Kristo: Sel LLomes El Kmard er a Ilkolk
Alsekum e ke melchesuar el kmo sel kmard el lolbtelel a klaumerang er kau a kedebengang e a ilkolk a kmedang, e msisichii a rengum. Mongeluolu a telbilem el mora Dios.
A obis er ngak el ngarsel building er a Relief Society a ungil osenged a de ngarngii e lomes er a Templo ra Salt Lake. A bek el kebesengei, e loltirakl er a klok, e a ikel dengki ra rikl er a templo a mo kmard sel kebesengei. Sel templo a mekekokil el kmard e lomekllomes er a rikl er a mado er ngak.
A tara klebesei er tial mlo merek el longerul buil, e a obis er ngak a mle ulis el milkolk er a bol ngelt a sils. Sera kumes er tial mado el mor rikl, ea templo a mle milekolk. Ng direkak el kard a dengki. Ng mle chelelakl. Ng diak el sebechek el mes aikel tebekebok er a templo el ngii a kues er a bek el kebesengi el mla mo melai a rak.
Se er a kumes er a ilkolk el bai ngii a mle kirel ngar ngii a llomes a rirelak el mo ometab el kmo a tara kot el lorechudel el dousbech er ngii meke de mukerool a melemolem el kiei er a bita er se llomes—el Jesus Kristo. Ngii e a uchul a klisiched, ng Llomes e Klengar ra Beluulechad. A lak a mesisiich el roled el mo re Ngii e nguchul e kede mad er a reng. Medengelii tiang, e Diablong a melasm el lomerek a berraod ra beluulechad el kid a chemau. Ng oureor el lomutk er sel llomes el dobang, mengimd er sel rolel, e lorriid er a klisichel, e mechikid me kede ngara ilkolk. A ikal berraod a di ngarngii er tial klengar, engdi Diablong a meringel oureor el meliakl er kid e melekoi er kid el kmo ngdi kid a melchesuar ngii el tekoi.
A bebil er kid a seluched er a ringel.
A kerior sel le berekid, esel sekum a klengar a kmal mo meringel meng kedeb a telid, esel de mla mechelebed eldi ua ngikel chad el mlara rael er a Jericho el eloit el medei, e a Jesus a mei e oiitel a cheluch er a telmeled, e kokuid el mo rebab, e milid, ngoikid el mora blai, e obekid. Me tirkel ngara ringel, e Ngii a melekoi: Ak mo … sumechokl a ikel berraod el mchellungel er a ongelngelem, meng di kau e diak ke mo melchesiu el chellungel, … meke moungil el medengei el kmo Ngak, el Rubak el Dios, a oldingel er a rechedak el sel le ngara ongarm. A Kristo a omekungil a telemall.
A Bebil er Kid a Mla Mo Mesaul.
A Elder Jeffrey R. Holland a dilu el kmo: “Ngdiak el moktek ra kmong kired el lorreched el engelakl ra ngarngii el klisiched. … Engdi [meng] uaisei, e ngak a medengei el kmo … te betok er kemiu a kmal limis el lorreched mesel klisiich ma madedok er a reng a bebil ra taem eng melutk er a mochu bechachau.” Sel sekum a ikel bo doruul a mla meltilech er kid, e de ngeseklid e doker ra Demad er a Babeluades el ngara re ngii a dechoit. A telkib er a blekerdelel a klengar er kid a mesuub ra tekoi el diak ke bo doruul er ngii. Ma leuaisei, sel bebil er a taem ea klengar a omeksaul er kid. A Jesus a menglou a rengud el kmo, “Mei er ngak, kemiu el chellungel a berraod, e kbeskemiu a ulengull.”
A Kristo a soal el mo obengked e olengeseu me bol kebekakl a chelngeled. A Kristo a ulenguul.
A Bebil er Kid a Melchesuar el Diak Dulsiseb er sel Kata er a Klechad.
Leng betok a uchul, me kede melchesuar el diak kede ngara belsachel malechub e kede cheloit. A Beches el Renged a ochotii sel klou el lurerel a Kristo el luruul er ngii el mora re bekbedengir a rechad: a re chebeds, a re melai a tax, a rengalek, a re Kalileans, a re mengol, redil, re Pharisees, re dengerengel, Samaritans, a re melakl el dil, soldau ra Rom, a re meruul a delbois el delengerengel, ma re diak el klikiid. Ngou mesind er a bek el cheldecheduch, e Ngii a osiik er a chad el direkak el kengei er ngii el soiisb er a tekoi ra klechad.
