Ng klemerang, klikiid, e beot el ebangekelio er a Jesus Kristo.
Diak el uaia ikel mla momerek el okedong, el ngii a mle medechel a ngarmedad el mengubt, ser ak mengubt er tial okedong er ngak er a teruich me a erung a diak el lungil el omelilt er chelechang; eng di, ak meluluch er sel sils a mei sel bokmerek aikel rokui el ngii a Rubak a omekdong er ngak el mo Meryl.
Rodam me a Rodos er ngak, ng meringel er ngak el mo oumerang el kmo ng mle 71 rak el mla memong, er a 1948, el ngak a mle missionary er a England e a 44 el rak er a mla memong e a bechik, Barbara, me ngak a ngilteterir a telungalek er kemam el mo er a Canada se er ak blek president er a Canada Toronto Mission. Ser a kumesiou er sei er a April 1976, ak mlo mekedong el mo er a kot er a chelechad er a Seventy, e klaischembrungel er a 1985, ak mlo mekedong el mo er a Chelechad er a teruich ma erung. Diak el uaike el mla momerek el okedong, el ngii a oldimukl er a omelubt, sel omengubt er a okedong er ngak er a teruich me a erung a diak el lungil el omelilt er a chelechang; eng di, ak meluluch er sel sils sel mei sel bok merek el meruul aikel rokui el ngii a Rubak a omekedong er ngak el mo meruul.
Sel kumedasu er aikel 43 el rak er a omesiou el General Authority me a techal al blak ngai el olsisechakl er a rengelkel a Demad er a Babeluades, ak mla mo mui el me lechesuar el Ngii a soal a Rengelkel el mo metik a budech, deureng, me a deureng er a klengar er tir.
A prophet Lehi a ulsisechakl, “Sechal [me a Redil] a, me tira mo nguu a deureng.” Ng betok a uchul e a budech, deurreng, me a deurreng a chemiis er kid er tial klengar, uldimukl er a chelbul, mekemad, kereomel, ulekerriul er bedenged, me a deluill er a telungalek.
Eng di kid a diak el sebeched el orreked aikel merail el mei el oldermerem el ngii a ngodechii a klengar kid er tial beluulechad, me sel dolasem el mo uaia blakelreng el oltiarkl er Rubak el Jesus Kristo, ng sebeched el metik a budech, deurreng, e diak el ior er a mondai er a beluulechad el meliukel er kid.
Ta er a rengelkek a mle tal lolekoi, “Chedam, ak melbedebk el omko ngak a sebechek el rulii.” Mak dilung, “A chedam el ngara babeluades a olengit er kid a mo meruul aikel ngar bab el sebeched er a bek el sils.” Rodam me a Rodos, moruul aikel sebechem el meruul er a bek el sils, e a uchei bo modengei, e ke mo melechesuar el kmo a demam el ngara babeluades a medengelkau e betik a rengul er kau. E sel bomodengei el kmo—meral medengelii—a klemerang er kau a morngii a meral moktek e klou a belkul e ke mo mui er a deurreng me a budech.
Uaia dichel a beluulechad, a Osobel a dilung, “ngikel loumerang er ngak a diak el kirel ngara ilekolk.”
“Jesus Kristo a ngakl el ngii a chedam a ngilu el mesang, e diak a tara ngakl lebesebang el [kid] sebechel suobel;
“A uchul, rokui el sechal [ me a redil] a kirel el nguu a ngklelel ngii a bilskii a Chedam.”
A chedaol lechukl a olsisechakl er kid el kmo a diablong a soal lomekrael er a rechad el mo er a ilekolk. Sel blak el reng er ngii a mo omuket er a lomes me a klemerang er a Jesus Kristo me a ebangekelio er ngii. Lehi a olsisechakl er a rengelkel, a diablong “osiik me a rokui el chad a lecheuarm el di uaingii.” Alsekum a demad el ngara babeluades el “ureor me a …klebakll” a “mo nguu a diak el mad e diak a ulebengelel a klengar [sechal am redil],” “urelel” a Lucifer a mo nguu tia el ringel me a klengit el reng er a renglkel a Dios. Klengit me a omtok er a dichel a Kristo er a klengar kid. Seikid a uchul a mo ochoti a chelsel a dichel a Kristo, el ngii a nguu a budech, deurreng.
Tial mla mo merek el teruich me a eai el buil, a Rubak a mla omekellomes er a profet me a Apostol el mo meruul a betok el lungil mengodech. Eng di, ak bekikl el kmo a chedaol el moktek er aikal mongodech a mol remiid er a chelsel tial klemeririar el kirel mongodech er tir.
