghan og mga talento, tawo nga dunay talagsaong espirituhanong kalig-on. Abunda siya sa kahibalo, pagtuo, gugma, panabut, pagpamatuod, kaisug, ug kalooy—nangulo ug nagserbisyo dili isip gikan sa taas nga posisyon, apan kanunay sa personal nga paagi. Adunay espesyal nga luna diha sa iyang kasingkasing alang sa mga kabus ug timawa. Mingawon kita sa iyang tingog, sa iyang kamakanunayon, sa iyang pagsalig sa Ginoo, sa iyang pahiyum, sa iyang salabutan, sa iyang kadasig, sa iyang kamalaumon, ug sa iyang mga istorya, nga gikonsiderar nakong mga sambingay sa usa ka moderno nga propeta sa Dios.

24 ka tuig na karon sukad nga si Harriet ug ako gidapit ni Presidente Monson ngadto sa iyang opisina ug gitawag ko nga moserbisyo isip General Authority sa Simbahan. Si Harriet ug ako nanlimbasug sa kamahinungdanon sa higayon ug sa malungtarong epekto niini sa among kinabuhi.

Hinoon, ang kainit, personal nga interes, pag-awhag, ug kadasig ni Presidente Monson alang sa buhat ug ang iyang propetikanhong dignidad mipabati kanamo og kakalma ug kamalinawon. Gibati namo nga anaa sa presensya sa tawo nga nakaila sa Manluluwas, nga Iyang sulugoon, nga nailhan sa atong Langitnong Amahan.

Ang Germany ug ang katawhan niini napanalanginan pag-ayo ni Presidente Monson. Ang iyang lig-ong pagtuo nakatabang sa paglig-on sa among pagtuo sa mga katuigan sa Cold War [tensyon tali sa Amerika ug Russia]. Wala lamang siya magdala og mga malita nga puno sa mga sinina ug ubang mga butang alang sa mga miyembro sa East Germany, apan ang iyang gamhanang apostolikanhong pag-ampo nga gihatag niadtong 1975 misaad og dili matukib nga espirituhanong mga panalangin. Mibalik si Presidente Monson uban ni kanhi-Elder Nelson ug mi-follow up niining balaan nga mga saad. Kadtong tanan natuman, ang matag lakang. Usa ka propeta sa Dios ang namulong, ug ang Dios mipasidungog sa pagtuo ug buhat sa Iyang sulugoon.

Sa dihang si Harriet ug ako miuban kang Presidente Monson sa usa ka komperensya sa Hamburg, nangutana siya kabahin ni Michael Panitsch, kanhi presidente sa stake ug patriarch, usa sa pinakalig-on nga mga pioneer sa Simbahan sa Germany. Grabeng nasakit si Brother Panitsch, naghigda na lang, ug dili makatambong sa among mga miting. Bisan pa, gusto ni Presidente Monson nga mobisita kaniya.

Sa sayo pa niini, naoperahan sa tiil si Presidente Monson ug masakitan kon molakaw. Si Brother Panitsch nagpuyo sa ikalimang andana sa building nga walay elevator. Kinahanglan kaming mokatkat sa daghang tiptip nga mga ang-ang. Apan namugos si Presidente Monson, mao nga miadto mi.

Sakit kaayo kadto nga pagsaka alang ni Presidente Monson, apan malipayon siyang mipadayon. Miabut mi sa brother nga naglubog, ug si Presidente Monson mihatag kaniya og talagsaong panalangin sa priesthood, mipasalamat kaniya sa iyang kinabuhi nga mapahinungurong nagserbisyo, ug mipahalipay kaniya uban sa pahiyom.

Kon maghunahuna ko niini nga kasinatian, mahinumdom ko sa gisulti ni Apostol Pedro mahitungod ni Jesus, iyang higala ug magtutudlo: “[Nag]pangadto-adto [Siya] sa paghimog mga kaayohan.”¹

Masulti usab kini sa tawo nga atong gimahal, gitahud, ug gipaluyohan isip propeta sa Dios, higala nato ug higala sa Dios, si Thomas Spencer Monson.

Usa ka kasinatian nga labing makatagbaw ug magantihon sa espiritwal nga paagi ang pagserbisyo isip usa sa mga magtatambag ni Presidente Monson diha sa Unang Kapangulohan sa Simbahan. Naglakip kini sa kalipay ug kasakit, katawa ug kasub-anan, laglum nga panagsultihanay, ug daghang dinasig nga propetikanhon nga mga panahon.

Bag-ohay lang, sa dihang si Presidente Eyring ug ako mobiya na unta human mibisita sa panimalay sa propeta, si Presidente Monson mipahunong namo ug miingon, “Gimahal nako ang Manluluwas nga si Jesukristo. Ug nasayud ko nga Siya nagmahal kanako.” Pagka-emosyunal ug gamhanan nga pagpamatuod sa propeta sa Dios.

Si Presidente Monson tinuod gayud nga propeta sa atong panahon. Malampuson siya ug daghan og mga talento. Ang tanan nga atong nahibaloan ug gimahal kabahin ni Presidente Thomas S. Monson magpadayon. Ang iyang espiritu mipauli na ngadto sa Dios, ang atong Amahan sa Langit, kinsa mihatag kaniya sa kinabuhi. Bisan asa ko moadto niining matahum nga kalibutan, usa ka bahin niining gihambin nga higala kanunay nga magauban kanako.

Mohalad ko og mahigugmaong pagpanamilit sa atong minahal nga propeta: Salamat, Presidente Thomas S. Monson. Hinaut ang Dios magauban kanimo hangtud sa sunod natong panagkita. Sa sagradong pangalan ni Jesukristo, atong Manluluwas ug atong Manunubos, amen.