2010–2019
Momes el Bedul a Jesus Kristo
April 2019 el Klou el Ongdibel
10:55

Momes el Bedul a Kristo

Mla er a Elder Kim B. Clark

Er a Chelchad er a Rukeuid

Alsekum me kede chemau el mo er a Jesus Kristo, e Ngii a mo ngosukid el kiei loltirakl a telbiled e mo melisiich a okedong el dolab el elders er a aIsrael.

A Jesus a mirrael er a rael el bitang er a Capernaum el mle betook a rechad lobengkel, ma redil el meketeketa el smecher el teruich ma eru el rak a rirtechii a rsel a Bilel. Ng dimle mereched elmo ungil.

A chedaol llechukl a kmo a Jesus, a mlomedengei el kmo “ngarngii a [klisiich] el mle tuobed er [Ngii],” meng mle “obult lomes er tial seked” e “ulemes er ngii … el redil el rirtechii a bilel.” “Ngkal redil er a bolodengei el kmo ng diak lobart,” eng mlo “meterob er medal, e uluchais er ngii a klemerang.”

A Jesus a dilu er ngii el kmo, “Rungalek, bo lungil a rengum: a klaumerang er kau a mla rullau el mo ungil; morael el ngara budech.”

A Jesus Kristo a ulsebelii ngkal redil. Ng mlo ungil a bedengel, eng di a Jesus er a lobult lomes er ngii, e ngii a mle ouchais er a klaumerang er ngii er Ngii me Ngii a ulemekungil er a rengul. Ng milngedecheduch er ngii loba beltikereng, e Ngii a kilengei er ngii, e mle omekngeltengat er ngii loba budech er Ngii.

Rodam, kid loba chedaol priesthood, e kid oureor el kirel olsobel. Tial mlomerek el rak e a Rubak a ngiluu a ngerachel er tial ureor el mesterir a re elders er a Israel. Kid obang chedaol oderuchel er a Rubak loureor lobengterir a rodos er kid, eng kired loldingel er a chedaol teletael, e orchedii omengidb er a Israel er a ikal eru el beluu, e remuul a rekleblid el mo sebecheklel a klaumerang me a omesubel ebangkelio, e mengedmokl er a beluulechad el kirel Ongeru Lemei a Jesus Kristo.

Ng uaia bek el tekoi, el Osobel a mla ochotii a rael er kid: ng kired el osiik e mesiou er a Jesus Kristo el uai Ngii e ra losiik e losiou er a Demal. A Osobel a dilii er tiakid el teletael el mora Profet Joseph:

“Momes er ngak er a bek luldasou; lak moumededenger, lak ko medakt.

“Momes a telemall el ngara kekengek, me a llechul a deel el ngara chimak me a ochik; di moumerang, moltirakl a llechuk, e komo nguu a rengedel a babeluades.”

Sel klengar ruchei e a Jesus a tilbir el mo er a Chedam el Ngii a mo meruul a soal a Demal e mo Osobeled e Olsobel er kid. A Demal er sera loker, “Ng techang a kudureklii?” A Jesus a ulenger:

“Ngak tiang, modureklak.”

“Chedam, sel soam bol motirakl, me a klebkall lekor kau el mo cherechar.”

Sel klengar ngii er a beluuelchad el rokir e a Jesus a mle oltirakl er tial telbiil. Ng mle oba ngariou el reng, medemdemk el reng, me a beltikereng e Ngii a mle olisechakl a osischeklel a Demal e miruul a urerel a Demal loba klisiich me a ngerachel el Demal a ulterkokl er ngii.

A Jesus a ngiluu a rengul el msang a Demal. Ng millekoi:

“Betik a renguk er a Chedam.”

Ak blechoel meruul aikel el ngii a soal.”

“Ak mlei … el diak kuruul a soak, ak bai meruul a soal a [Chedam] el luldureklak.”

Ng mlara ringel er a Gethsemane e Ngii a miluluuch, “Ng diak el sel soak, ng bai sel soam bol mekedmokl.”

A Rubak sel lomekedong er a re elders er a Israel el mo“omes er ngak er a bek el uldasou” e “momes a telemall” er a mla mekiis er a kodall el Bedengel, eng okedong el mo cheroid er a klengit me a beluulechad e obult el mo er Ngii e oubeltikereng e mengull er Ngii. Ng okedong el mo olisechakl a Osischeklel e meruul a Urerel el lokiu sel Teletelel. A le uasiei, eng okedong, el mo mui el oumerang er Ngii, e momechei a soad e nguu a rengud el mo er Ngii, e okiu a Klisichel lolsobel eng sebeched el mo uai Ngii.