Joseph F. Smith a dilung: “A klemerang, klikiid, beot el evangelio er a Jesus Kristo a mla moliut. Kid a ngar ngii a ngercheled el melemolem er ngii er tial beluulechad.” Ng dilechelii el kmo tial klemerang, klikiid, me a beot el ebangkelio er a “osebelii el olsisechakl er Kristo.”
Ngar er a tebechelel a klemerang, profeta Joseph Smith a ulsisechakl el kmo “ngokiu a tngakireng er Kristo, rokui el chad a mo suobel, ngokiu a bekongesenges er a llach me a chedaol ruoll er a ebangkelio.”
Sel kot el osisechakl er a ebangkelio er klaumerang er Rubak el Jesus Kristo, ouchel reng, sengk er a Chedaol Reng, e outekangel el mo er a ulebengelel. A rodam Hyrum a ulsisechakl: “Momelekl el [e omelekl] olsisechakl er tir: ke mo metik el kmo sel sils mea sils a beches el uldasou e dechelel a lomes a mo chemolt er kau. Ng sebechem mo meruul el mor ngii … mo medengtelirir el bleketakl. E kau a mo sebechem el rulii tiang el mo bleketakel lokiu tir[kau] olsisechakl.”
Sel kot lungil rael el kid a mes er a chedaol moketek er a Ikelesia a mo kiei er a klemerang, klikiid, me a beot el osisechklel a Kristo e dirrekl el mo remuul a Iker tebelong el llechul a Osobel: “Kau a mo oubetik a rengum er a Rubak longa rengum. … “Moubeltik el reng el mo er a tonari el di uaikau.”
A bekongesenges el mo er aikel teblong el llach a ochoti a rael el mo er a teletael el mo dubech er a budech me a deurreng. Sel dou beltik el reng e mesiou er a Rubak e mesiou er a tonari, e ke de melcheusar a deurreng el ngii a mer kid er a ungil rael.
Oubeltik el reng er a Dios e oubeltik el reng Er a tonari er chetemel a osisechakl; blai-ruol, Ikelesia-omesiou er a omesuub; Chedaol sils- sils er a chedaol omengull; me a ureor er a osobel a mo er a tebelong el tkul a dekedek me a chelechad. Rokui el tekoi a tekoi a ultiur er a chedaol llach el mo betik el reng er a Dios me a mo oubeltik el reng er a tonari. Ng ngar ngii a di beot, ulechel, e muut el beot ser tiang?
Kiei er a klemerang, klikiid, ng beot el uldasou er a ebangkelio a meskid a taem el mo oldingel er a remesobil, diak a chad er a blil, sabisi, smecher, me a chebuul. Kid a mo metik a budech, deurreng, me a deurreng er a klengar kid sel dosiou er a Rubak me a tonari er kid.
Tial mongodech el chedaol-sils a ochoti sel klou a ututelel er a blai-ruaol, Ikelesia- mesiou er omsubel a ebangkelio e omesuub a techal el mo omekbeches er a redeleb ma blak el reng er a Dios er a chelsel a kboub er a blid. Ngera sel mo sebechel a lmuut el kantang, beot, e klou el klaumedengei? Rodos me a rodam , ng sebechem el mesang tial omesuub me a olsisechakl er a ebangkelio er a telungalek er kid a klou el rael el mo metik er deurreng me a deurreng er a klengar kid?
Mesaod er a chedaol sils, a Osobel a dilu, “Me tiang a sils el mla metukt el kirem el mo ulengul er a ureliu, e mo harau a blak el reng el mo er a ngkel ngarbab.” Ng dilcheli, “kau a mo mui er a deurreng … [eng di] moldeu e moluluch … kau [kirem] a meruul aikang loba omereng el saol, lobengkel a deurreng me a mesiou … [e] obang a ungil reng e oieng el mesiou.”
Momes er sel tekoi el ngii a ocholt: ,{deurreng, ngara deureng, omereng el saol, klemeriar el reng, saol reng, e klemeriar el mesiou. Denguu e ngak tial omengull el chedaol-sils a kirel nguu a klikm el mera medad.
Sel dolsisechakl el ngarbab e chedaol omeruul, kulengit em momdasou el kmo ngerang sel ngii a teletael sel de ounged er rebek el chad el mei er a ongdibel er a Ikelesia, tokubets er tirkel beches el chad er a ikelesia me a oldingel. Kid el rokui el kired el soad el mengitakl a hymns e kerkikl lorrenges aikel tekoi er a nglunguch er a sakrament loba blok el reng me a uldasou.
