Usa ka Maamumahon ug Maisugon nga Propeta

Akong dungog nga gidapit sa pagpamulong sa lubong sa bantugan nga propeta sa Dios, si President Thomas S. Monson. Gibati ko og dakong kalooy ngadto sa iyang pamilya ug sa tanang nagbangutan sa iyang pagtaliwan. Adunay minilyon ka mga tawo sa tibuok kalibutan nga miambit nianang pagbati sa namatyan. Gipangga siya niadtong nakaila kaniya gikan sa iyang pagkamadanihon ug makapadasig nga mga pagpamulong ug sa iyang pagpangulo. Ang gidaghanon sa mga tawo nga nagpangga kaniya tungod sa iyang kabuotan naila lamang ngadto sa Dios nga mipadala kaniya aron sa pag-amuma kanila.

Ang pag-amuma sa uban kanunayng nahitabo diha sa pangalagad ni Presidente Monson. Mobisita siya sa tawo nga nanginahanglan, samtang anaa siya didto iyang bation nga adtoon ang lain pa nga tawo, ug unya ngadto pa sa lain. Kapin sa pipila ka higayon, ang maong tawo miingon, “nakahibalo ko nga moabut ka.” Mahimong nakahibalo sila, ang Ginoo mahimong nakahibalo, apan si Presidente Monson wala nakahibalo kanus-a siya nagsugod. Hinoon, kadtong nahibalo nga moabut siya nasayud nga ang Dios nahigugma kanila maong gipadala ang Iyang sulugoon. Ilang gibati ang gugma sa Dios pinaagi sa kamabination ni Presidente Monson ngadto nila. Ang gugma sa Dios, ug ang gugma alang sa mga anak sa Dios, makita sa tibuok niyang kinabuhi.

Kana nga gugma gisugdan og sayo ug milahutay kaniya hangtud sa katapusan. Sa iyang personal nga pagserbisyo ug sa iyang pagpangulo sa Ang Simbahan ni Jesukristo sa mga Santos sa Ulahing mga Adlaw, iyang giisip ang mga pulong ni Isaias isip ang pulong sa propeta sa Dios. Si Isaias misulat sa balaod sa puasa, diin gitutukan ang pag-atiman alang niadtong nanginahanglan:

“Dili ba mao ang pakigbahin sa imong tinapay uban sa gigutom, ug imo nga dad-on ang kabus nga sinalikway ngadto sa imong balay? kon ikaw makakita sa hubo nga imo siya nga tampian ug nga ikaw dili matago gikan sa imong kaugalingon nga unod?

“Unya ang imong kahayag mosidlak nga maingon sa kabuntagon, ug ang imong pagkaayo motungha sa madali; ug ang imong pagkamatarung mouna kanimo; ang himaya sa Ginoo magapalikod kanimo.

“Unya ikaw motawag, ug ang Ginoo motubag; ikaw motu-aw ug siya maga-ingon: Ania man ako. …

“Ug ang Ginoo magamando kanimo sa kanunay ug mobusog sa imong kalag sa mga dapit nga mamala, … ug mahisama sa usa ka pinatubigan nga tanaman, ug sama sa usa ka tubod sa tubig, kansang mga tubig walay paghubas” (Isaias 58:7–9, 11).

Diha sa pagserbisyo sa Ginoo sa tibuok kinabuhi, si Presidente Monson miamuma niadtong anaa sa temporal ug espirituhanon nga panginahanglan, ug iyang nadawat kadtong mga gisaad nga mga panalangin. Kon siya mosangpit sa Ginoo diha sa pag-ampo, ang Ginoo motubag. Ug ngadto ni Thomas Monson miabut ang pasalig nga anaa ang Ginoo.

Si Presidente Monson kanunayng mokutlo sa saad nga ang Ginoo magauban kanato sa atong matinud-anong pagserbisyo alang Kaniya. Kadto nga mga saad tinuod diha sa iyang kasinatian.

Ang Doktrina ug mga Pakigsaad 84:88 mao ang paborito: “Kinsa kadto nga modawat kaninyo, didto atua usab Ako, kay Ako molakaw diha sa inyong atubangan. Ako anaa sa inyong tuo nga kamot ug sa inyong wala, ug ang akong Espiritu mahimo nga anaa sa inyong mga kasingkasing, ug ang akong mga anghel anaa libut kaninyo, aron sa pagtabang kaninyo.”