A Lukas 19 a mesaod er a cheldecheduch el kirel a merredel ra omelai el tax ra Jericho el ngklel a Zacchaeus. Ng ngilasech er a kerekar me bol sebechel el mesa Jesus sel belengelakl. Zaccheus a ulureor ra kaberment er a Rom, el mle cheblad e dengerenger er a osengir a rechad. A Jesus a milsang el ngara chetebtel a kerekar e ulekerir, el kmo, “Zacchaeus, morchedau, e bebetengel; le chelechal sils e ak mora blim.” Ma Jesus er a lesang a klungiolel a rengul a Zacchaeus ma ikel tekoi el riruul el mora re bebil, eng kilngei er a ongtil, el kmo, “Tial sils ea osobel a merma er tial blai, le ngii a dirrek el ngelekel a Abraham.”
A Kristo a milkokil e louchais er a re Nephites, “Ak mla kmu er kemiu el kmo ngdiak a ta er kemiu elmo dibus.” A Petrus a ulebang sel mesisiich e locholt el ngara Omerelir 10 sera le dul kmo, “A Dios a mla chotii er ngak el kmo ng kirek el diak kumekedong er a ngidil chad el hutsu malechub eng diak el klikiid.” Ngdiak el mengodech el ngerchelir a re Kristiano ma re Uriul-klebesei el Santo el lolecholt er a meral beltik el reng er a delongelir. A Jesus a oldars er a osisiu el siotaikeng el merekid el Ngii a rirelii el mora Zacchaeus: “Meng uaisei, Ak dechor ra medal a esimer, e melngod: alsekum e[ ke] rongesak, e mekengii a esimer, e Ak kikong er [kau], me ngak.” A Kristo a mesekid el ngara kerkerud.
A Bebil er Kid a Chobuu Kung er a Ker.
Ngdiak el betok el rak er a memong e ak mlo beraod e checherd a renguk er a ker el dimlak betik a nger el kirel. A tara dirke tutau er a Sabadong eng mla rengii a kekerei el berrusek. Elsel tial berrous eng sebechek el mesa kekerei el blai e bleketakl el kmo ng kirek elmo dechor er a chelsel. Ng mla rengii e kleim el balech el meliuekl er a chelsel, engdi a ikel mado a ruul er a bad. Chelsel tial berrous e ak kulmondai, el diak el soak el soiisb er a elsel leng kmal mle kedeb a telik er ngii. Eng ngii a mlei a uldasu er a uldesuek el kmo ngikel lodam er a Jared a mle klou a rengul a melngois a bad el mo klas. A klas a bad el mla mora ureor e mengodech. Sera Rubak er a le rutech a ikel bedul a odam er a Jared, eng kilard er a llomes ra chelsel a ikel milkolk el diall. Mak di mle kiul el mo ourreng el mora chelsel sel kekerei el blai er a ngidil basio. Sei a basio—el di chimol basio—el kirek el meral “mesang.” A ikel ker eldi mengesang er ngak a dimlak el bol cheroid, engdi sel kmard er a chelsel a bteluk sel ker ruriul er a kbekiis: Ke mekerang e mo smisichii a klaumerang er kau, el mo ua odam er a Jared, ma ikel bedum bo lobult elmo llomes?
A ikal btelud a ulebeob el losiik a uldelomel e ulterkokl el klebechel tekoi. Ngdiak kudengei a bek el luchul el kmong ngerang mesel dekedekel a klechad a kmal lokrokl. Tiang a diak el sel terebel er a ukuruled el mo cherechar me dolab a rokui el nger. Tia sel terebel el do mekeroul er a telbiled (malechub a bebil ra taem eng urunguled) er a ikel lulecholt el tekoi el diak el meues. A omenglou el reng a mei e lokiu a betok el rael el diak el beot a domtab, engdi ngar ngii a llomes el ngara chelsel a ilkolk el de seluk er a chelsel. A Jesus a dilu el kmo, “Ngak e a llomes, e klengar, e klemerang er tial beluulechad.” Me tirkel losiik er a klemerang, eng locha sel kot eng kora klebelung el dakt el kirel a mado el ruul er a bad. Engdi ngokiu a klou el reng ma ker loiak a klaumerang, e a Jesus a sebechel el mult a mado er kid ra bad el mo klas ma llomes.A Kristo e a llomes el desang.
A Bebil er Kid a Melchesuar el Diak el Sebeched el mo Ungil.
Sel bekekerkard el chiro ra Mechut el Renged a diak el dil blel mengerngird engdi ng dirrek el mle mesisiich el mamd, el belkul a kmo sel kmard el chiro er ngii sel bereked el morsel mamd eng diak el riid ngii me sel bol betok el mesilk. A Diablong a omrachem er tial tekoi el kora dongu: a becheleleu el chelsechusem el mamd a diak el luut el sebechel el mo becheleleu. Engdi Jesus Kristo a mla kmung, “A rolek a ngarbab er a roliu,” e a ikel longasireng el krasia er Ngii e kmo sel douchel er a kengtid, e a ikel bekerkard el resechel a lmuut el mengikiid er kid. Ngdiak el mutab, engdi ng klemerang.
