Genesis Group

Maraming pamilyang Aprikanong Amerikano ang kabilang sa mga pinakaunang miyembro ng Simbahan at aktibo sa maraming kaganapan sa kasaysayan ng mga Banal sa mga Huling Araw. Gayunpaman, sa loob ng maraming dekada, madalas matagpuan ng mga bagong miyembrong Itim ang kanilang sarili bilang tanging Itim na tao o pamilya sa kanilang mga lokal na ward at stake. Hinahangad na makabuo ng mas matibay na komunidad, noong 1971, ang mga Itim na miyembro sa Salt Lake City ay nakipagtulungan sa mga lider ng Simbahan upang iorganisa ang Genesis Group, isang grupo na buwanang nagtitipon at nagdaraos ng mga aktibidad sa ilalim ng pamamahala ng Salt Lake Liberty Stake na nagbibigay ng karagdagang suporta sa mga miyembro nito.

Bago inorganisa ang Genesis Group, maraming miyembrong Itim sa Salt Lake City ang nagtitipon at nagpaplano ng mga aktibidad, bagama’t sila ay dumadalo sa magkakaibang ward. Noong dekada ng 1960, naging punong abala sina Eugene at Leitha Orr sa magiging taunang pagtitipon sa kanilang tahanan. Sa isang pagtitipon, tinanong ni Eugene sina Darius Gray at Ruffin Bridgeforth Jr. tungkol sa kung paano nila makokontra ang ilan sa mga panghihina ng loob na ipinahiwatig ng marami sa kanilang mga kaibigan at kapamilya na Itim habang dumadalo sa simbahan. Magkakasamang nag-ayuno at nanalangin ang tatlong lalaki para sa gabay mula sa langit. Para kay Gray, ito ang unang pagkakataong lumuhod siya upang manalangin kasama ang dalawa pang Itim na mga Banal sa mga Huling Araw mula nang naging miyembro siya ng Simbahan. Noong 1971, nilapitan nila ang mga lider ng Simbahan taglay ang mga tanong ukol sa restriksiyon sa priesthood at templo na ipinapatupad noon sa mga miyembro na may lahing Itim na Aprikano at kung paano sila makakatulong sa Simbahan sa pagbigay ng suporta sa komunidad ng mga Itim. Inatasan ni Pangulong Joseph Fielding Smith sina Elder Gordon B. Hinckley, Thomas S. Monson, at Boyd K. Packer na makipagtulungan kina Bridgeforth, Gray, at Orr na bumuo ng solusyon.

Noong ika-19 ng Oktubre 1971, ang Genesis Group—pinangalanan nang ganito dahil kinakatawan ng kanilang organisasyon ang “bagong simula” para sa mga miyembrong Itim—ay nagdaos ng unang pulong nito. Itinalaga nina Elder Hinckley, Monson, at Packer si Bridgeforth bilang president ng group habang si Gray ang first counselor at si Orr naman bilang second counselor. Si Lucille Bankhead, isang inapo ng mga pioneer na Banal sa mga Huling Araw na sina Jane Manning James at Green Flake, ay hinirang bilang Relief Society President ng group. Inanunsiyo ng bagong presidency ang kanilang plano para sa mga Itim na miyembro na magtipon isang beses bawat buwan upang magbahagi ng patotoo, magtayo ng komunidad na nagbibigay ng suporta, at magbahagi ng mga karansang pangkultura. Patuloy na dadalo rin ang mga miyembro ng Genesis Group sa kanilang mga home ward.

Naglingkod si Ruffin Bridgeforth bilang president ng Genesis Group mula nang inorganisa ito noong 1971 hanggang sa pagpanaw niya noong 1997. Sa kanyang mensahe sa burol ni Bridgeforth, sinabi ni Pangulong Gordon B. Hinckley na si Bridgeforth ay “isang tao ng pananampalataya, isang lalaking malapit sa kanyang mga tao at minahal sila at pinayuhan sila at pinagpala sila at tinulungan sila sa kanilang mga paghihirap, mga problema, mga tanong, mga pagsisikap na maabot ang mga tao sa labas habang naglilingkod sila sa Simbahan. Nanatili siyang isang dakilang pioneer sa panahong ito kung kailan natin binibigyang-pugay ang mga pioneer.” Kabilang sa mga humaliling pangulo sina Darius Gray, Donald Harwell, at Davis Stovall.

Binigyang-diin ng mga pagtitipon ng Genesis Group ang musika, lalo na ang musika ng ebanghelyo, na may malalim na ugnayan sa pamana ng pagsamba at papuri sa Diyos ng mga miyembro ng group sa pamamagitan ng pag-awit sa mga kongregasyong Protestanteng African American bago sila sumapi sa Simbahan. Simula noong 1979, bumuo ang group ng isang koro mula sa mga miyembrong dumalo sa kanilang mga debosyonal. Noong 2016, nilikha ang Debra Bonner Unity Gospel Choir, na kinabibilangan ng ilang miyembro ng Genesis Group choir, at nagsimulang kumanta bawat buwan. Ang mga pagtatanghal mula sa parehong koro ay naging pangunahing bahagi ng pagsamba ng Genesis Group. Sa loob ng 50-taong kasaysayan nito, ginunita ng Genesis Group ang mga kaganapan tulad ng paghahayag noong Hunyo 8, 1978 na nagtapos sa restriksiyon sa priesthood at templo pati na rin ang ika-25 at ika-50 anibersaryo ng group noong 1996 at 2021. Simula nang itatag ito, ang Genesis Group ay nanatiling may pormal na pahintulot mula sa Simbahan bilang isang grupo ng aktibidad at nananatiling nakatuon sa layunin nitong pakikisamahan ang mga Itim na Banal sa mga Huling Araw.

Mga Kaugnay na Paksa: Civil Rights Movement, Restriksyon sa Priesthood at Templo, Pagbubukod ng Lahi