Tungod kay nasayud siya nga ang saad tinuod, mao nga malaumon si President Monson. Nakapahimo usab kini niya nga maisugon. Kon kinahanglan siya nga mohimo og lisud ug importanting pagpili, maglaum siya sa Ginoo nga motubag sa iyang pag-ampo ug mopakita kaniya sa dalan nga subayon. Kon siya tawagon ngadto sa makuyaw o delikado nga sitwasyon, ang uban nahadlok, apan siya wala mobati og kahadlok. Mituo siya nga ang Ginoo nag-una kaniya ug ang mga anghel nagpalibut kaniya andam aron sa pagtabang kaniya. Kana naprubahan nga tinuod. Ang Iyang anak, si Ann, kinsa namulong karon nga puno kaayo sa pagbati, mibarug duol kaniya pipila ka oras sa wala pa siya mipanaw. Napanalanginan ko nga anaa didto. Sa akong pagsud-ong sa iyang nawong, naghunahuna ko nga ang saad sa Ginoo natuman. Napalibutan siya ug gitabangan sa tawhanong mga anghel—ug tingali mas daghan pa.

Mibati ko og kasigurohan nga ang nabanhaw nga Ginoo, nga nag-una kaniya ngadto sa kalibutan sa espiritu, nagpaabut kaniya uban sa gituyhad nga mga bukton. Gibati nako ang nagdilaab nga pagpamatuod, diin akong ipamatuod karon kaninyo, nga si Presidente Monson nakaila sa Ginoo, nga siya nalimpyo pinaagi sa Pag-ula samtang siya mihatag sa tanan diha sa pagserbisyo sa Ginoo iug sa mga anak sa Amahan. Nakaila siya sa Ginoo. Nahigugma siya sa Ginoo. Ug miingon siya nga siya nasayud nga ang Ginoo nahigugma kaniya.

Si Presidente Monson nagpakabuhi nianang giawhag ni Haring Benjamin ngari kanato:

“Ako moingon nganha kaninyo, ako manghinaut nga kamo kinahanglan mahinumdom sa pagbaton sa ngalan nga nahisulat kanunay sa inyong mga kasingkasing, nga kamo dili makaplagan diha sa wala nga kamot sa Dios, apan kamo makadungog ug masayud sa tingog diin kamo pagatawgon, ug usab, sa ngalan pinaagi diin siya motawag kaninyo.

Kay unsaon pagkasayud sa usa ka tawo sa agalon kinsa siya wala makaalagad, ug kinsa usa ka dili kaila ngadto kaniya, ug layo gikan sa mga lawom nga mga pagbati ug katuyoan sa iyang kasingkasing? …

“Busa, ako manghinaut nga kamo kinahanglan magmakanunayon ug dili mausab, sa kanunay puno sa mga maayo nga buhat, nga si Kristo, ang Ginoong Dios nga Makagagahum, mahimo nga mosilyo kaninyo nga iya, nga kamo mahimo nga dad-on ngadto sa langit, nga kamo mahimo nga makaangkon sa walay katapusan nga kaluwasan ug kinabuhi nga dayon” (Mosiah 5:12–13, 15).

Nasayud ko nga si Jesus mao ang Kristo. Akong ihatag ang akong balaan nga pagsaksi nga, pinaagi sa Iyang kinabuhi nga walay sala ug ang Iyang walay kinutuban nga Pag-ula, ang tanang anak sa Langitnong Amahan nga moabut sa mortalidad mabanhaw. Pinaagi sa pagpangalagad sa mga anghel ngadto ni Joseph Smith, ang propeta sa Pagpahiuli, ang hingpit nga mga yawe sa priesthood gipahiuli. Kadto nga mga yawe gipasa nga walay pagkaputol ngadto ni Presidente Monson. Naglakip kini sa gahum sa pagbugkos sa mga pamilya alang sa kahangturan. Si Presidente Monson nasayud niana ug mipamatuod gayud. Nga ang gahum sa priesthood magpadayon diha sa Simbahan sa Manluluwas dinhi sa yuta hangtud Siya moanhi pag-usab.

Si President ug Sister Monson nabugkos niana nga gahum. Ako nag-ampo og panalangin sa tanan nilang kaliwatan nga sila makaangkon sa kasigurohan nga ang Ginoo nagbantay kanila ug nga siya mahimong makasalmot sa mahimayaon ug mahangturon nga reyunyon sa pamilya. Pinaagi sa sagradong pangalan ni Jesukristo, amen.