Rodam, omko kid omes er a Jesus Kristo e Ngii a mo omekngeltengat er kid el mo elders er Ngii er a Israel el ngariou a rengud, medemdemk, kongei, e mui er a beltikereng er Ngii. E kid a mo nguu a deureng me a klengeltengat e ra ebangkelio er Ngii me a Ikelesia er Ngii el mora telungalek er kid me a rodam me a rodos er kid el ngara ikal eru el beluu.

A President Russell M. Nelson a mla mekodongid el lomes el bedul a Jesus Kristo e lokiu tiakid el rael: “Ngdiak a ngidil tekoi el beot malechub eng mereched el kirel a mo uai e a mesisiich el chedal. A moktek er kid a kirel bereked er a Osobel me a ebangkelio er Ngii. Ng kmal meringel a dolasm el di omes el bedul Ngii er a bek el uldasou. Ng di sel bodeuaisei, e a rraureng me a dekted a remiid.”

A bereked a ungil tekoi. Ng belkul a kmo kede mesisiich el bereked, el mui el urrekodel er ngii. Kede mreked a moktek er kid er a Jesus Kristo me a ebangkelio er Ngii sel doltirakl a telbiled.

Sel doltirakl a telbiled, eng omekrael a dolekoi me a doruul tekoi. Kid a kiei er a klengar er a telbiil el mui er a beot, el omeruul er a bek el sils el melutk el bedul a Jesus Kirsto: ngara reng el nglunguuch el ngara Ngklel , mesuub a Tekingel, e obult el mo er Ngii, e ouchel a rengud er a kngtid, oltirakl a Llechul, melai er a sakrament e mengull er a Chedaol sils er Ngii e blechoel ngara omengull er a chedaol templo er Ngii , e meruul a urerel a chedaol priesthood er Ngii el mesiou er a rengelekel a Dios.

Aikal omeruul er a telbiil a mok a rengud me a uldesued el kirel a klisichel Osobel me a mengikiid el odbechel Chedaol reng. Meng dersesei e a Osobel a melodech a teleteled, e kid a mo mui el lobult el mo er Ngii me a telbiled a mo ngarngii a ultutelel er a klengar kid.

A telibiil el deruul el mora Demad er a Babeluades a mo otil a blakereng er kid me a dmolech el klemeriar reng. A telbiil er a Chedam er a Babeluades el mer kid a meskid omereng el saul me a deureng. A telbiled a mo diak llach el doltirakl ng bai mo osisechakl el omekrael e omult er kid el mora Jesus Kristo.

A omeruul er a blakereng a mora rokui el chad, mekekerei me a remeklou. Kemiu el ngeasek el chad loba chedaol Aaronic Priesthood, a rokui el blak dung er chelechal kesus a tekoi lekor kemiu. Ak mereng a sulel a Dios el kiriu. Ko meruul a chedaol ruoll m ea telbiil el kirir a remilion el Uriul-klebesei el Santo er a bek el sandei. Sel mongedmokl, omekngeltengat, e morous er a sacrament; oldingel, meruul a techlbechelid er a templo; msiotai er a sechelim el mei ra omilil; malechub e kosiik er a chedal a chelechad er kau, e kau a meruul a urerel a mo suobel. Ng sebechem lomes el bedul a Jesus Kristo e kiei loltirakl a telbilem er a bek el sandei. Ak yaksok el kmo sel bom uaisei, e ko mo ungil mesiungel a Rubak er chelechang, me a merael mei el sils, el mesisiich el elder er a Israel.

Rodam, ak medengei el uase aikal rokui a kora kmal meringel. A kulengit e molbedebek a ikal tekingel a Osobel: “Ng diak di el ngak el tang le Chedam a obengkek.” Meng osisiu el mer kid. Ng diak dil kid el tang. A Rubak el Jesus Kristo me a Demad er a Babeluades a betik a rengrir erkid e Tir a obengked. Le Jesus a ullemes er a Demal e kildmeklii a klou el tnagkireng e kid a sebeched lomes el bedul a Jesus Kristo el medengei el uase Ngii a mo ngosukid.

Ng diak a ta er kid el cherrunggel. Bebeil er taem eng mo diak el sebeched. Kede mo mechesang e mo mesaul a rengud. Kede mesesibas. Alsekum e kid omes er a Jesus Kristo loba ouchel reng e Ngii a mo sobecheklid, e mengikiid er kid er a kengtid, ousubes er kid, e omekungil a rengud. Ngii a klou a rengul e bekokeuii; a beltikereng er Ngii a diak el ngemed e diak el riid. Ngii a ngosukid lotirakl a telbiled e meruul a ngercheled el elders er a Israel.