Olchotel a klemerang er a chelsel a olsengerenger me a ongdibel er a olchotel a klaumerang a lomekrael er ngii er a rechedal a bishopric, el tir a omerk er a kedeb el klaumerang el omtab er a uldasou er deurreng me a klemerang, klikiid, me a beot el ebangkelio er a Kristo. Rokui a kiruu el oltirakl er a okesiu. Ng kired el mo lotkii el kmo ngar ngii a rebebil er a ungil basio el louchais a cheldecheduch mecha lechub e omerk er a omeruul. Sel dolemolem er klaumerang er kid el beot e omtab er a enangkelio er Kristo, ngii a mo meskiid a omekbeches er a chedaol sel domerk er a klaumerang er kid el mo er a tang.
Ungil osisechakl a ungil mues lokiu a mlotab el lens er a betik er a rengul Dios me a betik e rengul er a tonari. Beot el mildung, kid a olsisechakl leng betik a rengud er a demad el ngara babeluades me a renglkel. Sel sekkak er kid el olsisechakl a mo ungil besul sel dolemolem er beot el osisechakl. Sel deurreng el mengai er a beot el tekoi er a klengar, meng kired el mo kerekikl el diak de bo domdasou el knobs betok a kirel modechel el mo er a ngi dil mongodech el kid a ngmai el mo omkedechor er a klaumerang me mesisich el lolchotel a klaumerang er a rengrir a rengelkel a Dios.
Me lak doruul a tekoi el mo meringel sel dolechel a ongdibel, seketechul, malechub eng usbechal. Mrellii el di beot. Ng ngar sel beot el ngii e ke mo metik a budech, deurreng, me a deurreng el ngak a mesoaud er ngii.
Aikal rak er a uchul a oungerangel er a Ikelesia, di ua lechukl er a handbook 2, a ulechotel aikel bleketakl e beot, el mlar ngii ak melekoi:
“A remeredel a melisiich er a bek el chad er a ikelesia el mo mongmai aikel rokui el kirel a ruoll er a priesthood, molemolem aikel kengei, e monguu a techall er a mo suobel me a diak a ulebengelel klengar. …
“ Meklou el chad: Oldubech er a bek el melkou el chad el mo klikiid el mo nguu a ruoll er a templo. Osisechakl er a rokui el meklou el chad el mo olecholt er a rebladek me a mo meruul a ruoll er a templo el kirir.
“Ngeasek: Molengeseu er a bek el ngeasek el sechal el mo nguu a Melchizedek Priesthood, mo nguu a ruoll er a templo, e mo klikiid el mo mesiou er a mui el mission. Molngeseu er a rebek el ngeasek el redil el mo klikiid el mo meruul e olab chedaol el kengei e nguu a ruoll er a templo. Melisiich er a rengeasek a klou a belkul lokiu a kaumusing.
“ Rokui el chad er a Ikelesia: Molengesu er a priesthood me a remeredel, chelechad er a ward, ward me a mui el missionari, me a rechad er a ikelesia a oureor el mo remuul a tekoi er a mo osiik er a derstang, melisiich er a telungalek me a Ikelesia, melisiich er a omeruul er a priesthood, e mengengdibel er a Ikelesia lokiu a obult, melemolem, me a melisiich. Olsisechakl er a rechad er a ikelesia el mo di tir el mesiou er tir e mo olengeseu er a remechebuul me a ousbech er a rolel a Rubak.”
A omesiou er ngak er a Ikelesia a mla omeklengengeltengat er ngak lolab a betok el ungil e tokubets el chedaol el omeruul. Ak sioning el kmo a Rubak a omekrael er a Ikelesia er ngii el mo meruul er a moktek er ngii. Ak mla ngmai aikal ngarbab el chedaol el omekrael el sebechek el remuul. A dengu er ngak a deurreng er a kiei er a ebangkelio er a blengelel a klemerang, klikiid, me a beot el osisechakl me a ebangkelio er a Jesus Kristo.
Ak mla mesiou el ngara cheungel a keys me a omekrael er a elolem, profet me a president er a Ikelesia, mlara Spencer W. Kimball el mo er aRussell M. Nelson. Ak sioning el kmo a dersta er tir a mle e ngii a milngilt el profet er a Rubak. Te mla oksisechakl er kid er aikel klou a belkul el osisechakl er a Ikelesia me a ebangkelio me a osisecheklel a Kristo. A President Nelson a outekeu er a urelel a Rubak el mo kohei er a mechas a rengul el omeruul. Ak kmu “mechas a rengul” le ngii a di ngii el tang el Apostle el ngii a klou er ngak, e ngak a meringel er ngak el oltoir er ngii! Ak sioning el kmo a kiis er a preisrhood ma ngerachel er profet er a Dios a ngar ngii. A President Nelson a olsisechakl er a klemeranf, klikiid, me a beot el ebangkelio er a Jesus Kristo. Ak kuchais er a klaumerang er ngak el kmo a Jesus a Kristo e tiang a Ikelesia er ngii-el ngii a kuchais el loba ngariou el reng el ngara klel a Jesus Kristo, bol uaisei.