Ungil Mengkar a Sib, Ngelekel a Dios

Rodam me a rodos, ng mla ta el meringel er kau oleiit er a medam me ke melasm el oleko komechur a sib? Me sel lolchesokl aika el sib loleong er a kakine me kau omechur el kmo: 1, 2, 3, … 245, 246, … 657, 658 …

A denguu er ngak, a omechur a sib a diak loitii a medak. Ak bai bekikl lobes el mecherengar malechub eng remiid a chimong, me sei a uchul e ak bai di mekar.

Me ngike el mengkar a sib el buik el ngii a mlo king, e kede melekoi el kmo:

“A Rubak a mengkerengek; meng diak riid.

“Ngii a mechiuiuak er a ungil basio: e ngii omekrael er ngak er bita er a kellechakl el daob.

“Ngii a msisichii a renguk.”

Chelecha el temel a Basqua, e kede oldeu er a Ungil Mngkar a Sib, el ngii a dirrek el Ngelekel a Dios. Aikel rokui el chedaol dui lolab, eng diak a lmuut el ngarbab a belkul. Ng betok a desuub el kirel Osobel el Ngii a kmo Ngungil Mengkar a Sib me a ulaoch el Kirel el kmo Ngelekel a Dios. Aikal el ngerachel me a olangch a mesisiich lolchotel—eng di ng techa ngike lemuut el meduch lolngeseu er a dersta me a dersta el mekreos el ngelekel a sib el uaia ungil mengkar a Sib, e techa lemuut el ungil mengkerenged el uaia Ngelekel a Dios?

Beltkil a rengul a Dios a uchul e nguldureklii a di ta el ngelekel sechal, e ngii el chimong el ngelekel a Dios a uldersii a klengar ngii lolchotel a blekongesenges er ngii el mo er a Demal. A Jesus a melekoi el kmo, “Ngak a ungil mengkar a sib: a ungil mengkar a sib a odersii a klengar ngii el kirel a cheremel sib.” A Jesus a ngarngii a klisichel lodersii a klengar ngii me a dirrek el klsichel lemuut lokisii a klengar ngii. Me ng kaukledem ngii me a Demal, e a Osobeled a omekngeltengat er kid, el Ungil Mengkerenged e dirrek el Ngelekel a Dios.

Me ngii el Ungil Mengkerenged, e a Jesus Kristo omekedong a cheremel sib lokiu oto er a ngerel me a Ngklel. Ngii osiik e mengidb er a kid. Ngii olisechakl el kmo ng mekera dolngeseu loba beltikereng. Me domtab aika el kldei el tekoi, lomuchel er Ngii sel lomekedong er kid lokiu a oto er a ngerel me a Ngklel.

A kot, a ungil Mengkar a Sib a “omekedong a cheremel sib lokiu a ngklir. … Tir a medengelii oto er a ngerel.” E “okiu a ngklel e ngii omekedong er kau, el ngii a ngklel a Kristo.” Me sel le blak a rengud losiik el mo oltirakl er a Jesus Kristo, e a chedaol ulkerael a mei el bo doruul a ungil, e oubeltikereng el mo er a Dios, e mesiou er Ngii. Me sel dosuub, e dolbedebek, e dengara nglunguuch; me sel deblechoel lomekbeches a telbiled er a sacrament me a templo; e dirrek sel desiotai er a rokui el chad el mei er a ebangkelio er Ngii e loruul chedaol ruoll, e kid oltirakl er a Okedongel.

Chelechal taem, e a President Russell M. Nelson a mellach er kid el mo omekedong er a mla moluut el Ikelesia loba ngakl el Jesus Kristo a ulechotii el ngii a; Ikelesia er a Jesus Kristo er a Uriul-klebesei el Santo. A Rubak a millekoi el kmo, “Ngii di el ngera el moruul, a omoruul el ngara ngklek;a leuaisei e ko momekedong er a ikelesia el ngara ngklek; e omekedong er a Chedam el ngara ngklek me bo lomekngeltengat er a ikelesia el kirek.” Meliuekl er a beluulechad, ra elsel a rengud ma re keblid, e kede omekedong er a ngklel a Demad e loba ngklel a Jesus Kristo. Kede dmeu a rengud el kirel a bokokeuii el klengeltengat ra re keblid el mats, er a omenguul ra Ikelesia, omesubel a ebangkelio, ma ungil tekingel a reng er a telungalk.