Siasing el mla er a iStock.com/iinwibisono
“Ma kngtim ng locha bekekerkard, ngmo becheleleu el ua snow; meng mo bekerkard leng merkang, eng dimo ua becheleleu el mamd.” A Rubak a bleketakl el melekoi: ngikel “mla ouchel a klengit, a dirrek el mla mekikiid, e ngak, el Rubak, a mla ousubes.” El belkul: Mei, e dobang a ta el luldasou. Ke mla remuul a mekngit: a rokui el chad a mla reuebet. Mei el me rengak e bo mouchel. Ng mlamo diak kudengelii a kengtim. Ke sebechem elmo cherrungel. Ngar ngii a ureor el kirem el mo meruul. A Kristo a rulii a bsechel a sib el mo becheleleu.
Engdi ngera ikel meral rael? Ngera ikel kiis el lmuut el lomech el morsel klisichel a Jesus Kristo sel sekum e kede oubeteteluut? A President Russell M. Nelson a dilii ra beot el rolel: “Sel luldesuall a kutmokl e mengeluolu a cheledaol el telbiil. … Ngdiak el meringel el rael.” Mrelii a Kristo el moktek er a klengar er kau.
Alsekum e ke melchesuar el kmo sel kmard el lolbtelel a klaumerang er kau a kedebengang e a ilkolk a kmedang, e msisichii a rengum. Mongeluolu a telbilem el mora Dios. Moker a kerim. Bol klou a rengum el tokas a bad el mo klas. Mobult el mo er a Jesus Kristo, el dirk kebtik a rengul er kau.
A Jesus a dilu el kmo, “Ngak a llomes el kmard er a ilkolk, e a ilkolk a diak el lodengelii.” Se belkul a kmong kmal meringel el melasem, e a ilkolk a diak el sebechel el mekodir sel llomes. El diak a rolel. Ke moumerang el kmo Sel llomes er Ngii a di ngar sei el kirem.
Kid, malechub ete rechad el de betik a rengud er tir, a di telkib el mora ilkolk. Mesel dilubech er a Templo ra Salt Lake, e ngkel loungerachel er a ureor, el Brother Val White, a ngiluu a okedong el kmal mle mereched. A rechad a milsang, Ngera telmelel a ikel dengkii er a templo? A kot, a rechad er a ureor a mlora bek el basio ra dengkii ra chelsel a templo e di mle tir el mkard a dengki. E a uriul e te miltechei a ikel baterii er a elsel sel blil a mesil e mle skeng e losiik el kmo ngerang a mlo diak el loureor.
Ng meringel a le dil kau el lomkard a dengki. Kede ousbech er a resechelid. Kede kausisbech. Meng di uai tirkel chad er a ureor ra templo, eng sebeched el kaingeseu el meduum, el lmuut el lokar a baterii er kid er a reng, e sumechokl a mlo cheleuid.
Kede locha di chimol tama er a dengki el ngara kerekar. Engdi kmard sel kekerei el lobteled, e mo dmak rokui, el di uai sel Kurismas er a Temple Square, eng sebeched el ngoititerir a re million el chad el mora blil a Rubak. Esel kot el lungil er ngii, el ua ikel blal dung a President Nelson, ng sebeched el nguu sel llomes er a Osobel el me rekid ma rechad el ngar ngii a ututelir el merkid e lokiu a beot el lomeruul el mengeluolu a telbiled. Meng ngokiu a betok el rael, ea Rubak a ousengk el kirel seikid el lomeruul er a klaumerang loba klisiich ma deurreng.
A kuchais el kau a ngara rengmam. A Rubak a medengei el kmo ke meringel el melasem. Ng ngarngii a ungil el moruul. Molemolem. Ngii a mes a ikel rokui el berrotel el cheloit el temem el ngara ulecherangel el kirem ma ikel lungil mo klungiolir tirkel betik a rengum er tir. A urerem a diak el mechoit. Ngdiak eldi el kau el tang. Sel ngklel, el Emmanuel, a belkul a “Dios lobengked.” Ngii a meral lobengkem.
Mngai a sesei el bakes er sel rael ra telbiil, ngii mesel sal kmal milkolk osengem el mo er cheroid. A llomes a lmuut el mo rengii. A kuchais el kirel a klemerang er a tekingel a Jesus, el ngii a mui er a llomes: “Bem keed er ngak e ngak a mo kmeed er kau; moba blak el reng e losiik er ngak e kemo metik er ngak; molengit, e kemo nguu; molengod, eng ngobok a chesimer el kirem.” Lobang a ngklel a Jesus Kristo, amen.