A Chedam a mo omekgeltengat er kid er a rokui el dousbech el mo mengedmokl er a moktek er Ngii: “tekoi … el ngara eanged me a chutem, klengar me a llomes, Reng me a klisiich, el modurokl lokiu sel soal a Chedam loeak a Jesus Kristo, el Ngelekel.”

A chedaol llomes me a klisiich sel siseb er a rengud ea keldei el ongasireng el tekoi a duubech:

A kot, eng sebeched lomes! Ngokiu chedaol ocholt e kid omuchel lomes el uaia Jesus er a lomes er ngike el redil: ngulmes er a chelsel a rengul. Sel domes el uaia Jesus a lomes, e Ngii omekngeltengat er kid el mo oubeltikereng er tirkel dosiou er tir loba beltikereng er Ngii. Ngokiu tiaikid el ngesou, e tirkel dosiou er tir a mo mesa Osobel e melchesuar a beltikereng er Ngii.

Ongerung, kid oba klisiich er a priesthood! Kid oba ngerachel me a klisiich loureor el ngara ngklel a Jesus Kristo el mo “omekngeltengat, omekrael, omecheliu, melisiich, e omekungil er a rebebil e mo uchul ongasireng el mo er tirkel [tir] a betik a rengud er tir e mesebechakl a [chebechiled me a telungalek er kid.

Ongedei, a Jesus Kristo obengked! Sel deborngii, a leborngii. Sel dolisechakl, me Ngii me ngolisechakl. Sel dongelaod, me Ngii meng mengelaod. Sel domekngeltengat, me Ngii me ngomekngeltengat.

Rodam, ng diak el klou a uchul e de ngara deureng? Ng uaisei! Kid oba chedaol priesthood er a Dios. Mesel domes el bedul a Jesus Kristo, e doltirakl a telbiled, e breked osenged el mo er Ngii, e kid a mo teloi er a Rodos er kid e oldingel er a chelsel a chedaol teletael, el mengidb er a beriid el Israel er a ikal eru el beluu, e melisiich e omak a telungalek, e mengedmokl er a beluulechad el kirel Ongeru Lemei a Rubak el Jesus Kristo. Ngmo duubech el uaisei. A kuuchais.

Ak mengesimer loba nglunguuch el ngara renguk, me kid el rokui, bek el chad, bo domes er a Jesus Kristo er a bek el uldesued. Lak moumededenger. Lak ko medakt. Lobang a ngklel a Jesus Kristo, amen.

Uleklatk

  1. James E. Talmage a loiia siasing er a Jesus “el ngara Capernaum” lomekungil (mesa Jesus Kristo [1916], 313).

  2. Mesa Lukas 8:43–44; dirrek el mesa Mateus 9:20–21; Markus 5:25–29.

  3. Lukas 8:46.

  4. Markus 5:30.

  5. Markus 5:32.

  6. Lukas 8:47.

  7. Markus 5:33.

  8. Lukas 8:48.

  9. James E. Talmage a milluches el kmo sel klou a ultutelel el mora redil sel lomekungil a bedengel el ngii el Osobel a milsang sel soal a rengul, me a klaumerang er ngii e Ngii kilengei er ngii. (mesa Jesus Kristo, 318). A Jesus a mle omekungil a bedengel me a rengul e milkengii a chesimer el kirel osebelel.

  10. Ng suobel el Jairus, el merredel er a ikelesia, a ulebengkel a Jesus er sera ldubech tial omekungil. A Jesus a mlara omerollel el mora blil a Jairus el mo olekiis er a ngelekel a Jairus el redil er a kodall. Ngkal redil el Jesus a mlo mekungil a locha mlodik er a chelsel a ikelesia el tial secherel a uchul. A Jesus er sera bol lomekungil , eng dirrek el milketeklii el mora rokui el chad el mlarngii, luldimukl ra Jairus, el kmo ngkal redil a betik er a rengul, el mui er a klaumerang, e cherrungel a bedengel me a rengul.

  11. Mesa D. Todd Christofferson, “The Elders Quorum” (Liahona, May 2018, 55–58) er a omesodel a teletelel a a chimol chelhad er a Melchizedek Priesthood er a chelsel a ward. A moktek er tial ngeldechel a mesaod er sel Frequently Asked Questions er a Ministering website: “A chimol chelechad er a Melchizedek Priesthood er a ward a oldak er a roba priesthood el mo kudmokl a rokui el urerel a mo suobel, luldimukl er a ureor er a templo me a reksi er a telungalek el ngii a di bla loungerachel a merredel er a chelechad er a rengarbab el prist” (“This Is Ministering: Frequently Asked Questions,” question 8, ministering.ChurchofJesusChrist.org).