Ongerung, a Ungil Mengkerenged osiik e mengidb er kid el mo tang Lobengkel. Ngii oker, “Omko a ta er kemiu, olab a dart el sib, e a ta er ngii a remiid, eng diak el bechei a oketiu me a kltiu er a ked, e bo losiik er ngike el chimong el ririid, el dimerekmo le betik er ngii?”

A Osobeled a blechoel losiik er ngike el chimong me tirkel oketiu me a kltiu, er a osisiu el taem. Me sel doldingel, e kede dirrek el melatk er tirkel oketiu me a kltiu el tir a mesisiich e diak el mesim, me a dirrek lomeletked er ngike el chimong el ngii a mla touchakl. A rubak osiik e oltobed er kid er a “chelsel a bek el basio,””er a ikel kleua el saus er a beluulechad.” Ngii a mengidb er kid lokiu chedaol telbiil me a tngakireng er Ngii.

A Osobeled a dilu er a rultirakl er Ngii er a Chuodel Renged el kmo, “A bebil er a cheremek el sib el tir a diak le ngara tiang.” E a kuk Beluu er a Merikel, e mla mekiis er a kodall el Rubak a millekoi el mo er a rengelekel a Lehi er a telbiil el kmo, “Kemiu a cheremek el sib.” E a Jesus a dilu el kmo ng dirk ngarngii a bebil er a cheremel sib el bo lomes er tir. Ng meral klengeltengat a Babier er a Mormon el tara sioning el kirel a Jesus Kristo!

A Jesus Kristo a siotai er a Ikelesia el mo megemedaol er a rokui el tir a rongesii a Ngerel e oltirakl a llechul. A osischeklel a Kristo a uldimukl er ngii a techolbechelid er a ralm me a ngau me a Chedaol Reng. A Nephi oker, “A Ngelekel a Dios, el ngii chedaol el diak a kngtil, e mlo metecholb er a ralm, el mo otirakl a rokui el llach, E kid, el diak dechedaol, el chad, a bai lemuut el kmal lousbech el mo metecholb, er a ralm!”

Chelechal sils e sel kmal soal osobeled a kmo aikel doruul me sel ngii a soad el mo er ngii a mo siotai er a rebebil el mei e oltirakl er ngii. Mei e betik er a beltikereng, omekungil, kltalreng, me a telbiil Lobengkel, er a chelsel a chedaol templo er a Dios, el ngii a chedaol ruoll el kirel a mo suobel a sebechel lomekngeltengat a bek el telcheroll er a telungalek, el ngii a mengedibel er a Israel er a ikal eru el beluu.

Ongedei, e Ngii el Mengkerengel a Israel,” e a Jesus Kristo a okesiul a kmo ng mekera remengkerengel a Israel a loldingel loba beltikereng. A Rubak a loker el kmo ng betik a rengud er Ngii, el uai sel keril el mo er a Simon Peter, e a belkul a tekingel Osobel a kmo: “Momeka cheremek el sib. … Momeka cheremek el sib. … Momeka cheremek el sib.” A Rubak a mla yaksok el kmo sel sekum a Remengkerengel a omeka Cheremel sib, e tirkel Lobengkel a “mo diak el medakt, diak bol mekngit a rengrir, me a diak bo lolngesonges er a ngerang.”

A Ungil Mengkerenged omeklatk el kmo a remengkerengel a Israel a diak el kirir el di chelellakl, me a diak lomriid malechub el uchul e a ikal sib a mo er cheroid, malechub e kuk di dolatk losiik a mo klungioled. A Rungil Mengkar a Sib a melisiich, omekungil, e mesmechokl a telemall, e lmuut el mo mengidb er tirkel cheridang, e osiik er tirkel mla remiid.

A Rubak a dirrek lulmeklatk el kirir tirkel, tir a diak lomekerreu a cheremel sib,” me a “rebulak el profet, el tir a me duum er kau el bleiull er a bilel a sib, eng di te mekngit el chad el uaia wolf.

A Ungil Mengkerel a Sib a ngara deureng sel demeduch el di kid el melilt loba ungil moktek me a klaumerang. Tirkel cheldull er Ngii a omes er a Kristo loba omereng el saul el kirel a tngakireng er Ngii. Kede tibir el mo oltirakl er Ngii, el diak demorimel, me a diak decheuiko, me a diak “demerur,” kede bai oba blakereng el mo betik a rengud er a Dios me a tonari er kid, el mo kaingeseu er a chelngelel a ta me a tang e mo ngara deureng lobengkel a ta me a tang. A Kristo a ultireklii a rubak, meke de mo mengull e oltirakl er a ngklel. Ked emo tmak eh meruul er a urerel el loldak e olisechakl er a rokui el rengelekel a Dios.

Rodam me a rodos, a Jesus Kristo a ngii a Cherrungel el Mengkerenged. Le ngii el mlo odersii a klengar ngii el kired, e a Jesus Kristo a dirrek el cherrungel el ngelekel a Dios.

A tngakireng er a Ngelekel a Dios a mlulaoch er a uchelel. A anghel a dilu er a Adam el kmo a uldersel a “uaia uldersel a Chimong el Betik er a Rengul a Chedam,” el ngii a ngoikid el mo er a “ouchelreng e mo omekedong er a ngklel a Dios lokiu a ngklel a Ngalek er chelechal mo cherechar.”

A Demad er a Abraham, el ngii a tilketekii a klengeltengat lokiu a telbiil el mo er a bek el beluu er a beluulechad, e mlo medengelii a belkul a uldersel a chimo el ngelekel sechal.

“Me a Isak a milngedecheduch er a demal er a Abraham, el kmo, Chedam: eng ulnger el kmo, Ngak tiang, e rungalek. Me ng dilu el kmo, tia ngau me a idungel a ngarngii: eng di ngar ker a ngelekel a sib el mo uldars …?

“Me a Abraham a dilu el kmo, Rungalek, a Dios a di ngii el mochotii a ngelekel a sib.”

A reapostol me a reprofet a milsang e mlo ngara deureng er a mlocholt er a uchelel el urerel a Ngelekel a Dios. A Johanes er a Chuodel Beluulechad mea Nephi er a Beches el Beluulechad a ulemlaoch el kirel a “Ngelekel a Dios”choi, Ngelekel a Diak a Ulebengelel Chedam[,] … Osobelel a beluulechad.”

A Abidani a ulemlaoch el kirel a tngakireng er a Jesus Kristo: “Kid el rokui, a uaia a sib, el di mla meterakl; el bek el chad a mla mo meruul er sel soal; e a Rubak a mla chemol a [telmelled] el rokui.” A Alma omekedong er tial klou e ulebongel el tngakireng er a Ngelekel a Dios el kmo “ng chimo el tekoi el kot el klou a ultutelel er a rokui el tekoi.” A Alma mengelechel el kmo, “bo multuil er a klaumerang er a Ngelekel a Dios”; “e mei e lak ko medakt.”

A ta er a kmal sechelik a ulechais el kmo ng milkera e nguu a klaumera er ngii er a Tngakireng er a Jesus Kristo. Ng milkeroul loumerang el kmo a klengit a blechoel loberaod a kelebsengel, el kid a uchul. Ngullengit el mo er a Dios me bo lodengelii a chedaol klausubes. Ng milluluuch el mo medengei el kmo ng mekera Jesus Kristo a lousubes er tirkel louchel a rengrir, ng mekerang e a chubechub a sumechii a llemalt.

A ta er a klebesei e a nglunguchel a mlonger lokiu a kmal chedaol teletael. A tal kmal meselsel chad a rirurt el tuobed er a stouang el cheltekill a teblo el tutuu el ngarngii a kall. Ng rirurt el tuobed er a rael, e a oungerachel er a stouang okiuellel loltoir ngii, e mildechemii e mocha tmaut loldiu e oldechelakl er ngii. Me ng dimlak lomdasou a mekngit el kirel ngika el medekta el ngeasek el chad el uai a le merechorech, e ngika el sechelik a mocha omelchesiu el mui er a chubechub el kirel. Dimlak le medakt malechub lomdasu el kirel, eng milrael bedul tirkal terul rubak el kaumondai. Ng dula er tirkal teru el chad el kmo, “msall ek harau aika el kall. A kulengit e becherei me lorael. E kulengit me kharau aika el kall.”