    A bebil er a teletael a mla mesa ngerachel a ward mission leader me a beches loungerachel a templo me a reksi er a telungalek er a ward el ngara cheungel a derider er a presidency er a chelechad er a re elders. Ma odingel el mora telungalek el ngara cheungir, e a ikal ngeldechel a mla nguu a ureor er a olsobel el mesterir a re ngara chelechad er a re elders. Ng uaisei, a bisop oba kiis er a ureor er a olsobel er a ward, eng di ngii a ngmai a ngerachel el msa merredel er chelechad er a re elders me bol sebechel a bisop lobengkel a telungalek er ngii, melisiich er a rengeasek, e mesiou el merritel er a Israel.

  12. Mesa Russell M. Nelson, “Let Us All Press On,” Liahona, May 2018, 118–19; Russell M. Nelson, “Becoming Exemplary Latter-day Saints,” Liahona, Nov. 2018, 113–14; Quentin L. Cook, “Deep and Lasting Conversion to Heavenly Father and the Lord Jesus Christ,” Liahona, Nov. 2018, 8–12.

  13. A Chedam a uldureklii a Jesus Kristo el mei er a beluulechad (mesa Johanes 17:18).

  14. Doctrine and Covenants 6:36–37.

  15. Abraham 3:27.

  16. Abraham 3:27.

  17. Moses 4:2.

  18. Ng kmal betok a bades er a chedaol llechukl el mesaod a tekoi el Jesus a dilung el kirel a meruul a urerel a Demal e olisechakl osischeklel a Demal. Mesa, ua okesiul, Johanes 5:19 (A Jesus a meruul el eldi sel lomes e ra Demad sel loruul); Johanes 5:36 (a Demad a milsang a Ngelekel a ureor el bo loruul); Johanes 8:26 (Jesus a ulsisechakl a ikel Ngii a ngilai e ra Demal); Johanes 14:28 (Jesus a milketeklii, “A Demak a ngarbab er ngak”); 3 Nephi 11:32 (A lechul e a lechul a Demal el bilsang).

  19. Johanes 14:31.

  20. Johanes 8:29.

  21. Johanes 6:38; dirrek el mesa Johanes 5:30.

  22. Lukas 22:42.

  23. A tekoi el lomes (mesa Doctrine and Covenants 6:36–37) er tial bades a ngarngii a belkul el melutk e ra okedongel a Rubak: el mo chemau (malechub ngobult); el nguu osengel a chad; mo ultuil er ngii; osiik er ngii’ mengiil loba urungulel; lomes er a rsel; mo olsingch malechub eng mengiil (mesa merriam-webster.com, “look”).

  24. Mesa Doctrine and Covenants 121:41–42. A blekerdelel a Kristo el ngara chedaol llechukl a sengk e ra Reng el mei lokiu a chubechub me a krazia er a Jesus Kristo. Aikakid a teletelir a re elders er a Israel el elders er Ngii.

  25. Russell M. Nelson, “Drawing the Power of Jesus Christ into Our Lives,” Liahona, May 2017, 41.

  26. Mesa merriam-webster.com, “rivet.”

  27. A omesodel a suobel er a telbiil er a klengar, e mesa Donald L. Hallstrom, “Living a Covenant Life,” Ensign, June 2013, 46–49. Tial cheldecheduch a mlengai e ra kemanget el cheldecheduch el mildung er a Brigham Young University–Idaho May er a 2011. For the longer version, mesa Donald L. Hallstrom, “A Covenant Life” (Brigham Young University–Idaho devotional, May 10, 2011), byui.edu.

  28. Mesa Jeremiah 31:31–33, el Rubak a dilu el kmo Ngii a mo kudmeklii a beches el telbiil lobengkel a blai er a Israel el mo llechukl er a chelsel a rengrir. Tial telbiil el llechukl er a rengud, malechub eng telbiil el mo mesiiisch er a chelsel a rengud, a dirrek el debetik er ngii er a tekingel a Paulus (mesa 2 Korint 3:3; Hebru 8:10. A lmuut el omesodel a bult me a reng, e mesa David A. Bednar, “Converted unto the Lord,” Liahona, Nov. 2012, 106–9.