Me ngulkiu odbechel Chedaol Reng me a mui el beltikereng el dirkak a ta me lomelchesiu el uaisei, e ngika el sechelik a dilu el kmo, “Ng di mle soak el ngoseuir e osebelii ngika el ngeasek el chad.” Ngika el sechelik a dilu el kmo ng mocha medengelii a Jesus Kristo me a Tngakireng er Ngii—el kmo ng mekerang e ngera uchul e a Jesus Kristo lokiu a klikiid e cherrungel el beltikereng eng kongei el mo Osobelel, e ngera uchul meng soal Ngii a bo leuaisei.

Sei a uchul e kede mengitakl el kmo:

Me ngii el Ngelekel a Dios, e a Osobeled a medengei sel desabisi, demechitechut, rrau a rengud, malechub e demedakt. Chelsel chedaol ues, e a Nephi a milsa klisichel a Ngelekel a Dios “[el mle riou] el mo er a resanto er a Ikelesia er a Ngelekel a Dios, me a re mla soiseb er a telbiil el chedal a Rubak.” Meng uaiseie “le berberiid er a beluulechad el rokir …eng di tir a bleiull er a llemalt e oba ngarbab el klebkellel a klisichel a Dios.”

Tial yaksok er a urunguled me a ongelaod a uldimukl er kid er chelechal sils.

Kau ke locha di kau el tang el chedal a Ikelesia er a chelsel a telungalek er kau, chelsel a skulem, urerem, malechub a basio el mkiei er ngii? A lebebil er a taem e a branch el mngarngii ng uaia lekekerei malechub eng ileakl el ko er a cheroid? Ke mla melukl el mo er a ta er a basio, el locha diak modengei a teko er ngii malechub eng siukang er ngii? A teletael er a klengar kau a locha mla mengodech me a tekoi el dimlak momdasou el kmo ng sebechel duubech a ngar medam er chelechang? A Osobel a mla meketeklii el me rekid , ra ngidil teletael ra klechad el dulsiseb er ngii, kid el rokui, el ua ikel tekingel a Isaia:: “Ngii a mo ngmai chimal mengedibel er a rengelekel, e ngoiteterir el mo er ngii, e mo omekrael er tirkel lobeteterir a remekekerei.”

Rodam me a rodos, a Ungil Mengkerengel a Sib a omekedong er kid lokiu a Ngerel me a Ngklel. Ngii osiik, mengidb, e me duum er a rechedal. Ngokiu a ngar el profet er Ngii me a dersta me a dersta er kid, e Ngii a siotai er a rokui el mo osiik er a budech, moktek, omekungil, me a deureng er a chelsel a cherrungel el mla moluut el ebangkelio me a Rolel er a telbiil. Ngokiu okesiul, e Ngii olisechakl er a remengkerengel a Israel el mo oldingel loba beltikereng er Ngii.

Me Ngii el Ngelekel a Dios, e a chedaol urerel a mlulaoch er a uchelel me a re apostol me a re profet a ngara deureng el kirel. A Tngakireng er Ngii, el di chimong e diak a ulebengelel, a kmal moktek er a chelsel a uldasou er a deureng e moktek er a blebelel a beluulechad. Ngii a subedid, el diak el iior er a teletael er a klechad el de ngara cheslel, el kmo Ngii a ngoikid el losisebid er a chelsel a Rengul.

Kemiu el rodam me a rodos, bo dosiik el mo ngariou a rengud “loltirakl er a Dios me a Ngelekel,”me a tara klebesei e bol sebechel a ngkled el mo llechukl er a hong er a Ngelekel a Dios,e bo dongitakl a cheliteklel a Ngelekel a Dios,e bo dengara belsoil lobengkel a Ngelekel a Dios.

Ngii el Mengkar a Sib e Ngelekel a Dios, E ng omekedong, Mluut el mei “er a meral llomes … er a [Osebeliu], … [el ngii] a ngarbab e meral mengkerengiu.” Ngii a mla yaksok el kmo “ngokiu a krazia er ngii [e kid] a [sebeched] el mo cherrungel el ngara Kristo.”

Chelechal temel Basqua, e kede odngesii:

“Worthy is the Lamb!”

“Odangel le bo er a Dios me a Ngelekel!”

A kuchais el Kirel, ngkal chereungel el Lungil Mengkar, cherungel el Ngelekel a Dios. Ngii a omekedong er kid ra ngkled—el ngara chedaol el ngklel a Jesus Kristo—amen.