  29. A nglunguuch er a sacrament er a blauang a ochotii a klebokel el teletelel a deleuill er a telbiled lobengkel a Demad er a Babeluades. Chelsel a moktek er a Chedam er a mo suobel e kid a tibir lobengkel a Chedam er a Babeludes, eng di a moktek er a telbiil a bo dodengei e mo sebeched el ngmai a klengeltengat lokiu a Rubak el Jesus Kristo; Ngii a Didelbai er kid. Chesel chedaol ruoll er a sacrament e kid a sioning el mora Chedam (a me er ngii el omekbeches a telbiled) el kmo kid a kongei el mo nguu a ngklel a Jesus Kristo, e blechoel melbedebek er Ngii, e oltirakl a Llechul, me a Reng er Ngii(Chedaol Reng) bol blechoel lobengked.

    A sengk er a yaksok er a Chedam a mei lokiu a osebeled e melisiich el klisichel a Jesus Kristo. Okesiul tiang, a President Russell M. Nelson a ulsiechakl, a Jesus Kristo a uchul a rokui el deureng (mesa “Joy and Spiritual Survival,” Liahona, Nov. 2016, 82). Seikid, sel denguu a moktek er kid el bedul a Jesus Kristo e kede mo metik er a deureng er a klengar kid el diak el iior er a teletael el kid a ngar chelsel.

  30. A President Ezra Taft Benson a dillii a klou el utebangll el tekoi el kirel tial blekeradel er sera ldung el kmo, “A blekongesenges sel bolak el seselk a rengud er ngii e bai bodosiik er ngii, e seikid el taem e a Dios a meskid a klisiich” (er a Donald L. Staheli, “Obedience—Life’s Great Challenge,” Ensign, May 1998, 82).

  31. Johanes 16:32.

  32. A lmuut el bebil e ra omesodel el kirel a uldesuel a Chedam me a Ngalek el kired, me a uldesuir, el kirel a beltikereng, me a urerir er a klengar kid, e mesa Jeffrey R. Holland, “The Grandeur of God,” Liahona, Nov. 2003, 70–73; Henry B. Eyring, “Walk with Me,” Liahona, May 2017, 82–85. See also Mateus 18:20; 28:20; Doctrine and Covenants 6:32; 29:5; 38:7; 61:36; 84:88.

  33. Mesa Rom 8:35–39; 1 Korinth 13:1–8; Moroni 7:46–47.

  34. Doctrine and Covenants 50:27. Metebngii el kmo a Rubak a odars elmo er tirkel mla mechedaol e odureklii tiakid el telbiil el kirel a, e ulterkokl el kirel, sel telutke el lureor el bo loruul er ngii:

    “E osisiu el kirel ngkel mo kot el ngarbab, el diak a odeuir el kmo ngii e a kot el ngariou el sibrir a rokui el chad.

    “A leuasiei, e ngii olab a rokui el tekoi; le rokui el tekoi a kloklel, a ngara eanged me a chutem, el klengar e llomes, e Reng e klisiich, e modurokl loba uldesuel a Chedam lokiu a Ngelekel, e ra Jesus Kristo.

    “Ng diak a chad el medengei a rokui el tekoi a lak el klikiid el cheroid er a rokui el mekngit.

    “Alsekum e kom klikiid er a rokui el klengit, eng sebechiu lolengit a ngii di el ngerang el ngara ngklel a Jesus eng mo uaisei.” (Doctrine and Covenants 50:26–29).

  35. Mesa 1 Samuel 16:7; 1 Korinth 2:14. A okesiul tial lomes el uaia Jesus a lomes, e mesa cheldechedechal a President Henry B. Eyring er a lebisop e ra ngeasek el chad el tilmelii a telemall. A Rubak a dilu er a Bisop Eyring er sel taem el kmo, “Ak mechikau me komes er ngii el uai Ngak sel kumes er ngii”(“Walk with Me,” 84).

  36. Tiaikid a yaksok e ngerachel el Osobel a ngiluu el mesterir tirkel chad el mle kldibel er a templo er a Bountiful. Ngii a dilu er tir me bol kiei loba Llomes er Ngii m ea Okesiul bo lobang, me tir bo lodersii el llomes el mo er a beluulechad er a klengar tir me a dirrek el ongterir el mo er a rebebil el mei er Ngii. Kid el kiei e mla mongit el mo oltirakl er Ngii, me a rebebil a mo, melchesuar e Mesang er a Remesiungel a Rubak. (Mesa 3 Nephi 18:24–25.)

  37. Mesa Russell M. Nelson, “The Price of Priesthood Power,” Liahona, May 2016, 68.

  38. Mesa Doctrine and Covenants 84:88.